ضابط متخصص ولا مهندس ... ج2

[diablo1231]

السلام عليكم

مبدأيا انا كنت عملت موضوع قبل كده و كنت بستشير الناس في موضوع اني اخش الاكاديمية الحربية ولا اكمل مهندس ....
اللي اختلف هو اني دخلت الجيش مجند بقالي شهر اهو يعني ناقصلي 11 شهر و اسلم و في نفس الوقت مقدم في الكلية الحربية و عديت اول مرحلة في الكشف الطبي ......

المشكلة اني مش عارف احدد اي حاجة ... انا مخنوق و نفسي اخلص السنة بتاعة الجيش و ادي الخدمة الالزامية و اخلص من الميري و بهدلته مع اني مقدم كلية حربية .... ببقي خلاص مقرر اني مكملش في الكلية الحربية بس والدتي و بعض اصدقائي يرجعوا يكلموني عن احوال البلد و ان مفيش شغل و المرتبات و الكلام ده فمش عارف احدد حاجة ....

انا خريج هندسة حلوان دفعة 2013 بتقدير جيد اتمني من الناس لو تنصحني في الموضوع ده و شكرا !

[ahmedsamir79]

الشخص الوحيد اللي ممكن يفيدك هو نفسك.
أنت اكتر واحد عارف نفسك كويس.

ملحوظه مهمه :غالبا أي حد بيرد عليك حيكون بيفتي لسبب بسيط انه حاجه من تلاته:
1-مهندس في الحياه المدنيه ميعرفش حاجه عن الضباط المهندسين
2-ضابط مهندس ميعرفش حاجه عن الشغل في الحياه المدنيه لواحد خريج جديد
3-لا ده ولا ده و بيقول اي كلام

أسف علي الاحباط

[abouzaid555]

السلام عليكم
انا مخنوق و نفسي اخلص السنة بتاعة الجيش و ادي الخدمة الالزامية و اخلص من الميري و بهدلته مع اني مقدم كلية حربية ....

يعنى حضرتك بقالك شهر فى الميرى و مش طايقه و زى تعبيرات حضرتك انه بهدلة يعنى حضرتك بتجاوب على نفسك مع العلم انى انا شخصيا بقالى 24 سنة فى الميرى و شايفه عكس حضرتك بالمرة الميرى يعنى ( الرجولة - الجدعنة - خبرات مكتسبة فى حياتك الشخصية و العملية - ظروف صعبة ينشأ عنها رجل كيس عنده حنكة فى التصرفات حيال المواقف الطارئة - الصبر و كثير و كثير و كثيرر.......... ) يعنى شخصيتك هى مرآة حياتك أقرا ما بداخلك حتى ترسم مستقبلك يا أخى الكريم ..

[kliken]

القرار فعﻻ صعب
الحيره ما بين انك تكمل ميرى او الحياه المدنيه و العمل كمهندس و المشكله طبعا ان الدنيا مقفله شويه اليومين دول و الشغل بقى صعب الحصول عليه كانت على ايام ما اتخرجت انا كان افضل كتير
بالنسبه ليا لو انا مكانك كنت هختار الحياه المدنيه بمميزاتها و بعيوبها و ممكن اصبر احد ما ربنا يكرمنى بشغل و الرزق بتاع ربنا
انا ليا اصدقاء اختاروا الحياه العسكريه برضه دفعتى و مبسوطين
القرار بيرجعلك انت عاوز ايه و ميال ﻻيه
انصحك بكتر اﻻستخاره و ان شاء الله ربنا يلهمك و ييسرلك اﻻمور لما فيه اﻻفضل ليك و لمستقبلك

[Nistelrooy]

خد في الاعتبار حياة العسكري في الميري تختلف عن الظابط

هيبقي عليك مسئولية اكتر بس مش هتتعب زي ما العساكر بتتعب ..

[تامر.محمد]

نصيحة اخوية بلاش الميري خصوصا الفترة دي

[elnakshabandy]

نصيحة اخوية بلاش الميري خصوصا الفترة دي

؟؟؟؟؟

[Mostafa.Ismail]

طيب شوية معلومات بس ... انت هندسة اية؟ قسم اية يعنى؟ بتعرف اية؟ ممكن تشتغل اية؟ اتدربت فى الصيف قبل كدة وفى اية؟ ناوى تكمل فى تخصصك ولا شوية وممكن تقلب تجارة فى حاجة بتحبها؟

نصيحة اخيرة ... سيبك من موضوع الحياة العسكرية رجولة وتحمل مسئولية و ملوخية والكلام اللى لا بيودى ولا بيجيب دة.
موضوع الشغل دة رزق وبتاع ربنا وملوش دعوة باى حاجة .. بس انك بتسعى وبتاخد بالاسباب طبعا دة شىْ يحترم.

[أحمد كمال]

ما تمشيش ورا كلام والدتك و الناس الكبيرة لسبب بسيط

هما مش عارفين طبيعة سوق عمل الشباب في المجالات اللي ما كانتش موجودة ايامهم


زي ما والدي و والدتي عارضوا تماما اني اخش مجال ال it لانهم فاهمين ان اي واحد قاعد قدام كيبورد يبقى بيفهم في كل حاجة و مالهوش لزمة ....... و كانوا فاهمين انه مجال فاشل


غير انهم كانوا عايزينني اشتغل في القطاع العام من باب "قليل دائم خير من كثير منقطع"


الاهل للاسف بيفكروا بمبدأ السلامة بس بزيادة أوي .... 500 جنيه كل شهر مضمونين احسن من 5000 جنيه كل شهر و احتمال كل فين و فين يقلوا !!

[amr011111]

اللى اعرفه من موضوعك القديم انك مدنى تقريبا او معمارى
فطبعا سيبك من سكة الكلية الحربيه
سوق العمل بره مفتوح ان شاء الله
حتى لو قعدت سنه فى البيت هتلاقى شغل بعدها ان شاء الله ومع الوقت هتغير شغلك كل فتره لشركه اكبر ومرتب اكبر وخبرتك هتزيد
انما فى الجيش مش هيبقى عندك اى خبره هندسيه

[Hikayat]

موضوعي ده ممكن يفيدك

http://www.nilemotors.net/Nile/389444-a.html

[SeiffoZ]

لو غاوى تدخل جيش عشان عاجبك المجال العسكري او بتفكر تتحول ضابط حربى يبقى ادخل، لو عايز مجال الهندسة بسص الجيش بالنسبة ليك وظيفة بلاش.

[م/مصطفى محمود]

انا ليا زميل كان معايا فى الجيش (تجنيد إجباري) وقدم ضباط متخصصين وبعدها بشهر إستقال

وصديقي فى الشغل نفس الموضوع دخل شهر وإستقال (والإتنين مهندسين)

بص ، الرزق مكتوب وهتاخدة فى الحياة المدنية أو العسكرية ، فى مصر أو فى الخليج

لو عايز تدخل الجيش علشان وطنية وتقدم حاجه للبلد و و و و (نية يعني ) يبقى توكل على الله

لو عايز تدخل علشان إستقرار ، فنصيحة أخوية بلاش ، دوس فى الحياة وجرب أحسن كتير ، جرب إشتغل فى شركات تحت السلم وشركات محترمة ، جرب تفتح حاجه خاصة جرب تشتغل فى المجال الأكاديمي ، فرصك وانت برة الجيش أحسن

ونصيحة بجد ، هات رواية الخيميائي ;)