لــحد إمتــــــــــــــــى

[miceg]

السلام عليكم ورحمه الله
ما أجمل السواقة داخل القاهرة وضواحيهاااااا
ألامس كان غريب جدااااا وكان فيه شوية مواقف تحفة
كنت رايح من م نصر الى مدينة العبور من على محور الفريق سعد الدين الشاذلي
وشوية حاجات بيعملوها المصريين غريبة من نوعها
اولها راجل بعربية جيب فاتته نزلة العبور وكان نازل فدخلة طريق إلاسماعيلية
المفروض طبيعي يكمل وياخد اول يوتيرن ويرجع يدخل العبور
لا الراجل وقف وقفه غريبة جداااااا وعاوز يرجعها بظهره
وسط تزاحم وصراع من العربيااااااااات
كان موقف بشع
الموقف الثاني وانا راجع عالدائري
عربية 1/8 بيسموها اللي هي ميني ميني ميكروباص :d
عطلان وراكن عالجنب الشمال وحاطط كاوتشين فوق بعض عشان يفهم اللي جاي انه عطلان
بس مش حاططهم جمب او خلف العربية
ده حاطتهم فنص الشارع على بعد أمتار من عربيته
طبعا اللي قدامي ضرب فرامل على اخر لحظة ولحسن الحظ كان مرسيدس
طبعااااا انا زيه بالظبط ولحقت نفسي وقبل ماعمل اي حاجة اديت علامة ألانتظار
وربنا ستر علينا وعلى كل اللي جاي من الخلف فاخر لحظة
ومواقف ثانية زي ان الحجة أم سيد قلبها ضعيف شوية فالسواقة فبتكبس فرامل عالاخر
قبل اللي قدامها بشوية حلوين ودي طبعا متتصورش ممكن تسبب إيه فالصواريخ اللي جايه من خلفك .
زي مثلا الحجة نحمده قاعده بترغي فالتليفون والطريق ده عباره عن فسحة
طبعا الكلام ده بيعملوه الرجااااال بس مش بنفس الخطورة اللي بيعملوها الستات

وبرجع وأقول لحد إمتى المهازل اللي بتحصل فالطرق المصرية
مش عارف بصراحة العيب فينا ولا في الحكومة اللي بترخصلنا رخص القيادة
ولا العيب فمين بالظبط
كلمتين كده كانو على قلبي وقولت افضفض معااكو
وانت شايفين ايه الحلول الممكنة اللي ممكن تحصل لو انت مسئول

[corolladestroyer]

العيب في الحكومه انها بتطلع رخص لاي حد فعلا ده الواحد بيشوف بلاوي في امتحان الرخص ده وناس على قدها اوي وعايزه تدريب 6 شهور تاني على الاقل وتفاجئ اني صباحو عادي طلع رخصه ثانيا العيب فينا احنا برضو لما اب ولا زوج يروح يطلع لبنته ولا لابنه ولا مراته رخصه وهو عارف المستوى المبهر ليها او ليه في السواقه ومفيش احترام للبلد نهائي والف مبروك يا حبيبتي الرخصه وينزلها طايحه في العالم اللي بره المفروض الناس يبقه عندها وعي ان ده شارع عمومي ودول بني آدمين اللي في الشارع دول مش حيوانات ندوس عليهم ولا نخبطلهم عربيتهم.... الكلام ده بالنسبه للناس اللي مش بتعرف تسوق نيجي بقه للناس اللي بتعرف تسوق بس بيستعبطو وعاملين هنود تلاقي واحد حيوان واقف على الشمال ياخي حرام على اهلك اعمل اعتبار للناس اللي انت عايش وسطهم...واحد تاني عنده الوقفه في نص شارع هوايه تلاقي ممكن بكل سهوله يحضن على جنب لا هو متعه عنده يقف في نص الشارع برود فوق الوصف ولا الناس السرحانه وماشيه بسرعه 15 كم في شارع فاضي واللي يغيظ تلاقي واحد جنبو ماشي بسرعة 16 كم وانت تروح تولع في نفسك ولا اللي بيرجع بضهره على الدائري ولا على كوبري ولا في صلاح سالم عادي معندوش اي مشاكل الناس دي معندهاش اي وعي نهائي وهمهم الكامل مصلحتي فقط مستعجل وغلطت ايه المشكله الكل يخبط راسه في عرض الحائط وهعمل اللي عايزه وليذهب الجميع الى الجحيم ناس معندهاش احساس ولا تقدير ابدا بالطريق العام و قمة اللامبالاة والاهمال والاستهتار بالبلد والناس اللي فيها كل شايف نفسه على الباقي وانهم بهايم واني اعمل اللي عايزه في اي وقت مفيش احترام لحد ابداا....ربنا يتولانا برحمته وللاسف مفيش امل نهائي في البلد دي.....

[elmkaneeki]

عالم اخر نباهة وفكاكة معلش

[youssef_elgbaly]

الرخص كفته فى مصر كله رشاوى واحد صاحبى اخد الرخصة الخاصة بكيلو جاتوه تصور والله كيلو جاتوه من كلاسيك ههههههههههههههه
اما الرخصة المهنية صعبة شوية لانك بتتمتحن حرف s لوحدك مافيش حد جمبك والمشكلة هنا ان اكتر الناس بتاخدها من غير ماتكون عارفة حتى الطريق والشوارع كويس يعنى ممكن تركب مع سواق تاكسى جديد يلففك ومايعرفش الطريق كويس وتانى حاجة المشكلة من المرور نفسه بالنسبة للناس الجديدة اللى مش عارف الشارع ده رايح ولا جاى مافيش علامات ارشادية ولما تلاقى علامات ارشادية بتبقى حته صفيحة مصدية والمشكلة هنا بالليل المفروض تنور بالليل علشان الناس تشوفها والمرور على قد مايقدر المفروض شايف طريق عربيات رايح وجاى منه يعمل يوفط مش يعمل يفطة لشارع وعشرة لا وياريت الاهتمام بالاضاءة بالنسبة للحتة كليوباترا البحر اسكندرية ضلمة وناس ياما راحت فيها لان النازل كله بيجرى فيها وواسعة وانا اقول لاى واحد هايعدى الطريق استخدم النفق مش هاياخد منك دقايق ماتسطبسطش الموضوع تقول اخدها جرى وخلاص

[أبو آسر]

المنظومة كلها فاسدة سواء الحكومة بالفساد والرشاوي والمحسوبية والإهمال والرجعية أو ثقافة الناس نفسها المعتمدة على الأنانية والفهلوة وقلة الذوق
وأنا بالرغم من إني مسافرتش برة مصر تقريبا إلا إني أكاد أجزم أنه لا توجد دولة في العالم أسوأ من مصر في السواقة وسلوكيات الطريق
ومنساش تعليق واحد سوري عايش في مصر على المسألة دي لما قال:
السواقة في مصر: إما النصر أو الشهادة !!!

[Eng_hatemfathy]

انا شايف المشكلة متفرعة وتجمعها جميعا كلمة "فكاكة"
يعنى اللى بيعرف يسوق واخد الطريق يمين شمال لحسابة ويكبس من اقصى اليمين علشان يلف شمال ويدخل ببوزة علشان يعدى ممن هو اولى منه فى المرور واللى خايف يقف او يروح يركن فى جنب لحد لمل الشارع يفضى
واستخراج الرخصة فكاكة والوقوف فى نص الشارع للتحميل ومتابعة السير دون انتظار فراغ الطريق فكاكة والركن فى الممنوع صف تانى وتالت ورابع احيانا فكاكة واستغلال بعض المحلات لاكتر من نصف الاسفلت زى كبدة البرنس كده فكاكة والركن العمودى فى شوارع ضيقة قدام القهاوى فكاكة زى المعادى كده والركن فى الشمال على الدائرى لتغيير فردة كاوتش ابو الفكاكة كلها ومش مشكله حد بيفادى من الشمال يعنى صح يلاقى نفسه لابس وملبس عشرين عربية وراه -عادى خالص
واللى بيفتح فتحه فى الحائط الخرسانى على الدائرى علشان يعدى بالموتوسيكل بتاعه ويسيب الحجارة المكسره فى الحارة الشمال واللى يلبس يلبس برضه فكاكة
عايشين فى بلد الفكاكة وكنا بنقول الكلمة ومش حاسين بيها لحد ما اعترفت القيادة بانها الكلمة الحاكمة للمهروسة مصر

[marsguy]

الموضوع بسيط جداً

إحنا ماحدش عندنا بيتعلم يسوق

إحنا بنتعلم إزاي نحرك العربيه, مش إزاي نسوق العربيه وسط الناس ووسط الشوارع

حتى إختبار السواقه نفسه هو إختبار قدرتك على تحريك العربيه مش القياده في الشوارع

زمان في مصر كان إختبار السواقه عباره عن حد بيركب جنبك وتسوق بيه مده ويشوف بتتصرف إزاي

المشكله كمان إن كل واحد عنده شوية إعتقادات هو مكونها على مر السنين وهي مش صح

زي مثلاً إعتقاد إنك تنور النور بالليل لو الدنيا ضلمه بس والشارع مش منور. النور ده لو إنت مش منوره في دوله من اللي عندها سواقه رخصتك هاتتسحب وش عشان النور ده مش بس إنت بتشوف بيه, إنت كمان بتتشاف بيه.

الخلاصه: إن كمان في ناس محترمين جداً وشايفين إنهم بيسوقوا صح بس للأسف الكلام ده مش حقيقي. عشان وي ما قلت كل واحد معتقد إن هي دي السوقه الصح. وهو مش هايلاقي حد يعلمه الصح ولا يغلطه لما يعمل الغلط

[maryano]

فكررتيني مرة كنتي ماشي في طريق المشير قبل ميوسع و اللقي واحد بيرجه مرشدير و هو في الحارة الشمال علاشان عادي الفتحة ستر ربنا هو اللي نجاني لكنت لبست فيه او اتقلبت ساعتها اول مرة اشتم واحد شتايم جامدة كدة

[mahmoud869]

مستنين ايه من بلد الرخصة بتاخدها وانت قاعد في البيت

[ahmedkhairy]

السواقة فى مصر اصبحت درب من دروب الخيال

[elnakshabandy]

المنظومة كلها فاسدة سواء الحكومة بالفساد والرشاوي والمحسوبية والإهمال والرجعية أو ثقافة الناس نفسها المعتمدة على الأنانية والفهلوة وقلة الذوق
وأنا بالرغم من إني مسافرتش برة مصر تقريبا إلا إني أكاد أجزم أنه لا توجد دولة في العالم أسوأ من مصر في السواقة وسلوكيات الطريق
ومنساش تعليق واحد سوري عايش في مصر على المسألة دي لما قال:
السواقة في مصر: إما النصر أو الشهادة !!!

جامده فحت

[Dr_Mido]

ااقلك ازاي انا عندي صاحبي في احد المراكز المهمه يعني مطلع لاصحابنا كلهم رخص اشطر واجد فيهم بيعرف يضرب كلاكس

[طارق _عبد السلام]

انا مختلف معاكم احنا فى مصر اغلب السواقين قمه فى المهاره بصرف النظر عن الرخصه اللى بتيجى بكيلو كباب
لكن تخيل واحد سايق المفروض ينتبه للطريق والحفر والبلاعات والمطبات العشوائيه والبشر اللى بيمروا من اى مكان بيعجبهم ويدور على لافته ارشاديه توجهه للمكان اللى هو رايحه وتاكسى او ميكروباص مستعد يقف فى نصف الطريق فجأه علشان زبون وحتى عسكرى شرطه واقف فى نص الاشاره معطل العربيات بوقفته وبيصرخ عليك علشان تعدى (هعدى من فوقه يعنى) كل ده وتقولوا نفيش سواقين فى مصر
احنا عندنا محترفين سواقه لكن لانعلم اى شىء عن اخلاق الطريق وحق الغير من الجميع بقى سواء مشاه سواقين محليات (المنظومه كلها الا من رحم ربى)

[S O P H O S]

الموضوع ملوش حل
من الواحد بيشوفه بصراحة لا

[Secret-Man]

انا مره واحد بيتكلم فى الموبايل وحتت عيل مشوفتش فى سنتحته فى الدنيا كان فى شارع اليميرغنى ورمى عليا كان هيخبط العربيه وولابصلى وعمل عبيط

ولما طلعت من وراه وبصتله ركن وشاورلى وعايز ينزل يتخانق معايا

تقول ايه فى عالم بجحه قليله الادب بتسوق بالاخص الشباب وناهيك عن البنات فى البرود الى عايشين فيه ويولع الشارع


ده حرقه دم ياشيخ