هى الساعات اللى على jumia ساعات original ولا ؟؟؟

[iwantes350]

السلام عليكم ورحمة الله وبركاته
انا ان شاء الله ناوى اجيب ساعة فى حدود 500 الى 600 بالكتير اوى ولقيت حاجات كتير منها casio و citizen و حاجات تانى هل الساعات دى اوريجينال ولا هاى كوبي ولو فعلا مش مضمونة ايه احسن ماركة فى الساعات تكون فى الحدود دى و اوريجينال ؟؟؟ واى حد ليه تجربة فى العطور و الساعات من جوميا يقولى هل هى اورجينال ولا ؟؟؟

[iwantes350]

رائيكو ايه ؟؟

[A_H_M_A_D]

اعتقد ان الموقع ده بيتعامل مع الوكلاء الرسميين , عشان كده المفروض انها اصليه

[h_shahin]

انا جيبت منهم ساعة كاسيو ديجيتال كانت أوريجينال بالضمان و كتيب التشغيل

[mr.a]

كوبي يا باشا

[amrezzat82]

انا شوفت نظارات عندهم لقيتها سعرها قليل جدا و بره معدي الأف و نص . فبالتأكيد هي كوبي و لما سألتهم عملوا عبدو العبيط
عايز تريح دماغك شوف اي موديل يعجبك و أعمل سيرش عليه شوفوه بكام اصلي بره مصر و لو فى توكيل أسأل عليه بكام
مع أنى مع مبدأ محدش بقى بيعمل عروض حقيقية

[tmz9111]

الساعات اللى هلى جوميا كلها اصليه وبالضمان

[iwantes350]

متشكر يا جماعة
انا دلوقتى احترت اكتر

[khaloooda]

هو انا مشترتش حاجة منه قبل كده
بس عجبتني عليه ساعة
كانت بخمسمائة وشوية فكة
بعمل عليها سيرش علي امازون لقيتها بحوالي 350 دولار
يعني حوالي 2500 جنيه

[h_shahin]

اللى أعرفه إن موقع جوميا و موقع نفسك ما بيتعاملوش إلا فى المنتجات الأصلية
لكن
طالما شاكك و مش مرتاح إنزل السوق و إشترى من محل ثقة أحسن لك

[mr.a]

الساعات اللى هلى جوميا كلها اصليه وبالضمان

حضرتك الضمان مش فيصل الكوبي بيتياع بضمان
لصاحب الموضوع
احسن حاجه فعلا تعرف part numberوتعمل سيرش عليه
وحضرتك 600 صعب تجيبلك ساعه براند مش بتتخدش ولا تتجرح ومفيش عقرب يقع ولا دهانها يقشر صعب لأن انا جربت orient
ولأن 99%من السوق كوبي بنصحك تجيبها من توكيلها او موزعها لأن انت عارف البايعين ضميرهم صحته بخير شويتينيعني انا اتلقيت نفس الساعه بفرق سعر 200 جندي فلازم تلف وتشوف
فمن الآخر الساعه ب 600 زي 150 فشوفلك حاجه كده ديزين حلو واشتريها

[Ahmed_Adham]

جوميا فيه أصلي وفيه كوبي بس مستحيل تلاقيه بيبع الكوبي بسعر الاصلي. الفيصل في الاخر هوه السعر.

[M.ABDOU]

انا من رأيى فى الساعات لاما تشترى حاجه اوريجينال من التوكيل ودى مش حتقل عن 1000 جنيه او اكتر او تشترى اى ساعه ديزاين حلو وخلاص وانسى بقى موضوع الهاى كوبى ده

فلوس على الفاضى لاما اوريجينال لاما اى ساعه ديزاين حلو وفرق الفلوس ليك

[Y a r i s]

كلامكم ده لخبطني انا شخصياً
يعني انا عجبتني برضو ساعه كاسيو بس اقل بكتير من الارقام الي بتتكلموا فيها انتوا ، يعني انا قلت ليه اشتري ساعه غالية. اصبر شوية مش يمكن اتثبت تاني :) .. المهم عجبتني ساعه كاسيو ب ٣٦٦ جنية فقط



يعني معقولة ساعة زي دي متكنش اصلي ... !!!
اصل مفهاش حاجة. تستاهل انها تكون غالية ساعه سيمبل خالص وكلاسيك وهو ده كل احتياجي في الساعه مش محتاج حاجة تحت المية و ٢٠٠ متر تحت سطح المية والكلام ده !!
فهل دي اصلي ولا تقليد ... والي مخوفني اني اشتري من الموقع بتاع نفسك ده ان بعد ما اطلبها لحد باب البيت تطلع الكتينا ولا المينا بتاعت الساعه صغيرة والعقارب منمنمه مشوفش منها حاجة ساعتها هيبقى عيب ارجعها ... بعد مالراجل جبهالي كتر خيروا لغايت عندي !
فحتت شكل الساعه على ايد الواحد بتفرق غير لمن تكون من على موقع ولا ايه :) ... وتحياتي

[iwantes350]

متشكر ليكم يا شباب على التفاعل اوحد صاحبي جايب سواتش اصلية من الوكيل بتعاها ب 600 جنيه وكانت موديل 2010 ؟؟؟
وانا رحت عرفة جروب لقيت ساعة سواتش ب 750 جنيه وكانت اصلية .. ايه رائيكم ؟؟
استاذ yaris منور الموضوع المشكلة فعلا زى ما حضرتك قلت ممكن فعلا لما توصل تكون صغيرة او حجمها مش كبير زى الصور ..
وشكرا تانى على الردود