حتى الامراض والاوبئة اسرار عسكرية

[Eng_hatemfathy]

لما تلاقى حاجه وتلاتين قناه عاملين حملات لا للارهاب
ونفس الحاجه وتلاتين قناة عاملين حملات نعم للدستور ومتلاقيش ولا قناة عاملة حملات للتعريف بالمرض وطرق الوقاية واعراض الاصابة
وفى نفس الوقت مفيش حد بينادى باعدام الخنازير لايقاف تطور الفيروس و اللى زرايبها ملت البلد تانى فى حين ان الكل بينادى باعدام فصيل مجتمعى مخالف له فى الرأى
يعنى الخنازير اعز على البنى ادم من اخوه!!!!
فعلا زمن العجائب
والمسخرة ان تأجيل المدارس بحجة لم شمل الاسرة طب ما انتو هتفرقوها يوم 22 فبراير ولا لم الشمل بيكون اسبوع واحد بس واكتر من كده بعزقة

[mahmoudysf]

صدق انت او لا تصدق. . . ان الحماية الوحيدة من اى عدوى عن طريق الجهاز التنفسى هى حاجتين. . . الكمامة دى و مطهرات الايدى. . . الموضوع ده انا قتلته بحثا مع ظهور انفلونزا الطيور من سبع سنين. . . و هى دى الخلاصة. . . انك تمنع العدوى بعمل mechanical barriers او موانع بينك و بين وصول الفيروس ليك و اهمها الكمامة و ترك مسافة بينك و بين الشخص العيان. . . اما مطهرات الايدى فلأنه ثبت ان تلوث الايدى هو المصدر الاول للعدوى. . .

بالنسبة للتوعية. . . طبعا كعادتنا متأخرين بس انا شوفت امبارح المتحدث بأسم وزارة الصحة بيشرح ان الفيروس خلاص مشرف و مأنس معانا خلاص و بقى من فيروسات الانفلونزا الموسمية اللى هنشوفها كل سنة. . . و قال كلام زى اللى انا كتبته عن الحرص من العدوى و الكلام ده. . . بس الفكرة اعتقد انهم مش عايزين من دلوقت يتكلموا على مرحلة الكمامات عشان عدم اثارة الفزع بين الناس خاصة اللى مش متعلمة مع انها حاجة بسيطة بس كون ان احنا مش متعودين عليها فده هيخلى دماغ الناس تودى و تجيب و اللى يقولك ده مش مجرد انفلونزا و اللى يقولك كمامة ايه و كلام فاضى ايه. . . ياريت كان فى سياحة كان حد راح صور الراجل اليابانى فى المتحف كان هيلاقى منهم كتير بكمامات :-) بس برضه مش مشكلة لان صورة واحدة للشتا فى اليابان لما تلاقى الناس كلها فى الشارع بكمامات كفيلة انها توضح ازاى الناس بتتصرف فى الكواكب الاخرى :-)

سيادتك بتتكلم عن مكافحة العرض ومش مكافحة المرض
واظن ان توعية الناس واللي يصاب بالذعر يصاب افضل من موتهم
انا بكلم حضرتك عن 18 ماتو حتى الان و 170 اصابة حسب المصادر الرسمية هما منتظرين ايه تاني
المشاركة اللي تحت دي بتلخص كتير ممكن يتقال

لما تلاقى حاجه وتلاتين قناه عاملين حملات لا للارهاب
ونفس الحاجه وتلاتين قناة عاملين حملات نعم للدستور ومتلاقيش ولا قناة عاملة حملات للتعريف بالمرض وطرق الوقاية واعراض الاصابة
وفى نفس الوقت مفيش حد بينادى باعدام الخنازير لايقاف تطور الفيروس و اللى زرايبها ملت البلد تانى فى حين ان الكل بينادى باعدام فصيل مجتمعى مخالف له فى الرأى
يعنى الخنازير اعز على البنى ادم من اخوه!!!!
فعلا زمن العجائب
والمسخرة ان تأجيل المدارس بحجة لم شمل الاسرة طب ما انتو هتفرقوها يوم 22 فبراير ولا لم الشمل بيكون اسبوع واحد بس واكتر من كده بعزقة

[mahmoudysf]

ده بوست على الفيس قولت ممكن يفيد
هام وخطير خذوا حذركم
احنا ربــــــات البيوت
يا جماعه من فضلكوا كله يقرا والموضوع سواء اشاعه او بجد الوقاية خير من العلاج وخاصة مع اعلان موت كذا حالة وتاجيل المدارس منقول اولا احب اعرفكوا انا طبيبه بشريه يعنى معلش تعالوا على نفسكوا وخدوا كلامى ده على محمل الجد دون استغرابات او جدالات فى فعلا عدوى موجوده فى البلد حتى الان احنا مش عارفين هيا كورونا ولا انفلونزا خنازير لانه مش تيبكل لاى فيرس فيهم يعنى سواء كان كورونا او خنازير احنا معندناش مصل ليهم ده بمنتهى الصراحه الفيرس جاى مت...حور وواخد شكل جديد للعدوى يعنى هياخد وقت على مانعدل المصل ويبقى ايجابى معاه طب ايه اعراض العدوى هتلاقى سخونيه بس جامده فى انتفاخ الغدد تحت الودان فى الم فى الزور وكجه ورشح اهم عرض هو انتفاخ الغدد اللى تحت الودان مع السخونيه الشديده طب لو شكيت فى حاله عندى او عند جارتى حضرتك فورا هتساعدى الشخص ده انه يروح اقرب مستفى حميات او مستشفى عام كبيره متطلعيش على مستفى صغيره لانك بتعرضى اللى هيفحصه لانه يتعدى منه ومش هيعرف يساعده بالعكس ممكن يضره لانه ممكن يطمنك انه برد عادى ويطلع هو الفيرس ويتاخر فى العلاج هل بيؤدى للوفاه بيؤدى للوفاه للاسف طب بيعدى ازاى بيعدى بالاختلاط يعنى رذاذ الفم او تلامس ايدك مع ايد شخص مريض وترجعى تحطيها على عينك او بؤك يعنى مصدر دخولها ليكى فى السوايل مخاط لمس عين تحطي مصدر العدوى فى بؤك طب فى مصل ليها فى مصل فى الصيدليات اسمه تمى فلو ب 40 جنيه بس زى ماقولت هو الفيرس جاى متحور يعنى المصل قد يساعد فى تاخير اعراض المرض انما مش هيدى حمايه كامله للاسف رجاء مش عيب انك تلبسى كمامه فى الاماكن المزدحمه زى المترو والمواصلات العامه مش عيب انك تتجنبى السلامات والقبلات الحاره مع زمايلك فى الفتره دى مش عيب انى احوش ولادى من اللعب مع ولاد الجيران فى الفتره دى واهم كمان اجلوا الدراسه يعنى خففوا الاختلاط تماما وملحوظه مهمه جدااااااااااااااااااااااااا اى واحده مربيه طيور تقوم بدبحها فووووووووووووووووووووووووووووووووووووووووووووووووو وورا مفيش خوف من اكلها نهائى الفيرس بيموت بالحراره العاليه يعنى لو شايفه الطير كويس قدامك ادبحيه وفرزنيه او كليه زى ماتحبى لكن متسيبهوش بعد الليله فى بيتك وكذلك الطيور اللى بره لو شايفه الطير كويس قدامك اشتريه عادى جدا ده بس للناس اللى بيجلها هواجس وقلق حبيت اطمنهم وتنضفى ايدك كويس بعد دبح الطير او غسله وممنوع تلمسى بؤك او عينه لحد ماتغسلى ايدك وتطهريها كويس مره واتنين وتلاته طب فى حالات ماتت منه للاسف فى 177 اصابه بالفيرس فى 4 اطباء راحوا من وسطنا للاسف كلهم شباب ميعدوش ال 35 سنه وكلهم عندهم اطفال معدوش ال 7 سنين وللاسف الصحه كانت متكتمه تكتم رهيب على الموضوع وحتى الان فى 17 حاله وفاه من الحالات المصابه ربنا يعدينا من الازمه دى على خير حافظى وحاذرى وان شاء الله نقدر نوقف انتشار الفيرس وسواء بجد او اشاعه الوقاية خيرا من العلاج منقووووووووووووووووووووووووووووول مريم

[eslamrace]

الموضوع محتاج فعلا توعيه من الحكومه ووسائل الاعلام واتخاذ الاحتياطات وكمان تغيير سلوكياتنا احنا كمواطنين لان اسهل حاجه ان الحكومه تعمل حمله توعيه ولكن لو المواطن متقبلهاش "كالعاده"واخدها بتهريج حتبقى هى دى المشكله وده الاصعب لاننا بنقلق من التغيير وغالبيه المواطنين بيحب يمشيها بالبركه
بالظبط زى من فتره قريبه المواطن اللى ركب 3 اسنان فى الشارع من مواطن صينى على القهوه لان السن وقف عليه ب20 جنيه بدون تأكد من تعقيم ادوات ولا سلوكيات صحيه
ربنا يستر وتعدى الازمه على خير خاصه للاطفال الصغيرين اللى مش حيفهموا التداير الصحيه وممكن يهملوها .
تحياتى.

[almohaor]

كفاية علينا محاربة الارهاب اللى كل القنوات المصرية شغالة عليها ليل نهار
انما صحة المواطنين فليتكفل بها الرحمن..طيب قولوا للناس اذاى تاخد احتياطتها من المرض
الغريبة ان وزيرة الصحة فى احدى القنوات الفضائية تؤكد ان الاصابات لاتتعدى اربعة منهم اتنين وفيات يجى وراها مسئول من نقابة الاطباء يؤكد ان الوفيات تسعه ومن بينها دكاترة _ طب نصدق مين فيهم
بلدنا بقت عشرية قوى لكل انواع الامراض اللميتة والمستعصية
بمعنى ان المرض لما يدخل مصر لازم يستوطن بها
البلهارسيا_فيروسات الكبدالوبائية _ ارتفاع نسبة الاعاقات الجسمية والعقلية _انفلونزا الطيور _ انفلونزا الخنازير_جميع انواع السرطانات..الفشل الكلوى
بفضل الهرمونات التى تضاف للاعلاف وترش بها الفواكه..وكمان المبيدات المسرطنة اللى لاتستعمل الا فى بلدنا المحروسة مصر وحرمتها دول العالم ولوثوا بها الارض الزراعية لاجيال قادمة
وربنا يبارك فى حكوماتنا الرشيدة ويجعله عامر

[Eng_hatemfathy]

اللذيذ انى قريت بوست لواحد ان بنت محمد مرسى بالتعاون مع دكتور امريكى وفى معامل كلية العلوم جامعة الزقازيق اعادت احياء الفيروس من جديد ونشرته
يا شماتة طنط ظاظا فينا !!!!!!!

يعنى فاهيتا ووزة جاسوسة وكيماوى فى رابعة ومدافع هاون فوق العمارات وجثث فى كرة ارضية و71 واحد من حماس ثبتوا الجيش والشرطة الصرية وجابوا كل المحافظات وفتحوا كل السجون ودلوقتى اعادة احياء الفيروس

رحمتك يا رب

[S O P H O S]

هو في مشكلة فعلا
ولكن الكارثة ان محدش عاوز يقول الحقيقة
والشعب كده هيخاف اكتر فعلا بنخبي ايه وعلي مين !!

[mahmoudysf]

اللذيذ انى قريت بوست لواحد ان بنت محمد مرسى بالتعاون مع دكتور امريكى وفى معامل كلية العلوم جامعة الزقازيق اعادت احياء الفيروس من جديد ونشرته
يا شماتة طنط ظاظا فينا !!!!!!!

يعنى فاهيتا ووزة جاسوسة وكيماوى فى رابعة ومدافع هاون فوق العمارات وجثث فى كرة ارضية و71 واحد من حماس ثبتوا الجيش والشرطة الصرية وجابوا كل المحافظات وفتحوا كل السجون ودلوقتى اعادة احياء الفيروس

رحمتك يا رب

انا كل ما لاقي حد بيردد الكلام ده
ااقول ان المادة الخام للتخلف مصدرها عندنا اكيد

[Mohab.Nabil]

اللذيذ انى قريت بوست لواحد ان بنت محمد مرسى بالتعاون مع دكتور امريكى وفى معامل كلية العلوم جامعة الزقازيق اعادت احياء الفيروس من جديد ونشرته
يا شماتة طنط ظاظا فينا !!!!!!!

يعنى فاهيتا ووزة جاسوسة وكيماوى فى رابعة ومدافع هاون فوق العمارات وجثث فى كرة ارضية و71 واحد من حماس ثبتوا الجيش والشرطة الصرية وجابوا كل المحافظات وفتحوا كل السجون ودلوقتى اعادة احياء الفيروس

رحمتك يا رب

يعنى طلع اللى بنشوفه فى الافلام الاجنبى حقيقى

هههههههههه و الله هم يضحك و يحزن فى نفس الوقت

[ahmed1981]

لا تزال الدولة تصر على التعامل مع اى مرض او وباء على انه سر حربى يجب اخفاؤه

الحقيقة أني لا أرى دولة
الببلاوي عنخ آمون بيتنفس بالعافية
عايزين منه إيه تاني ؟؟

ـ

[MaZaGAngeE]

وزيرة الصحة قالت ان المشكلة في الشعب .... يعني الحكومة عداها العيب

[أبو آسر]

اللذيذ انى قريت بوست لواحد ان بنت محمد مرسى بالتعاون مع دكتور امريكى وفى معامل كلية العلوم جامعة الزقازيق اعادت احياء الفيروس من جديد ونشرته
يا شماتة طنط ظاظا فينا !!!!!!!

يعنى فاهيتا ووزة جاسوسة وكيماوى فى رابعة ومدافع هاون فوق العمارات وجثث فى كرة ارضية و71 واحد من حماس ثبتوا الجيش والشرطة الصرية وجابوا كل المحافظات وفتحوا كل السجون ودلوقتى اعادة احياء الفيروس

رحمتك يا رب

ههههههههههههههه
بس اللوم مش على اللي بيقول الحاجات دي
اللوم على اللي بيصدقها واكتشفت مؤخرا انهم كتروا أوي للأسف !
ده توفيق عكاشة طلع رحمة يا راجل !