شقة في النزهة الجديدة

[svneleven]

مش متأكد لو المنتدي الاجتماعي هو المكان المظبوط للاستشارة ديه و الا لأ.
المهم واحد صاحبي عاوز يشتري شقة في النزهة الجديدة. فين؟
ملاهي السندباد الشرطة أخدتها و هتبني هناك مشروع سكني للظباط و الظباط نفسهم بيبيعو الوحدات بتاعتهم.
لو حد عنده فكرة عن المنطقة لو حلوة أو وحشه ليها مشاكل و الا لأ و سعر المتر تقريبا هناك كام. و كمان مشاريع الشرطة ديه بتتسلم في ميعادها و الا لأ و جزاكم الله كل خير.

[maged]

النزهة الجديدة منطقة رائعة وهادئة لكن معنديش فكرة سعر المتر فى مكان السندباد ممكن يكون بكام

[raedegypt]

بكام السعر معروض ؟

[svneleven]

هتتسلم كمان سنتين و نص و قايلين 4000 تقريبا للمتر علي دفعات كبيرة مش تقسيط تقسيط يعني. المشكلة أن علي جوجل مابس هتلاقس منطقة جسر السويس و شارع طه حسين في ضهرها و ديه منطقة شعبية.

[raedegypt]

المشكله فى الابراج زى عمارات العبور صلاح سالم .. شقق كثيرة ومحدش عارف حد وتلاقى خدمات زى الزفت ومافيش اتحاد ملاك لانهم ضباط خدوها تجارة ومئه واحد باع للاخر . فى النهايه اسانسيرات تخرب وسلالم زى الزفت وحراميه وبعدين لاتعرف تركب طبق لان السطوح مع البوابين ومحدش عارف من فين اتوآ دة نقطه
المشكله الاخرى خزنات المياه مع الاهمال كلها وساخه وطحالب وبرضه مش هاتلاقى حد تعرفه تتفاهم معاه هى شوف حتى لا اطيل عليك مشاكل عمارات الشرطه والجيش بتكون بسعر دعم لهم وهما يبيعوها تجاره فى النهايه تضيع المسؤليه وتجد فوضى فى السكان والبلطجيه
بالنسبه للمنطقه زحمه جدآ ومش هاتلاقى مكان لركن العربيه . الجراجات البوابين معرفش مع مين يقفلوها وتاجر مخازن ها تتكلم هاتلاقى تانى يوم يالعربيه او البيت اتسرق ان ماكان ابنك ولا زوجتك خطفوها علشان ماتفتح فمك معاهم . من النهايه تغور

[أبو آسر]

هتتسلم كمان سنتين و نص و قايلين 4000 تقريبا للمتر علي دفعات كبيرة مش تقسيط تقسيط يعني. المشكلة أن علي جوجل مابس هتلاقس منطقة جسر السويس و شارع طه حسين في ضهرها و ديه منطقة شعبية.

لا يا باشا طه حسين مش منطقة شعبية أبدا .. النزهة الجديدة من أرقى مناطق مصر وأقل خنقة وزحمة (نسبيا) من مصر الجديدة ومدينة نصر ، وجسر السويس نفسه فيه مناطق شعبية زي محطة الجراج وما خلفها من عين شمس ومناطق أخرى مستواها جيد جدا اللي بتقع في نطاق مصر الجديدة والنزهة وشارع الحجاز ونادي الشمس
بس انت بتقول إنهم هيشيلوا ملاهي السندباد نفسها ويعملوا عليها مساكن ؟!! طب والملاهي هتروح فين ؟
لو المباني دي هتبقى في نفس مربع الملاهي هيبقى مشروع رائع جدا لأنها هتبقى كده على شارع جوزيف تيتو الرئيسي وفي وشك مباشرة مطار القاهرة بس أنا شخصيا مش هفضلها علشان هتبقى قريبة أوي من الشارع الرئيسي علشان موضوع تلوث عوادم السيارات اللي مش بتنقطع من الشارع ده زائد دوشة العربيات نفسها وأخيرا دوشة طيارات المطار نفسه ! لكن المنطقة في الجملة نضيفة جدا وراقية وبعيدة عن أي منطقة شعبية وأعتقد 4000 جنيه للمتر سعر معقول لو الشقة نفسها هتكون كويسة من ناحية تشطيبات المداخل والواجهات والتقسيم والمنظر العام فقول لصاحبك يصبر شوية لما يشوف البروشورات ويعرف كل التفاصيل
لكن أنا شخصيا بالمبلغ ده أجيبلي حاجة في التجمع الخامس مثلا أو الرحاب أو مدينتي لأني مش بحب المناطق دي بسبب الزحام والتلوث لكن كل واحد طبعا بيبقى ليه وجهة نظره

[salodas]

أنا اسمع عن المشروع ده من أكتر من سنة وفعلا لما رحت عند السندباد لاقيت شالو اليافطة بتاعته وحطو مكانها (اسم جمعية مش فاكر اسمها ايه الى هى مسؤاله عن المشروع .. وكان ايصال الحجز بيتباع بحوالى 10 الاف جنيه وممكن تفاصل وأنت وشطارتك ... ايصال الحجز ده الى أنت بتشتريه من الضابط الى حاجز . وبعدين بتكمل انت الأقساط .

بصراحة المشروع مش عارف له بداية من نهاية وأن عن نفسى اى حاجة خاصة بالشرطة بقفل منها .
واتفق تمام مع ابو ياسر كما قال ان بالسعر ده اشترى فى التجمع افضل فى كل حاجة

[أحمد كمال]

بصراحة في ظل الظروف الحالية

ما تشتريش من ضابط شرطة عشان لو طلع راجل مش تمام و حصل مشاكل في البيعة مش هتعرف تاخد منه لا ابيض و لا اسود

[أحمد كمال]

المشكله فى الابراج زى عمارات العبور صلاح سالم .. شقق كثيرة ومحدش عارف حد وتلاقى خدمات زى الزفت ومافيش اتحاد ملاك لانهم ضباط خدوها تجارة ومئه واحد باع للاخر . فى النهايه اسانسيرات تخرب وسلالم زى الزفت وحراميه وبعدين لاتعرف تركب طبق لان السطوح مع البوابين ومحدش عارف من فين اتوآ دة نقطه
المشكله الاخرى خزنات المياه مع الاهمال كلها وساخه وطحالب وبرضه مش هاتلاقى حد تعرفه تتفاهم معاه هى شوف حتى لا اطيل عليك مشاكل عمارات الشرطه والجيش بتكون بسعر دعم لهم وهما يبيعوها تجاره فى النهايه تضيع المسؤليه وتجد فوضى فى السكان والبلطجيه
بالنسبه للمنطقه زحمه جدآ ومش هاتلاقى مكان لركن العربيه . الجراجات البوابين معرفش مع مين يقفلوها وتاجر مخازن ها تتكلم هاتلاقى تانى يوم يالعربيه او البيت اتسرق ان ماكان ابنك ولا زوجتك خطفوها علشان ماتفتح فمك معاهم . من النهايه تغور

الحياة مش بالسواد ده ...... ناس كتير ساكنة في عمارات شرطة و جيش و عايشين كويس

[svneleven]

شكرا للجميع الصراحة ما كنتش متوقع كم الأراء الكتير ده. شكرا جزيلا لكل من شارك برأيه.