مشكلة مع توشيبا العربي

[Shiref_mohamed]

السلام عليكم جميعاً اعضاء المنتدي الكرام
انا حصلى مشكله مع توشيبا العربي ومش عارف اعمل فيها ايه فقررت اني اكتب المشكله هنا وانا على يقين ان الناس هنا مش هتتأخر عليا في النصيحه ..
الى حصل اني يوم الاثنين 21/10/2013 اشتريت سخان توشيبا 55 لتر من توكيل توشيبا في طلعت حرب وقالولى هناك اتصل بـ 19319 اعمل اوردر تركيب عشان يجو يركبو السخان ويختمولك الضمان ( 10 سنوات) ..
المهم في نفس اليوم عملت البلاغ وقالولى ان التركيب بـ 50 جنيه و هيتم في خلال 5 ايام ابتداء من غداً تمام .. تمام (مع العلم انى اعرف اركبه لوحدى في 5 دقايق بس مضطر عشان اختم الضمان)
كان المفروض التركيب يتم يوم السبت الى فات 26/10 وطبعاً لغيت كل مشاويري اليوم ده وقاعد منتظر اتصال من البهوات عشان السخان يركب وطبعاً محصلش ..
يوم الاحد 27/10 اتصلت بيهم تاني قالولى اه فعلا التركيب كده اتاخر واحنا هنعملك شكوى في قسم الشكاوى وهيكلمك حد عشان يجي يركب في خلال 24 ساعه طبعاً تمالكت اعصابي وسكت وقلت ماشي بس مش اكتر من 24 ساعه عشان مواعيدي قالولى 24 ساعه فقط تمام .. تمام
عديت الأحد وانتظرت الأتنين بلا جدوى اتصلت التلاثاء عشان اسال ليه محدش جالى عملو فيها من بنها وازاي محدش جالك يافندم .. طيب احنا اسفين جداً والنهارده هيكلمك حد عشان يجى يركب ..........المره ده مقدرتش امسك اعصابى وقلت للي بيكلمنى انا عاوز اكلم مسئول عشان اشتكيله لقيته بيقولى هحولك بس هو هيقولك نفس الكلام قلتله ملكش فيه .. المهم حولنى لشخص تاني بقوله مين حضرتك قالى انا رئيس قسم الشكاوي .. حكيتله القصه كلها من البدايه وقلتله انا اشتريت السخان توشيبا ومرضتش اشترى اي براند تاني عشان عارف ان خدمات مابعد البيع عندكم ممتازة يقوم يحصل فيا كده .. المهم لقيته ماسك على نغمة واحده وهيا ان النهارده (الثلاثاء 29/10) هيكلمونى عشان يجو يركبوه انا طبعاً ماقتنعتش وقلتله انا عاوز اكلم المسئول عنكم عشان واضح انك معاهم لقيته بيقولى يبقى لازم حضرتك تروح الإدارة قلتله فين الإدارة راح مديني العنوان طلبت منه رقم تليفون قالى ملهمش رقم تليفون قلتله ازاي يعني قالى زي مابقولك وعلى العموم النهارده هيكلمو حضرتك عشان يجو يركبوه .. انا قفلت معاه وقلت اتصل بالدليل اجيب تليفونات العنوان لقيت فعلاً مش متسجل للعنوان اى ارقام تليفونات ..
ديه قصة الحاج سخان كلها وان حاليا متضايق جداً بسبب الوقت الى ضاع واعصابي الى اتحرقت وعاوز اعمل معاهم اى حاجه تزعلهم وفكرت في حلين قلت اعرضهم عليكم ..

الأول انى اخد السخان في شنطة العربية واروح الإدارة في العنوان الى اداهولى وارميهلهم على الباب وازعق واعملهم فضايح ..واطلب فلوسي واشترى اي نوع تاني ..

والتاني اني اسكان الفاتورة مع هيستورى الموضوع بالكامل وابعته ميل لجهاز حماية المستهلك...
محتاج اراءكم وتعليقاتكم ولو حد عنده افكار تانيه ياريت يساعدنى .. وشكراًً

[amr011111]

توشيبا العربى مبقتش زى الاول ولا حتى فى جودة المنتجات
كان عندنا مروحه توشيبا القديمه حمارة شغل
انما دلوقتى توشيبا الجديده اخرها سنتين ولا تلاته وتلاقى المروحه مش بتلف وبتبقى محتاج تغير ليها طقم تروس
ابعت لهم ايميل شكوى على الايميل بتاعهم

.......@elarabygroup.com

مش عارف الميل مش راضى ينكتب صح
هى اول كلمه كونتاكتز ( المنتدى مش قابلها بالانجليزى )

بالنسبه للضمان بقى
انا كان عندى غساله شاريها ايديال زانوسى وطبعاً مش محتاجه ان الشركه تيجى تركبها ديه مفيهاش اختراع يعنى ده خرطوم بيتحط فى الصرف وفيشا
لما حصلت مشكله قالوا انها بره الضمان
طبعا لو فى بلد تانيه كانت رجعت بسهوله

[Shiref_mohamed]

توشيبا العربى مبقتش زى الاول ولا حتى فى جودة المنتجات
كان عندنا مروحه توشيبا القديمه حمارة شغل
انما دلوقتى توشيبا الجديده اخرها سنتين ولا تلاته وتلاقى المروحه مش بتلف وبتبقى محتاج تغير ليها طقم تروس
ابعت لهم ايميل شكوى على الايميل بتاعهم

.......@elarabygroup.com

مش عارف الميل مش راضى ينكتب صح
هى اول كلمه كونتاكتز ( المنتدى مش قابلها بالانجليزى )

بالنسبه للضمان بقى
انا كان عندى غساله شاريها ايديال زانوسى وطبعاً مش محتاجه ان الشركه تيجى تركبها ديه مفيهاش اختراع يعنى ده خرطوم بيتحط فى الصرف وفيشا
لما حصلت مشكله قالوا انها بره الضمان
طبعا لو فى بلد تانيه كانت رجعت بسهوله

متشكر جداً لرد حضرتك وهما فعلاً مش كل منتجاتهم كويسه الغساله والثلاجه تعبانين جداً
اما السخان فهو الوحيد في السوق الى الحله بتاعته استانلس واحسن عزل كمان + انه فيه 2 هيتر واحد شتوى وواحد صيفي عشان توفير الكهرباء + ان الهيتر متركب في جانب الحله مش من الأسفل وده امان اكثر لو لاقدر الله حصل تسريب ميه متجيش على الكهرباء عيبه بس ان سعره عالى 1100 جنيه ..
طيب مش لو بعت الميل لحماية المستهلك هيبقى اقوى ولا ايه ؟؟؟؟

[المنسي]

عليك وعلى حماية المستهلك

[amr011111]

متشكر جداً لرد حضرتك وهما فعلاً مش كل منتجاتهم كويسه الغساله والثلاجه تعبانين جداً
اما السخان فهو الوحيد في السوق الى الحله بتاعته استانلس واحسن عزل كمان + انه فيه 2 هيتر واحد شتوى وواحد صيفي عشان توفير الكهرباء + ان الهيتر متركب في جانب الحله مش من الأسفل وده امان اكثر لو لاقدر الله حصل تسريب ميه متجيش على الكهرباء عيبه بس ان سعره عالى 1100 جنيه ..
طيب مش لو بعت الميل لحماية المستهلك هيبقى اقوى ولا ايه ؟؟؟؟

ابعت هنا وهنا وهتكسب وقت للى يرد اقرب من التانى

[A.Saad]

شوف اريستون

[A.Saad]

اتصل بالدليل هيجيبوا لك العنوان
واعمل شكوى فى مكتب رئيس الشركة

[ابو لؤى]

متابع

[amrezzat82]

صديقي .. كل البلد كده - أفضل تابع معاهم لحد ما يتركب و أعتقد انك لن تحتاج للصيانة إلا بعد 5 سنين على الأقل
حماية المستهلك مش بيعمل حاجة و خصوصا ان الموضوع فى نظرهم حيبقى تافه .. مرة عملت شكوى في لنك دوت كوم و فى الآخر طلعنى أنا اللى غلطان رغم الموضوع كان فيه خطأ رهيب و الشركة تداركت الأمر غيروا الأعلان بسبب شكوتى و صعدت الموضوع فى ادارة لنك لحد ما أخدت حقي
حاول تجيب تليفونات الادارة و كلم مدير خدمة العملاء أو حد من العلاقات العامة

وعلى رأي صدام و دمتم للنضال

[mohammadrashee]

متزعلش اوي كده
هون على نفسك
ديه الصيانه عندنا في الشركات كلها كده
انا كان ليا مشكله اكبرمن كده مع اوليمبك

[salodas]

ده افضل سخان فى مصر .... اعصر على نفسك كيلو ليمون لغاية السخان ميركب .... وعلى فكرة السباك الى ركبة عندى ولا اى اندهاش .... ومتخفش ده حمار شغل ولا هيحصله حاجة .
مرحبا بك فى مصر

[Shiref_mohamed]

لحد اللحظة ديه محدش كلمني برضه شكلى كده هروحلهم وﻻد التيت دول

[dedi]

شئ يحرق الدم صعد الموضوع و لو بالتليفون و شوف المسؤل عن المبيعات او مدير التسويق وابعت ايميل لمدير الشركة

[abdelrahmaaan]

خش على الصفحة بتاعتهم على الفيس بوك اعمللهم فضيحة لانى تعرضت لموقف مشابه لده ومكانش فيه اهتمام وبعد ما عملتلهم فضيحة على صفحتهم اهتموا بموضوعى وكلمونى لانهم بيخافوا على سمعتهم لكن لو كلمتهم منك ليهم ولا هيفرق معاهم حاجة

[aliabutaleb]

مشكلتك شبيهة بمشكلتي في تركيب الغسالة الفول أوتوماتيك.
اللي بيركبوا الاجهزة عندهم هي مراكز خدمة معتمدة يعني مش تابعين لهم بشكل مباشر
وبعد جدالي الطويل معاهم مفيش حل غير انك تستحمل لأن حتى إنك تشتكي المركز ده غير متاح.
نظام بزرميط!