الغربه

[M_samii]

يا جماعه انا طالب في اعدادي عماره فنون جميله جامعة الاسكندريه و اتكتب عليا اني اتغرب عن اهلي لاني من القاهره كنت عاوز اعرف ازاي انتوا بتتغلبوا علي وحدة و قسوة الغربه لاني بصراحه مبقتش قادر استحمل اقعد بعيد عن اهلي ده بالاضافه للضغط الشديد عليا في الكليه من الدكاتره و المعيدين انا حاسس اني بنهار الصراحه و داخل في حالة اكتآب :(

[benmatar]

واحدة واحدة
طبعا وجودك في وسط أهلك وناسك له قيمة كبيرة
بس متوصلش الحالة النفسية للحد ده.... إزااااااااي؟؟؟
أي حد بيتعلم او بيشتغل وبيسافر اكيد بيحصل له نفس الاحساس بتاع حضرتك، منهم من بيتأقلم ومنهم بينهار وده عامل اساسي للفشل او النجاح
يعني إييييييه؟؟؟؟
يعني نجاحك وتفوقك مرتبط بالموضوع ده عشان كده متستسلمش بتاتا، وتبتدي تعمل تحليل للوضع اللي انت فيه، إزااااااااااااي؟؟؟
نبدأ بعمل حصر للنقاط الإيجابية والسلبية واكتر واحد يساعدك هو انت بنفسك، ولو تسمحلي اقولك كام نقطة ممكن تكون إيجابية وانت تحكم:
- الاسكندرية مدينة جميلة يتمنى الإقامة فيها الملايين، حضرتك مقيم فيها يبقى ده شيء ايجابي وتقدر تستفيد من طبيعة وجمال المدينة والبحر في مذاكرتك مثلا او الاسترخاء والاستجمام قدر المستطاع مع تشجيعك لصديق او قريب لزيارتك (المسافة بينها وبين القاهرة ساعتين)
- التواجد في عزلة عن الصديق والجار بتساعد على المذاكرة، يعني ممكن توصل للتفوق لوجود وقت وفير بدون حاجات تشغل.
- اكيد حاجات تانية انا مش شايفها حضرتك أعلم بيها
ومن ناحية تانية تقدر تحدد السلبيات وتحاول إما تعدلها او تتجنبها او متهتمش بيها.
دي مجرد خواطر حبيت انصح حضرتك فيها وتقبل مروري

[rotanamasoud]

بتحصل لناس كتير بسبب الكليات وانا منهم زمان
كان الوقت بتحس بالثانيه تقيله تقل ما بالك بالدقيقه والساعه يعنى الاسبوع ممكن يجيب معاك احساس 7 سنين
لاكن مع الوقت بتبدء الثوانى والدقائق والايام تمر المرور العادى لما تتاقلم ويبقالك شله واصحاب وتنزل بالليل وتفك وكله بيعدى انت كمان على ايامك لابات وموبايلات عاليه تضيع اى وقت انا كنت سنه 98 وكان اختراع المحمول لسه نازل اصلا

[eng.salama93]

بص يا هندسة .. أخوك من تانيه ميكانيكا هندسة شبرا
انا برغم ان بيتي بيبعد مسافه 15 كيلو عن الكلية بس كان نفسي اسكن ف السكن الجامعي او اي حته ابعد فيها عن أهلي شويه أريح دماغي :d

[saddam]

صديقي المواطن
كل حاجة في أولها صعب والظروف.تحكم.والنصيحة حاول تمشي كتير وتروح للبحر من حته نظيفة.عالكورنيش أنا مرة حكم عليا الزمن والظروف أقعد في شقتي في إسكندرية 9 شهور من.غير مشوف حد ولا حد يشوفني وعدت وراحت وحاول تعمل شوية هوايات مخصوصة ليك يعني أنا مثلا لما كنت بزهق أركب الطورماي من.أوله ﻵخره في محطة الرمل وأنزل أتمشى كام محطة.أو أروح عزبة.سعد وشارع صلاح الدين أشوف إيه آخر تطورات كماليات السيارات ﻷن دي هوايتي وشوفلك هواية.وتصدق لما تخلص دراستك وتتخرج حتقعد كل شوية تطلع حجة.عشان تنزل إسكندرية
ودمتم للنضال

[Mohab.Nabil]

متفكرش فى الموضوع كتير مع نفسك ، و متقعدش فى البيت كتير لوحدك برضه

و بعدين انت فى اسكندرية و اهلك فى القاهرة يعنى ممكن تزورهم كل شوية .. المسافة مش بعيدة خالص

[الاستاذ]

اسكندريه غربه دة انا افتكرت هتقولى السعودية ولا امريكا

[eng_volto]

يا هندسة حرام عليك انا من القاهره اخويا كان هندسه الاسكندرية اخد هناك اعدادي واهلى اتحيلو عليه يحول القاهره مكنش راضي وقضي هناك الخمس سنين عاش حياتة فيهم
انا بقي قضيت الكلية فى القاهره قضيت خمس سنين مرار طافح كنت بحقد عليه بصراحه
من الى كان بيحكية عن العيشة هناك
كفاية انك تتمشى على البحر بليل فى الشتاء
ياهندسة انت بس فى الاول شوية وهيبقي ليك صحابك وعيش انت وهما

[M.Osama]

يا راجل.. اسكندريه غربه !! دي اسكندريه متعه... انا نفس حالاتك برده بس متغرب عشان الشغل.. وبرجع بيتي خميس وجمعه.. الموضوع ف الاول صعب.. بس هتتأقلم اول ما يبقالك شله.. وتخرج وتروح وتيجي بعد الكليه.. وحتنسي الوحده والكلام الفارغ ده :).. صدقني انا كنت زيك كدا من 6 شهور

[waelfarid]

بيتوتي بيتوتي يعني
سبحان الله
اللي يشوف ظروف غيره تهون عليه ظروفه
يامهون كل عسير يارب

[Mohamed_Hamid]

ياراجل ده انا اول ما قرأت العنوان افتكرت انك متغرب فى دولة اجنبية مجهولة !!! :)
علشان بس اول مرة تبعد عن اهلك هتحس انها غربة.. اجمد كدة وكله هيبقى تمام ان شاء الله :)

[micromoud]

الصحبه بتهون كل شىء ...

[S O P H O S]

دي فرصة تقرب من ربنا اكتر
وساعتها ربنا هيقدرك تصبر