أعضاء نايل موتورز..أشكال و ألوان

[abohend]

السلام عليكم و رحمة الله و بركاته
أنا مشترك في نايل موتورز من فترة وجيزة أقل من 3 شهور
لكن بفضل الله حاسس إني بين أسرتي
مجتمع جديد عليا لأني مكنتش بشترك فمنتديات..كنت شايفها مضيعة للوقت
لكن منتدى نايل موتورز شدني جدا بصراحة
في البداية أشتركت عشان أعرف إجابة كام سؤال بيدوروا فدماغي
لكن مع مرور الوقت و تفاعل الأعضاء و المنسقين و المشرفين و الإدارة
لقيت نفسي بتجرجر واحدة واحدة لحد مبقيت مقدرش مفتحش المنتدى كل يوم


المهم عشان مطولش عليكم
في خلال ال3 شهور دول قابلت أصناف كتير من الأعضاء
المعظم طبعا ناس محترمة و فاهمة و متعاونة و مبتبخلش على حد بمساعدة أو معلومة
لكن لقيت كام صنف كده مش و لا بد
خد عندك مثلا

الصنف الأول: العضو (تشكرات)
تدخل أي موضوع تلاقي لازق الديباجة (مشكووووووووور-شكرا-رائع-جميل-لذيذ-ظريف-....إلخ)
طبعا من حقه إنه يشكر واحد زميله عامل موضوع كويس
أو شارك مشاركة بناءة
لكن أخونا ده مبيعملش حاجة غير كده رغم إنه فالمنتدى من 3-4 سنين و ممكن يكون عضو فضي كمان
لكن عمرنا معرفنا هو راكب عربية ايه و لا رأيه ايه فيها
و لو معندوش عربية حتى معرفناش ايه إهتماماته في عالم السيارات و لا عمره حتى حود على المنتدى الإجتماعي و تفاعل مع الأعضاء هناك

الصنف التاني: العضو (معصرة)
يدخل على القسم المناسب لنوع عربيته
و تلاقيه نازل أسئلة
يعصر الأعضاء اللي فالقسم واحد واحد
جبت الفرش منين؟
أجيب قطعة الغيار منين؟
أسعار اللي مش عارف ايه كام؟
أحسن ميكانيكي شغال فالعربية دي فين؟
التوكيل أخباره ايه؟
عندي مشكلة فكذا أعمل ايه؟؟

و برضه أنا مش بلومه إنه بيسأل و يستفيد
كلنا هنا بنستفيد من بعض و بنكتسب خبرة من بعض
لكن أخونا ده شغلته عصر بس
عمره ميكتب أي معلومة
و لا يفيد أي عضو حتى لو يقدر
بيقولك و أنا مالي
هي مش عربيتي تمام و اللي محتاج أعرفه بلاقي اللي بيرد عليا


الصنف الثالث: العضو (تهريج)
يبقى الناس بتتكلم فموضوع مهم
مشكلة مع وكيل
أو مشكلة فعربية واحد من الأعضاء
أو لا قدر الله عيب تصنيع و صاحب العربية دايخ بيها بين لجنة هندسية و حماية مستهلك و وكيل
و أخونا ده و لا على باله
يدخل يرمي مشاركة ملهاش أي لزمة يستخف فيها دمه
و مستني الناس تموت على نفسها من الضحك و تبعتله شكر و إعجاب

الصنف الرابع: (المحقق كونان)
ده بقى بيبقى مقيم في قسم معين (في الغالب اللي عربيته بتنتمي إليه)
و قاعد يحقق في مشاركة اي عضو
لو واحد حظه العسر أجبره على الإختلاف في الرأي مع المحقق كونان
يبدأ كونان في إلقاء الإتهامات للعضو المسكين
أنا عارفك...مش إنت اللي من سنتين قلت على العربية الفلانية كذا
إنت شكلك بتشتغل تبع وكيل منافس
إنت إيش فهمك إنت فالعربيات
و يستمر في كيل الإتهامات و جمع عزوته من أعضاء القسم للذب عن شرف العربية المصونة

الصنف الخامس: العضو (المفتي)
ما شاء الله عليه بيفهم في الكفت
تسأل فميكانيكا... يجاوب
كهرباء... موجود
سمكرة ..شغال
عفشة... ميضرش

بس يا ريته بيجاوب صح
إلا كله فتي فتي فتي

بس عنده ثقه في نفسه....يعدمها
تلاقي بيجاوب بكل قوة
ده أكيد عيب حساس كذا
و هو أساسا ميعرفش الحساس ده بتاع ايه

الواحد ساعات بيتقمص شخصية صنف من الأصناف دي و هو مش واخد باله
لكن في النهاية المنتدى للإفادة و الإستفادة و التآخي و المشاركة و نقل الخبرات
و لازم كل واحد يشارك زمايله بأي معلومة أو نصيحة
و ميبخلش على إخواته بأي جديد

تحياتي لجميع أعضاء نايل موتورز المحترمين

تم نقلة للمنتدى الاجتماعى .

[exact]

يعني حضرتك شايف ان مفيش عضو في المنتدى له فايدة؟؟

[abohend]

يعني حضرتك شايف ان مفيش عضو في المنتدى له فايدة؟؟

لأ طبعا
أقرأ الموضوع كله هتلاقيني قلت

المعظم طبعا ناس محترمة و فاهمة و متعاونة و مبتبخلش على حد بمساعدة أو معلومة
لكن لقيت كام صنف كده مش و لا بد

يبقى القاعدة هما الناس المتعاونة و الفاهمة
و الأستثناء هما اللي ذكرتهم

تقبل تحياتي

[abofandy]

ههههههههههه
دة انت فرمت الناس كلها يا ريسنا
بس هى دى طبيعة البشر وحال الدنيا في هذه الايام وهى ... اخطف واجرى ...
على راى محمد هنيدى الحياه سريعة سريعة
فكل واحد يجى منتدى كبير زى نيل موتورز يخش على قسم الى عربيته بتنتمى ويرمى سوال اول النهار ويستنى لاخر النهار لما يكون السوال لف واتفرم على الناس في القسم وغير القسم وجمع اجابات واراء واستفسارت ويحصر هو في الاخر

والكل كدة انا وانت وغيرنا كتير
لحد ما يجيب الوقت وبتبقى عايز تدى للمنتدى اى حاجة بقدر ما انت بتستفيد منه
تعمل تقرير عن حاجة انت اشتريتها او عربية انت جبتها او ترد على واحد بس تكون انت تملك الاجابة الصحيحة ومش تضلله

هى دى الحياة يا صديقى العزيز .. المنفعة المشتركه .. انا بحتاجلك دلوقتى انت بتحتاجنى بعدين هى دى الحياه
بس بلاش القفشة الجامدة دى
زى ما اانت قولت المنتدى هنا كلنا اسرة واحدة الى عارف معلومة مش بيبخل على حد بيها وفية اجتماعات كتير بتحصل في المنتدى وبنتعرف اكتر ونشوف بعض على الحقيقة مش بس كلام من وراء شاشات صماء

[foxhonda2008]

العضو المحترم صاحب الموضوع
حضرتك كت اي نوع من الاعضاء

[J A G U A R]

يا ريت كده كل واحد يدخل يقول هو اى نوع من الاعضاء .....

[saddam]

صديقي المواطن
حللت أهلا ونزلت سهلا وموضوع متحضر له بعناية ورغم إن حضرتك مواطن منتسب جديد للمنتدى لكنك أخ فاضل ومناضل ومساهماتك في المنتدى إيجابية وفعالة وحضرتك طبعا إحنه هنا في نايل موتورز مجتمع مصري على صغير وأكاد أجزم إن عندنا في المنتدى ممثلين عن 20% من طوائف الشعب المصري على أقل تقدير فطبيعي تلاقي الصالح والطالح وتلاقي البرم واللي على نياته وتلاقي اﻷبيض وتلاقي اﻷسود واللي علينه نكبر دماغنا شوية ونوسع آفاقنا ونستوعب الجميع فقولا واحدا لولا اﻷسود ما عرفنا اﻷبيض ولولا الحرامي ما عرفنا قيمة اﻷمين ولولا الكاذب ما عرفنا الصادق ولولا الشر ما عرفنا الخير
فلا بد لكل مكان من عضو مسيء نسأل الله أن ينصلح حاله حتى نميز الخبيث من الطيب ونعرف الصالح من تعاملنا مع الطالح
وخذها مني حكمة في منتدانا
لا تحارب أحدا
ولا تدع عينيك تشاهد سلبيأت العضو وركز في إيجابياته ولو ملوش أي إيجابية فسيبه في حاله ربنا يصلح حالنا وحاله
ومن أساء إليك أحسن إليه
ومن شتمك إبعتله بوكيه ورد
وألف صديق ولا عدو واحد
ودائما إسمع من اﻵخرين أنا مواضيع كثيرة أدخلها وأسمع كلاما خاطئا وسط كلام صح فنعديه ونعمل نفسينا مش فاهمين في حبة مواضيع ونفسنا نتعلم عشان نشجع المواطنين على التفاعل
فأنا أنصح تكمل حضرتك زي معهدناك بأسلوبك المفيد السلس وسيبك من المواضيع التشخيصية دي فستجد الردود السلبية عليها أكثر من اﻹيجابية
وحفظك الله من كل سوء
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

يا خوفي بعد كل الكلام ده وأطلع أنا مصنف عندك في خانة اﻷعضاء الفشلنجية

[شادى عبدالمنعم]

بارك الله فيك ...... ونعتبرها إعادة تذكره لنا

[mahmoud_ali]

خاطبوا الناس على قدر عقولهم

[abohend]

العضو المحترم صاحب الموضوع
حضرتك كت اي نوع من الاعضاء

أنا تقمصت كذا شخصية
يعني ممكن تلاقيني فمرة (معصرة)..و ده كان قبل حجز البيجو 301
تقريبا أعضاء بيجو زهقوا مني و فرحوا إني حجزت و خلصوا

و مرة الواحد يشتغل مفتي
لكن ربنا بيسترها و واحد من الأعضاء الأفاضل يلحقه

ربنا يسترنا

[abohend]

متميز

صديقي المواطن
حللت أهلا ونزلت سهلا وموضوع متحضر له بعناية ورغم إن حضرتك مواطن منتسب جديد للمنتدى لكنك أخ فاضل ومناضل ومساهماتك في المنتدى إيجابية وفعالة وحضرتك طبعا إحنه هنا في نايل موتورز مجتمع مصري على صغير وأكاد أجزم إن عندنا في المنتدى ممثلين عن 20% من طوائف الشعب المصري على أقل تقدير فطبيعي تلاقي الصالح والطالح وتلاقي البرم واللي على نياته وتلاقي اﻷبيض وتلاقي اﻷسود واللي علينه نكبر دماغنا شوية ونوسع آفاقنا ونستوعب الجميع فقولا واحدا لولا اﻷسود ما عرفنا اﻷبيض ولولا الحرامي ما عرفنا قيمة اﻷمين ولولا الكاذب ما عرفنا الصادق ولولا الشر ما عرفنا الخير
فلا بد لكل مكان من عضو مسيء نسأل الله أن ينصلح حاله حتى نميز الخبيث من الطيب ونعرف الصالح من تعاملنا مع الطالح
وخذها مني حكمة في منتدانا
لا تحارب أحدا
ولا تدع عينيك تشاهد سلبيأت العضو وركز في إيجابياته ولو ملوش أي إيجابية فسيبه في حاله ربنا يصلح حالنا وحاله
ومن أساء إليك أحسن إليه
ومن شتمك إبعتله بوكيه ورد
وألف صديق ولا عدو واحد
ودائما إسمع من اﻵخرين أنا مواضيع كثيرة أدخلها وأسمع كلاما خاطئا وسط كلام صح فنعديه ونعمل نفسينا مش فاهمين في حبة مواضيع ونفسنا نتعلم عشان نشجع المواطنين على التفاعل
فأنا أنصح تكمل حضرتك زي معهدناك بأسلوبك المفيد السلس وسيبك من المواضيع التشخيصية دي فستجد الردود السلبية عليها أكثر من اﻹيجابية
وحفظك الله من كل سوء
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

يا خوفي بعد كل الكلام ده وأطلع أنا مصنف عندك في خانة اﻷعضاء الفشلنجية

saddam
كالعادة مشاركتك مميزة و مختلفة
و لو أنت من الأعضاء الفشلنجية أمال مين اللي ناجح؟؟!!
شاكر لمرورك

[akmm]

المنتدى في غايه الروعه والجمال والتفاعل بين اعضائه ...... وعموما لابد من بعض النوافص او السلبيات من اللى حضرتك قلت عليها .. والكمال لله وحده .... عموما هو قسم مفيد جدا للى مش عارف شىء معين عن السيارات بكافه انواعها ومفيد ايضا للى عارف لانه ممكن يصحح معلومه عنده او يستكملها او يحدثها من آرتء وتفاعلات الاخوه الاعضاء .... تحياتى لحضرتك .

[abohend]

المنتدى في غايه الروعه والجمال والتفاعل بين اعضائه ...... وعموما لابد من بعض النوافص او السلبيات من اللى حضرتك قلت عليها .. والكمال لله وحده .... عموما هو قسم مفيد جدا للى مش عارف شىء معين عن السيارات بكافه انواعها ومفيد ايضا للى عارف لانه ممكن يصحح معلومه عنده او يستكملها او يحدثها من آرتء وتفاعلات الاخوه الاعضاء .... تحياتى لحضرتك .

مرورك نور الموضوع
تقبل تحياتي

[ابو لؤى]

مشكور موضوع مميز هايل جميل

[abohend]

مشكور موضوع مميز هايل جميل

ملعوبة...............