::: شركة te data ومنتهى عدم احترام العميل :::

[star101]

شائت الاقدار ان اشترك مع شركه تى داتا عن طريق موزع....وللاسف قام موزع اخر بشراء الخطوط منه على ان يتم تقسيم الارباح بينهما.....وهذان الموزعان لا رقيب عليهما من قبل الشركه....طلبنا اكثر من مرة التعامل مع الشركه مباشرة فرفضت وقالت انه لا يحق لنا الا التعامل معاها الا من خلال الموزع.....ومرت الشهور وفوجئنا منذ اسبوع بفصل الخدمه عن جميع مشتركى دتى داتا التابعين لهذا الموزع...رغم سددانا قيمه الشهر مقدما....استفسرنا عن الامر....فعرفنا ان الموزعان بينهما خلافات مادية فقام الاول بفصل الخطوط كلها ....رجعنا الى شركه تى داتا وشكونا اليها فكان الرد ان نرجع للموزع. وانها لا تستطيع تقديم اى مساعده فى الامر لان الموزع هو المسؤل امامها عن الخطوط .رجعنا الى الموزع تهرب منا وقالنا تعالوا خدوا فلوسكم انا مش هشغل الخطوط دى تانى...ذهبنا الى الشركه مرة اخرى وطلبنا ان نسدد لها قيمه الاشتراك مباشرة بعيدا عن الموزع فرفضت مرة اخرى .... والموزع ولا يريد ارجاع الخدمه عندا فى الموزع الاخر....ومئات الخطوط مفصوله والشركه الام لا تحرك ساكنا ....ارسلنا شكاوى فى فرع الشركه وفى جهاز الاتصالات
ولا مجيب...اخر ما وصلنا اليه ان نقوم بفصل الخدمه نهائيا مع شركه تى داتا والاشتراك مع شركه اخرى فوجدنا ان الامر صعب فامر الكنسله يتطلب شهور
فما العمل الان مع شركه دتى داتا

[DR/WAFEK]

نفس المشكله عندى ان مش قادر اتعامل مع الشركه نفسها لازم ترجع لموزع الصراحه غباء من الشركه انها تقفد ناس كتيرو الحل انك فعلا تكنسل الخط وتجيب خط تانى تكلفته 50 ج من المصريه للاتصالات وبعدين ترجع تشترك فى خط نت بس تخليك مع الشركه مباشر على الاقل حتاخد راوتر ونص الاشتراك مده 6 شهور وتحياتى

[star101]

DR/WAFEK شكرا ليك بس ده مش حل ...ليه اجيب خط جديد وواقعد ادفع فاتورة لخط مش بستخدمه..علشان مش قادرين حلو مشكله ويحترموا عملائهم شوية

[احمد المصرى]

اول مره اسمع عن موضوع الموزعين دا بصراحه احنا بنتعامل مع الشركه على طول

[4fun14]

انا اول ما عرفت حاجه اسمها دي اس ال كان باشتراك مع تى داتا سنة 2004 وفضلت 3 سنين ف خناقات مستمره وروتين مزعج لغايه ما خلصت منهم ف 2007 ومن ساعتها وانا مرتاح..كانوا كاتمين الضحكة ف قلبى

[Eng_hatemfathy]

انا اشتركت معاهم سنة 2011 وفعلا اسوأ خدمة واسوأ معاملة واجهل خدمة عملا شفتها -قعدت معاهم سنة وكرهت فيها نفسى وفكيت فيها ضفيرة التليفون ميت مرة واتكلفت فيها تليفونات وموبايلات قد تمن الخدمة
ومن اول يوم اشتراك وانا بتخانق وطلبت الدخول لرئيس مجلس الادارة وبعتولى واحد قعد معايا 4 ساعات لحد ما شغل الخدمة وطول الفترة خناقات وفى الاخر عملت كذا كومبلين ومفيش فايدة والخدمة كانت زفت والانقطاع اكتر من الشغل
فى الاخر عملت طلب الغاء واتصل بيا اكتر من حد وانا مصر على الالغاء واستخدمت فلاشة فةودافان ونزل عرض ظريف لفودافون الارضى بعد كام شهر فحاولت اشترك لقيت الخط لسه مقفزل ومفيش كانسيليشن نمبر ليا
عملت فيلم وشكوى لمرفق تنظيم الاتصالات وهددتهم برفع قضية تعويض لو ضاع منى العرض
وفعلا خلال يومين كان رقم الكانسله عندى واشتركت فى فودافون فى اغسطس 2012 ومن يومها محتجتش اتصل بيهم الا نادر جدا وناس قمة فى الزوق
اتعرفت على ناس مهندسين فى تى اى داتا لقيت انهم فعلا مفرين بانها اسوأ خدمة

[amr011111]

فروع تى اى داتا ماليه البلد مكانش ليها لزمه تشترك مع موزع
الحل انك تكنسل الخدمه وتشترى مع اى شركه تانيه

[rotanamasoud]

الحل اننا نسيب البلد كلنا

[تامر.محمد]

مش صح خالص فكرة الاشتراك مع موزع دي لأن الشركات فعلا بيبقى مالهمش اي علاقة بيك , هما بيبقوا كأنهم مأجرين البورت له و هو مأجرهولك , مافيش عمليا تعامل بينك و بين الشركة خالص و بتبقى تحت رحمة الموزع

[Hikayat]

نعلى الاقل حتاخد راوتر ونص الاشتراك مده 6 شهور وتحياتى

هوه الراوتر ده بيبقي ببلاش ولا بتدفع فيه فلوس ؟
يعني لما الشركه بتنزل اعلانات ان الراوتر هديه ... ده فعلا بيبقي هديه وببلاش ؟

[ahmedteam]

حضرتك ليه تخلى وسيط بينك و بين الشركه

انت لما بتدفعله الاشتراك ايه يضمنلك انه بيوصله للشركه

الموزع ببساطه ممكن يكون مركب خطك على شركه تانيه و حضرتك مش عارف لانه ممكن يكون موزع لاكتر من شركه

الموزع ممكن يشتركلك انترنت محدود و يفهمك انه غير محدود و يحط الباقى فى جيبه

و فى الاخر ترجع تلوم على الشركه

مش بدافع عنهم و لا حاجه انا بس بوضح حاجه ممكن تكون مش واخد بالك منها

فى النهايه انا مشترك معاهم من 7 سنين من غير ولا مشكله و الحمد لله

[Ahmed_Adham]

غالبا صاحب الموضوع مش في القاهره يا جماعه والمدينه اللي هوه فيها مفيهاش فرع ل tedata ومأجرين الخطوط كلها لموزع ومعندهمش خطوط يتعاملو بيها مع العميل مباشره. الله يكون في عونك بس تابع شكوى جهاز تنظيم الاتصالات وان شاء الله تتحل.

[Eng_hatemfathy]

انا شايف ان الموضوع محتاج زيارة لاقرب فرع للشركة الام وملىء طلب الغاء خدمة والوقوف حتى الحصول على رقم تسجيل الطلب والاصرار على ذلك لانهم بيحاولوا يماطلوا
رقم الالغاء رسميا بيحتاج 14 يوم عمل يعنى 21 يوم يعنى 3 اسابيع
بنهاية ال 3 اسابيع محتاج زيارة للفرع ده وطبعا مش هيكون خلص
محتاج هوليلة ودوشة وطلب مقابلة المدير وحوار من ده وطبعا فى طلب الالغاء لازم يتكتب شوية حكايات طبعا حقيقية من المعاناة طوال فترة الخدمة وعدم الموافقة على اعادة الخدمة وحل مشاكك
يعنى شهر خناق وبعد كده شوف حد نضيف زى فودافون او موبينيل او اشتغل بفلاشة لو مش محتاج تحميل جامد ومستمر

[beshomilan]

الكانسليشن نمبر مبيقعدش شهور يافندم..ده اخره اسبوعين وخناقه صغيره فالتليفون هيدهولك تاني يوم..لا تقلق تماما..وللاخ اللي بيسال الراوتر فالعرض بيكون هديه ولا لا فهو هديه غير مسترده بس حضرتك ملزم تقعد معاهم سنه وعشان تفسخ العقد قبل سنه لازم تدفع ٢٠٠ جنيه غرامه

[S O P H O S]

المشكلة ان فيه موزع ووسيط فالموضوع