اخد معايا اية وانا رايح الجيش؟؟؟

[bido600]

السؤال يطرح نفسة
لمن لدية الخبرة
اخد اية معايا وانا رايح الجيش
او بمعني اصح اية اللي المفروض اجيبة وادخل بية في مركز التدريب؟

وتاني استفسار هل لو انا بمارس رياضة ما ينفع اكملها وانا جوة ولا غير مسموح مجرد خدمتي فقط لا غير
ونشكر معاليكم مسبقا

[Elawany13]

خد معاك بعض المأكولات اللى عمرها طويل ومش بتبوظ بسرعه
زى بعض المعلبات تونه مثلا - جبنه مثلثات - عسل ابيض - بقسماط أو قراقيش

مش هتحتاج تمارس رياضة زيادة
كفايه عليك التدريب
ما هتصدق تلاقى دقيقه راحه علشان تترمى على السرير وتنام شوية

ربنا معاك

[saddam]

صديقي المواطن
بالتوفيق خدت أو مخدتش مفيش فايدة ﻷنك مهما خدت حتظطر تعزم على زمايلك وملحوظة
إوعاك تقول إنك بتجيد حرفة أو صنعة أو تعرف تصلح عربيات كل دي حتخليهم يمسكوك عهدة وكل عربيات الجيش المصري واﻹسرائيلي كمان حيخلوك تصلحها لوحدك وبالتوفيق الجيش للرجال ومن لم يخدم بالجيش حيخسر كتير في حياته أنا عن نفسي إبني لو جاله إعفا حروح أعمل واسطة وأدفع فلوس عشان يخدم التعليم في الصغر كالنقش عالحجر
ودمتم.للنضال

[eng wael]

الاخ الفاضل
انت مش المفروض تاخد معاك ايه انت المفروض تسيب ايه وانت رايح
سيب الرفاهيه والاكله النظيفه والراحه سريرك اللى بتنام عليه وحمامك اللى متعود عليه لانك هتلاقيهم هناك بشكل تانى هيكون صدمه فى الاول بس مع الوقت هتتعود عليهم
اعتقد ان معظم الوحدات ومراكز التدريب فيها كانتين كويس يعنى فى الاول لو معجبكش الاكل هتشترى من برة لحد ما تاخد عليه
هتشوف فول عمرك ماشفته فى حياتك ولا العدس اوعى وشك
وهتلاقى سرير بيتحرك لو حده من الكائنات اللى عايشه فيه ههههههههه
اهم حاجه خلى نفسك حلوة وانت داخل الحمام واتعود عليه بسرعه
انا شايف انك تاخد معاك ادويه للاسهال والامساك
ملايه سرير وكيس مخده وكيس اريال خد كذا غيار داخلى _ خيط وابرة _ زجاجه ميه بلاستيك كبيرة او زمزميه _ شبشب بلاستيك _ بيجامه _ متاخدش معاك حاجات يبان انها غاليه علشان ماتتسرقش منك_ هتحتاج مبيد حشرى بس ممكن يكون بيتباع هناك
دة اللى انا فاكرة دلوقت
ونصيحه من اجمل ايام حياتك اللى هتعيشها فترة الجيش رغم مافيها من متاعب
وربنا يوفقك وتعدى على خير

[r0xer]

your memories, your loyalty for this land.

[janagabr]

بس خد فترة الجيش اكنها فترة لبناء جسدك ولياقتك من ناحية التدريبات والجري ومن ناحية تانية بناء قوتك المعنوية وبناء الارادة والعزيمة قد يكون كلام كبير او مجعلس بس هبسطهولك في ناس كتير بتخش الخير وتلاقيه قرفان من نفسه ويخرج من الجيش تلاقيه متعلمش حاجة سيبك من الناس ده وهتلاقيها كتير دول بعيد عنك الناس الفشلة اللي تدوس عليها برجلك انما انت يا معلم هقولك اكنر حاجة تتعلمها هي الصبر وقوة التحمل والتكييف مع الاوضاع المختلفة وتحمل درجات حرارة الجو المختلفة بمعني وانت واقف في الطابور بيسيبوك بالساعات في الشمس خليك واقف ثابت من حديد شادد نفسك المعنوية لما يدخلوك ضاحية او جري او تكدير اعملها بذمة هتلاقي نفسك بقي نفسك طويل وبقيت عصب شديد وجسمك هيبتدي يتقسم زي بتوع الكيك بوكس مش العيال البلالين بتوع الجيم بتوع اليومين دول هتقولي طاب استفيد ايه بعد كده في حياتي العملية اقولك اول حاجة انت في الجيش تعاملت مع جميع الشخصيات اللي هتقابلها في حياتك وعرفت تصنف الناس من كويس ووحش وعرفت كل حركات الخزوقة اللي ممكن تقابلها وبالتالي لما تخرج في شغلك هتلاقي نفسك بقيت ذكي ومفيش حد يعرف يقرطسك ولا يضحك عليك ومن بعيد كده لما تشوف واحد هتقول عليه الواد ده كويس او وحش وهتتعلم لهجات الناس وهتتعلم ازاي تعيش وتحوش من اقل كمية من الفلوس وتكتسب مناعة صحية من معظم الامراض وخاصة عمر ما بطنك هتوجعك بعد كدة صحيح انت هتتعب بس هتتعلم بعد كده وتذكر ان مفيش حد بيتفوق في الثانوية او الجامعة الا بالتعب من خلال المذاكرة ليل نهار وكبت اهواءة وتفضيل المذاكرة علي كل شئ هو تعب اه بس هيشوف نجاحة اخر السنة وهيرحة بقيت عمره ومفيش حد بيغتني الا لما يتعب ويشتغل صبح وبالليل هو تعب بس اغتني بعد كده واستريح عقلك في راسك تعرف خلاصك وتذكر مفيش اكتر من الفشلة والحمير والخرفان في هذة البلد فهل يا تري ليك رأي مختلف وهتثبت نفسك وتتفوق ولما هتنضم للقطيع وتزودهم واحد انت اللي هتقولنا والكلام مش موجه لشخصك ( يعني لا اقصد انت في الكلام ) بل هو لكل فرد لكي يحدد مستقبله

[م/مصطفى محمود]

ممنوع اى نوع من انواع المأكولات تدخل ، حتى لو كانت زيارة (ممكن يكون ملوث وانت فى عهدة الجيش) فمتحاولش

خد معاك 2 فرش جزمة + خيط وأبرة + شرابات زيتي من الشيشينجي (علشان تبدل براحتك وريحة الرجل وكده) + بدرة رجل ، مزيل عرق بلية مش اسبراي + ملابس داخلية+ 3 قفل نضيف (بلاش الصيني علشان كل المفاتيح بتفتح كل الاقفال وده عن تجربة) + قلم وورقه (وتكتب بالقلم على المخلة أسمك وعلى البطاطين علشان متتسرقش) + مناديل وايبس + صابونة + ديتول سائل وبخاخة علشان البق + معلقة (يفضل تجيب كيس معالق بلاستك ولما تاكل ترميها علشان متفضلش تغسلها ) + مناديل + مرهم كيناكومب لو بيجيلك تسلخات + ميدالية كشاف صغيرة (النور بيطفي بعد 10 فلو حبيت تعمل حاجه او تجيب حاجه ) + طبعا مكن حلاقة ومعجون حلاقة

الشنطة واللبس الملكي هتخليهم فى الدولاب بتاعك وتسلمهم لأهلك فى أول زيارة

وبخصوص الرياضة فطابور اللياقة هيظبطك متقلقش (فترة مركز التدريب)

[S O P H O S]

متنساش المصحف وربنا يوفقك ان شاء الله

[tameraast]

اه فكرتنى بالجيش :))

الرجاله قالت المهم و عملت معاك الصح
متقلقش كلو بيعدى
الموضوع مقرف لاقصى درجه بس كلو بيعدى
انت سلاح ايه ؟
شد حيلك يا بطل

[eng wael]

اعتقد بعد كل الكلام ده الراجل هيعمل غياب هههههه
موفق ان شاء الله

[طارق _عبد السلام]

الرجاله استرسلوا وقاموا بالواجب فى المعلومات
نصيحه منى لانى كنت مُعلم تدريب
اثناء الجمع للطوابير حاول دايما ماتبقاش فى الصف الاول ولا فى الصف الاخير ولا فى الاجناب
خليك فى النص دايما باى طريقه بالذات فى مركز التدريب لان المربع الخارجى للجمع بيكون هو الضحيه دايما علشان الكل يخاف
يعنى مجرد تشكيل مفتوح الصف الاول ممكن زحف وضرب وممكن الصف الاخير يطلع طُلبه مطبخ او اشغال
والاجناب للطلتيش عادى
ايام وهتعدىها باى طريقه فتكييف عليها هتستريح ان شاء الله وانسى الملكيه وفى اقرب وقت ان شاء الله هتقول بصوت عالى زى القدامى والمقبلين على انهاء خدمه كلها شهر ياجيش ونقول على الجرايه عيش :)
فكرتنا بالذى مضى من 26 سنه

[elrasy]

اسود سنة فى حياتى,,, بس فعلا اتعملت منها كتير.

هات معلقة
ماكينة حلاقة و معجون
كريم مرطب
كيس مخدة
2 قفل صغير
ابرة و خيط
مناديل بكر
دوا للاسهال
كريم كدمات
بنادول

دة اللى فاكرة دلوقتى

[AHMED12345678]

مركز تدريب اية يا راجل
مركز التدريب يعتبر فندق بالنسبة للتشكيلات
كانت ايام
قابلت فى الجيش انتن البشر وقابلت اجدعهم
بس المنتنين كانوا اكتر
والحمدلله سنه وعدت بس بصراحة اتعلمت كتير واعتقد من غيرها يمكن مكنتش بقى الى بقيت علية دلوقتى
لان تقريبا شخصيتى اتغيرت خالص بعد ما خرجت من الجيش
بس دة طبعا بيعتمد على السلاح الى هتدخلة
يعنى الدفاع الشعبى او اجهزة القيادة مش جيش ولا يمكن يكونوا زى المدفعية او المشاة او المدرعات او المهندسين

[AHMED12345678]

وصحيح اهم حاجة الخيط والابرة لان الافرولات ما شاء الله عليها متخيطة حلو اوى
ههههههههههههههه
من خبرتى الحاجات الى تاخدها معاك
1- ابرة وخيط
2- ورنيش اسود وفرشة جزم علشان تلمع البيادة
3- دواء للبرد والاسهال والصداع ويستحسن يكون من الانواع المعروفة زى الكيتوفان والانتينال او الانتوسيد وتسيب الدواء فى علبة علشان يكون معروف
4- قفلين كويسين من الحجم الوسط واحد للمخلة وواحد دولابك
5- صبانه بلاستيك للصابونه وهات صابونه لغاية ما الجيش ما يسلمك الصابون
6- راديو صغير بس ميكونش غالى مع هيدفون مش غالى مع حجارة قلم
7- قلم ازرق ونوته صغيرة
7- لزق للجروح
8- معجون حلاقة ومكن حلاقة
9- ملعقة
10- كشاف صغير
11 - باكيته مناديل جيب
12- بودرة للرجل لو كانت راجلك من النوع الى بيطلع روائح كريهة
مفيش داعى للشبشب علشان هيكون حاجة ملكى وكمان الجيش بيسلمك شبشب
ومفيش داعى للفوط وملاية السرير واكياس المخدات علشان بردة ملكى وممنوعه والجيش ببردة بيسلمهالك
والجيش بيسلمك صابون للوش وصابون لغسيل الهدوم وعلى فكرة صابون غسيل الهدوم احسن كتير من الاريال وبينضف عالطول
حاول تاخد غيارات داخلية ملكى علشان بتاعة الجيش معفنه

[bido600]

انا مش عارف اشكركم ازاي يا رجالة والله
قمتو بالواجب وزيادة بكتير والله

انا داخل سلاح مشاه لسة بقي معرفش هتفرع لانهي فرع فيه :d وزي مسمعت من كل حتة عارف ان نهاري ازرق :d
الحمدلله علي كل حال وانا فرحان والله اني داخل الجيش لاني جريت علي حوار اني اخش الجيش دا من وانا في اعدادي لحد سنة 3 كلية فبنسبالي اني داخل الجيش دا فخر كبير والله ولقد فرغ صبري مستني اليوم اللي هسلم نفسي فيه
انا عارف اني هتصدم في حجات لما ادخل اشوفها بعنيا
وهقابل اشكال ميعلم بيها الا ربنا
وهقابل اللي هيتنطط عليا شوية
بس هذه هيا الحياه :d

انا جبت شوية حجات ( مكن حلاقة كتير - ورنيش وشكلة طلع بني :d - صابونة - جيل حلاقة - خيط وابرة )
زمازال التبضع مستمر