حد بيسافر على طريق الغردقة للصعيد؟؟؟ الجو أمان ولا قلق؟؟؟؟؟؟؟؟؟

[أدهم]

السلام عليكم
حسافر ان شاء الله الصعيد طريق العين السخنة الصحراوي وبعد كده الغردقة واطلع عالصعيد

الطريق امان ولا الظروف ايه

الف شكر يارجالة

[amz2011]

طب ما تمشى من الطريق الغربى

[أدهم]

طب ما تمشى من الطريق الغربى

فين الطريق الغربي؟

الطريق اللي اعرفه اللي هو بعد التجمع طريق الاسماعيلية تقريبا

[maged]

هتسافر من فين ورايح فين فى الصعيد

[Ramy_2R]

انا رجعت عليه من أسبوع كان أكان بس فاضي و مفيش خدمات على جظء كبير منه
و نصبحه لو عربيتك خفيفه مترجعش بليل
حتطير :)

[أدهم]

هتسافر من فين ورايح فين فى الصعيد

من القاهرة هطلع على الطريق بتاع التجمع الخامس واروح العين السخنة
اعتقد اسمه طريق الاسماعيلية؟

للاقصر طبعا بمشي في النهار مش بالليل

[أدهم]

انا رجعت عليه من أسبوع كان أكان بس فاضي و مفيش خدمات على جظء كبير منه
و نصبحه لو عربيتك خفيفه مترجعش بليل
حتطير :)

اللي هو طريق الاسماعيلية تقريبا للعين السخن ومنها الغردقه صح؟؟؟؟؟؟؟؟؟

انا بمشي في النهار بس ان شاء الله

[Mohyeldin1974]

معلش انا نش واخد بالى منين لفين
بس لو قصدك من الغردقه للصعيد يبقى هتاخد طريق الشيخ فضل وده طريق حلو بس فاضى تماما من اى خدمات ومفيهوش سريخ ابن يومين ولازم عربيتك تبقى واثق فيها اوى اوى ، انا جربته من كام شهر كنت رايح من الغردقه للمنيا
وهو بيطلع، على الطريق الشرقى بتاع المنيا ومنه تكمل قبلى

[أدهم]

معلش انا نش واخد بالى منين لفين
بس لو قصدك من الغردقه للصعيد يبقى هتاخد طريق الشيخ فضل وده طريق حلو بس فاضى تماما من اى خدمات ومفيهوش سريخ ابن يومين ولازم عربيتك تبقى واثق فيها اوى اوى ، انا جربته من كام شهر كنت رايح من الغردقه للمنيا
وهو بيطلع، على الطريق الشرقى بتاع المنيا ومنه تكمل قبلى

هطلع من القاهرة للتجمع وطريق الاسماعيلية للعين السخنة والغردقة للصعيد
الطريق ده كويس؟

[maged]

طريق الغردقه الصعيد ممتاز جدا بس مشكلته انه مفيش اى شبكة محمول يعنى لازم تكون عربيتك غير قابله للاعطال نهائيا

انا شخصيا سافرت جرجا بالماروتى من الفاهرة 650 كم على الطريق الغربى كان ونس ومعقول لكن فى العودة رجعت على طريق الجيش الجديد وكنت راجع ليلا وبفانوس امامى واحد وكانت ليله رعب لكن وصلت بالسلامه وبعد التجربه دى قررت انى اسافر على الغربى فقط لانه امان فى حالة اى عطل او حادث لاقدر الله
خلاصة الكلام طريق القاهرة الغردقه اكويس جدا لكن المسافه من الغردقه الى الصعيد لازم سيارة مضمونه

[Mohyeldin1974]

هطلع من القاهرة للتجمع وطريق الاسماعيلية للعين السخنة والغردقة للصعيد
الطريق ده كويس؟

يا باشا طريق الاسماعيليه ملوش علاقه بمشوارم
حضرتك هتاخد طريق السخنه بتاع القطاميه ( من الدائرى) ومنه تكمل على طريق الغردقه وحسب مانا فاكر عند الزعفرانه تاخد يمين بعد بنزينه وطنيه بتاعت الحيش يبقى انت كده ماسك طريق الشيخ فضل حوالى ٢٦٩ كم والله اعلم وبيطلعك على الطريق الشرقى اللى على المنيا الجديده ومنها على مدينه المنيا وبعد كده كمل قبلى اما من نفس الطريق بس معرفش مكمل قبلى لحد فين واما تعدى النيل وتمسك الزراعى وده مؤرف او انك تمسك الغربى بس هيبقى مشوار عليك
اتمنى تلاقى الشرقى مكمل قبلى بعد اسيوط
اهم حاجه فى الحوار ده عربيتك لانك اذا عطلت معاك الجبل بس

[mohamed_selim]

يا جماعهمتلخبطوش الراجل ...
هتطلع من القاهره للعين السخنه من عند القطاميه و تمسك طريق الغردقه (اسمه الاسماعيليه الغردقه فعلا) و طوالى للغردقه و تعدى الغردقه من على الدائرى فى اتجاه سفاجا و تمسك طريق قنا سفاجا و تنزل منه على الاقصر على طول
لحد سفاجا الطريق كويس بس خلى بالك بيقولو فى سيول اليومين دول فممكن تلاقى حتت مقفوله من الطريق

قنا سفاجا ممشيتش عليه قبل كده بس واحد صاحبى مشى عليه للاقصر و بيقول كويس بس مشكلته انه مفيش خدمات بس اسفلت كويس ... ساعتين و نص من سفاجا كان فى الاقصر
و فى حته بيقول مطلع مع ملفات ... لو الصبح و عربيتك كويسه اتكل على الله افضل بكتير من انك تاخد طريق الصعيد