احدي شركات الفوركس كلمتني اسمهاmarkets.com وقالولي الاتي

[aminibrahim]

الو استاذ امين
انا ايوه انا
انا سعد من شركة مركتس كنت سجلت حضرتك علي حساب الشركه وحابين نساعدك
انا: ازاي
هو: ممكن نساعدك في عملية البيع والشراء في العمله الاجنبيه وهانكون معاك واحده بواحده\

انا:بس انا فتحت حساب مجاني للتعليم فقط وبدون ايداع
هو: تمام بس عشان يبقي في تداول حقيقي مكن تعمل ايداع بالحد الادني ولو 200 دولار واحنا هانكون معاك خطوه بخطوه علي مدار اليوم
انا : طب عشان انا حاليا سايق ولما اكون امام الكمبيوتر هابعتللك ايميل ونظبط مع بعض
هو: تمام
انا : بالمناسبه هم مين حضرك وبتكلمني منين -- ما انا كنت نسيت اسمه من كتر الكلام

هو: اسمي سعد من البحرين
انا: اهلا وسهلا وفرصه سعيده

السؤال هما الناس دول بيبقو جادين وهل ممكن لو اي واحد حب يشتغل معاهم ممكن والا ممكن يبقي في نصب في الموضوع


ادينو رايكو ونتناقش عشان افهم

الف شكر يا شباب

[4fun14]

1-متشتركش فى شركات فوركس مغمورة
2-لازم تداول 3 شهور ع الاقل لغايه ما تلاقى ارباحك اكبر من خسايرك
3-الفوركس غدار جدا والخسارة احتمالاتها اكبر بكتير..لسه بدرى اوى على ما تداول بفلوس حقيقية ولازم تتعلم اساليب تحليل وادارة كتير عشان متفلسش زى معظم المتداولين

[aminibrahim]

1-متشتركش فى شركات فوركس مغمورة
2-لازم تداول 3 شهور ع الاقل لغايه ما تلاقى ارباحك اكبر من خسايرك
3-الفوركس غدار جدا والخسارة احتمالاتها اكبر بكتير..لسه بدرى اوى على ما تداول بفلوس حقيقية ولازم تتعلم اساليب تحليل وادارة كتير عشان متفلسش زى معظم المتداولين

++++1
لكن يعني ايه تداول الاول منغير فلوس ؟وشركات كبيره زي ايه؟

[4fun14]

++++1
لكن يعني ايه تداول الاول منغير فلوس ؟وشركات كبيره زي ايه؟

يعنى اللى انت عملته بالظبط يا باشا..حساب مجانى للتعليم فقط ,حساب ديمو يعنى
كأن حسابك فيه 100 الف مثلا وتضارب بيهم ديمو..بتكون قدامك الاسعار والشارت كأنك مضارب حقيقى تماما وتفتح صفقات وتقفلها وتحاول تكسب..لكن لا مكسبك هو مكسب مادى حقيقى ولا خسارتك هى خساره حقيقية بل هى تجربة فقط
ولو لقيت انك بتكسب وشايف ان المضاربه حلال "عشان فيه جدل فى القصة دى" تجرب تفتح حساب حقيقى بمبلغ صغير لأن المضاربه بحساب حقيقى اصعب ومحتاجه اعصاب قوية
-انا بقالى كتير بعيد عن الفوركس بس اكتر شركه ثقه اسمها fxdd ودى اللى كنت شغال معاها وتمام..انصحك تجرب معاهم الديمو عشان تتعود على المتاجره بتاعتهم
فى شركات بتقدم عروض مغريه لكن بباه قلقان منها وممكن يماطلوا عشان يرجعولك فلوسك والقرف ده فابعد عنها احسن
وبكرر عليك تانى..الفوركس مغرى جدا وتحس انك امتكلت مفتاح كنوز الدنيا وهو غدار جدا وخطر جدا جدا جدا..اوعى تضارب بفلوس اكبر من قدرتك على المخاطره واقرا كويس فى الموضوع قبل ما تشتغل بحساب حقيقى "بفلوس حقيقية يعنى..مش ديمو"

[hani945]

اعتمد على نفسك ، المجال ده عاوز بحث وقراءة واطلاع وتجارب ، علشان تقدر تعتمد على نفسك كويس ، ومتستناش توصية من شركة من أى مكان ، لأنه غالباً توصيتين تلاثة حلوين كده يكسبوك وبعدين تدخل بعقد كبير فى توصية وبعدين يقع المحظور وتخسر فلوسك ، ترجع تحط رصيد جديد ، ودايرة عمالة بتدور وإنت مش عارف تطلع منها ، المجال ده زى أى مجال أو صناعة أو مهنة فى الدنيا ، لازم تدرس كويس وبعدين تتعلم التحليل وبعدين تدرب على الحسابات الديمو وبعدين لما تقف على رجلك كويس تقدر تفتح حساب حقيقى وتشتغل عليه .
ينفع حد يشتغل دكتور من غير ما يدرس الطب ، ولا يشتغل مهندس من غير ما يدرس الهندسة ، هو المجال ده كده كمان ينفع تبقى متاجر أو مضارب من غير ما تدرس أى نوع من أنواع التحليل وتقرأ فى الاقتصاد علشان تتعلم على الأقل تأثير التقارير الاقتصادية الصادرة ، يعنى مثلاً ارتفاع أو انخفاض معدل الفائدة ، ونسب البطالة ، وبرامج التيسير الكمى ، وتتعلم كمان أهم حاجة وهى تحديد اتجاه السوق إذا كان صاعد أو هابط أو متذبذب لأن ده هو اللى هيحدد إنت هتبيع ولا هتشترى ؟
ولازال هناك حتى الآن جدل دائر هل هو حلال أم حرام .
وبالتوفيق إن شاء الله

[aminibrahim]

الله يكركمو يا شباب وشكرا علي النصيحه

ومادام فيه شبهه يبقي بلاشمنه احسن

والله المستعان

[mahmoud869]

سيبك منه

[fepsceasar]

لو كسبت ولو خسرت هتقول اعوض خسارتى
وطبعا غير التحفظات الدينية اللى غيري اقدر على شرحها
الفوركس مشكلته اكبر من الاسهم لان الاسهم على الاقل فى اصل وقيمته مش هتوصل لصفر لكن فى الفوركس سهل جدا فى عملية بسيطة متابعهاش تخسر كل فلوسك
دى مجرد وجهة نظر ولا ادعى انها الصح المطلق
متهيالى الحكاية كلها انك بتحول عملة صعبة خارج مصر وخلاص

[S O P H O S]

ابعد عنهم فرأي

[aminibrahim]

شكرا يا شباب انا بعدت عن الموضوع ده والحمد لله

الراجل النهارده كلمني وقلت له انا غيرت راءيي وكانت النتيجه انه اتنرفز وقالي مش احنا اتفقنا انك هاتحول فلوس
رديت وقلتله غيرت رائيي ومع الف سلامه

الحمد لله

[4fun14]

شكرا يا شباب انا بعدت عن الموضوع ده والحمد لله

الراجل النهارده كلمني وقلت له انا غيرت راءيي وكانت النتيجه انه اتنرفز وقالي مش احنا اتفقنا انك هاتحول فلوس
رديت وقلتله غيرت رائيي ومع الف سلامه

الحمد لله

عين العقل..انا كنت بضارب بحرص شديد وبرضه خسرت مبلغ وبدات احس الموضوع عباره عن قمار..
وسيب اللى يتنرفز يتنرفز ياعم هو مش هيعوضك لما تخسر فلوسك