هروح القاهرة وعندى كام سؤال

[matrix_it]

عايز اروح القلعة دار المحفوظات و المعادى و القرية الذكية و العباسية
احجز فى انى فندق بحيث ابقى قريب من الاماكن دى و كمان ابقى قريب من السوبر جيت او القطر
و شكرا

[Ayman-Ahmed]

حاول تدور على حاجة فى منطقة التحرير-وسط البلد :

من وسط البلد للقلعة = 30-40 دقيقة.مواصلات من باب اللوق للعتبة ومن العتبة للقلعة.

من وسط البلد للمعادى = حسب فين فى المعادى = 50 دقيقة لساعة.مواصلات من على الكورنيش-جاردن سيتى.

من وسط البلد للقرية الذكية=ساعة ونصف لساعتين=مواصلات من عبد المنعم رياض للمهندسين (ميدان لبنان) ومن هناك ميكروباص للقرية.

من وسط البلد للعباسية = 40-50 دقيقة=ميكروباص من شارع رمسيس (اوله ميدان عبد المنعم رياض)

محطة القطار= 20-40 دقيقة من ميدان التحرير.

السوبر جيت =لو موقف الماظة = ساعة لساعة ونصف=لو موقف الترجمان=20-30 دقيقة.

[matrix_it]

تمام انزل فى التحرير احسن ؟

[dedi]

فندق فى شارع الجمهورية هابى تون بجوار فندق فيكتوريا فى وسط البلد وهو محترم غرفة مذدوجة 200 جنية بالافطار موش وحش وفية فندق تانى تبعهم اسمة هابى سيتى بردة فى وسط البلد بلافطار 280 جنية افضل شوية
لو عايز ارقام تليفونات او العنوان قول

[Ayman-Ahmed]

تمام انزل فى التحرير احسن ؟

التحرير ووسط البلد تقريبا حاجة واحدة لانهم قريبين جدا من بعض.

[abdulkhaleq]

بالنسبه للقريه الذكيه فهي ممكن بس حوار حبتين
المواصله مش دايركت للقريه
هتركب من ميدان لبنان
وتنزل على المحور سلم الصحراوي
وتاخد مواصله تانيه من تحت توديك لباب القريه
والباقي هيبقى مشي لحد اما توصل الشركه اللي انت عايزها

[matrix_it]

تمام كدة يعنى هتبهدل من الاخر :)
طيب لو هروح المعادى الجديدة خلف القمر الصناعى
اركب السوبر جيت ولا القطر و انزل فى انى محطة سواء سوبر جيت او القطر
و لما انزل اركب ايه و هتاخد وقت اد ايه
و انا ان شاء الله هروح القاهرة و ارجع صد رد من غير بيات فى فندق و شكراا

[matrix_it]

مسافر بكرة و هتسحل اى حد يرد هههههههههه

[mem]

القطر تنزل محطه مصر
وبعدين تركب المترو
وتنزل محطه المعادى وتركب اى تاكس يوديك عند القمر الصناعى حته صغيره مش كبيره
ولو سوبر جيت وهيجيبك احمد حلمى بردك تركب المترو

[matrix_it]

انا ملقتش حجز قطر فا حجزت غرب الدلتا هينزلنى عبد المنعم رياض
فيه مترو فى عبد المنعم رياض للمعادى الجديدة ؟
و انا راجع عايز اخد القطر اركب القطر منين؟
و شكرا

[homme49]

انا ملقتش حجز قطر فا حجزت غرب الدلتا هينزلنى عبد المنعم رياض
فيه مترو فى عبد المنعم رياض للمعادى الجديدة ؟
و انا راجع عايز اخد القطر اركب القطر منين؟
و شكرا

عندما تنزل ميدان عبد المنعم رياض ممكن ترجع محطة مترو و تركب مترو الأنفاق من محطة الإسعاف و التى تسمى أيضا محطة جمال عبد الناصر و تأخذ إتجاه حلوان و تنزل محطة المعادى و من هناك سوف تجد ميكروباص أو تاكسى

و إنت راجع عايز تأخذ القطار - إنزل من مترو الأنفاق محطة الشهداء و التى تسمى محطة ميدان رمسيس
فى أمان الله

[ahmedkhairy]

فندق البارون مصر الجديدة وقريب من كل مكان