استشارة من الاخوة المحامين

[ashraf122]

السلام عليكم ، انا كنت عايز اشترى شقة و العمارة خلصانة مبانى و تشطيب واجهات و مداخل (معرفش الكهرباء و المياة واصلة ولا لسة) بالتقسيط عل اربع سنوات بس صاحب العمارة مشترط ان التسليم بعد تخليص الاقساط يعنى حيكون مع عقد بس و مقدرش ادخل عداد الكهرباء ولا عداد مياة ولا حتى اوضب الشقة الا بعض الاقساط ما تخلص

هل دة طبيعى ولا ممكن يكون فية قلق من الموضوع دة
فية حاجة كمان قلقانى بس من غير ما حد يزعل او يشتم صاحب العمارة اخوانى بس غنى جدا فهل دة مقلق ام لا يعنى ممكن يتقبض علية قبل ما استلم الشقة

[A.Saad]

مش قصة انه اخوانى ويتقبض
القصة ان الفيلم ده اول مرة اشوفه
استلام الشقة بيكون بعد اول قسط
فى الشركات بس ممكن يتاخر شوية
غير كدة ممكن شقتك تتباع عشرين مرة
واقرا موضوع عامله عضو تانى عن شقة عايز يأجرها
اسمه فيه صاحبة البيت والسمسار

[أبو آسر]

مفيش حاجة اسمها تستلم الشقة مع آخر قسط تدفعه !
لو مش عايز يسلم إلا ما يضمن كل فلوسه يبقى يبيع كاش بس ويريح نافوخه لكن انت كمشتري لما تدفع مقدم وتتفق على مواعيد أقساط وكله مكتوب في العقد فمن حقك إنك تستلم شقتك وتوضبها وتسكن فيها كمان الحاجة الوحيدة اللي مش من حقك إنك تبيعها لأن العقد اللي معاك مفروض إنه عقد بيع ابتدائي مش نهائي وده مينفعش تبيع بيه
أنصحك في موضوع العقارات بالذات استغنى عن 300 جنيه وروح لمحامي شاطر يحضر معاك التعاقد ويكتبلك عقد تضمن بيه حقوقك لأن دي شقة مش موبايل

[mk3]

السلام عليكم ، انا كنت عايز اشترى شقة و العمارة خلصانة مبانى و تشطيب واجهات و مداخل (معرفش الكهرباء و المياة واصلة ولا لسة) بالتقسيط عل اربع سنوات بس صاحب العمارة مشترط ان التسليم بعد تخليص الاقساط يعنى حيكون مع عقد بس و مقدرش ادخل عداد الكهرباء ولا عداد مياة ولا حتى اوضب الشقة الا بعض الاقساط ما تخلص

هل دة طبيعى ولا ممكن يكون فية قلق من الموضوع دة
فية حاجة كمان قلقانى بس من غير ما حد يزعل او يشتم صاحب العمارة اخوانى بس غنى جدا فهل دة مقلق ام لا يعنى ممكن يتقبض علية قبل ما استلم الشقة

قابلتنى قبل كده صاحب العماره كان عايز يكتب شرط لا تشطيب الا بعد دفع كل الاقساط بس كان هيسلمنى عادى واما سالته ليه قالى عشان فى ناس بتتعذر وتكون شطبت تيجى تقوله فلوسك وشقتى يقول لا ادفع التشطيب اللى فيها. طيب مين يقدر الشغل ب قرش ولا بعشره دى مشكله تانيه

[SAMEH_FOUAD]

هو الموضوع مش محتاج محامى ولا حاجة

كل الموضوع انك تتفق على انك هتدفع المقدم المحدد , والاقساط المحددة فى ميعادها , وتستلم شقتك عادى جدا , وتبدأ تجهيزها

وهو لو معترض على النقطة دية

خلاص طالما انت واثق ان الحمد لله الامور تمام ومافيش مشاكل مادية ان شاء الله

اتفق فى العقد انك هتدفع الاقساط فى ميعادها , واى عدول من ناحيتك , يبقى صاحب العقار غير ملزم بدفع اى مصاريف اتدفعت فى الشقة , بس كدة , وفى الحالتين هو يضمن انة كسبان فى الحالتين

( العقد شريعة المتعاقدين )

[أحمد كمال]

قابلتنى قبل كده صاحب العماره كان عايز يكتب شرط لا تشطيب الا بعد دفع كل الاقساط بس كان هيسلمنى عادى واما سالته ليه قالى عشان فى ناس بتتعذر وتكون شطبت تيجى تقوله فلوسك وشقتى يقول لا ادفع التشطيب اللى فيها. طيب مين يقدر الشغل ب قرش ولا بعشره دى مشكله تانيه

بسيطة

قول له انا موافق على شرط اني لو تعثرت و لغينا العقد انا متنازل عن مقابل اي تشطيبات في الشقة


لو انت مالي ايدك من قدرتك على دفع الاقساط


لو اتقبض عليه عشان اخوان انت خسران ايه؟ العمارة خلصانة و متشطبة ....... هتدفع الاقساط لمن ينوب عنه و خلاص

[ashraf122]

اشكركم على الرد طيب هو انا ممكن بعد ما ادفع المقدم اعمل صحة و نفاذ للعقد ولا لا

[elhelwany188]

السلام عليكم ورحمة الله وبركاته ...
اخى الكريم اول مرة اسمع حاجة زى كده ...
العرف بيقول ايه فى حالات القسط انا بدفع مقدم واستلم الشقة وباقى الاقساط بتتكتب فى عقد الشقة وفى بعض الحالات بياخد وصولات امانة بقيمة الاقساط ومؤرخة بميعاد كل قسط وبيكتب فى العقد انه اخد وصل امانة بالاقساط علشان يسقط الشق الجنائى ويكتب فى العقد انه لا يحق له بيع الشقة قبل سداد الاقساط ثم بعد سداد الاقساط تكتب مخالصة بالشقة ويكتب في المخالصة ان لا يوجد على الشقة اى اقساط ويحق لك التصرف فيها بالبيع ...
وعموما اعمل استخارة الاول وربنا يوفقك للى فيه الخير ...
بس بصراحة عايز رأيى بعيد عن انه اخوان او سلفى او وطنى او يهودى العرف هو اللى بيمشى فى الحاجات دى فما دام خالف العرف ابعد احسن وشوف شقة تانية تستلمها وقتى اول ما تدفع اول قسط ....

[mohamed_selim]

هو انت عرفت منين انه اخوان؟

[ashraf122]

هو انت عرفت منين انه اخوان؟

لانة من مشاريعة الاخرى مدرسة فى التجمع الخامس ازهرى لغات ومعروف انة اخوان

[dem0]

اللى اعرفه ان فى القسط بتستلم اول ما العمارة بتنتهي سواء كملت اقساط او لا

يعني مثلا انت تعاقدت اليوم والعمارة ادامها مثلا سسنه وتكمل و6 شهور لتشطيب الواجهه والمداخل الخ

يبقى انت هتدفع قسط سنه و6 شهور لكن اول ما العمارة بتنهي بتستلم زيك زي الكاش

تخوفك من الهروب زي ما الاخ انت شقتك استلمتها هتدفع القسط لمن ينوب عنه

لكن ممكن هو علشان هيمشى فيبيع العمارة كاملة مش عارف وقتها موقف الناس ايه اللى لسه مستلمتش

فاحسن دور على حل تاني شوف مثلا بنك تمويل عقاري ولا حاجه