أعمل ايه في الإستهلاك العالي

[Khaled Lanos]

السلام عليكم

يا جماعة المشكلة كلها بدأت من ساعة ما ركبت تكيفين قبل رمضان السنة دي لأننا كنا بنفطس الظهر..المهم انا جيبت يونيون آير ومحطوطين في غرف محكمة الغلق وبتأكد ان الكباس بيفصل وأصلا انا ظابطهم على 25 عشان يوفرو في الكهربا..المهم من يومها والكهربا مبتجيش غير بالـ 400 جنيه والـ 500 جنيه في الشهر!!

احنا اصلا مش بنشغل التكيفات غير ساعة الظهر او الحر عموما اللي بيبقى في فترة الصبح..لكن بالليل الجو بيبقى برد بما اننا في الشيخ زايد عشان كدا مش بنشغلهم بالليل.

كل دا كوم بقى والشهر اللي فات كوم تاني..فاتورة الكهربا كانت الصدمة الشهر اللي فات 980 جنيه

ليه ياعم؟ أصل عليك شهرين..قولت لو مش ذنبي انك مبتعديش وخدت الوصل وقولت له مش دافع..المهم قعدت يومين افكر قولت خلاص هنزل الشركة وأمري لله هدفع بدل ما يقطعو النور مش ناقصة كافية هو بيقطع لوحده..ويعلم ربنا الشهر دا كان صعب جدا لأن المرتب راح كله على فاتروة الكهربا بس

المهم الشهر اللي فات بقى حلفت منا مشغل التكيفات خاالص لو هموت اما نشوف اخرتها مع الكهربا..وفعلا من الشهر اللي فات للشهر دا مفتركش اننا شغلت التكيف مرتين او 3 على بعض..الجو أصلا بدأ يبرد مع المراوح الدنيا كانت لذيذة الشهر دا الحمد لله..امبارح بقى جات جيه محصل الكهربا ونا بقى فرحان عشان الشهر دا وفرت في الإستهلاك على قد ما أقدر وقولت هتيجي زي زمان 120 جنيه ولا حاجة ههههه..وكانت المفجأة بقى انها جت 380
قومت حالف 100 يمين اني مش هدفع المرة دي لحد ما اشوف آخرها مع الحرامية دول..
راح المحصل قالي ماتشوف لنا فلوس يابيه عشان النهارده اول الشهر..قولت لنا وانت مالك اول الشهر ولا آخر الشهر هو انت بتاخد راتبك مني هات الوصل واتكل عالله.

دلوقتي يا جماعة انا مش عارف أعمل ايه..في حاجة غلط أكيد..ايه هي مش عارف..انا حاسس اننا بتسرق..بس المرة اللي فاتت لما خدت الوصل أبو 980 جنيه مديتش الفلوس للمحصل قولت احتمال يكون مزور ولا حاجة لأن الفواتير مش مختومة..فروحت الشركة نفسها اتأكدت من الفاتروة قالي مظبوطة 980 جنيه :(

والعداد عندي بتاع زمان مش الإكتروني..كانو عايزين يركبولي الإلكتروني بلطجة بس على مين عملتلهم مجنون ههههه

واللي هيشلني بجد..صحابي ساكنين معايا في نفس المدينة بس الأحياء مختلفة..اللي عندو 3 مكيفات وانا شوفت بعيني مش بيطفو في اليوم..والفاتروة تجيلو 70 و 80 جنيه!! طب ازاااااااي ياعالم

معلش طولت عليكم بس بقت حاجة زيادة عن حدها بصراحة مرتب الشهر بيروح على فاتروة الكهربا والغاز والمية والتيليفون والـ dsl كله في يوم واحد كدا كتييير

[hazemhany]

طيب حضرتك ممكن تتأكد من قرايات العداد الموجودة في الفاتورة وتقارنها ببعضها وتقارنها بالقراية الحالية اللي في العداد نفسه ...يعني تشوف ام 980 دي كانت قراية سابقة كام وحالية كام ..وام 380 نفس الكلام وتشوفها هل فعلا القرايات دي متوافقة مع قرايته الحالية اللي قدام عنيك ولا الراجل بيألف قرايات من عنده ...ياريت كمان تقولنا قدرة التكييفات دي قد ايه

[أبو آسر]

دي مشكلة عامة في مصر دلوقتي الحكومة قاصدها عشان تلم فلوس من الشعب وأنا زيك عندي 3 تكييفات واحد بس هو اللي بيشتغل علطول والتاني نادرا لما بيشتغل وواحد تالت في الريسبشن أندر النادر لما بيشتغل ! وفاتورة شهر 9 جاتلي 600 جنيه ! مع إن الشهر اللي قبله علطول كانت 200 وده كتير برده لكن 600 دي كارثة محصلتش في التاريخ ومدفعتش برده لحد دلوقتي ومش عارف هيعملوا إيه بس أنا منفض ومسلم أمري لله

[Mohamed_Hamid]

هات حد من الشبكة يبص على العداد ليكون مخرف ولا حاجة علشان الكلام ده مش طبيعى ابدا !!!

[amrelsha3er]

قدم شكوى وهات حد يعاين العداد بتاعك ده وبعد ماتاخد فعلا قراه العداد عن شهر 10 مثلا وتشوف الوصل اللى جاى القراءه اللى فيه قريبه من القرايه اللى فاتت ولا لا!؟ عشان تعرف فعل بيحطو كيلوات ازاى على مزاجهم ولا فعلا على العداد
ربما معاك بس الامر مش طبيع متسكتش

[samozaen91]

يا باشا كده ممكن تكون فى مشكله فى العداد نفسه ممكن تجيب بقى عداد تانى من الشركه يركبوه و تريج دماغك
لو حاسس ان ده مش استهلاكك غير العداد كانت نفس المشكله و غيرناه من زمن هات الجديد مش فاكر كان مركته فولتو ولا ايه

[aldesha989]

العداد طبعآ بيخرف وهما حراميه اصلآ ماحدش بيعرف يأخد لا حق ولا باطل

[amr011111]

كمان فيه حاجه مينفعش يجيبلك شهرين على بعض وساعتها هتدخل فى شرايح عاليه المفروض الشهر اللى جالك فيه 980 جنيه
يكون متقسم على شهرين علشان اول 100 كيلو سعرهم غير تانى 100 كيلو وهكذا

[S O P H O S]

في حاجة غلط عندك
وكده بتدخل فشريحة سعرية جديدة
حاول تفضل ورا الموضوع لحد ما تعرف الغلط عند مين

[MuhamedNabil]

الموضوع ده غالبا حصل فى مصر كلها, قريات شهر يوليو كانت تقديرية و اتقدرت بنصف الاستهلاك الحقيقى و طبعا الفرق سمع على الفواتير البعدها

يعن انا فى الصيف فاتورتى غالبا من 130 - 200 على حسب استعمال الكييف, شهر سبعة جاتلى فاتورة ب 30 جم !!!!!! و هو ده الحلانى اتحركت لانى عمرى في حياتى مجتلى فاتورة 30 جم لاصيف و لا شتاء و بصيت فى العداد سعتها لقيت الاستهلاك الحالى 1000 وات

شهر 9 جابولى شهرين على بعض و دفعته و امرى لله بس خلى بالك بقى من حاجتين الاولى انك متدفعش شهرين على بعض غير لما تتأكد انهم قسموا الفاتورة على شهرين بمعنى انهم لو حسبوا استهلاك الكهرباء 1000 وات على شهر تكسر 800 جم و لو قسموا 1000 على الشهرين تدفع اجمالى فى حدود 680 جم

الحاجة التانية انهم بيجبولاك فاتورة ممكن تتعدى استهلاك الشهرين , 10 اسابيع مثلا يعنى شهرين و نص او اكتر
طبعا انت كده بيتنصب عليك و ده برده حصل معايا لانهم اذا مجاش معاد قرايات الشهر التالت بيحسبلك الاستهلاك على شهرين حتى لو بينك و بين الشهر التالت ايام
طبعا الشريحة بتعلى و انت بتدفع
هما بياخدوا القرايات يوم 5 فى الشهر فخلى بالك من الموضوع ده. و فى الاخر الراجل فى مكتب الكهرباء قالى تبقى جيب انت القرايات

[hugan]

اطلب الكشف علي العداد

[Ahmed_selmy]

شوف القراءة اللى فى الوصل واللى فى العداد......لو زى بعض يبقى ممكن يكون دا استهلاكك او ان العداد فى مشكله
عموما حضرتك شوف استهلاكك قد ايه يعنى لو عندك سخان كهرباء بيستهلك و لو فيه فرن كهرباء بردوا بستهلك...الاستهلاك مش تكييف بس

[hugan]

الحراميه الموضوع طلع كبير
النهارده الفاتوره جايه 450
مش عارف ليه
والتكييف مش شغال من نصف شهر 9
واضح انهم ضربوا الفواتير كلها في العالي
بكره اروح الشركه واعرف ايه الموضوع

[Khaled Lanos]

السلام عليكم
أول حاجة
أنا آسف يا جماعة الموضوع بعد ما عملته كان عندي مشكلة مش عارف في الجهاز ولا في النت فمكنتش بشوفه خااالص فمن ساعتها مكسل موضوع تاني..لحد ما دخلت بالصدفة في مواضيعي ولقيته هههههه
تاني حاجة
الفاتورة الشهر دا جات حاجة وتسعين جنيه بعد ما الفواتير القديمة قطمت ظهرنا.
تالت حاجة
والدي للأسف راح دفع الفاتورة ام 340 جنيه آخر واحدة كنت قايلكو عليها..انا مكونتش ناوي أدفع غير لما أشوف حل للموضوع دا بس والدي بقى الله يسامحه :)
رابع حاجة
العداد عندي بكر عادي مش الكتروني خالص بس بحس انو بيجري جامد :(
خامس حاجة
انا أعرف ناس مبيدفعوش كهربا من بعد الثورة والنور مش بيقطع عندهم خالص..أنا الصراحة نفسي أعمل كدا لان الحكومة بيسرقونا حاليا عشان مفيش فلوس..بس خايف مدفعش ويجي يوم كل دا يكون متراكم علينا ونلاقي فاتورة بـ 4 تلاف ولا حاجة :)
سادس حاجة
ياريت تقولوي اعمل ايه أنا حاسس ان المحصل بيسرقنا..أتأكد ازاي من الفواتير دي انها مش مضروبة..من النت مثلا ولا أنزل للشركة كل شهر ولا ايه.
سابع حاجة
عايز أتأكد من العداد بردو انو مش بيخرف اعمل ايه.
وربنا يعوض علينا في الفلوس اللي ادفعت دي وحسبي الله ونعم الوكيل.
شكرا يارجالة.

[Khaled Lanos]

شوف القراءة اللى فى الوصل واللى فى العداد......لو زى بعض يبقى ممكن يكون دا استهلاكك او ان العداد فى مشكله
عموما حضرتك شوف استهلاكك قد ايه يعنى لو عندك سخان كهرباء بيستهلك و لو فيه فرن كهرباء بردوا بستهلك...الاستهلاك مش تكييف بس

ازيك يا أحمد باشا
أنا معنديش سخانات كهربا ولا بوتجاز كهربا..كله غاز طبيعي.
مش فاهم يعني لما المحصل يديني الفاتروة مثلا اطلع ابص على الأرقام اللي في العداد وفي الفاتورة واقارنهم ببعض؟
طب مهو أكيد هيكون فيه اختلاف.