سوال عن السيراميك

[hamisa08]

سلام عليكم

دة اول موضوع ليا اجتماعى

حبيت استفاد من خبرة زميلى هنا بخصوص شراء السيراميك انا عايش فى القاهرة اجيب سيراميك منين ؟؟

وانا بفضل يكون ماركة نظيفة بس فرز تانى

وهل فى ضرر لو لزقتة على البلاط اللى عندى بدل التكسير ووجع القلب وشيل والحط

[alrabeh]

منطقة المهاجرين بعين شمس
من جسر السويس تدخل شمال من عند سنترال النزهة شارع 6 اكتوبر ويمين تعدى مزلقان القطر حتلاقى محلات السيراميك ومعظمهم تجار الفجالة بس اسعارهم ارخص من الفجالة
ممكن تتفرج عند السلاب او اى معرض سيراميك وتاخد اسم الشكل ولونه وتتطلبه من هناك
بالتوفيق

[amr011111]

فى كذا مكان لبيع السيراميك
السلاب والمحجوب
الاماكن الاخرى
عندك فى شارع ترسا فى المطبعه - الهرم
وفيه فى الفجاله فى وسط البلد
وفي فى المهاجرين فى عين شمس
ومش هينفع تلزقه على البلاط اللى عندك الا لو فرشت فرشه رمل وده غلط علشان هيبقى الاحمال على السقف اكتر من مما هو مصمم عليه

[amr011111]

ممكن تتفرج عند السلاب او اى معرض سيراميك وتاخد اسم الشكل ولونه وتتطلبه من هناك

مش هينفع علشان لما بتتفرج الكود اللى بتاخده بيبقى مختلف علشان محدش يعمل الموضوع ده

[drcobra]

انا جبت بورسلين من مصنع كليوباترا من العاشر فرز تانى المتر كان عامل 49
وجبت حوائط المتر كان عامل 34 فرز تانى
سألت على الاسعار برة كانت مولعة ورحت المهاجرين برضوا اسعار عالية

انصحك مصنع كليوباترا فى اى مكان بيكون فية عروض وتخفيضات كويسة جدا والمهندسين هناك متعاونين جدا وبيحاولوا يجيبولك اكتر تخفيض

انا اشتريت وشحنت للبحر الاحمر

[Eng_hatemfathy]

السلاب عامل خصومات بمناسبة افتتاح فرع اكتوبر وبتوصل ل50%
نصيحة الارضيات تبقى فرز اول وخاصة فى الريسبشن لو مش هتعمل بورسلين لان الهرس جامد جاد فى الريسبشن والطرقة وجرجرة كراسى السفرة والانترية بتجرح اجدعها سيراميك فلو فرز تانى ممكن يشرخ بسهوله
موضع اللصق -فيه دلوقتى مواد غروية بتلصق السيراميك على البلاط القديم بشرط يكون سطح التشطيب نضيف والفروق مش عاليه علشان متكسرش السيراميك لما يتحط عليه ولسه شايف الموضوع ده من يومين فى مركز علاج طبيعى كنت بروحه والدكتورة ركبت سيراميك فى الويك اند
بس لو البلاط مش نضيف يبقى لازم يا اما تكسر يا اما تفرش رمل وتبلط عليه وده هيقلل منسوب السقف وممكن تحس بخنقة شوية او النجف يبقى واطى
وبالتوفيق
ملاحظة وعن تجربة بلاش تشترى من ترسة والمرج وعين شمس وخليك فى المعارض المحترمة لانك هترجع اى حاجه بايظة ولو خدتها البيت بكل سهوله وفى نفس الوقت هترجع الزيادات اللى مستعملتهاش لو الكرتونة مقفوله وهتعرف تكمل اى حاجه خلصت من عندك بنفس التون والتون غير اللون على فكره لان التون بيبقى باتش كامله من موديل بس ليها نفس الدرجه بالظبط

[A.Saad]

سلاب اكتوبر فاتح من زمان والخصم خلص
الاعلانات دى قديمة

[Abo Yasso]

سلاب المعادى عامل حصومات لغايه 50%
او انك تروح المصنع بتاع كيليوباترا

[M!SHO]

هو فيه بورسلين فرز تاني ؟
ويفرق ايه عن الفرز الاول ؟

[aldesha989]

انا تانى مره اسمع عن موضوع اللزق ده فى واحد قالى انه هيعمل كده احسن ما يكسر ويبهدل الدنيا هيلزق السراميك على البلاط وخلاص

[hamisa08]

متشكر يا جماعة لكل ردودكم واخص بالشكر Eng_hatemfathy

الحمدلله البلاط عندى كويس واللصق فى شكارة ب 50 وشكارة تانية 45 شكارة بتلزق حوالى متر او متر ونص يعنى كرتونة

انا فاعد فى الشروق ازاى مجاش فى بالى موضوع مصنع كيلوبترا هو جمبى فى العاشر بس محدش يعرف مواعيدة ؟؟

[Eng_hatemfathy]

متشكر يا جماعة لكل ردودكم واخص بالشكر eng_hatemfathy

الحمدلله البلاط عندى كويس واللصق فى شكارة ب 50 وشكارة تانية 45 شكارة بتلزق حوالى متر او متر ونص يعنى كرتونة

انا فاعد فى الشروق ازاى مجاش فى بالى موضوع مصنع كيلوبترا هو جمبى فى العاشر بس محدش يعرف مواعيدة ؟؟

بالتوفيق ان شاء الله

[DreAmO]

انزل الفجاله فيها معارض وحجات كتير جداً هتعجبك وتحيرك
بس ابعد عن معرض كليوباترا اللي هناك .. سعرهم غريب جداً ( اضعاف مضاعفه )

بالتوفيق .

[Eng_hatemfathy]

انا عن نفسى بفضل السلاب عن التجار للاسباب الاتية
شركة ليها اسم وبتعامل مع موظف وليه مدير وليهم مدير وهكذا ففى اكتر من واحد ممكن يحلو المشكله انا المحلات فلو حصل مشكله هرشق فى الحيط
مفيش فصال وانا بكره الفصال ولو اشتريت بسعر اعلى شوية بس ببقى متأكد انى متنصبش عليا لان فى المحل لو الحاجه ب جنيه بيقول عشرة وممكن انزل معاه لخمسه وفى الاخر انا اتنصب عليا فى 4 وانا فرحان وفاكر نفسى كسبان
ممكن ترجع بسهوله اى كراتين مقفوله لو محتجتهاش ولو لقيت بلاطه مكسورة او مشروخة بترجعها بكل سهوله ومن غير عوج بياعين
ممكن يجيب لك نفس التون لو خلص من عنده واحتجت كماله

وعلشان كده نادرا ما بلجأ فى السيراميك للمحلات وبيكون فى حاجه صغيرة ومفيهاش فن

[CIVIC_VTEC]

با

انا جبت بورسلين من مصنع كليوباترا من العاشر فرز تانى المتر كان عامل 49
وجبت حوائط المتر كان عامل 34 فرز تانى
سألت على الاسعار برة كانت مولعة ورحت المهاجرين برضوا اسعار عالية

انصحك مصنع كليوباترا فى اى مكان بيكون فية عروض وتخفيضات كويسة جدا والمهندسين هناك متعاونين جدا وبيحاولوا يجيبولك اكتر تخفيض

انا اشتريت وشحنت للبحر الاحمر

باشا ممكن تفاصيل أكتر عن المصنع دا
وياريت لو ليه اي ارقام تليفونات
وتفاصيل عن البورسلين الفرز التاني دا
وايه فروقه عن الفرز الاول ؟؟
انا اسف استفساراتي كتيره بس انا مسحول اليومين دول فى الشقه وبصراحة تعليقك اضافلى كتير .. وشكرا جزيلا مقدما