لاحول ولا قوة الا بالله ... ( صنيعية أخرررر زمن )

[Y a r i s]

لاحول ولا قوة الا بالله
( حسبي الله ونعم الوكيل )



يارب اشكو إليك حالي : ( صنيعية أخر زمن ) .

عاوز اغير سلك الدبان والناموس بتاع الشبابيك عندنا كل ما اروح لصنيعي يقولي فك الشباك وهاتوا وانا هغيرهولك من عنيا ... فانا ارد عليه وهو انا لو اعرف افك الشباك كنت جيتلك يا بني ادم ... وبعدين افك الشباك ليه طب ما أخلعلك الشقه واجبهالك أسهل !!

سبحان الله تلاقيهم قاعدين وبيهشوا فدبان ويقلولك اصل السوق واقف والحال واقف والدنيا واقفه وتجيبلهم الشغل لغايت عندهم يقوموا يتمرقعوا ويقلك مش فاضي او هاتلي الشغل لغايت عندي ... والي فيهم بقه وصنيعي على حق. عاوز عربية تيجي لغايت عندوا عند باب المحل تاخدوا وعربية مخصوص. ترجعوا من البيت لغايت باب المحل ... والي يجننك لمن يجي يفتح واحد اجنبي ( فلسطيني ولا سوداني ولا سوري ) جمب منو يفتح ويشتغل ويرضى بقليلوا ويطلع معاك يشتغل انشالله حتى في نص الليل. يقولولك ايه الي جاب الاجنبي ده هنا الله يخرب بيوتهم خدوا رزقنا ... لاحول ولا قوة الا بالله هو لا منكم ولامن كفاية شرك !!

[تامر.محمد]

هي البلد دي في قاع الأمم حاليا من شوية ؟
بسبب عوامل كتير ده واحد منها

اللي حصل مع السوريين هنا في مسألة الشغل دي بالذات فتح عينينا على حاجات ما كناش فاهمينها , و يا ريته فتح عينين اصحاب الشأن

[A.Saad]

المويتال ولا خشب الشبابيك يا يارس
جرار ولا مفصلى

[Y a r i s]

المويتال ولا خشب الشبابيك يا يارس
جرار ولا مفصلى

المونيتال ياحمد باشا .. جرار بس المشكلة الواد الي فصلهم عملهم بطريقة ميتخلعووش غير بالطبل البلدي انا حاولت اخلع درفة البلكونة شفت الضرفة لقيتها اتعوجت كده وحسيت الحلق كلوا هيطلع في ايدي من المصنعية الي اي كلام .

المشكلة مش في كده انشاء الله هتصرف بس. تصور حتى باب الشقة مع البروده الباب بيمدد وميرضاش يقفل فرحت اجيب نجار. لقيت النجار كمان بيقولي طيب اخلعلي الباب وهتهولي هنا وانا هزبطهولك !!!

انتا شايف لاي مدى الصنيعية والبرود الي عندهم. عارف عملت ايه في باب الشقه جبت حتت صابونة وبليتها وليست بيها الباب من الجنب وبقى عشرة على عشرة :) هههه بقينا نفتكس :)

[Eng_hatemfathy]

وعلشان كده انا مريح دماغى وجايب معظم العدد وبعمل كل حاجه بنفسى سواء نجارة او سباكة او كهربا
لان يوم لما احتاج صنايعى بيبقى يوم ملوش لون ولازم هنختلف على الاقل لو ما اتخانقناش
بجد تلاقى الصنايعى عامل فيها شيخ الصنعة والاطة ملهاش اخر وشغله فى الاخر بيطلع ناقص ده اذا ما بوظش حاجه ويقولك اصل وفصل ويبقى عايز كمان فو قالاجرة الى اتف عليها
ربنا يتوب علينا من الصنايعية المصريين

[Y a r i s]

هي البلد دي في قاع الأمم حاليا من شوية ؟
بسبب عوامل كتير ده واحد منها

اللي حصل مع السوريين هنا في مسألة الشغل دي بالذات فتح عينينا على حاجات ما كناش فاهمينها , و يا ريته فتح عينين اصحاب الشأن

١١١١١١+
واللهي وواللهي والله. خدت الكلمتين من على طرف لساني يا تامر باشا
ده على مستوى. كيس العيش الابيض كنا بنجيبوا بتاع مصنع ريتش باك الكيس ب ٤ واحيانا البقال الي جمبنا يحب يستغل ويبعتوا بخمسة وسط الحساب ويستغل ان البت لوحدها مش هتعد وتفاصل وراه وتحاسب ... تصور دلوقتي. بقى في اكتوبر يجي كزا فرن سوري يعمل العيش الابيض وبسم الله مشاء الله كل رغيف ورغيف قااااااد كده وب ٢.٥ جنية فقط كيس العيش الشامي كلوو وتلاقي طري كده وزي الغريبة في ايدك .

على مستوى خيااااااط تودي البناطيل لخياط مصري يقعد يطلع عينك على عدي عليا بكرة طب عدي عليا بعد العشا طب بص تعاله بعد بكره وانشاء الله هكون خلصتلك زرار البنطلوم !!! تانيت البنطلوم بقو ياخدوا عليها ١٠ و ١٥ جنية ومش عاجبهم كمان وشغل عك في عك لزق بتفافه عدم المؤخزة واقلب . لكن الخياط السوري بعتلو بناطيل وحبت حجات كده ومسافة ماخلصت كلام مع واحد حبيبي شافني بالصدفة قدام المحل. لقيت الخياط بيندهلي وقلي خلاص اغراضك خالصين. وايه بقه شغل بجد بجد تسلم الايادي فنااااان وخد ٣ جنية بس على البنطلوم !!!

القصد في كل حاجة. الواد السوري صنيعي بجد وعندوا ضمير وفن مش موجود عند الصنايعي المصري. ليهم حق الخليجين بيدوا مرتبات. للسوري اعلى من مرتبات المصري ... شيء مؤسف الحقيقة مرقعة الصنايعية عندنا بجد شيء مؤسف مش فالحين غير انهم يطلبو زيادة وعاوزين فلوس فلوس وانتاج عك في عك

[Y a r i s]

وعلشان كده انا مريح دماغى وجايب معظم العدد وبعمل كل حاجه بنفسى سواء نجارة او سباكة او كهربا
لان يوم لما احتاج صنايعى بيبقى يوم ملوش لون ولازم هنختلف على الاقل لو ما اتخانقناش
بجد تلاقى الصنايعى عامل فيها شيخ الصنعة والاطة ملهاش اخر وشغله فى الاخر بيطلع ناقص ده اذا ما بوظش حاجه ويقولك اصل وفصل ويبقى عايز كمان فو قالاجرة الى اتف عليها
ربنا يتوب علينا من الصنايعية المصريين

واللهي انتا راجل ١٠ على ١٠ وجدع
فعلاً هو الزمن بتاعنا دهو زمن الي الواحد لازم يعمل كل حاجة بايدوو ولا الذل. لده ولده ... ياخي. ده حتى الصنايعية بيقعدوا يتنكوا على الواحد. ولا دكتور زمانوا ... لا ومش بس كده. اول ما يخش البيت يشغلك كل الي في البيت لحسابو يعني. مثلاً انا اقف على ايدو واسند معاه اي حاجة. ابني. فجئة يتحول بقدرة قادر لاسطة بلية ويناولوا مفك. شاكوش. مفتاح عشرة كده يعني. وطبعاً مراتي في المطبخ بتعملوا كوبايت الشاي. الي بيحبها شاي في الخمسين حتى بنتي الصنيعي يبعتها. تجيبلوا كوبايت ميه من المطبخ او يقولها روحي عند عمك عماد الموان. قليلوا لاسطى جمال بيسلم عليك وبيقلك هات الهلتي الي سلفتهولك امبار ح ههههههههه

[تامر.محمد]

واللهي انتا راجل ١٠ على ١٠ وجدع
فعلاً هو الزمن بتاعنا دهو زمن الي الواحد لازم يعمل كل حاجة بايدوو ولا الذل. لده ولده ...

انا برده باعمل كده دلوقت

انا فاكر مرة كنت محتاج سباك
قعدت اتصل بيه اسبوعين ورا بعض , و معاد ورا معاد
تقريبا نص اهله و جيرانه ماتوا في الاسبوعين دول و عزى فيهم واحد ورا التاني

طب مش فاضي اليومين دول يحترمني و يقول لي انه مش هايفضى قبل اسبوعين
لأ و ليه يطير الزبون ؟ يفضل يعطل في اللي جابوه لحد ما هو يفضى
حاجة تقرف

[friendship7897]

ههههه
واضح إن كلهم كدة
أنا كان عندي مفصلة ضلفة المطبخ اللي تحت الحوض أتخلعت
روحت لنجار قول له كدة : قال لي هاتيها
قولت له : هتركب المفصلة فين لو جبت الضلفة ؟
قال لي هاتي العلبة اللي تحت الحوض كلها !!!
قولت له : حاضر يا فندم ، بس ممكن طلب من حضرتك ؟
قالي لي بمنتهى الآلاطة : أتفضلي ؟
قولت له ممكن رقم تليفون نجار علشان يجي يفكها لي وأبعتها لك - ههههه

[lanos2004]

شوف هتدفع كام واجى اعملهولك-بالدولار

[AhMeD MeTwAlY]

واللهي انتا راجل ١٠ على ١٠ وجدع
فعلاً هو الزمن بتاعنا دهو زمن الي الواحد لازم يعمل كل حاجة بايدوو ولا الذل. لده ولده ... ياخي. ده حتى الصنايعية بيقعدوا يتنكوا على الواحد. ولا دكتور زمانوا ... لا ومش بس كده. اول ما يخش البيت يشغلك كل الي في البيت لحسابو يعني. مثلاً انا اقف على ايدو واسند معاه اي حاجة. ابني. فجئة يتحول بقدرة قادر لاسطة بلية ويناولوا مفك. شاكوش. مفتاح عشرة كده يعني. وطبعاً مراتي في المطبخ بتعملوا كوبايت الشاي. الي بيحبها شاي في الخمسين حتى بنتي الصنيعي يبعتها. تجيبلوا كوبايت ميه من المطبخ او يقولها روحي عند عمك عماد الموان. قليلوا لاسطى جمال بيسلم عليك وبيقلك هات الهلتي الي سلفتهولك امبار ح ههههههههه

انا بعمل معظم حجتي بايدي بس في اوقات بيكون عندي شغل بخلصه وانا علي الكمبيوتر فمش فاضي مره قالي هات مفك قمت نولته قالي هات البنسه قمت اديتهاله وقولتله انا عندي شغل مهم بخلصه لسه بيقولي هات مش عارف ايه قمت ماسكه وواخد العده كلها وواخده طرده بره بيقولي في ايه يا استاذ احمد قولتله لما اشتغل صبي هبق اجيبك

[تامر.محمد]

انا بعمل معظم حجتي بايدي بس في اوقات بيكون عندي شغل بخلصه وانا علي الكمبيوتر فمش فاضي مره قالي هات مفك قمت نولته قالي هات البنسه قمت اديتهاله وقولتله انا عندي شغل مهم بخلصه لسه بيقولي هات مش عارف ايه قمت ماسكه وواخد العده كلها وواخده طرده بره بيقولي في ايه يا استاذ احمد قولتله لما اشتغل صبي هبق اجيبك

هههههههههههههههههههههههههههههههههههههههههههههههههه ههههههههههههههههههههههههههههههههه

[horas3000]

حكايه كل بيت مصري

[eslamrace]

المشكله مبقتش مشكله صنايعى وبس ده بقي جيل بحاله فى جيل طالع اتربى على الانتخه سواء متعلم "فبيحسس نفسه ان مجابتهوش ولاده وانه بيشتغل حاجه مش من مستواه "او غير متعلم "فبيتعامل من ناحيه مش المتعلمين دول بيتعوجوا علينا طيب اهم بيجوا عندنا واحنا بنتحكم فيهم "
والصنايعى المفترض انه يكون اقدر الناس فى صنعته بحيث ان الناس لما تطلبه تكون بتطلبه فى حاجات فنيه ميقدرش حد غيره يعملها ولكن تحول دلوقتى لمجرد تقفيل شغل بمعنى ان اغلبنا بيجيب الصنايعى يعمل حاجات بسيطه فى البيت بس لمجرد ضيق الوقت او انه مش عايز يحاول فيها وبالتالى تحول الفنى الى اى شخص عنده قدره الافتكاس فممكن تلاقى واحد عايز يحسن دخله فيقولك انا كهربائي لمجرد انه مره وهو صغير حط مفك تست فى بريزه كهرباء فنورت فقالك مهو موضوع بسيط اهو ونتعلم فى خلق الله علشان كده ضاع الفنى وسط الصنايعى والمفترض الصنايعى المنيل ننصح صحابنا وجيراننا واهلنا ميتعاملوش معاه لان لما القرش يقل معاه حيعرف انه لازم يسمع لشكاوى الناس منه ويغير سلوكه ولو فى صنايعى كويس برضه ننشر خبر انه شخص كويس لعله رزقه يزيد ويتعلم ان حسن المعامله والصنعه بتتقدر
ويا ريت لو حد يعرف شركات او مكاتب توريد صنايعيه حتى لو بسعر اعلى شويه ولكن حنبقى مرتاحين ان فى مقر للشركه لو رحت عملت قلق حيريحك علشان سمعته وغالبا كل الدول المحترمه بتتعامل بالشكل ده

بنفس الطريقه علشان نعرف حجم المشكله فى فئه الشباب كل شاب نفسه يتعين فى شركه بمرتب كويس عظيم هاته شغله فى شركه قطاع خاص يتفحت فورا تلاقيه بيقولك انا عايز حاجه حكومه انتخه اروح الساعه 3 وعندى تامين ومعاش واهو اسمى شغال وطبعا لما يلاقى وظيفه احلامه فى القطاع الحكومى بيكون مش عايز يشتغل ويتعوج على خلق الله مش علشان هو وحش بس علشان "المرتب ضعيف ومبيكفيش والدنيا وحشه والحكومه لازم ترفع المرتبات " فمن النهايه قله قليله من المصريين هم اللى بيشتغلوا بجد واغلب الباقى بيشتغل مضطر ولو خيرته ياخد 700 جنيه بدل وظيفه "اعانه بطاله "او يشتغل ب 1200 جنيه غالبا حيختار الاختيار الاول وده افه مجتمعنا ان الصنايعى والموظف والعامل والفلاح والتاجر بيستنى المكسب الكبير قبل ميشتغل ويفضل يلف فى دوامه هى العيشه الكويسه الاول ولا الشغل الاول وكأنها "البيضه ولا الفرخه "وبالرغم ان اغلب الدول فهمت ان الشغل والتعب حتى لو بمقابل قليل هو السبيل للعيشه الكويسه لسه لحد دلوقتى احنا تايهين .

بس احقاقا للحق انا اتعاملت مع صنايعيه محترمين جدا جدا وناس زى الفل ولكن للاسف الغالب بيبقى ظاهر اكتر من المحترمين
والحل كنت قايله فى موضوع عن مجانيه التعليم من فتره الغاء مجانيه التعليم الجامعى وتوجيه الاهتمام للتعليم الفنى علشان يدخل فى المجال ده ناس حابه وفاهمه ومطلوبه فى مجتمعنا

كلنا بنشارك فى سوء البلد دى بشكل مباشر او غير مباشر .
تحياتى .

[Mohamed_Hamid]

يا عمدة مفيش غرابة هو ده المصرى