زهقت من السواقه

[micromoud]

فى ظل الطرق الزحمه الواحد مرواحه ورجوعه من الشغل او اى مشوار بقى مقرف جدا فى كل الاوقات وطول اليوم ممكن تلاقى الطريق واقف بسبب تريله عطلانه حمولة وقعت عالارض لجنه مرور ولا ليها ستين لازمه حادثه وعربيه مقلوبه واتنين نازلين بيتخانقوا مع بعض وممكن تبقى ماشى وتلاقى واحد امامك ماشى على مهله خالص وتزمرله ولا بيحس ولا بيتحرك وتكتشف فى الاخر انه بيتكلم فى التليفون ومش مركز و فى عز الزحمه اليوميه فى ناس بتتفاداها بالدخول عكسى يعنى تبقى ماشى فى طريقك محترم ومبترضاش تخالف القانون وواقف بقالك فترة من الزحمه وتلاقى الناحية التانيه طابور عربيات ماشى ورا بعضه سالك عكسى فى مشهد يومى متكرر الحدوث يخليك تسأل نفسك انا ايه اللى مخلينى محترم وماشى فى سكتى ومأخر نفسى عن مشاويرى والناس مقضياها فهلوة احنا هنا مبقاش فى قانون ولا اخلاق و السواقه خلاص اكتر صفه ممكن يتعود عليها قله الادب والشتيمه.

ياترى فى حد زيى كده ولا انا بس

[محمد اسلام]

انا كنت زى حضرتك بالضبط لحد ما ربنا كرمنى واشتريت سيارة اوتوماتيك ... بصراحه احساس مختلف تماما

[micromoud]

مش فكرة تعب او راحة السواقه ... الفكرة فى التعب من السلوك والاخلاق و السلبيات والفشل فى الطريق

[Anaslbda]

أنا زهقت من السواقة فعلاً.
لكن كل ما افتكر ايام المواصلات والذل والمهانة اللي كنت بشوفها انا واهلي ساعتها بشكر ربنا على نعمته :)

[حاتم سليم]

تألم من النقطه " أ " الى النقطه " ب "

و لو مش عاجبك

طق و موت ...

[ramymechanics]

أول حاجة عملتها شفت مكان سكن حضرتك لقيته الجيزة بجد ربنا معاك انا المرة اللى بعدى فيها فى اى مكان فالجيزة بحس بمرار طافح ... من سنة فاتت قبل مانقل القاهرة الجديدة كنت ساكن فعين شمس بس بصراحة اما نقلت حسيت بفرق رهييييييييييييييييييييييب لكن الحكة الوحيدة فى عربيتى الجديدة كانت من توكتوك فى عين شمس وانا بزور اهلى

انا فعلا بحس بغصة كل ما اسوق فى شوارع مصر وبقارن بينها وبين اى بلد تانية واتحسر .. كفاية ميكروباصات الترامكو بتاعة شارع الهرم او الف مسكن وتكاتك فى طرق عمومية بيحصل فين فالعالم الكلام دة نفسى افهم

انا حاسس ان نص ذنوبى اللى عملتها من يوم ماتولدت كانت شتايم وانا سايق

[miceg]

كان الله في العون
السواقة في مصر بقت لا تطاق لدرجة ان الواحد بيفكر يغير عربيته بعربيه فيها رفاهيه أكثر
عشان يحط أعصابه فثلاحة ويتعايش مع الزحمه وقله ألادب
وفعلا الحداقة بقت بالهبل وتلاقي طابور داخل عكسي وواخد حقك الشرعي فالشارع اللي انت داخله
عشان ألافندي وغيره كسلو يقفو فالطابور
ماهو مافيش رئيس ولا حكومة هيغير كل السلوكيات اللي بتحصل دي
وبصراحه انا فاقد ألامل ان الناس تتصلح
عليه العوض ومنه العوض

[J A G U A R]

انا حاسس ان نص ذنوبى اللى عملتها من يوم ماتولدت كانت شتايم وانا سايق

ده انا طول من ماشى بسب بالدين .. استغفر الله العظيم

[أبو آسر]

فى ظل الطرق الزحمه الواحد مرواحه ورجوعه من الشغل او اى مشوار بقى مقرف جدا فى كل الاوقات وطول اليوم ممكن تلاقى الطريق واقف بسبب تريله عطلانه حمولة وقعت عالارض لجنه مرور ولا ليها ستين لازمه حادثه وعربيه مقلوبه واتنين نازلين بيتخانقوا مع بعض وممكن تبقى ماشى وتلاقى واحد امامك ماشى على مهله خالص وتزمرله ولا بيحس ولا بيتحرك وتكتشف فى الاخر انه بيتكلم فى التليفون ومش مركز و فى عز الزحمه اليوميه فى ناس بتتفاداها بالدخول عكسى يعنى تبقى ماشى فى طريقك محترم ومبترضاش تخالف القانون وواقف بقالك فترة من الزحمه وتلاقى الناحية التانيه طابور عربيات ماشى ورا بعضه سالك عكسى فى مشهد يومى متكرر الحدوث يخليك تسأل نفسك انا ايه اللى مخلينى محترم وماشى فى سكتى ومأخر نفسى عن مشاويرى والناس مقضياها فهلوة احنا هنا مبقاش فى قانون ولا اخلاق و السواقه خلاص اكتر صفه ممكن يتعود عليها قله الادب والشتيمه.

ياترى فى حد زيى كده ولا انا بس

أنا زيك طبعا وأكتر منك كمان لدرجة إني بكره اليوم اللي بكون نازل فيه مشوار خارج مدينة العبور ومش معنى كده إن العبور في معزل عن مصر ! هي أرحم بلا شك لكن برده ما زلت تلاقي إنسان بارد ماسك الشمال وماشي على 60 !! ومهما تقلب نور أو تدي كلاكسات ولا في الدماغ البرود مسيطر على أعصابه لدرجة إني بستغرب هي الناس دي بتجيب البرود ده منين ! ده أنا لما بيكون ورايا مشوار واتأخرت شوية ممكن أمشي على سرعة 140 علشان ألحق لكن العالم دي تحس إنها فاضية لا وراها شغلة ولا مشغلة غير تطليع *&^%$ الواحد ، وآه وآه من اللي ماسك التليفون ده كل ما أشوف واحد كده أقوم باصصله وأقول في نفسي ملعون أبو التليفونات ! والعجيب إنك ممكن تلاقي واحد راكب عربية تمنها أكتر من ربع مليون جنيه ومتعرفش بقى مستخسر ولا إيه يجيب بلوتوث تمنه أقل من 150 جنيه يقدر يتكلم بيه من غير ما يمسك التليفون في إيده ده على افتراض إن العربية نفسها مفيهاش الأوبشن ده !! بس تحس إن العالم دي خلاص أدمنت الفوضى والبرود ووظيفتها دلوقتي في الحياة إنها تموت اللي زي حالاتنا كده كمدا وغيظا !
أقول إيه ولا إيه بس حسبي الله ونعم الوكيل في البلد دي اللي خلاص فعلا فقدت الأمل إنها تتغير وإن عقليات شوية الأشكال اللي عايشة فيها دي تتغير

ده انا طول من ماشى بسب بالدين .. استغفر الله العظيم

بلاش يا أخي امسك لسانك لأن سب الدين كفر مخرج من الملة عياذا بالله ولو مضطر تشتم اشتم الشخص نفسه لكن بلاش سب الدين الله يكرمك

[S O P H O S]

يارتنا فمجتمع هادي
ينفع فيه نمشي بعجلة ومحدش يدوس علينا وهي بيجري
او نموت من دخان العربيات الملوث