لقينا طفلة صغيرة جنب الجامع نعمل ايه ؟؟!!

[amr011111]

ممكن تصور العربية بس وتحطها ع النت من غير البنت وتنوه ان البنت موجوده في العنوان الفلاني واللي يتصل تسأله ع لبسها او اي علامه مميزة فيها

فعلا ده كلام سليم تماما
ولما يجوا تقولهم هاتوا صوره ليها
من عندكم
وانتوا موجودين معاها فى الصوره

[محمد عز]

طالما البنت الرضيعة لابسة هدوم كويسة ومحطوطة جوا كريكوت

يبقى موضوع ان اهلها رموها يبقى صعب لان اللى بيرمى ابنه ولا بنته مش هيهون عليه يصرف عليه مليم

يبقى احتمالات زى ما الأخوة الأعضاء بيقولوا ممكن كانت فى عربية واتسرقت وما ذلك من الأمور تبقى اقرب

ويارب صبر قلوب ابوها وامها واهلها

وياصاحب الموضوع تعبك ده عمره ما هيروح هدر واستحمل لحد ما تلاقى اهل البنت وده ثواب عظيم جدا

[Mohamed_Hamid]

هو اعلان فى قناة فضائية مشهورة يتكلف كام؟ لو مدته 10 ثوانى مثلا؟ اللى عنده فكرة ياريت يفيدنا؟
ايه رأيكم لو نتشارك كلنا ونجمع أجر عمل اعلان زى ده؟ التليفزيون احسن شئ طبعا من النت والجرائد

[Mohamed_Hamid]

الأخ الكريم صاحب الموضوع: ياريت متعملش اى اجراء قبل ما نتفق هنا على حاجة وياريت لو جيرانك اللى لقوا البنت لو كانوا ودوها فعلا الملجأ يوقفوا الاجراء ده شوية لحد ما نحاول

[Ahmed_Adham]

المفروض تصور البنت وتنشر صورها فى البرامج التليفزيونيه لانى انا مع تعليق الاخ ياريس ان ممكن فعلا يكونوا حراميه سرقوا عربيه ولقوا البيبى ده موجود

لانى معتقدش ان اللى رمى البنت ديه سايباها فى كارى كوت

بس طبعاً متسلموش الطفله لاى حد يتصل يقول انها بنته لازم تتأكدوا انها بنته ولا لاء. ازاى بقى ده المفروض اللى نفكر فيه بس محدش يقول نسأل البنت :)

بارك الله فى جميع بجد موضوع انسانى
اخى الكرييم فكرة انك تصور الطفلىة هى والعربية ةتعرضها على النت دى فكرة مرفوضة من وجهة
نظرى الشخصى لان من السهل ان اى واحد يذاكر الصورة كويس ويكى يضرب اى ورق ويوهمك وياخد الطفة واما يبيعها قطعة واحدة او انتتتتتتتتت عارف وعشان كدة لم ان شاء الله توصل لاهل الطفلة تتاكد من بعض الاشياء الول شهادة الميلاد و فصيلة دم المولود والاهل ثم جيران اهل المولود واعتقد انه فى كل المستشفيات الان توجد استمارة تسلم لاهل الطفل عليها بصمة رجل المولود ولو مفيش مشكلة ايه المانع انك تخليهم يعملو اختبار دى ان اى آن تيسر ومتتعبش منى الاجرات دى لانك بتعمل ده بدافع انسانى

ممكن تصور العربية بس وتحطها ع النت من غير البنت وتنوه ان البنت موجوده في العنوان الفلاني واللي يتصل تسأله ع لبسها او اي علامه مميزة فيها

وغالبا هيكونو عملو محضر في نفس التاريخ اللي كانت فيه قدام المسجد أو في يوم سابق وتسليم البنت يكون في نفس القسم استكمالا للمحضر ولاخلاء المسؤوليه..

[mohamedbook]

احتمال باردك يكون ام البنت متريشة ولما ولدت البيبي اخدها ابو مامة البنت او امها او اخوها ورماها عشان يداري البلاوي الزرقه الي عندهم
بمناسبة متريشه دي ملقتش في رقبة البنت نص قلاده ولا حاجة من حركات الافلام المصري بتاعتنا دي

[the lawyer]

موضوع اعلان علي قناة فكرة ممتازة ، ووممكن نتشارك في التكاليف ، والقناة ممكن تعملنا تخفيض ممكن النهار مثلا مع محمود سعد او ريهام سعيد او سي بي سي ، عايزين حد شغال في المجال دا يدلنا

[the lawyer]

بس اهم حاجة لازم محضر ويكون متوصي عليه لانه حيتحفظ علطول لازم اللي يعمله يكون ليه معرفة في القسم علشان يدور اذا كان فيه محاضر فقد تانية ولا لا وخصوصا علي الإقسام اللي قربية من الطرق السريعة

[friendship7897]

الموضوع دا حصل لوالدي زمان
أنه لقى طفلة جنب مسجد وذهب بها إلى القسم – وسألهم عن الإجراءات ، وكانت كما أتذكر كالآتي :-
1)يعمل محضر في القسم بمواصفات البنت وشكلها وأي علامة مميزة وممكن يرفق المحضر صورة لها .
2)قسم الشرطة هو اللي هينقل الطفلة إلى أي دار أيتام .
3)عند إستلام دار الأيتام للطفلة لابد من تسميتها أسماً صورياً ثلاثي لإستكمال المحضر وعلشان كدة أغلبية الأطفال اللي في دور الأيتام هتلاقيهم بأسماء مشاهير ( فنانين أو شيوخ أو لاعب كورة ) اللي بيجي على بال اللي عمل المحضر .
4)ومن دار الأيتام ممكن كفالته بأسمه المستعار إما بإستلامه بعد دراسة الحالة اللي هتستلمه هل مناسب أم لأ ، أو كفالته مادياً وهو في دار الأيتام ، وغالباً دار الأيتام مش بترفض لأن الأعداد عندها كتير والمصاريف أو التبرعات مش كتيرة .
المشكلة البنت على ما يحصل الإجراءات دي لو مافيش حد متابعها ببرونه بها لبن وماء وعلاج إذا كانت بها أي تعب لا قدر الله بتكون هلكت عياط وإعياء.
وحسبي الله ونعم الوكيل في أهلها اللي قدروا يعملوا كدة في ضناهم ، وهي غالباً بتكون طفلة خطيئة ، علشان لو كانت تاهت أو عربية أهلها أثبتت كما ذكر بعض المشاركين
كان هيبان دا في محضرهم عند عمل المحضر في أي قسم من الأقسام ، وكمان لو تاهت منهم لأي سبب هما بنفسهم هيدوروا في الأقسام والمستشفيات ودور الأيتام مش هيستنوا يتعملهم إعلان علشان يلاقي ضناهم .
لا حول ولا قوة إلا بالله

ملحوظة : سوف أتصل بدار أيتام أعرف مديرتها للتأكد من هذه الإجراءات وسوف أكتب مشاركة أخرى إذا كان هناك أختلاف عن ما قولته .

وجزاك الله خيراً لصاحب الموضوع على نيتك لكفالة هذه الطفلة .
وربنا إن شاء الله هيرزقك رزقاً حلال طيب لهذه النية إن تمت أو لا .

[meero_boy2000]

خلي بالك مش كل طفل هتلاقيه مرمي هنا ولا هنا معنا كده ان اهلوا سايبينه ... ممكن مثلاً حرمية سرقوا عربية او ثبتوا صاحب عربية ولاقوا مع العربية طفل نونوو مرمي على الكرسي الخلفي. فبيوقفوا جمب اي صفيحة زبالة او باب جامع ويقوم رامينوا او حدفينوا من شباك العربية وهيا ماشية كل شيء متوقع

احياناً برضوا ممكن واحد متجوز اتنين. وواحده بتخلف والتانية مبتخلفش فكيد النسا بيخلي الزوجة الي مبتخلفش تخطف العيل من ورى اموا وترميه بعيد بعيد عنها ... طبعاً اكيد بتقولوا ايه الخيال الخصب ده. ... هقولك لأ ده مش خيال ده واقع شيطاني موجود مع الاسف في المجتمع ... هو ابليس هج من البلد دي من شوية. ماهو من قلت الشغل :) ... وتحياتي

+1111111111

[amr011111]

وحسبي الله ونعم الوكيل في أهلها اللي قدروا يعملوا كدة في ضناهم ، وهي غالباً بتكون طفلة خطيئة ، علشان لو كانت تاهت أو عربية أهلها أثبتت كما ذكر بعض المشاركين
كان هيبان دا في محضرهم عند عمل المحضر في أي قسم من الأقسام ، وكمان لو تاهت منهم لأي سبب هما بنفسهم هيدوروا في الأقسام والمستشفيات ودور الأيتام مش هيستنوا يتعملهم إعلان علشان يلاقي ضناهم .

الكلام ده على ما اعتقد لو الحكومه عندنا ذكيه وكل شىء كمبيوتريزك فلما حد يعمل محضر فى اسم يكشفوا على الكمبيوتر ان فيه حد عمل محضر اختفاء طفله
اعتقد ان الموضوع بياخد وقت عقبال ما يعرفوا فى قسم الدقى مثلا ان حد فى قسم سوهاج عمل محضر اختفاء طفله والله اعلم

[michohat]

اتأكد من الاجراءات المطلوبة وبعد كده اقترح ان تكون وسيلة الاعلام الاولى هو الفيس بوك بنشر صورة العربية فاضية ومعاها رقم تليفون واهل الخير ع الفيس بوك كتير هيساهموا في نشر الصورة

[Y a r i s]

ياعزيزي يا صاحب الموضوع. انتا لو صورت الطفلة ... ونزلت صورها في وسائل الاعلان المختلفة وجه واحد يدعي انها بنتوا فزي ما قال استاذ احمد اكيد كان عامل محضر في اليوم. الي اتخطفت فيه البنت + في شيء اسمو تحليل الدي ان ايه وده بيتم في مصلحة الطب الشرعي في السيدة زينب جمب مستشفى ٥٧٣٥٧ ومعرفش اذا معمل البرج بيعملوا ولا لأ. عامةً العملية سهلة بس الي عاوز اي طفلة علشان يبعها ما الاطفال كتير وعلى كل اشارة هتلاقي بالعيلين تلاته مرميين ... بس هو ممكن حد محروم من الخلفه ونفسوا في حتت عيل. وده عامة انسان لوخد الطفله فهتلاقيه طاااااااير بيها لسابع سما واحتمال كبير يربيها ويصرف عليها اكتر من اهلها ذات نفسهم ... بس احنا بنقول. ايه انو تعمل الي عليك بنشر صور الطفلة رغم ان الي ضايع منو طفل مبيبقاش عندوا وقت ياكول لقمة. او حتى يبص في المرايا على وشو. فما بالك انو يبص ويقلب الفيس بوك :) حسبي الله ونعم الوكيل في الانفلات الامني الي في البلد عاوزين طريقة نكتب على العربية عزيزي الحرامي والمثبت احذر يوجد طفل رضيع داخل العربية. فياريت لو تكرمت خود العربية الي بعدها او ثبت عربية الي جيه :) ألطف بينا يارب

[horeen]

أخى الفاضل
يوجد بجوار منزل ما يطلق عليه العامه (دار أيتام) ولكن هى فى الحقيقه الجنه التى وعد الله بها عباده الصالحين
وهى متخصصه فى رعايه الأطفال من سن يوم إلى سن 3 سنوات لما يحتاجه الطفل من عنايه ورعايه خاصه
على سبيل المثال مخصص لكل طفلين أم تعيش معهم ليل نهار ولهم خاله تكفلهم يوم أجازه الأم مع وجود طبيب مقيم وإقامه فاخره جزى الله القائمين عليها خير الجزاء

http://www.youtube.com/watch?v=Cwo82EncGVA

وأخيرا
إذا كنت تريد إيداعها فى هذه الدار برجاء مرسالتى وجزاك الله الجنه

[horeen]

دى صور من الدار

https://www.facebook.com/media/set/?set=a.672529282772625.1073742590.145505648808327&type=1