ملحوظات هامة قبل ما تروح العمرة وتدبس وكل ما يلزمك من رفايع صغيرة واماكن الاكل

[الفجر]

اولا اسال الله ان الموضوع اللى هكتبة يكون فى ميزان حسناتى اللى للاسف خالى من الحسنات حتى الان ومووضوع يهم كل معتمر من رفايع صغيرة وهدايا واكل ومنين وبكام وطبعا مش هدخل فى مناسك العمرة لان الكل عارفها اوى

ودلوقت اعضاء المنتدى المعتمرين الكرام ويارب يوفقنى ويرزقنى واحصلكم تانى اهم ملحوظات والاحتياجات والرفايع الاكل وكل ما تتخيلة

اولا

احتياجاتك قبل ما تركب الطيارة ولا تستغرب من كلامى

قبل كل شئ شوف الشركة السياحة اللى انت رايح فيها محترمة وهتقعدك فعلا فى الفندق اللى اتفقتوا علية ولا ضحكت عليك عشان بتحصل كتير جدا

خد معاك خرطوم رفيع ربع متر (ضرورى جدا جدا ) لية يا حاج عشان كولديرات المياة الزمزم فى مكة او المدينة داخل الحرم عملنها بطريقة فتحة ضيقة اوى بحيث ان اخرك تملى كباية مية بلاستيك فقط مش تملى جركن زمزم وللا حاجة قالخرطوم هيريحك تحط الخرطوم فى فتحة كولدير زمزم والفتحة التانية فى جركن لان الجركن مستحيل يدخل داخل الكولدير وهما قاصدين كدة عشان تظطر تشرب فقط كباية زمزم مش تعبى ومباة مياة وتروح بيها على الاوتيل والفندق اللى انت نازل فية

اتمنى تكون النقطة دة مفهومة وشرحها وصل وعلى فكرة وانت خارج فى المطار انت ليك جركن واحد فقط مية زمزم على كل باسبور وتمنة حسب حجمة العشرة لتر ب 17 ريال وتغليفة ب 10 ريال وفى جركن كبير ب 35 ريال وتغليفة وشحنة على الطيارة ب عشرة ريال تقريبا ايضا فاعمل حسابك على 100 ريال شراء جراكن زمزم لو انت وعيلتك راجعين وايضا اعرف ان الجراكن لمياة زمزم لا تشترى الا من المطار فقط فلا تتعب نفسك وتشترى جراكن زمزم من خارج المطار لانك هتحبر على تركها وايضا معلومة ليك المياة المعدنية هناك اغلى من البنزين

اعمل حسابك على معلبات كنير تاخدها معاك زى معلبات التونة وما تتكسفش من كدة لان المعلبات هناك غالية جدا والاكل والفاكهة عموما فى السعودية غالى جدا جدا ويكفى انك تعرف ان كيلو العنب هناك على سبيل المثال يعدى العشرين ريال الكيلو !!!يعنى 40 جنية مصرى تقريبا !!

خد معاك غلاية شاى صغيرة لان كباية الشاى خارج الحرم ممكن تلاقيها بخمسة ريال والقهوة و 10 ريال ودة الاسعار اللى انا شفتها بعينى فى ابراج مكة فى شهر رمضان الماضى

خد معاك كاميرا كويسة اوى بصراحة انا استلفت كاميرا من صديق لى دة لو مقدرتش تشترى كاميرا غالية بطبع والكاميرا مهمة جدا لاتقاط زكرياتك وانت فى الحرم لانها لحظات لا تنسى ابداخصوصا حول الكعبة

خد معاك جلاليب فقط ولزوجتك عبايات سوداء فقط وشباشب فقط لاغير ولا تاخد معاك اى اطقم قميص وبنطلون واللبس المصرى المعروف اياة ولا حتى جزم لانك مش هتلبسهم اساسا وهتعرف بعدين لية بقلك كدة

خد معاك ملايات وافرشها على سراير الفندق وحتى اتغطى بيها وخلى غطاء البطانية فوق الملاية منعا لاى انتقال مرض جلدى من فرش الفندق

الشبشب المخيط اللى هتشترية غالبا هيكون شبهه الاف الشباشب داخل الحرم فعشان لا تاخد بتاع واحد تانى زى ما حصل معايا هههههه ابقا علمة بعلامة ولا حاجة واحفظ مكانة جيدا داخل الحرم وضعة فى مكان اامن اثناء الطواف

لا تاخذ معاك ادوية نهائيا لان ممكن يكون من حظك الوسخ انك تقابل حد هناك يعمل جريمة عشان قرص اسبرين ويحسبة عليك قرص مخدرات فارجوك لا تصطحب معاك ادوية نهائيا الا للضرورة القصوى كادوية الضغط والسكر والبرد وادوية الاسهال اه شئ لان هناك اكل المطاعم بيعمل امساك شديد جدا جدا

الشنطة السفر لازم تكون بعجل متحرك عشان تسهل معاك الشيل والحمل وتكون جلد مش بلاستيك لانها هتترزع فى مطار القاهرة من العمال فى مطار القاهرة وهتكسر لو كانت شنط بلاستيك وهتندم جدا

وانت فى الطيارة المضيفة اسيوية الجنسية لو راكب طيران سعودى فجاول تعرف كلمتين انجليزى عشان تعرف تطلب منها حاجة مهمة خصوصا لو الركاب اللى جنبك ناس بسطاء فانت هتكون المتحدث الرسمى ليهم خصوصا انك هتشوف اشكال غريبة معاك فى الطيارة ومن مجاهيل القرى والنجوع فاستحلمهم وساعدهم مع المضيفة الاسيوية...... وملحوظة لا تطلب اى وجبة فراخ فى الطيران السعودى ولكن اختار وجبة اللحمة فقط لاغير وحاول يكون كرسيك فى الطيارة بعيد عن الجناح عشان صوت الموتور لا يزعجك مباشرة ومعاك قطن تسد بية ودنك لو بتصدع من صوت الطيارة وبيجيلك دوار

لو تقدر تشترى حامل الشنط اللى بعجل وقاعدة من تحت عشان تحمل علية جراكن زمزم والرفايع الصغيرة اشترية من مصر ارخص اما فى المملكة السعودية فتمنة خارج الحرم عند محل الشهير سلسلة ابن داود 80 ريال وفى شارع الستين المشهور تمنة حدود الخمسين ريال فحاول تشرية من مصر بس حقيقى ما عرفش فىى مصر تمنة كام ومنين لانى ادبست واشترية من المملكة لان محدش قالى ونصحنى باهمية حامل شنط اللى بعجل فى تجميع الرفايع والجراكن

خد معاك قلم ملون فلمسطر عشان تكتب علية الشنط سواء وانت رايح او انت راجع بحمد الله عشان تعلم شنطك بسهولة فى المطار وعلى السير المطار لان اغلب الشنط شبهه بعض جدا فتمميز الشنط لازم انت اللى تعلمة بنفسك وبعلامات مميزة جدا لانها بتبقى حوسة وخناقة فى المطار بسبب تشابة الشنط خصوصا ان مطار القاهرة المعاملة فية سئية جدا

لو مسافر فى الصيف فلازم تشترى شمسية سوداء لان الشمس حارقة جدا ودرجة الحرارة فى الظل 45 اما فى الشمس فممكن تصل الى 80 !!! وعلم الشمسية بعلامة مميزة عشان ترفعها لفوق ومراتك تقدر توصلك فى الزحمة الشديدة خصوصا ايام الاجازات والجمعة هتتوة انت ومراتك من بعض فى الزحمة فاستخدم الشمسية كعصايا مميزة ليك ومراتك تقدر توصلك

واحسن حتة تتقابلوا فيها انت واسرتك فى الحرم بعد الصلاة امام باب اسمة باب عمرة الشهير تقريبا باب عمرة رقم 64 ان لم تخنى الذاكرة لانة فاضى نوعا ما وتبعد عن زحمة عن باب الملك عبد العزيز اللى ادام برج الساعة مباشرة وكلها توهان فى الزحمة يابا

لو روحت معاك اطفال فاحسن مكان ليك فى الحرم الدور العلوى اللى فوق خالص دة لو كانوا فتحينة لانة واسع والاطفال ممكن يلعبوا خلفاك مع الجنسيات الاطفال التانية دون مشكلة ودون ازعاج للمصلين والاولاد مش هيملوا فى الدور العلوى دة

لما تروح المدينة خد معاك مصلية يوم الجمعة فى الزحمة الشديدة غالبا مش هتلاقى مكان الا خارج الحرم وبالتالى هتصلى على الرخام وللاسف الرخام هناك بيمتص الحرارة اوى لدرجة انك متقدرس تسجد وتحط راسك علىا لرخام من شدة الحرارة !! اما فى مكة فالرخام هناك معمول بطريقة خاصة جدا ولايمتص الحرارة نهائيا مهما كانت درجة الحرارة

احسن شركة موبيلا هى الstc والمكالة الدولية منها لاهلك فى مصر ارخص من اى شركة اتصالات تانية بس اياك تاخد شريحة مجهولة ام 40 ريال من اللى تتباع فى مطار جدة وهتلاقى عامل فلبينى اسيوى الشكل بيعرضها عليك لان الشريحة لما تخلص مش هتقدر تشحنها تانى لان الشريحة لازم تكون باسمك فاحسن شئ اشترى شريحة باسمك على الجواز او على جواز احد اصدقائك فى السعودية لو ليك حد هناك عشان تقدر تشحنها تانى

اخيرا اول ما تزل الحرم اياك تاخدك العاطفة انت ومراتك وتروح تبوس الحجر الاسود بعد الطواف لانك ممكن تموت بجد من شدة الزحام والجماعة الافارقة هناك لو اخدت منهم كوع او كتف هتقع بالضربة القاضية و خصوصا لو انت مريض قلب وصدر ممكن تقع ومحدش يعرف يجيبك من بين الاقدام ومراتك هتتبهدل فى الزحمة فعلى اية شاور للحجر الاسود وخلاص ولو خلاص مش قادر ونفسك تطولة فانتتظر للساعة 8 صباحا الحرم بيخف الزحمة بس طبعا مش اوى وممكن فقط فى الوقت دة تبوس الحجرالاسود


قبل ما تطوف خد معاك رزمة مناديل ومياة ووزعها على الناس اللى بتطوف معاك لان العرق بيشر بغزارة اوى من شدة الزحام وضيق النفس ومحتاج تشرب مياة كل شوية وخلى زوجتك ادامك مش جنبك عشان محدش يلزق فى مراتك من الظهر لو مؤاخذة غصب عنة لان الزحام فى الطواف انت لا يمكن تتخيلة

بالنسبة للحمامات خارج الحرم كلها زحمة جدا وممكن تاخد دور رقم عشرة افى الانتظار و دة عشان تقدر تعمل تواليت مياة فقط وطبعا الريحة وحشة اوى و دة ايام الزحمة والاجازات والمناسبات الدينية وكمان مش نضيفة اوى فاحسن حمام ياسيدى هنلاقية فى ابراج مكة ادام الحرم فى الدور التالت هتركب السلم المتحرك هنلاقى جامع فى الدور التالت والحمامات بتاعتة نضيفة جدا جدا ومفيش زحمة عكس الحمامت الى داد الحرم وخد معاك طبعا لفة مناديل عشان تنشف



ثانيا المطاعم والاكل وبكام

فى الحرم يا سيدى المطاعم الى فى ابراج مكة وعند ابراج الساعة غالية جدا وهتعمل امساك شديد جدا لان الطباخين هناك هنود والاكل حراق اوى والوجبة ليك انت ومراتك فى حدود الاربعين ريال الوحبة الواحدة فقط خراب بيوت يعنى

بس احسن مطعم ليك هو مطعم البيك الشهير جدا وصاحبة واحد فلسطينى ونظيف جدا جدا فى الاكل بتاعة الوجبة الواحدة ب 12 ريال فقط عبارة عن 12 قطعة دجاج مسحوب ويكفيك الوجبة انت ومراتك وممكن تاخد وجبة جمبرى ب 19 ريال فقط ومطعم البيك يا سيدى هتلاقية خلف فندق الانتركونتيتنال وخلف ابراج الساعة فى مول كبير لسة فاتح جديد فى الدور التالت بظبط ان لم تخنى الذاكرة وخد بالك فى مطعم تانى اسمة مطعم الديك فاياك تتلخبط بينة وبين مطعم البيك لان دة حاجة والتانى حاجة خالصصصصصصصصص


ولازم تاكل زبادى وتشرب لبن نادك الشهير كتير مش لبن المراعى انضف وارخص عشان تقلل الامساك اللى هيجيلك هنا

لو ربنا كرمك والفلوس مش مشكلة ليك ممكن تشترى مسند ظهر تمنة 180 ريال تقريبا وانت قاعد فى الحرم هيسهلك الجلوس من غير مشاكل فى الظهر من اسواق بن داود داخل ابراج مكة

العساكر اللى ورا مقام ابراهيم فى الحرم صعبيين جدا فاياك تتناقش او تتحاور معاهم لما يغلسوا عليك فى موقف او شئ لان واحد اترحل ادامى من الحرم عشان بجح فى العسكرى اللى هناك ورد علية بطريقة وحشة فاياك ترد او تبجح معاهم

وانت فى المدينة اسال لزوجتك عن ميعاد فتح الروضة للنساء لانها باوقات محددة وومش مفتوحة على طول للنساء

بالنسبة لهدايا

اياك تروح تشترى موبيلات وسبح وطواقى وسجاجيد لانها اصلا التجار جايبنها من مصر نظرا لرخصها وحتى الموبيلات اللى هناك من غير ضمان وصينى مضروب واصلا غالية كمان الحاجة الوحيدة اللى ممكن تشتريها عبايات سعودى خليجى لمراتك بس الازواق وحشة مش حلوة بس قماشتها وخامتها حلوة وفاصل اوى لان العمالة الهندى هتصيع عليك جامد جدا

احسن هدية ممكن تجبها لحد هو كوب صغير مياة زمزم ومعلومة مهمة جدا جدا لو انت وضعت نقطتين فقط من مياة زمزم على خزان المياة اللى فى عمارتكم او بيتك فانت كدة زمزمت المياة كلها واصبحت كل االمياة بفضل وبركة من الله مياة زمزم ولا تسغترب فشيوخ مكة والسعوديين نفسهم بيعملوا كدة بيجيبوا جركن زمزم وبيحطوا نقط صغيرة كل شوية على خزان المياة وبكدة الخزان كلة اصبح زمزم!!

وطبعا المسك والعود والعنبر والبخور وان كان غالى التمن دى الهدايا فقط المميزة وان كان شر ولابد منة ليك عشان تراضى اهلك واشترية من شارع الستين اللى فى مكة لانة ارخص منطقة او شارع الستين اللى برضة فى المدينة والوصول لية سهل جدا سواء فى المدينة او مكة ومش محتاج تاكسى بعشرة ريال ولا حاجة


التبرعات للحرم

احسن شئ تعملة فى التبرعات للحرم تجيب كرسى من خارج الحرم بحوالى 30 ريال وتتركة داخل الحرم صدقة جارية عشان الناس فى رمضان وايام الزحمة من كتر الوقوف فى الصلاة التراويح بتحتاج الى كرسى وكل واحد هيقعد على الكرسى فى الحرم هيتحسب لية حسنة وصدقة جارية الى ما شاء ربك والصلاة فى الحرم طبعا ب 100 الف وللاسف انا ما قدر اعملها لانى كنت فلست فى الاخر بس هموت واجيب عشر كراسى المرة القادمة واعملها ان شاء الله صدقة جارية


اخيرا فى ناس كتير وللاسف انا منهم فاكرين ان الاسلام عمرة وحج كل سنة فقط ........لا الصلاة والمحافظة على الصلاة فى المساجد وفى اوقتها احسن من مليون عمرة والله يحسبها ليكم من المال الحلال

اى استفسار فى الخدمة بس ادعولى ربنا يرحمنى برحمتة وارجع تانى للكعبة

[masryxt]

جزاك الله خيرا

[Ahmed_Rahem]

جزاك الله كل خير، انا هضيف على الى انت كاتبة من واقع عمرتى السنة الى فاتت

قبل كل شئ شوف الشركة السياحة اللى انت رايح فيها محترمة وهتقعدك فعلا فى الفندق اللى اتفقتوا علية ولا ضحكت عليك عشان بتحصل كتير جدا
دة احسن كلام اتقال لان لو الفندق الى انت متفق علية كويس هترتاح على الاخر

خد معاك خرطوم رفيع ربع متر (ضرورى جدا جدا ) لية يا حاج عشان كولديرات المياة الزمزم فى مكة او المدينة داخل الحرم عملنها بطريقة فتحة ضيقة اوى بحيث ان اخرك تملى كباية مية بلاستيك فقط مش تملى جركن زمزم وللا حاجة قالخرطوم هيريحك تحط الخرطوم فى فتحة كولدير زمزم والفتحة التانية فى جركن لان الجركن مستحيل يدخل داخل الكولدير وهما قاصدين كدة عشان تظطر تشرب فقط كباية زمزم مش تعبى ومباة مياة وتروح بيها على الاوتيل والفندق اللى انت نازل فية

اتمنى تكون النقطة دة مفهومة وشرحها وصل وعلى فكرة وانت خارج فى المطار انت ليك جركن واحد فقط مية زمزم على كل باسبور وتمنة حسب حجمة العشرة لتر ب 17 ريال وتغليفة ب 10 ريال وفى جركن كبير ب 35 ريال وتغليفة وشحنة على الطيارة ب عشرة ريال تقريبا ايضا فاعمل حسابك على 100 ريال شراء جراكن زمزم لو انت وعيلتك راجعين وايضا اعرف ان الجراكن لمياة زمزم لا تشترى الا من المطار فقط فلا تتعب نفسك وتشترى جراكن زمزم من خارج المطار لانك هتحبر على تركها وايضا معلومة ليك المياة المعدنية هناك اغلى من البنزين
من المطار (جدة) فية خدمة تغليف الشنط وفى نفس المكان عبوة زمزم متغلفة وفى كرتونة وجاهزة للشحن - كانت ارخص من الى في مكة. العبوات الى هتملاها من الحرم ممكن تتفتح في الطيارة (حصلت في رحلتى وبهدلت كل العبوات التانية، لانها بتتحط في صندوق ورقى) فالافضل المياة من المطار وكمان علشان الشيلة من الحرم لمطار جدة. طالما فاضل معاك وزن يبقى الشحن مجاناً انما لو انت معاك وزن كبير هتدفع.
اعمل حسابك على معلبات كنير تاخدها معاك زى معلبات التونة وما تتكسفش من كدة لان المعلبات هناك غالية جدا والاكل والفاكهة عموما فى السعودية غالى جدا جدا ويكفى انك تعرف ان كيلو العنب هناك على سبيل المثال يعدى العشرين ريال الكيلو !!!يعنى 40 جنية مصرى تقريبا !!

خد معاك كاميرا كويسة اوى بصراحة انا استلفت كاميرا من صديق لى دة لو مقدرتش تشترى كاميرا غالية بطبع والكاميرا مهمة جدا لاتقاط زكرياتك وانت فى الحرم لانها لحظات لا تنسى ابداخصوصا حول الكعبة
انا رائى الشخصى التركيز على المناسك علشان تفضل في ذاكرتك مش الصورة وبس.

خد معاك جلاليب فقط ولزوجتك عبايات سوداء فقط وشباشب فقط لاغير ولا تاخد معاك اى اطقم قميص وبنطلون واللبس المصرى المعروف اياة ولا حتى جزم لانك مش هتلبسهم اساسا وهتعرف بعدين لية بقلك كدة
فعلاً ولزوجتك نصيحة العبايات تكون مقاسها اوسع منها وتكون سوداء ومفيهاش اى خياطة او تطريز خالص. غير كدة هتسمع كلام من حرس الحرم " غطى وشك" كتير.

خد معاك ملايات وافرشها على سراير الفندق وحتى اتغطى بيها وخلى غطاء البطانية فوق الملاية منعا لاى انتقال مرض جلدى من فرش الفندق
لو الفندق 5 نجوم يبقى مفيش قلق، ولكن مفيش مانع بس على حساب الشيلة

الشبشب المخيط اللى هتشترية غالبا هيكون شبهه الاف الشباشب داخل الحرم فعشان لا تاخد بتاع واحد تانى زى ما حصل معايا هههههه ابقا علمة بعلامة ولا حاجة واحفظ مكانة جيدا داخل الحرم وضعة فى مكان اامن اثناء الطواف
انا كنت جايب كيس قماش وبحط فية شبشبى وافضل معلقة في ايدى. لان كدة مببقاش مطر ارجع لمكان الشبشب كل ما احب اخرج.

لا تاخذ معاك ادوية نهائيا لان ممكن يكون من حظك الوسخ انك تقابل حد هناك يعمل جريمة عشان قرص اسبرين ويحسبة عليك قرص مخدرات فارجوك لا تصطحب معاك ادوية نهائيا الا للضرورة القصوى كادوية الضغط والسكر والبرد وادوية الاسهال اه شئ لان هناك اكل المطاعم بيعمل امساك شديد جدا جدا
فعلاً، خد الادوية المهمة فقط، وممكن الاحوط خد كمان الروشتة معاك.

الشنطة السفر لازم تكون بعجل متحرك عشان تسهل معاك الشيل والحمل وتكون جلد مش بلاستيك لانها هتترزع فى مطار القاهرة من العمال فى مطار القاهرة وهتكسر لو كانت شنط بلاستيك وهتندم جدا
للأسف مش هتلاقى شنطة جلد بسعر كويس وهتلاقيها غالية جداً وغالباً ممكن تتقطع بسهولة، هات شنطة قماش، والاحسن تكون الحجم الصغير وتطلع بيها الطيارة في ايدك، بس دة على حساب مشترياتك وهدياك. انا تقريباً مجبتش هدايا غير لاقارب الدرجة الاولى فقط.


وحاول يكون كرسيك فى الطيارة بعيد عن الجناح عشان صوت الموتور لا يزعجك مباشرة ومعاك قطن تسد بية ودنك لو بتصدع من صوت الطيارة وبيجيلك دوار
نصيحة في الاقلاع والهبوط لو ودنك وجعتك، ابلع ريقك او اندغ لبانة.

لو تقدر تشترى حامل الشنط اللى بعجل وقاعدة من تحت عشان تحمل علية جراكن زمزم والرفايع الصغيرة اشترية من مصر ارخص اما فى المملكة السعودية فتمنة خارج الحرم عند محل الشهير سلسلة ابن داود 80 ريال وفى شارع الستين المشهور تمنة حدود الخمسين ريال فحاول تشرية من مصر بس حقيقى ما عرفش فىى مصر تمنة كام ومنين لانى ادبست واشترية من المملكة لان محدش قالى ونصحنى باهمية حامل شنط اللى بعجل فى تجميع الرفايع والجراكن

خد معاك قلم ملون فلمسطر عشان تكتب علية الشنط سواء وانت رايح او انت راجع بحمد الله عشان تعلم شنطك بسهولة فى المطار وعلى السير المطار لان اغلب الشنط شبهه بعض جدا فتمميز الشنط لازم انت اللى تعلمة بنفسك وبعلامات مميزة جدا لانها بتبقى حوسة وخناقة فى المطار بسبب تشابة الشنط خصوصا ان مطار القاهرة المعاملة فية سئية جدا
بدل الكتابة على الشنط - لان ممكن حد تانى يحتاجها في سفرية تانية - اربط شريط ملون على ايديها، او حط كارت تعريف باسمك والزقة عليها، بتكون عملية اكتر لو حد تانى خد الشنطة منك وسافر بيها.

لو مسافر فى الصيف فلازم تشترى شمسية سوداء لان الشمس حارقة جدا ودرجة الحرارة فى الظل 45 اما فى الشمس فممكن تصل الى 80 !!! وعلم الشمسية بعلامة مميزة عشان ترفعها لفوق ومراتك تقدر توصلك فى الزحمة الشديدة خصوصا ايام الاجازات والجمعة هتتوة انت ومراتك من بعض فى الزحمة فاستخدم الشمسية كعصايا مميزة ليك ومراتك تقدر توصلك
اعتقد في الصيف الشمسية بتكون بيضاء وليها بطانة.

اما فى مكة فالرخام هناك معمول بطريقة خاصة جدا ولايمتص الحرارة نهائيا مهما كانت درجة الحرارة
الرخام بنوعية خاصة من ايطاليا - اشتروا المحجر كلة، فعلاً مش مبالغة - مسامة واسعة فمبحتفظش بالحرارة


قبل ما تطوف خد معاك رزمة مناديل ومياة ووزعها على الناس اللى بتطوف معاك لان العرق بيشر بغزارة اوى من شدة الزحام وضيق النفس ومحتاج تشرب مياة كل شوية وخلى زوجتك ادامك مش جنبك عشان محدش يلزق فى مراتك من الظهر لو مؤاخذة غصب عنة لان الزحام فى الطواف انت لا يمكن تتخيلة
وابعد عن طريق المجموعات - ممكن تمشى وراهم على الاقل بيفتحوا طريق


ثانيا المطاعم والاكل وبكام

العساكر اللى ورا مقام ابراهيم فى الحرم صعبيين جدا فاياك تتناقش او تتحاور معاهم لما يغلسوا عليك فى موقف او شئ لان واحد اترحل ادامى من الحرم عشان بجح فى العسكرى اللى هناك ورد علية بطريقة وحشة فاياك ترد او تبجح معاهم
دى نصيحة عامة مع الكل مش دول بس،

لو احتجت كرسى بعجل - هتلاقى في الحرم والمسعى سعوديون وبياخدوا فلوس - 50 درهم للطواف او السعى. او ممكن تاخد واحد مجانى من قرب باب بلال وتزق انت وترجعة تانى ليهم. وفى السعى ممكن تاجر كرسى كهرباء.

حلاقى الشعر او تقصيرة تكون بموس مخصص للاستعمال مرة واحدة - بيكون في كيس وبيتفتح قدامك وبيترمى بعد متخلص.

الاهم الصلاة والدعاء والتركيز فيهم فقط لاغير

والسلام ختام

[minicooper20]

نصايح جيده لكن يشوب الموضوع بعض من المبالغه
الدنيا اسهل من كده بكتير امال لو روحت الحج بقا كنت عملت ايه يا باشا
الدنيا اسهل من كده بكتير و خصوصا ان الحرم مبيبقاش زحمه الا فى رمضان فقط لاكن باقى السنه الى حد ما كويس
regrds.....

[Xander2010_Evo]

جزاك الله خيرآ .. نويت إن شاء الله أروح عمرة في شهر رجب .. كان نفسي أروح الأيام دي فالمولد النبوي بس للأسف إجراءات تجديد البطاقة وعمل الباسبور وحوارات التاشيرة للأسف مش هتخليني ألحق

[أحمد كمال]

نصيحة اخرى

الكيناكومب صديق الحاج و المعتمر ........ تاخد معاك نص انبوبة من الصغيرة لكل فرد لكل يوم عالاقل (لو 3 اشخاص رايحين اسبوع تاخد معاك 10 صغير او 5 كبير)

[saddam]

صديقي المواطن
موضوع جميل ومتعوب عليه وشرح شبه وافي وغايتك منه أن تنصح وتوعي زملائك اﻷفاضل فجهد كريم منك وجعله الله في ميزان حسناتك وزادك من عنده الخير الكثير
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

[أبو عمار]

نصيحة اخرى

الكيناكومب صديق الحاج و المعتمر ........ تاخد معاك نص انبوبة من الصغيرة لكل فرد لكل يوم عالاقل (لو 3 اشخاص رايحين اسبوع تاخد معاك 10 صغير او 5 كبير)

+111111111111111111111111
للوقاية من التسلخات نتيجة الطواف و السعــــــــــــــــــــــــــــــــــــــــــــــ ــــــــــى بملابس الإحرام

[الفجر]

+111111111111111111111111
للوقاية من التسلخات نتيجة الطواف و السعــــــــــــــــــــــــــــــــــــــــــــــ ــــــــــى بملابس الإحرام

يا سلام عليك نسيت اكتب دى وانا فعلا كنت مسافر كنت واخد نعايا 3مراهم تسلخات

واشكرك مرة اخرى للافادة

[egyboy]

طيب تفتكروا الواحد ياخد معاه مبلغ كام بالظبط ؟؟

ويسيب الفلوس فى الغرفة ولا بيفضل شايلها على طووول معاه

وياخدهم بالمصرى ولا يحلوهم هنا ولا هنااااااك

[RAPID]

طيب تفتكروا الواحد ياخد معاه مبلغ كام بالظبط ؟؟

ويسيب الفلوس فى الغرفة ولا بيفضل شايلها على طووول معاه

وياخدهم بالمصرى ولا يحلوهم هنا ولا هنااااااك

متسيبش فلوسك في الغرفة ممكن تتسرق عن تجربة احد الاصدقاء كان سايب مبلغ كبير فى شنطة رجع ملقاهوش واستعوض ربنا فيه

[ahmedwagdy03]

جزاك الله خيرا بس إيه يا عم إنت مهاجر و لا إيه
العملية أبسط من البساطة

1- مافيش حاجة إسمها عبى المياة بخرطوم و الكلام ده لإن دلوقتى ممنوع منعا باتا دخول الحرمين بجراكن و كلام من ده . عايز إشترى من برة

2- مافيش شاى بخمسة ريال و لا حاجة إلا لو حتاخده من الفندق إنما لو عايز بريال ممكن من البقالة اللى فى الشارع اللى فيه إبراج الهيلتون من الناس اللى بيعملوا ساندويتشات فلافل

3-مش لازم تاكل عنب إيطالى مستورد سعره 40 ريال ممكن تاكل عنب محلى لو عايز أو مش لازم
4- إبقى خلى فى جيبك كيس بلاستيك حط فيه الشباشب عند الباب و الأمن بيشوفه ما بيقولش حاجة أو الأحسن جيب الشنطة القماش الصغيرة و حط فيها شباسب العيلة و خلى إبنك أو بنتك تعلقها على الظهر و دى مسموح بيها طالما شافها و إنت داخل

5- موضوع الكتابة على الشنط مبيعملوش غير المصريين و الهنود و باكستانية

[الفجر]

جزاك الله خيرا بس إيه يا عم إنت مهاجر و لا إيه
العملية أبسط من البساطة

1- مافيش حاجة إسمها عبى المياة بخرطوم و الكلام ده لإن دلوقتى ممنوع منعا باتا دخول الحرمين بجراكن و كلام من ده . عايز إشترى من برة

2- مافيش شاى بخمسة ريال و لا حاجة إلا لو حتاخده من الفندق إنما لو عايز بريال ممكن من البقالة اللى فى الشارع اللى فيه إبراج الهيلتون من الناس اللى بيعملوا ساندويتشات فلافل

كولديرات زمزم موجودة خارج الحرم امام باب عمرة بالتحديد ودة المكان اللى الناس بتملى منة وتعبى زمزم لكن بطبع ممنوع دخول الجراكن داخل الحرم زى ما حضرتك قلت

2 كباية شاى والقهوة غاليين جدا اياك رمضان والحج وانا عامل الموضوع ليس للوقت الحالى ولكن طوال السنة

واشكرك على مرورك

[الفجر]

up...........................

[S O P H O S]

تسلم علي مجهودك وتعبك