اوافق على تعيين هذا الشاب ام لا ؟

[خالد2013]

النهاردة اتقدم للشغل فى الشركة الى انا فيها وانا الى عملت معاه المقابلة
الشاب شكلة فاهم ومحترم وبتاع شغل مش انتخة لكن لاحظت انه الدغ فى حرف الراء
فى انا محتار اوافق على تعيته ولا موفقش وهل اللدغة دة هتسبب مشاكل فى الشغل
خصوصا انه تحت مسوليتى انا
ممكن رايكم بصراحة وبدون مجاملة

[محمد يوسف]

ايه العلاقة؟ هو حايغنى مثلا أو حايشتغل فى كول سنتر؟

[dedi]

طالما انة مناسب وانت شايف كدة حرام تمنع عنة فرصة العمل وموش هو الذى خلق نفسة وبة لدغة فى لسانة

[ramymechanics]

حسب نوع الشغل ... يعنى لو فرونت ديسك وكدة ممكن تعيد تفكير لو شغل محتاج بحث وشغل خارجى يبقى ايه المانع هو جه على كرسى بعجل ؟؟

[amrelsaqqa]

من ناحية الشغل حضرتك ماقلتش ايه طبيعة الشغل عشان اقدر اقولك ، حضرتك اللى هتقدر تحدد هل عنده مشكلة هتأثر على شغله او شخصيته او مظهره العام ده قرار حسب تقديرك الشخصى انما ما ينفعش نقول الالدغ مالوش شغل !
عندك مثلا باسم يوسف الدغ وناجح مع ان وظيفته معتمدة على مظهره وكلامه ! فمابالك لو دى شغلانة مكتبية مثلا مش هيفرق فيها الموضوع ده خالص
اقبله طبعا لو مفيش اي مانع تانى ، انا مش شايفه factor اصلا بصراحة !

[خالد2013]

شغل مكتبى ياجماعة وبيرد على تلفونات طبعا وبيقابل سعات عملاء

[J A G U A R]

شغله يا عم هاينوبك صواب حتا

[walidzakzok]

شغله طبعا والعبره بشغله واداؤه

[speed_magnum]

شغله طالما كويس
دا حتى المثل بيقلك

شغل الالدغ . يتعدل لسانه
:)

[Ahmed TRAVCO]

انا شايف ان ده مش سبب اساسا لرفض واحد كويس في خبرته ومظهره وطريقة تعامله الخ الخ لمجرد انه عنده مشكلة ما في نطق حرف... حتى لو كان خدمة عملاء وبيرد على تليفونات ايه المشكلة يعني؟؟ واشكر الزميل اللي ذكر مثال باسم يوسف علشان يوضح قد ايه الموضوع مش ازمة يعني...

[smsm2015]

الكمال لله وحده اخى العزيز شغل الراجل طالما مؤدب ومحترم

[assaf]

شغله المهم الكفاءه مش احسن ماتجيب واحد مش الدغ و يكون بيحب يانتخ و يتعبك

[khaled_sabry]

شغله عادى
و مش اللدغه دى اللى حتأثر على ادائه حسب طبيعة الشغل اللى انتا قولتها
ده باسم يوسف الدغ و ده ما منعشى شهرته

[lad]

شغله مدام شايف انه كويس و مناسب للشغل

[aly_hosny]

معلش متزعلش

بس انت لو في دولة محترمة هتتحاكم على الكلام دا