مطاعم قريبة من الزمالك

[osama_alam]

شباب السلام عليكم انا اسكندراني ونازل اسبوع انا والعيلة شغل في الزمالك وكنت محتاج اعرف ايه هية المطاعم القريبة مني اللي ينفع افطر فيها واسعارها ويا ريت وصف للسكة تبقوا مشكورين اوي

[Hossam_Hassan]

اسهل و احسن حاجة هى المراكب اللى فيها مطاعم، زى نايل سيتى، هتلاقيهم كلهم جنب بعض على النيل، هيبقوا على يمينك وانت داخل الزمالك من كوبرى قصر النيل، فيهم مطاعم مختلفة و غالبا افطار الواحد مش هيقل عن 70 - 80 جنيه، ده لو مش بوفيه مفتوح، البوفيه المفتوح فى ستوديو مصر حوالى 140 جنيه الفرد و يستحسن تحجز.

الوجبات السريعة زى مكدونالدز و بيتزا هت و بون ابيتى هتلاقيهم جنب بعض قرب برج ام كلثوم اللى على فرع النيل الصغير عند مطلع كوبرى 15 مايو، كنتاكى و كوك دور فى اخر الزمالك عند ابو الفدا.

لو غاوى ايطالى، يبقى توماس اللى فى أول شارع 26 يوليو و البيتزا هناك ممتازة.

للأسف فى مطاعم كتيرة حلوة، بس مش حافظ أسماء الشوارع اللى فيها و لو وصفتلك هتتوه علشان الزمالك دى توهة أصلا، بس ممكن تلاقى العناوين فى موقع Otlop.

[دموع الثلج]

عندك كل مطاعم الفاست فود فى شارع ابو الفدا من اول بيتزا هت لحد كنتاكى


وعندك على النيل بواخر كثير اولهم البلو نايل فيها مطعم دار القمر لبنانى وفيها مطعم مغربى وفيها ابل بيز ومطعم تايلاندى وبعدين باخره النيل سيتى وباخره السرايا وبعدها الباشا والاسعار هناك مثلا لفردين من 250 الى 300


عندك مطعم الفوركورنر بعد باب نادى الجزيره فى عماره فوق بنك كريدى اجريكول ده غالى شويه

عاوز تقضيها مكرونات عندك مطعم ديدوس فى شارع اسمه حاجه صبرى ده سعره رخيص واكله حلو هو معروف

فيه عندك مطعم ابو السيد فى شارع 26 يوليو ده للاكلات المصريه بس يعنى ملوخيه بالارانب باميه وفته والاكل ده بس لازم تحجز بالتليفون عشان الممكان مش كبير والاكل حلو

[osama_alam]

مشكورين يا شباب وجزاكم الله خيرا بس سؤلين كده:

1- هوه المراكب اللي على النيل اقدر اروحها ازاي من الزمالك انا قاعد في فندق ام كلثوم قدام الكوبري اللي بينزلك على المهندسين
2- فين مطعم ابو السيد ده انا اتمشيت في شارع 26 يوليو وشفت مطعم توماس وشفت مطعم تاني اسمه الجمهورية بس مشفتش مطعم ابو السيد ده

وجزاكم الله خير

[دموع الثلج]

المراكب اللى على النيل فى شارع سراى الجزيره هوصفلك
انت عارف شارع 26 يوليو اخره فندق ماريوت الزمالك وقدامه باخره مكسيم الماريوت سيب الفندق وكمل كل البواخر على نفس الصف بتاع مكسيم الماريوت دى بس قدام شويه لحد ما توصل اخر الشارع لباخره البلو نايل

ابو السيد عنوانه 157 ش 26 يوليو وراء توماس على طول هو فى الشارع الضيق اللى جمب توماس مش على الشارع الرئيسى وده تليفونه 27359640

وفيه مطعم فلورنسيا فى فندق فلامنكو قريب جدا من مكانك اكلات مصريه برضوا وده تليفونه 27350815

ولو عاوز مطاعم اكثر كويسه برضوا يبقى فى المهندسين لو تحب هقولك عليهم

[blazer]

المراكب اللى على النيل فى شارع سراى الجزيره هوصفلك
انت عارف شارع 26 يوليو اخره فندق ماريوت الزمالك وقدامه باخره مكسيم الماريوت سيب الفندق وكمل كل البواخر على نفس الصف بتاع مكسيم الماريوت دى بس قدام شويه لحد ما توصل اخر الشارع لباخره البلو نايل

ابو السيد عنوانه 157 ش 26 يوليو وراء توماس على طول هو فى الشارع الضيق اللى جمب توماس مش على الشارع الرئيسى وده تليفونه 27359640

وفيه مطعم فلورنسيا فى فندق فلامنكو قريب جدا من مكانك اكلات مصريه برضوا وده تليفونه 27350815

ولو عاوز مطاعم اكثر كويسه برضوا يبقى فى المهندسين لو تحب هقولك عليهم

ايه المطاعم دى كلها
دا ولا الدليل :):):)
بهزر