حد جرب الشراء من موقع جوميا وسوق

[mahmoudysf]

السلام عليكم
شفت لبس عاجبني في موقع سوق
وعلية تخفيض كويس
هل الخامة بتاعتهم زي الصور
وهل التخفيضات دي حقيقية لانهم كاتبين على حاجات تخفيضات 50 %
وهل المقاسات زي المقاسات المصرية
طيب لو اشتريت حاجة وجت خامتها مش تمام او المقاس مش مظبوط امتنع عن الاستلام وبياخدو الحاجة عادي
وشاكر ليكم

[Eng.Omar_karem]

انا اشتريت من جوميا موبيل مش لبس والحمد لله تمام...بس عامة هما كويسين اوي وجابوا الاوردر في ميعاده واعرف برضوا واحد صاحبي جاب منهم جزمة وبيقولي تمام وجميلة جدا...واكيد المقاسات زى المقاسات المصرية

بالنسبة لموضوع الاستلام ده هو ارخم حاجة في القصة كلها لان مندوب شركة الشحن مش هيسمحلك تشوف الاوردر الا لما تدفع الفلوس ويمشي لانه مش طرف هو مجرد موصل فقط بياخد فلوسه ويمشى
لو فيه بقى مشكلة في الاوردر بتتصل بالشركة نفسها وتتعامل معاهم !!

[exelence]

واحد صاحبى اشترى موبايل من سوق بس ما كانش معاه ضمان و لما قالهم قالولوا هنديك ضمان شركة سوق نفسها بس دى كانت غلطته هو لان اللى بضمان كان سعره اعلى و موجود بردوا فى الموقع بس الموبايل ممتاز و مفيهوش حاجه

[أبو آسر]

مبدئيا الموضوع عامل زي البطيخة يا تبقى حمرا يا تبقى قرعة ! أنا كان ليا تعاملات كتير جدا مع موقع سوق ومنها الكويس جدا ومنها السيء جدا وانت وحظك
بس الميزة انك لو اشتريت حاجة ومعجبتكش ولقيتها بايظة او غير مطابقة للمواصفات فممكن ترجعها عادي مجانا وتسترد فلوسك بس اعمل حسابك في بتاع اسبوعين مثلا على الاقل على ما يعملولك refund وتاخد فلوسك ده غير انك ممكن تضطر تقعد تكلمهم يوميا علشان تفكرهم وتستعجلهم !
طبعا الكلام ده بالنسبة لسوق أما جوميا فمجربتوش لكن أعتقد النظام كله واحد
وخلي بالك العروض دي 99% بتبقى وهمية وممكن تلاقيها أغلى من برة كمان وغالبا الصور اللي بتنزل بتبقى بتاعة المنتجات الأصلية مش التقليد اللي بتتباع فعليا
نصيحة هات الحاجة اللي شايفها بعنيك لأن احنا لسة قدامنا حوالي 99 سنة على ما نوصل لموقع زي أمازون مثلا في البيع والشراء أونلاين !

[الجنرال]

في فرق ما بين سوق وبين جوميا وده فرق مهم جدا جدا جدا

ان سوق ده عامل زي دوبيزل .. اي حد ممكن يعرض اي حاجة عليه .. وفي ناس فاتحه بيوتها من التجارة عليه .. وده مش عيب

سوق بيدخل كوسيط وضامن للسلع .. فانت بتتعامل مع البائع (اللى هو اي حد فى الدنيا) وسوق وسيط بينكوا فقط

في بعض السلع سوق نفسها بتجيبها وتبيعها بنفسها

جوميا العكس .. جوميا يمتلك البضاعة .. يعني بيبيع حاجته هو (بغض النظر هو جايبها منين) فانت بتتعامل مع جوميا

تجربتي بصراحة مع سوق كانت زي الزفت .. اشتريت موبايل .. اتأخر جدا فى التسليم .. قدمت طلب الغاء .. محدش بيعبرك اصلا .. تبعت شكاوي ومفيش فايدة .. في الاخر جالي الموبايل في يوم وانا فى الشغل وللاسف بابا استلمه ودفعلهم الفلوس

الموبايل طلع بايظ وفيه مشكلة .. ومعهوش ضمان ولا زفت .. بعتلهم طلب استرجاع .. محدش عبرني .. بعتلهم شكوى .. مفيش فايدة .. ولحد الان الموبايل موجود ومفيش اي حد عبرني من سوق والشكوى مفتوحة بقالها بتاع سنة ونص مثلا

اعرف ناس شغاله في سوق دوت كوم .. كلمتهم .. مفيش فايدة نهائي

جوميا متعاملتش معاه .. لكن معرفش حد اشترى منهم واشتكى بصراحة

على العكس بقه .. كان عندي تجربة شراء من على الانترنت من موقع زيهم كده بس فى سنغافورة .. لا تتخيل كمية الاحترام والدقة في كل حاجة .. حتى مقاس الحاجة اللى بتشريها كانت مكتوبة بدقة .. وكنت مقلق من اني ادفع بالكريديت كارد فالراجل جه بنفسه لحد الفندق وسابلي الطلبية فى الاستقبال تحت واخد الفلوس ومشي (مشوفتهوش اصلا)

[mahmoudysf]

شاكر جدا لحضراتكم
السلعة اللي عايز اشتريها موجودة في جوميا وموجودة في سوق نفس السلعة لكن المقاس بتاعي موجود في سوق مع اني كنت اتمنى ان التعامل يكون مع جوميا لكثرة الشكاوي من سوق
اخيرا هل الشحن مجاني ولا بدفع تكلفة الشحن

[أبو آسر]

شاكر جدا لحضراتكم
السلعة اللي عايز اشتريها موجودة في جوميا وموجودة في سوق نفس السلعة لكن المقاس بتاعي موجود في سوق مع اني كنت اتمنى ان التعامل يكون مع جوميا لكثرة الشكاوي من سوق
اخيرا هل الشحن مجاني ولا بدفع تكلفة الشحن

غالبا بتدفع فلوس شحن وبتختلف برده من منتج لآخر
انت سجل في الموقع واعمل طلب شراء عادي وكمل الخطوات وهتلاقي في الآخر المبلغ الإجمالي شامل الشحن وكل حاجة

[ahmedsamy90]

أنصحك بالتعامل مع جوميا أو نفسك أحسن كتير من سوق

[ahmedsamy90]

أنا جبت جزمة كلاسيك من جوميا من كام يوم وممتازة جداً (imac) ....... وهما ناس في منتهى الاحترام

[mahmoudysf]

انا بالفعل عملت طلب شراء في نفس يوم عمل الموضوع من موقع سوق
ونفس السلعة موجودة في موقع جوميا بنفس السعر ونفس النخفيض !!!!!!!
بس ملقتش مقاسي في جوميا
المهم اتصل بيا حد من سوق عشان يتأكد من البيانات
وبعدين بسال الحاجة هتوصل امتى معرفش
طيب ممكن تخلي مندوب شركة الشحن يتصل قبل التسليم بيوم عشان اكون موجود ملناش علاقة
ولغاية الان من يوم 9 ولم تصل الحاجة دخلت على حسابي في الموقع لقيت كاتبين لم يتم الشحن حتى الان والشحن من 14/2 الى 19 /2
يعني الاوردر بياخد اكتر من اسبوع ودي حاجة مقرفة

[hiccup]

أنا اشتريت من جوميا كتير وهشارك مع حضرتك الخلاصة من وجهة نظري /
١: بالنسبة للهواتف والأجهزة بتبقي ممتازة لان مثلاً لو موبيل نوكيا أو سامسونج بيكون بنفس المواصفات مع وجود عروض ممتازة .
٢: بالنسبة للملابس للأسف الشديد مش ديماً بتكون الخامات كويسه حسب سعر المنتج يعني لو حضرتك لقيت خصم كبير علي منتج في الغالب بيكون بسبب سوء الخامة او أصبح موضه قديمة اوي
٣: سياسة الاستبدال والاسترجاع تقريباً ٧٠٪ بتقدر ترجع اي شىء لكن الموضوع بيكون ممل جداً وبياخد وقت اقل شىء اسبوعين .
دي خلاصة تجربتي في الشراء من جوميا في الموضوع تجربة الشراء من جوميا موضحين كل شىء بالظبط عن طريقة الشراء .
التسجيل في جوميا /:

http://wingiz.com/media/images/91bb99180e.jpg

اختيار المنتج والشراء .

http://wingiz.com/media/images/f6a1a87086.jpg

بالتوفيق

[ahmed aly aly]

استريبت تابلت خدمة ممتاذة