كلمات تفائلية أو إيجابية .... يلا شارك

[friendship7897]

سمعت أغنية أنهاردة في الراديو وأنا رايحة الشغل الصبح

رفعت معناوياتي أوي

فدورت عليها في جوجل ولاقيتها

بس مش عارفة أرفع الأغنية علشان ممنوع عندي من الشغل

هي أغنية لرامي صبري أسمها حاول دايماً ( أول مرة أسمعها ) بس عجبتني أوي

وأرجوا من زملائي أعضاء المنتدي عدم النقد بأن هل الأغاني أصبحت قدوتنا !!

لأ طبعاً هي مش قدوتنا ولا حاجة – لأن قدوتنا أكيد هتكون من أشخاص صالحين مش في أغاني

لكن فيه بعض الكلمات فعلاً بتأثر في النفس وتجعلك بدون مقدمات شخصية إيجابية

ومن ضمن الأغاني الأغنية دي – ياريت تعجبكم ، وياريت تشاركوا بكلمات أغاني ترفع من معناوياتنا أو تجعلنا أشخاص إيجابيين

حاول دايما بأى طريقة تحلى أيامك

ليه تزعل على اللى راح من عمرك وبكره قدامك

محدش منها واخد حاجه ياسيدى عديها

وحالك أرضى بيه وأهو بكره ربك يسويها

ومين فى الدنيا دى بحالها على طول بيتهنى

معاك مره .. ومره عليك .. ماهى دنيا مش جنه

يعنى عيشها وارضى بيها ... اضحك ايه فايدة تكشر ليها

اسمع كلامى وارمى هموم الدنيا وراك
سيبك من اللى راح وعدى زمان ده كله بيجى بقى باوان

عيش الدنيا خلى الفرحه فى كل مكان سبقاك

حاول دايما تخلى الدنيا جميله اوى سهله
سايسها وخدها كده ببساطه ولا حاجه مستاهله

هنزعل ليه وهى حياتنا هنعيشها كام مره

حياتك حبها واعشقها لو حلوه او مره

مفيش احلام بتبقى حقيقه بين ليله والتانيه

عشان توصل لحلمك حاول .. عافر مع الدنيا

[Y a r i s]

اغنية جميلة فعلاً وكلماتها هادفة
انا برضوا في كام اغنية اثرت فيا ... زي لو بطلنا نحلم نموت
وفي اغنية برضوا كانت بتصبرني على الحال الي هيا بتقول : وانا وياااااياااا بعيش .... ملعنش الازمات بحلم وانا ممعيش ملعنش الازمات ... وبرضو اغنية وصفولي الصبرررررررررر ... وفي اغنية تحفففففه بحبها جدا لواد اسموا ادم الي هيا بتقول بتاعت الي بياكول حرام او يمد ايدو. كلماتها مش حضراني دلوقتي علشان صوت الدق والخبط وصوت الشنيور الي عند الجيران مطلعني من اللحظة الرومانسية اااه بالمناسبة كان في اغنية زمان . بتقول. الرحممممة يا ناااس كفاية دووشة ... الرحمة يا ناس ليه بتعذبوني . حد فاكرها

[مصطفى-حسن]

ان لم تجد ما تحب... فاحبب ما وجدت
او بمعنى اخر
لا تنظر لنصف الكوب الفارغ .....انظر للنصف الممتلى

التعايش وانك تشوف الميزة فى المشكلة اللى انت فيها دى حالة مش كل الناس بتعرف توصلها

[ahmedteam]

انا بقى اكتر اغنيه بتأثر فيا و فى مستقبلى و حاططها دايما قدام عنيا : ليه يا زمان مسبتناش ابريا

[friendship7897]

شكراً لأنك أول مشارك يا أ/ Yaris
وجائزة أول مشارك البحث عن أغنيته المفضلة ومش حضراه دلوقتي - هههههه
لاقيت لك أغنية اللي يمد أيده وياكل الحرام بتاعة آدم
هي فعلاً اغنية للوعظ .... بس أنت جبت كلمة إيده دي منين
دي الأغنية كلها ما فيهاش ولا أيد
قولوا للى اكل الحرام يخاف بكرة اللى كالوه يفسدوا
يابا الغنى بالحرام لو شاف ابن الحلال يحسدوا
ناس بتعبى فى شكاير مآأسى معاصى وخساير
مين باع ضميره دا مالوا مهما يسدد فى ماله
ولا يعلى فى عماير .. مصيره مستقصدوا
تبقى الحكاية اذا .. مش ملوا ما فى الخزن

وجاري البحث أغنية الشنيييييور

[friendship7897]

ان لم تجد ما تحب... فاحبب ما وجدت
او بمعنى اخر
لا تنظر لنصف الكوب الفارغ .....انظر للنصف الممتلى

التعايش وانك تشوف الميزة فى المشكلة اللى انت فيها دى حالة مش كل الناس بتعرف توصلها

أنا سمعت نفس الجملة بطريقة تانية لكن لها نفس المعني
أعمل ما تحب حتى تحب ما تعمل
وشكراً أ/ Zarif إنك سيبت أفكارك المفيدة ومفك وتكيفك وزاعنفك شوية
وفي إنتظار مشاركاتك القادمة للجمل البناءة

[Ahmed_selmy]

هو غالبا بيكون على حسب المود .....يعنى احيانا الواحد يبقى موده حلو يسمع حاجه تخليه ينتعش بزياده.
ربنا يجعل المود كله كويس .

[friendship7897]

انا بقى اكتر اغنيه بتأثر فيا و فى مستقبلى و حاططها دايما قدام عنيا : ليه يا زمان مسبتناش ابريا

ليه كدة يا أ/ ahmedteam
دي مش أغنية تفائلية خالص ولا حتى إيجابية
ليه حاططها آدام عنيك .. لازم نتفائل شوية
وشكراً لمشاركتك - بس هنتظر مشاركة أخرى أكثر تفائلاً
ودي بعض كلمات أغنية - بعضها فقط لأني لو كتبتها كلها - الموضوع مش هيكون إيجابي

ليه يا زمان ما سبتناش أبرياء
وواخدنا ليه في طريق ما منوش رجوع

ولفين ياخدنا الأنين ..... لليالي مالهاش عينين
ولفين ياخدنا الحنين..... لواحة الحيرانين

الفقرة الوحيدة في الأغنية للتفائل دي :

ما تسرسبيش يا سنيننا من بين ايدينا
ولا تنتهيش ده احنا يا دوب ابتدينا
واللى له أول بكرة حيبان له آخر
وبكرة تفرج مهما ضاقت علينا

[miceg]

انا في كوبليهات بتديني طاقة إيجابية فمواقف صعبه زي
موش هفضل عايش بتألم على جرح هـــــــعــديه مانا لازم اخطي و اتقدم و ما اقفش لوحدي

[friendship7897]

هو غالبا بيكون على حسب المود .....يعنى احيانا الواحد يبقى موده حلو يسمع حاجه تخليه ينتعش بزياده.
ربنا يجعل المود كله كويس .

هي فعلاً حسب المود
طيب مودك أيه أنهاردة ؟

[friendship7897]

انا في كوبليهات بتديني طاقة إيجابية فمواقف صعبه زي
موش هفضل عايش بتألم على جرح هـــــــعــديه مانا لازم اخطي و اتقدم و ما اقفش لوحدي

حلوة أوي
أنا مش عارفة بتاعة مين
بس فعلاً لازم نخطي ونتقدم وكفاية ألم
وفيه كلمات أغنية أتجنن دي تحفة

اضحك والضحكه هتبقي ضحكتين
واتنين في اتنين في اتنين ضحك كل اللي عايشين

[أبو آسر]

الأنشودة دي من الروائع وأول ما شفت الفيديو بتاعها بكيت فعلا وتبعث على الأمل والرضا بقضاء الله
الأنشودة بالإنجليزي لكن ترجمتها بالعربي مكتوبة على الفيديو

[youtube]http://www.youtube.com/watch?v=wcuiCL2sw-I[/youtube]

[HeMa_LanCeR]

مافيش احسن من التلوث السمعي اللي بقينا عايشين فية

أشكرك ,,,,, أوعدك
هههههههههههههههه

[friendship7897]

الأنشودة دي من الروائع وأول ما شفت الفيديو بتاعها بكيت فعلا وتبعث على الأمل والرضا بقضاء الله
الأنشودة بالإنجليزي لكن ترجمتها بالعربي مكتوبة على الفيديو
-i

شكراً لمشاركتك
وأنا لسه في الشغل وتشغيل اليوتيوب مغلق عندنا - كان نفسي أسمعها
لكن أول ما أسمعها في البيت - أكيد هعمل لك لايك لأني عارفة من خلال مشاركاتك ذوق حضرتك الراقي

[friendship7897]

مافيش احسن من التلوث السمعي اللي بقينا عايشين فية

أشكرك ,,,,, أوعدك
هههههههههههههههه

بمناسبة التلوث السمعي
أيه رأيك في كلمات الأغنية دي - هي دي الكلمات ولا بلاش اللي خلت الدنيا ملاهي

الدنيا زى المرجيحه يوم تحت وفوق
فى خلق عايشه ومرتاحه وفيها ناس مش فوق
وانا ماشى بتمرجح فيها من تحت لفــــــــوق