موضوع خطوبة

[moody_687]

دلوقتي انا اتقابلت مع بنوتة واهلها ومعايا امي واختي ووالدي مجاش لظروف شخصية
اهلها كويسين جدا ومستعدين يسعادوني ف موضوع الزواج وامي واختي مبسوطين باهل العروسة انا برده انبسطت من اهلها
المشكلة ان العروسة مش مالية عيني كجمال حاسس انها مش هي دي وطلعت من المقابلة امبارح حاسس انى عادي مش حاسس بسعادة صليت استخارة ومحستش بحاجة
ففتحت الموضوع مع والدي فقولتله اهلها كويسين وهى كويسة بس انا شايفها عادية مش جذباني نهائي فقالي خلاص كل شئ قسمة ونصيب وامي زعلانة مني عشان رافضها
دلوقتي ف حلين فبالي يااما اقابلها هى واهلها ومعايا ابويا ونرد العزومة وف نفس الوقت ادي لنفسي فرصة تانية
واما انى ابلغ قراري ليهم
انا كان ليا موضوع قبل ذلك مع خطوبة كنت رافض البنت ووافقت عشان امي تعبت وفي الاخر اتفكت وكانت خطوبة صالونات ومن ضغوطات من والدتي قريت فاتحة معاه عشان امي كانت مربياها وكان عندي اعتراض ع البنت واهلها وبالرغم من ذلك قريت فاتحة عشان قولت ان البنت مؤدبة ومش مشكلة الشكل وف الاخر الخطوبة اتفسخت
انا مش عايز اكرر نفس الغلطة تاني انا عندي 26 سنة وامي زعلانة والله ماعارف اعمل ايه

[mustafavet]

هو طبعا رضي الام شيء مهم جدا
لكن
الواقع بيقول انك مش هتبقي مستريح وحتي لو حسيت براحله مع اول بنت هتشد انتباهك هتقلب حياتك
الافضل
ابعد عن فكرة الزواج حتي تجد من تتخيل نفسك معها ولا تتخيل ان ف الوجود من هو افضل منها
ربنا يرزقك الزوجه الصالحة

[nab!l]

ادى لنفسك فرصة تانيه ... لكن متسيبش نفسك اوى لضغوط الوالدة لاانك انت الى هتتجوز مش حد تانى

[moody_687]

ادى لنفسك فرصة تانيه ... لكن متسيبش نفسك اوى لضغوط الوالدة لاانك انت الى هتتجوز مش حد تانى

ازاي ادي لنفسي فرصة تانية ؟

[dede_dodo88]

طب أنت معرفتك للبنت نفسها تمت أزاي ؟ صالونات برضه؟! يعني أيه درجة المعرفة بينكم ؟..

[samyyousef]

يجب ان تتزوج عن اقتناع
يجب ان تكون راضي..او سترضى

[hossam_elwani]

الانطباعات الاولى تدوم


اخلع من الموضوع

[amoor89]

اسمحلى اقولك ان طاعة الوالدين طبعا شىء مفروغ منه لكن فى مواضيع الجواز دى بلاش يكون قرارك مبنى على وجهة نظر والدتك لانك هتتعب بعد كده واظن انت بنفسك جربت ولقيت مش نافع ومش معنى كده ان نظرة الوالدة للبنت دايما خطأ لا لكن لازم يكون القرار منك انت وبس وحط تحت دى مليون خط
عن تجربة شخصية فى خطوبتى لما اتقدمت لخطيبتى شفتها الأول ولما لقيت انى مستريح للموضوع قولت لأهلى انهم يسألوا عن أهل البنت فقط مش عليها هيا لان دى كانت مهمتى
من الأخر الأهل دورهم انهم يختاروا النسب من ناحية أهل البنت لكن مش يفرضوا حد معين عليك لمجرد انهم شايفين انها مناسبة ليك
متستعجلش القرار ده مش سهل لانك بتبنى حياة كاملة ومتبتديش حاجة انت مش مقتنع بيها من الأول

[medo_2060]

طالما مش مقتنع من الانطباع الاول وزياده كمان تجربتك الى تمت تحت ضغط اقدر اقلك اوعى تاخد واحده استخسار لمجرد انها مؤدبه واهلك بيشرحوها.. اخلع من الموضوع دا بدرى.. دا مجرد رأى شخصى وربنا يوفقك لما فيه الخير.

[moody_687]

انا خلاص اخذت قراري ووالدي مأيدني فيه وقالي مادام مش مليت عينك خالص وامي مشكلتها انها خايفة انها متفرحش بيا

[moody_687]

طب أنت معرفتك للبنت نفسها تمت أزاي ؟ صالونات برضه؟! يعني أيه درجة المعرفة بينكم ؟..

صديقة والدتى دوول من طرفها وده كان اول تقابل بين العائلتين وقعدت معاها ساعة الاربع وسط الاهل وخرجت من المقابلة دي انى شايفها عادية مش شداني شكلا لكن كادب واخلاق موجود وربنا يوفقها مع حد احسن مني

[elfarashah]

سلام الله عليكم ورحمته وبركاته
مــع إحترامي لكل الآباء والأمهات لكن اللي هيتجوز هو حضرتك مش أي حد تاني
يبقى القرار الأول والأخير ليك إنت ، وبعدها تيجي موافقة الأهل من ناحية الأصل والحسب والنسب والعيلة ، حتى الشكل نفسه يرجعلك إنت ، وفي نفس الوقت لو البنت مؤدبة وأهلها ناس كويسين يبقى إدي لنفسك فرصة تانية تعرفها مش يمكن تشوفها بشكل أفضل عن المرة الأولى؟ علشان لما تقول أه أو لأ يكون عن إقتناع وماترجع تندم بعدين وتحط نفسك في كل الحيرة دي ، وبالتوفيق

[wawamoha]

اتكلم مع البنت زياره و اتنين و يا سلام لو والدتك تقول لوالدتها عل جنب كده ان لازم يتكلمم مع بعض شويه ... علشان يبقم مستعدين لو ما حصلش نصيب .... بس في الاخر شكلها مش عاجبك و ماشدتكش تقييم سطحي جدااااااا

الاهم بقى مش الشكل بس ... لازم تشوف شخصيتها و طريقتها في الكلاتم و التفكير ....الخ و شويه اختبارات صغيره كده عن موقف حصلك ...الخ

بيقى الواحد مننا متهياله انه هايختار انجلينا جولي ....يطلع محمود عويس في الاخر
و بعد ما تتدبس يتضح ان محود عويس بتاعنا هو انجلينا بتاعتهم ..
بالشفا

[hazemhassan]

انا خلاص اخذت قراري ووالدي مأيدني فيه وقالي مادام مش مليت عينك خالص وامي مشكلتها انها خايفة انها متفرحش بيا

انت كدة عملت الصح
وانا كمان حصل معايا نفس اللى حصل معاك بالظبط ووافقت عشان امى وخايفة بردو انها ماتفرحش بيا وكل الكلام دة بس معرفتش اتأقلم مع البنت وانسحبت من الموضوع و اخذت قرار مع نفسى انى مش هوافق على اى موضوع تانى غير لما اكون انا شخصيا مقتنع بي 100%

[moody_687]

سلام الله عليكم ورحمته وبركاته
مــع إحترامي لكل الآباء والأمهات لكن اللي هيتجوز هو حضرتك مش أي حد تاني
يبقى القرار الأول والأخير ليك إنت ، وبعدها تيجي موافقة الأهل من ناحية الأصل والحسب والنسب والعيلة ، حتى الشكل نفسه يرجعلك إنت ، وفي نفس الوقت لو البنت مؤدبة وأهلها ناس كويسين يبقى إدي لنفسك فرصة تانية تعرفها مش يمكن تشوفها بشكل أفضل عن المرة الأولى؟ علشان لما تقول أه أو لأ يكون عن إقتناع وماترجع تندم بعدين وتحط نفسك في كل الحيرة دي ، وبالتوفيق

انا اول تجربة ليا مكنتش مقتنع وقلت لا ومن ضغط امي وافقت وقريت فاتحة وانفسخت الفاتحة
وحاليا بتكرر نفس ضغوطها عالية وعايزة تفرح بيا وانا مش بلومها بس مادام البنت مش جذبتني شكلا يبقى ليه اعطي نفسي فرصة انى اكمل
انا مبدأي عنوان جواب المرأة هو جمالها ومضمون الجواب هو ادبها وروحها والاتنين لا يستغنى عنهم بالنسالي