الميكروباص والدائرى والاءيفون والميتال

[Astro BoY]

#حدث_بالفعل ركبت ميكروباص منيب معادى فيه السواق و ٢ وراه, واحد فيهم مسمعتش صوته خالص طلعت و العربيه مشيت شويه لقيت ال٢ طلعو مطاوى و طلع اللى معاك مفكرتش انا على الدائرى و مفيش غيرى و دار الحوار التالى: انا: اهى المحفظة هو بعد ما شاف المحفظة: الحق ياسطى دا معهوش الا ١٥ جنيه السواق: ايه دا دانتا جربوع هو: طب هات ياض "التلفون" انا: خد اهو -iPhone 5- انا لنفسى: يلهوى اسود هو انا ناقص هو: صينى دة ؟ انا بفرح: اه اه صينى هو: طب افتحه و بعدين عاملة انجليزى ليه ؟ هتعملنا فيها خواجة انا: خد اهو فتحتة و معلش مش انا اللى عامله دا الواد ابن اختى بس عيل عفريت هو: اه طيب -بيحاول يدوس على زرار Back و الأيفون مفيهوش زرار Back أصلا- هو: البتاع دا مبيرجعش ليه انا: الزرار بايظ و معييش فلوس اصلحه, اعمل ايه بس هو وهو مضايق: امسك يا يعنى صينى و كمان بايظ انا و فرحان بقى: خدة يا عم دا قارفنى هو: اخدة عشان يقرفنى ههههههه -ضحكة غلسة- هو: يا اسطى دا شكله زى حلاتنا هديله حاجته السواق: اديله يا عم احنا مبنجيش على الغلابة السواق: شغال ايه بقى يابا؟ انا: شغال فى سنترال السواق: ربنا معاك, متشغلنا حاجة بقى من البتاع دة انا و بفتح ال Playlist الواد اللى جمبى: انت لسة هتدور و راح دايس على الشاشة مشغل Slayer-Blood line السواق: ايه دا, ايه يا عم الدوشة دى انا: ميتال الواد و السواق فى نفس واحد: ايه ؟ انا : دربكة اسم الموسيقى دربكة الواد: دوشة اوى الدربكة دى انا: الواد ابن اختى هو اللى حاطتها انا: خد بقى الأجرة السواق: عليا الطلاق بال ٣ منا واخد منك اجرة انا: ربنا يخليك يا ذوق و خد منى الكوفيه و سابهالى قالى حرام عشان هترجع باليل فى البرد حرام و وصلنى لحد صقرقريش ادام سنترال -المفروض انى شغال فيه- و نزلت فى سلام الحمد لله
منقول من صفحة نايل موتورز على الفيس بوك

[mastr_n]

القصة دية اتهرت كتير على الفيس بوك

[1.8Tee]

slayer برضة عندهم جذور مصرية :)...كانوا صوروا اغنية seasons in the abyss فى اول التسعينات فى مصر عند الاهرامات و فى معبد من المعابد و النيل.

[ابو لؤى]

ممكن اعرف ايه فايده القصه دى المفروض الحراميه يصعبو علينا يعنى ولا ايه بالظبط ؟

[dr.hazem]

ههههههههههههه
شر البلية ما يضحك

تحياتي