حادثة غريبة عجيبة في ٦ اكتوبر ! ولا عزاء للمصريين !

[Y a r i s]

حادثة غريبة عجيبة في ٦ اكتوبر !
ولا عزاء للمصريين !

كنت في احد المستشفيات في ٦ اكتوبر ( بدون ذكر اسامي لان سامحوني الوضع لايسمح بالزيارة ) ... في قسم العناية المركزة ... بعد تدهور صحة الحج والدي على الاخر ... وانا في عز حزني. على والدي ... ودموعي تملء وجهي وانا عمال اقرالوا قرأن بصوت واطي عسى الله ان يخفف عنوا اخر سكرات الموت ... لقيت الدنيا كانت مدربكة في الطوارئ ... ووحده سايحه بدمها ... بعدين خدوها على ؤوضة العمليات وفين وفين لمن طلعوها من غرفة العمليات. وجابوها للعناية المركزة عندنا ... الممرضة طلبت مني المغادرة قلتلها ارجوكي انا عاوز اكون جمب والدي ... ابويا فلقيت الممرضة بتقولي معليش اصل عندنا حالة حرجة واحدة مضروبة. بالنار !!

المهم فغادرت احتراماً للظرف الحرج ... ولمن طلعت لي الممرضة. بره لقيتها بطب طب عليا وانا ببكي في صمت وتقلي معليش حقك عليا ... بس اصل الست الي انتا شفتها دي اضرب عليها نار برشاش ألي. كانت في الحي ١١ وماشية وركبة توك توك وهيا معديه حظها السيء كانت في عملية سطو مسلح وتثبيت عربية في عم الظهرية ... فالحرامية. بيهوشو صاحب العربية بكام طلقة في الهوى. فالكام طلقة. دي جت فيها يا عيني وهيا معدية لابيها ولا عليها !!!

بيني وبينكم لقيت دموعي بقت تنزل فوق كل دمعه دمعتين ... وفوق كل حسرة حسرتين لان بجد منظرها يقطططططططططططططططططع القلب وشكلها غلبانة .... يعني بجد بجد يصعب حتى على الكافر الجاحد الي معندهوش قلب ... صورتها زيها زي اي. ست مصرية اصيلة الملامح المصرية البسيطة ... وادايقت اكتر لمن جه جوزها وهو معاه اطفال كتاكيت. صغيرين. يعني طلعت الشابة دي أم لاطفال .... منهم طفل لسه رضيع ... مش عارف اقول ايه الحقيقة بس نداء انساني لكل حرامي عندوا ضمير ... ياريت نركز بعد كده شوية يا جماعة واحنا بنثبت عربيات الناس ... ونشوف بنضرب نار فين بالزبط .... لان الي ضربت عليها نار دي ممكن تكون امك. ممكن تكون اختك ممكن بنتك .... ذنبهم ايه العيال عيالها تيتمهم وتحرم اطفال من امهم ... ارجوكم واتوسل إليكم. ركزوا شويتين وبلاش شغل الهواااااااه دهوا .... واعتقد انكم بقه عندكم خبرة دلوقتي ومحترفين. بقالكم تالت سنين اهو ودخلين على السنة الرابعه بتسرقوا عربيات الشعب المصري ووخدين راحتكم على الاخر ... زمان كنا بنقول اصل العربيات بتتسرق وبتتهرب على غزة ... طيب والنهردة العربيات بتتسرق وبتتهرب فيين عند عزة ولا بيهربوه فين بس نفسي افهم .

@@@@@@@@

وبعدين وانتوا بتسرقوا ... حاولوا تركزوا ... يعني اذا انتم شايفين ان اصحاب العربيات حرامية وولاد ستين في سبعين وعلى قلبهم قااااااد كده ... طيب ذنبها ايه المسكينة الي راكبه توك توك دي !!!
هما لو اصحاب العربيات. عندهم دمممم كانوا فضلوا ساكتين لغايت دلوقتي على سرقت عربياتهم ولا حياة لمن تنادي.

والغريب ان في نفس اليوم. كمان في حادث بالحي الخامس على محور الكفراوي بيقلك عربية نص نقل فيها مسلحين لابسين شربات حريمي على وشهم. نزلوا في وضح النهار ... بالالي. بس دول بقه بروفيشنال ضربوا نار على الاسفلت. ( حرامية بتفهم وعندهم بعد نظر ) وبيقلك شهود العيان. الي شافوا الحادثة استغربوا ان الحرامي وهو بياخود العربية. خدها عادي جداً يعني مدسشي بانزين وجري بيها لا ده بيقلك كان ماشي على قشر بيض وعلى مهلوا خلاص .

نداء عاجل. الى من بيده الامر .... نداء لوزير الداخلية. .... ندااااااااء للقائد الاعلى للقوات المسلحة ... نداء لجيش مصر العظيم. أكتوبر والشيخ زياد تستغيث بكم ... والحالة عندنا خارج نطاق السيطرة ... يا سادة. المسلحين بقوا يخشوا ورى صاحب العربية. للصيدلية. علشان يثبتوه وياخدوا منوا مفتاح عربيتوا. هنستنى ايه تاني. !
لازم تشوفلكم حل. لازمن تشوفلكم صيرفة ذنبها ايه المسكينة الي. خدت رصاصتين دي .

ملاحظة : ( الي في ايدوا الحل ياريت يقولوا. ... والي يقدر يوصل ندائي لأولي الامر ياريت يوصلوا ... لكن برجاء برجاء عدم. التطرق باي شكل من الاشكال. للسياسة. ) ... وشكراً

ودعاوتكم للست الي اضرب عليها نار دي ربنا يقومها بالسلامة .... ودعاوتكم لابي ربنا يخلصوا من ألموا وعذابوا ويتولى امروا بالسلامة ... ودعاوتكم لصاحب العربية ربنا يرجعلوا عربيتوا بالسلامة. ودعواتكم لسكان. ٦ اكتوبر. ربنا يخلصنا من المجرمين. والعصابة الي فيها بالسلامة يااااااااااااااارب. رحمتك يا ارحم الراحمين .

وواللهي خلوا الواحد يتلفت حوليه زي الحرامية ويبص يمين وشمال قبل ما يركب عربيتوا. لايكون حد مسلح كده ولا كده معدي او مستنيه على الصبح ... وخلو الواحد. الصبح ياخد عربيتوا. عربيتوووو. بقيت اخود. عربيتي واطلع اجري من غير ما اسخنها. الصبحيه من كتر رعبي وخوفي. . بجد حرام واخرت العذاب ده ايه بس يارب. هو انا ناقص ده الي فيا مكفيني وزيادة .... وبعدين دول مش عصابة ولا اتنين ولا حتى عشرة ... ده كل واحد معاه الي مش عارف يعمل بيه ايه بيطلع يقلب عيشوا بيه ... تقولش طالع يكون نفسوا ... طيب معليش حرامي وبيكافح ... ونقول بدل الغربة والشحططة. في السعودية والامرات والكويت اهو يجبلو. حتت الي وينزل يسرق ويثبت في خلق الله. لغايت ما يكون نفسوا ويجيب تمن الشبكة والمهر ... طيب اي حد مثلاً بيسافر السعودية ولا حتى الكويت اهو بيغيب. سنة ولا سنتين. وبعد كده بيرجع بقه بعد ما كون نفسوا . ويقول خلاص كده كفاية .... فانتا ربنا كرمك بحتت آلي. وثبتلك عربية عربيتين ياسيدي قول تالت عربيات. خلاص بوس ايدك بقه وش وظهر واحمد ربنا وقول خلاص جبريت كده اديكي كونت نفسك وجبت الشبكة والمهر وفرش شقتك .... ولا انتا هتفضل عايش في الدور كده على طول ... ولا انتا عاوز انشاء الله انشاء الله راسم لعيالك تدخلهم الجامعة الامريكية بعد عمر طويل مثلاً علشان كده شغال الله ينور بتسرق في عربيات الخلق والعالم احب انا وأحترم الحرامي الي عندوا بعد نظر وبيبص لقدام وبيخطط لمستقبلوا ومستقبل عيالوا على حساب جيوب الناس ... الطف بينا يارب ... وتحياتي

[w-m-a]

ربنا يسترها على البلد
ويشفى الاخت المصابه
ويخفف الام والدك
الهم امين امين امين

[bmya]

ياريس باشا وحشنا وربنا يعفوا عن والدك ويشفيه امين يارب الموضوع فعلا مأساه ربنا ينتقم من السبب

[starlanos]

ربنا يصبر اهلها
والحكومة فالحة من اول المحور جهينة الحصري من الناحيتين ليلة القدر اول المصانع كل ده لجانويوقفوني وموقفين الطريق
وعلي الدائري و الواحات كل ده لجان ويوم مبيبقي معيش العربية واركب توكتوك او عربيات مخصوص ناس اغلبيتة من الفيوم وجاية تاكل عيش واوقات كتير ببيت عربيتي عند دار الي فليلة القدر واجي ملقيش فيها الهوا وسعات امشي الساعه 12 او3 بليل من منطقة المصانع مفيش اي قلق

سبحان الله
وربن يشفي والدك

[elfarashah]

سلام الله عليكم ورحمته وبركاته

بداية ألف سلامة على الوالد ربنا يشفيه ويباركلك فيه ويطمنك عليه يارب
وربنا يشفي المسكينة دي ويقومها بالسلامة لأولادها وزوجها
أما بخصوص سرقــة السيــارات فأعتقد إن ده أمــر واضح
وضوح الشمس للجميــع ومستمر لغاية اللحظة دي ومنذ ثلاث سنوات
ليه بقى مفيش حد بيتحرك؟ ,,,,الله أعلم
هل مش قادرين عليهم؟,,,, الله أعلم
هل ليهم مصلحة في كدة ؟,,,, الله أعلم
وتقريباً هتكون دي إجابتنا وإجابة كل واحد تسأله في الموضوع
اللـــــه أعلـــــم
يعني لو سلمنا فعلاً إن الوحشين الأشرار الإرهابيين على حد قولهم واللي كانوا ماسكينها
كانوا سبب في غياب الأمــن وترويع المواطنين !!!
هل فيه أمــل دلوقتي نشوف أي تغيير؟ ونحس بالأمــان؟ ويتم السيطرة
على شوية الحرامية والبلطجية اللي بيسرقوا شمال ويمين دول؟
ولا هما لازم يبقى ليهم لحية وبيدخلوا مسجد عشان نخرج الجيش كله لمقاومتهم؟
إلا بقى لو مستنيين تفويض مننا بكدة
والله غصت بحلقي الكلمات فاصمَّتْ قلمي
دمتم برعاية الله وحفظه

[amr011111]

فيه كذا حل
الحل الاول ان الشرطه تشتغل وده على مدار 3 سنين مش نافع

الحل الاخر
ان ناس تتطوع وتخلص على العصابات بنفسها
يعنى يعملوا كمين
تبقى عربيه عشره على عشره وصاحبها يقعد فيها عند مول العرب زى ما بنسمع ولما تيجى الحراميه تاخد منه العربيه
ينزلهم بسهوله
ويكون بقى فيه بتاع 30 او 40 واحد معاهم الى ان شاء الله يكونوا من العرب او مجرمين سابقين
ويخلصوا عليهم اول باول

ولو العدد اكبر تنزل حمله على اوكارهم ويخلصوا عليهم

[J A G U A R]

ربنا يسترها علينا ويشفى والدك والست الغلبانه اللى ملهاش ذنب دى ويصلح حال البلد .. امين يا رب

[elfarashah]

فيه كذا حل
الحل الاول ان الشرطه تشتغل وده على مدار 3 سنين مش نافع

الحل الاخر
ان ناس تتطوع وتخلص على العصابات بنفسها
يعنى يعملوا كمين
تبقى عربيه عشره على عشره وصاحبها يقعد فيها عند مول العرب زى ما بنسمع ولما تيجى الحراميه تاخد منه العربيه
ينزلهم بسهوله
ويكون بقى فيه بتاع 30 او 40 واحد معاهم الى ان شاء الله يكونوا من العرب او مجرمين سابقين
ويخلصوا عليهم اول باول

ولو العدد اكبر تنزل حمله على اوكارهم ويخلصوا عليهم

سلام الله عليكم ورحمته وبركاته

حضرتك شايف إن ده حل ؟؟
وهل تقاعس رجال الشرطة في الموضوع ده عادي؟ وقلة حيلة؟ تفتكر !!!

والله أنا أعرف إللي قدروا يفضوا إعتصام رابعة والنهضة ويعتقلوا الأخوان ويقتلوا فيهم

ويصادروا أموالهم ويبعدوهم عن الحياة بأكملها مش هيغلب عليهم شوية حرامية

ولا إيه؟؟

ولو مش قادرين فعلاً يوفروا للمواطنين الأمن والأمان وحفظ ممتلكاتهم يبقوا يسيبوها

للي يعرف يديرها ويظبطها ويحفظ أمنها

( والله الواحد كل لما ياخد قرار بينه وبين نفسه

إنه مايتكلم في السياسة غصب عن عينه بيلاقي دمه محروق من اللي بيشوفه)

[أبو آسر]

حسبنا الله ونعم الوكيل في الداخلية وفي كل واحد متقاعس عن عمله وبيتسبب في إزهاق الأرواح وترويع الآمنين
وربنا يقوم الست دي بالسلامة ويشفيها شفاء لا يغادر سقما
ويشفي والدك ويقومه بالسلامة ويقر أعينكم به
ويتوب علينا من البلد دي ويقدرنا نسافر في أي بلد تانية نهرب بديننا وبنفسنا وبأولادنا

[mastr_n]

ربنا يعينك على اللحظات الصعبة اللى انت بتعيشها مع والدك لأنى عشتها واكتر واحد عارف قد اية صعبة ويارب يشفية ويقوم معافى وجميع مرضى المسلمين اللهم امين

ولاعزاء للمصرين فى حالة الامن لاحول ولاقوة ألا باللة اعلى العظيم يارب الطف بينا

[speed_magnum]

ربنا يشفيها ويشفي والدك يا استاذ ياريس
والله انت من افضل الناس خلقا في هذا المنتدى
واصابني الحزن وادعوا لوالدك بالشفاء العاجل

[Y a r i s]

أشكركم من صميم صميم أعماق قلبي ... وواللهِ انتم زي اخواتي ويمكن اكتر ... تسلمولي يارب ... وربنا يديم المحبة والمعروف بينا يارب العالمين .. وتحياتي .

[eslamrace]

الف سلامه على الوالد وربنا يخفف عنه
وربنا يشفى السيده المسكينه ضحيه الاجرام
ويا رب يصلح احوالنا ويولى امورنا من يصلح
تحياتى.

[mr_vampire]

اولا الف سلامة علي الوالد وربنا يقومه بالسلامة ويشفي المسكينة الضحية ده ويقومها لولادها وجوزها بالسلامة ان شاء الله.

انا هحترم رغبتك في عدم التطرق للسياسة ولكن اعذر حرقة دمي . فمعلش اعذر الداخلية والجيش البواسل عشان مشغولين بمواجهة الارهاب المتمثل في طلبة الجامعات وكليات البنات والمظاهرات اللي بترفع فقط علامة رابعة. انما طبعا البلطجية والحرامية وقطاع الطرق مصريين صررررف وملهمش اي علاقة لا من بعيد ولا قريب بالارهاب اللي هما بيواجهوه.

حسبنا الله ونعم الوكيل

اعتذرلك مرة تانية

[Hunting_Eagle]

ربنا يشفي والدك و يشفي المسكينة المصابة و يشفي جميع مرضي المسلمين

لا تيأسوا من رحمة الله

الفرج قريب