سؤال للناس الي عندهم فلتر مياة panasonic بانسونيك !

[Y a r i s]

سؤال للناس الي عندهم فلتر مياة
panasonic tk-cs10 بانسونيك !




دلوقتي من فترة وانا كل ما اجي اغسل وشي ولا حتى اتمضمض بقيت اشم ريحة كريهة للمية. ... فقلت لا مبيدهاش. خليني اجيب فلتر مية .. شكل حنفية مجاري مسمعة مع ماصورة المية عندنا ولا حاجة .. . وكنت فاكر موضوع قديم. والاخوة الاعضاء قعدوا يقولولي. قولاً واحد مفيش غير. بانسونيك وده ياباني وبتنجاني والمية بقت عالم تاني الخ الخ ... طيب انا بسم الله مشاء الله جبتوا زي ما نصحتوموني ... والفلتر مرمي عندي بقالوا فترة مش عارف اركبوا !!! رحت جبت سباك يمين شمال مفيش فايدة البتاعة الي بتركب في الحنفية ما هو انا اصلي عامل حنفية غسالة كده مخصوص للفلتر ... الحنفية دي. يانص بوصة يا تالت تربع بوصة ... لكن دخلت الخلاط او الفلتر ده لاهي نص ولا هي تالت تربع تقريباً في اليابان عندهم مقاس بين البينين ... جبت كزا سباك وبرضوا مفيش فايدة ... طلعت على الاقصى اشهر محل سباكة فيكي يا اكتوبر اني ألاقي صرفة او افتكاسة. معرفوش ... فجزاكم الله خير انتوا ركبتوه ازاي على الحنفية. وجبتوا نبل ايه ولا اتصرفتوا ازاي في الحكاية دي .... وياسلام لو تصوروا بس الوصلة او شكل النبل الي مركيبينوا علشان اجيب زي منو .. او لو فيه في شركة بانسونيك فنين تركيب. ياريت تدوني نمرتهم اكلمهم ... حاكم المدام واكلة وشي وكل شوية تقلي هتلينا وردتين بلاستيك نحطهم في قلبيه ونعملوا فاظة ... احسن من رميتوا كده ...وبالذات هيا قالتلي هات فلتر تانج وانا اصريت على بانسونيك من بعد ما شكرتمولي فيه ... وياشماتت ابل ظاظا فيا ... . وشكراً .

[Ahmed_Adham]

أنا مركبه في الخلاط والطريقه انك بتفك صفايه الخلاط وتركب القطعه اللي جايه مع الفلتر مكانها والتركيب سهل جدا مش محتاج سباك ولا بتاع بس القطعه دي مش موجوده في الصوره دي كده ناقص قطعه لونها عندي "بني".

[Y a r i s]

قصدك على القطعة دي يا احمد باشا
انا جربت اني اركبها في الخلاط الاساسي للمطبخ بس كده هتلاقيه ينزل سرسوب سرسوب ومش هيسعف الي بيغسل المواعين ... انا عملت حنفية غسالة مستقلة. بحيث ان العملية تبقى بعيد خالص عن الخلاط والي عاوز يغسل مواعين يغسل براحتوا والي عاوز يشرب ميشغلش الي شغال على الحوض. فاهمني. يا عزيزي ... وهيا هنا المعضلة الحقيقة ... ازاي اركبها على حنفية الغسالة ... وتحياتي

[Ramy_2R]

أعملها عملوه عن أي خراط

[Ahmed_Adham]

قصدك على القطعة دي يا احمد باشا
انا جربت اني اركبها في الخلاط الاساسي للمطبخ بس كده هتلاقيه ينزل سرسوب سرسوب ومش هيسعف الي بيغسل المواعين ... انا عملت حنفية غسالة مستقلة. بحيث ان العملية تبقى بعيد خالص عن الخلاط والي عاوز يغسل مواعين يغسل براحتوا والي عاوز يشرب ميشغلش الي شغال على الحوض. فاهمني. يا عزيزي ... وهيا هنا المعضلة الحقيقة ... ازاي اركبها على حنفية الغسالة ... وتحياتي

الحلقه المعدن اللي فيها مسامير دي ملهاش لازمه اركنها على جنب. القطعه التانيه دي غالبا اللي أقصدها لو فيها قلاووظ من الناحيتين هتركبها على بوز الخلاط بعد ما تفك منه الصفايه بتاعته وبعد ما تركبها هتركب فيها القطعه التانيه بتاع الفلتر اللي فيها المفتاح.

المفتاح ده بقى بتغير منه بين ان الميه تنزل من الخلاط (بنفس المعدل العادي خالص بدون الفلتر) وبين انك تدخل الميه على الفلتر يعني بتحولك مخرج الخلاط لمخرجين.

[mohamed_selim]

لو عندك مخرج مستقل مش هينفع لان ده معمول يركب على الخلاط على طول و عملى للموعين و خلافه
لو تعرف تتصرف فيه و هات واحد بريتيش بيركفيلد ممتاز برضه و بيركب على وصله لوحدها

[A.Saad]

منك لله يا كروللا قصدى يارس
بوظت سمعة الفلتر
اتصل بيا اشرح لك تركبه ازاى
او تعالى شوفه عندى وهات معاك 5 كيلو فراولة

[dr.hazem]

قصدك على القطعة دي يا احمد باشا
انا جربت اني اركبها في الخلاط الاساسي للمطبخ بس كده هتلاقيه ينزل سرسوب سرسوب ومش هيسعف الي بيغسل المواعين ... انا عملت حنفية غسالة مستقلة. بحيث ان العملية تبقى بعيد خالص عن الخلاط والي عاوز يغسل مواعين يغسل براحتوا والي عاوز يشرب ميشغلش الي شغال على الحوض. فاهمني. يا عزيزي ... وهيا هنا المعضلة الحقيقة ... ازاي اركبها على حنفية الغسالة ... وتحياتي

ازيك ياغالي

انا انتبهت لكلمه بسيطه
مفيش فلتر مهما كانت امكانياته هيطلعلك ميه تنظف بيها المواعين وتشطفها!!
كل فلتر له معدل لترات في الدقيقه المفروض بيقدر يفلترهالك
لو هتستخدم اكتر من المعدل ده يبقى عالفاضي
المعدل ده بيبقى المفروض جاي مكتوب على الفلتر
مش معنى ان الميه عدت يبقى اتعالجت كويس خصوصا فلاتر الكربون بتحتاج ان الميه تعدي فيها براحتها عشان اي روائح تروح
تحياتي

[A.Saad]

الاول تجيب جلبة للحنفية او ان الحنفية تكون بعيدة عن الحائط

[A.Saad]

تلف تافلون على سن الحنفية

[A.Saad]

تركب القطعة اللى ب 4 مسامير على المحبس او الحنفية
المسامير تكوم ناحية المحبس

[A.Saad]

تركب القطعة اللى فيها الخرطوم
للقطعة البلاستبك اللى بنحول منها لمياه مفلترة من عدمه
دى سنها حساس جدا وبيبوظ فى ثوانى لانه بﻻاستيك
بالراحة اوى هنا

[A.Saad]

الفلتر فيه شكلين
الجدبد تدفقه احسن من القديم

[Y a r i s]

لا يادكتر ده احمد باشا فعلاً كان معاه حق. القطعة البنية. جربتها طلعت بتركب. في الخلاط مباشرة ً ... وفي تحويلة او ؤوكرة كده. ان كنت عاوز مية تروح للخلاط. او عاوز مية تنزل من الحنفية. ... بس طبعاً الطريقة دي سيئة جداً وبتعمل لخمة لست البيت لانك كده بتمد خرطوم من بزبوز الخلاط. للفلتر ... وكده بيبقى زحمة على الحوض ... المهم انا لحمد الله. لقيت حل. لهذه المشكلة وقلت اشاركم هذا الحل. علشان انتوا الي تجيبولي فرولة وبرتقان ويستفندي كمان :)

بصوا الحل بمنتهى البساطة انك هتعمل حنفية غسالة ودي بتتباع من ١٥ جنية لغايت ٢٠ جنية وممكن تعمل حنفيتين كمان بمشترك حرف تي ... المهم في واحد بتاع مكيفات وفلاتر رحتلو وحكيتلو قصتي ورحلت عزابي مع السبكين. فلقيت عندوا بتاعه كده. زي جلبة جلد وفي قلبها قلوظ نحاس. تمنها ١٥ جنية
وادي صورتها اهي

وبس بتركب بقه وصلة الفلتر عليها ... وتقول يارب ... وبس ياسيدي تفتح وتقفل من حنفية الغسالة. ... بس عيب الحكاية دي. ان لمن تيجي تقفل. او تقفل الحنفية. بيفضل الفلتر ينقط مية ومبتوقفش المية بسرعة بس بصفة عامة. فلتر لزيز هههه وفي انتظار الفرولة يا a.saad باشا :)

@@@@@@@

بس بصراحة الفلاتر دي اختراع. يا كتش ... ياجماعه طول عمري اعرف ان المية ليس لها ريحة او لون ... انتوا عارفين تيجي تعمل كوبايت الشاي من الحنفية عندنا تلاقي الشاي كاريف كده ... لا وكان من كام يوم في برنامج لازم نفهم على ال cbc بتاع مجدي الجلاد بيتكلم عن مشكلة المية في مصر ... انا واللهي بقيت احس بنغزة في كلاوياااا من بعد ما شفت البرنامج بتاع لازم نفهم !! ربناً يسترها ياًرب عامة. فلتر بانسونيك هيبر منزل عليه. عرض اكمن هو اصدار قديم. فبيبيعوا ومعاه فلتر هدية عاوز يزحلق الكمية الي عندوا علشان الشكل الجديد نزل .

وتحياتي .... وفي انتظار الفرولة :)

[Y a r i s]

الفلتر فيه شكلين
الجدبد تدفقه احسن من القديم

الجديد حلو ان فيه لمبة من فوق بيبين اذا الفلتر مدة صلاحيتوا انتهت ... بس انا قلت على ايه بعد ٦ اشهر انشاء الله ابقى اركب. الفلتر الاحتياط واوفر فرق الفلوس دي بالذات القديم عليها عرض فلتر هدية :)