عايز اكل كبســــــــه؟؟؟؟

[midoabdeen]

السلام عليكم ورحمه الله وبركاته
ازيكم يا جماعه عاملين ايه

من غير استغراب كده :0002014a:
عايز اكل كبسه

حد يعرف مكان جاامد بيعمل الكبسه كويس وباسعار كويسه

فكرت فى حضر موت بش مش عارف هيبقى كويس ولا لا

وياريت اللى يقول على مكان يقول اروحه ازاى علشان ماتوهش

[mezo73]

انت فتحت نفسي مع اني لسة متغدي دلوقت
انا معرفش مكان برة انا اعرف مكان جوة في بيتنا
وبالهنا والشفا :)

[Amr Nasir]

+1 ..

[nodey]

اطلب بسمتيوي وباهنا والشقا يا باشا

[BUNSH]

بنسبـــــالى احسن كبســة بتاعة الشيف سرحان واحسن فتة شاورمـــــا فراخ ابو عمــــــار ..

[saddam]

صديقي المواطن
الكبسات كتير وأنا أعرف أكتر من 10 مطاعم حتعجيك وأنا على فكرة بعرف أطبخها على أعلى المستويات ولكن مبدئيا أبعتك ل إثنين واحدهم حضرموت ولكن أنا لقيت أكثر من 22 فرع يدعي أنه حضرموت زورا وبهتانا فوجدت أفضلهم هو حضرموت جامعة الدول مقابل فرغلي عصير ثم يليه مطعم جدودنا في الدخلة المقابلة للمعهد القومي للبحوث في الدقي ثم عندك مطعم ميدان الشام في اﻷردنيه في الحي السابع أكتوبر ولو معجبكش الثلاثة دول كلمني أرصلك ثلاثة آخرين
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال
ولو عايز مطاعم أكلها عظيم بس منظرها تعبان برضو أعرف ولكن الكبسة الصح مكانها مش مصر ولكن أقرب مكان للكبسة في مصر هو مرسى مطروح قولا واحدا

[mohammedgido]

احنا بنعمل الكبسة في البيت وبتكون ممتازة وقريبة جدا من الي في المطاعم
لكن لي استفسار
بلاحظ في المطاعم حباية الرز بتكون طويلة لكن ال بنعملة مبتبقاش بالطول دا مع اننا بنشترية أرز بسمتي من العطار
فهل العيب من نوع الرز ولا طريقة الطبخ
لو من نوع الرز حد جرب نوع رز وكانت حبايتة زي الي في المطاعم طويلة

[Trondo]

رز بسمتى هندى ذهبي اللون

[miceg]

سلسلة مطاعم التقوي (( الشيف سرحان ))
حضر موت فرع النحاس م نصر

[Anaslbda]

حضرموت فروعه سواء الأصلية أو المقلّدة كلها مش حلوة.
ما عدا فرع حضرموت اللي في الحجاز. أحلى كبسة في مصر.

[الجنرال]

سيبك بقه من كل دول بجد

وخد الخلاصة .. هما اتنين فى مصر اللى بيفهموا فيها بجد

تدفع كام واقولك عليهم؟؟

[الجنرال]

خلاص من غير فلوس خالص :d

واحد اسمه مجرشي فى المهندسين قريب من ميدان لبنان .. ده اصلا صاحبه السفير السعودي السابق (القطان على ما افتكر) وبجد الجو والاكل تحس انك فى السعودية .. وفي عائلات بتروحله من المعادي مخصوص علشان تاكل حاجة معينة عنده (كنافة بالكريمة تقريبا)

المهم .. هتلاقي فى المطعم ده سعوديين وخليجيين كتير بياكلوا فيه .. وفيه حتة ولد يمني .. هو غلبان اه .. لكن بيعمل شاي تحفة بالنعناع السعودي وبيعمله بطريقة .. معلم بجد

اول ما بتدخل المطعم وتقعد تلاقيه جايلك بكوبايه قهوة سعودي .. وممكن شاي لو طلبت منه .. وبعد الاكل لازم يعدي عليك بكوباية شاي (ببلاش على فكرة ... هو بيقدم المشروبات دي ببلاش وعايش على التبس واللى فيه النصيب .. وهو اصلا مش تبع المطعم ولا ليه دعوة بيه .. بس بيقدم الحاجات دي ببلاش وبياخد تبس يعيش عليه)

اسعار الفراخ (المندي والمظبي والحنيذ ومعرفش ايه تانى) يتراوح في حدود 35 جنيه (لا تتوقع فرخة كبيرة .. هي عصفورة صغيرة بس طعمها تحفة)

اسعار اللحوم (وكلها لحم ضاني) بتبقى فى حدود ال 50 جنيه

بصراحة مش هعرف اوصفلك العنوان .. فهجيبلك صورة من جوجل

التاني بقه وده اقل درجة من مجرشي وفي نفس الوقت طعمه حلو شغال يعنى

هو بيت الكبسة فى مدينة 6 اكتوبر

لو انت جاي من عند مدرسة جيل 2000 وماشي فى اتجاه المتميز (شارع المدارس لان فيه مدارس كتيرة قوي هناك) هتلاقيه على شمالك قدام شوية

بس بجد .. جرب مجرشي وصدقني مش هتندم خالص

[الجنرال]

[mohammedgido]

سلسلة مطاعم التقوي (( الشيف سرحان ))
حضر موت فرع النحاس م نصر

أيوة الله يبارك لك
انا واحد صاحبي كان مرة عامل عقيقة لابنة وكان عامل كبسة وكانت تحفة بكل المقاييس
لما سألتة قالي من ( دار التقوى ) هي دي الي تقصدها
ولو هي يارت لو حضرتك تعرف العنوان وتليفون تديهوني ولك مني جزيل الشكر

[hugan]

متابع