المريوطيه ؟؟؟؟؟؟؟؟

[midoabdeen]

السلام عليكم ورحمه الله وبركاته

حد سمع عن شقق فى المريوطيه سعر الشقه ال 100 وحاجه متر اقل من 100 الف ج

لسه سامع الحوار دا وعايز اتاكد منه بس مش عارف فين بالظبط حد يعرف حاجه زى كده

علشان خلااااااااااص الواحد قرب يتجنن من الاسعار اللى ما يعلم بيها الا ربنا

[midoabdeen]

ايه يا جماعه محدش يعرف خالص
عموما انا جبت العنوان ياريت اللى يعرف يدلنى اذا كانت كويسه اروح ولا لا

شارع مسجد التوحيد متفرع من شارع المجزر المريوطيه الهرم بجوار مدرسه الاورمان

ياريت اللى يعرف اى حاجه عن المنطقه دى مايبخلش بالمعلومه

[الجنرال]

من خلال اللى سمعته (وليس عن تجربة شخصية)

ان الشقق دي بتبقى مبنية بالمخالفة (يعنى هو مترخصله 4 ادوار مثلا وهو بنى فعليا 20 دور)

وده ليه تبعاته على الاساسات ومدى تحمل المبنى للادوار الزيادة والحوارات دي

والحاجة التانية اللى عرفتها انها بتبقى متباعة لكذا حد .. يعني الشقة دي ممكن يكون بايعها لاتنين تانيين قبلك واتنين تانيين بعدك .. وانتوا الخمسة بقه اتصرفوا مع بعض وهو يكون خلع بالفلوس

اللى عايز اقوله فى الاخر .. خلي بالك وخليك حذر

[ahmedwagdy03]

أرد على الأخ الجنرال : ده لو ليها رخصة من الأساس

بس يا سيدى بصفتى مهندس مدنى أقول لسيادتك إن الكلام ده يستحيل عمليا و إقتصاديا و بحساب التكلفة و حسابات المكسب و الخسارة لسبب بسيط جدا
سعر المتر المربع 1000 جنية مش حنقول أقل : تخانة بلاطة السقف لوحدها تعمل مع الكمرات متوسط 20 سم و لو فرضنا أن سعر التكلفة للمتر الخرسانة بحديده و مصنعياته شاكب راكب فى حدود 2000 جنية ( ده لو خرسانة تشيل بيت مش نظام أبو لبدة ) يبقى تكلفة المتر من الشقة لوحده 400 جنية و لسة الأعمدة و البلوك ة التشطيب و تحميل المرافق و السلالم و الذى منه و تحميل سعر الأرض -ده لو ماكانتش أرض زراعية و واخدينها عافية بدون رخص و لا حاجة و سلملى على الإنفلات الأمنى و سبوبة المحليات .

غالبا يا سيدى العمارة دى مثل أى عمارة شيطانية لوزعية طلعت فى شهرين كما الحال عندنا فى إسكندرية .

طبعا عايز الخلاصة :

1- موضوع التراخيص و القوانين : ما تقلقش منه بتاتا لإن محدش فاضى للأمن و القانون و الكلام الفارغ ده . شكلهم حيفضلوا يجروا ورا بعض فى الشوارع كتير و فى الآخر حيعملك قانون توفيق أوضاع و غرامات و مراكز قانونية و موافقون .

2- القلق الحقيقى هو سلامة المبنى و هل قطاعات الأعمدة تتحمل الإرتفاعات و نوع التأسيس على التربة و أعتقد فى حالة المريوطية بتبقى أرض زراعية يعنى لازم خوازيق 100% لأى إرتفاع فوق 4 أدوار حسب ما أتذكر و أى نوع آخر زى الرافت و السملات و الكلام ده فأبشرك أن العمارة فى أحسن الأحوال حتميل