هل في حد بيحضر لدكتور ابراهيم الفقي ؟؟

[Dream286]

السلام عليكم

انا كنت حابب اعرف هل في حد هنا يسمع عن دكتور ابراهيم الفقي رئيس مجلس ادارة المركز الكندي للتنمية البشرية ؟

وهل في حد مهتم بحضور الدورات التدريبية الخاصة به ؟

ياريت لو في حد مهتم يقول

على فكرة دكتور ابراهيم الفقي فعلا راجل عظيم جدا

والله شخصية قوية ومؤثرة بشكل غير طبيعي

واللي مسمعش عنه او حضر له ممكن يعمل سيرش على النت عليه

فعلا هيستفيد جدا

[GoldenManEye]

الراجل ده بيعصبنى لما بشوفوا :)

بس أنا شفت فى الجرايد إعلان عن محاضرات بيعملها تمنها بالـ الاف مش عارف ليه!

مش عارف الموضوع يستاهل المبلغ ده والا إيه!!

[م/محمد صلاح]

الراجل ده بيعصبنى لما بشوفوا :)

بس أنا شفت فى الجرايد إعلان عن محاضرات بيعملها تمنها بالـ الاف مش عارف ليه!

مش عارف الموضوع يستاهل المبلغ ده والا إيه!!

انا بصراحه كمان بيعصبنى لانى حاسس انه مطرقع وبيشتغل الناس بغض النظر عن الشهادات الكتير والدكتوراه بس دى وجهة نظرى

[Hossam_Hassan]

الراجل ده بيعصبنى لما بشوفوا :)

بس أنا شفت فى الجرايد إعلان عن محاضرات بيعملها تمنها بالـ الاف مش عارف ليه!

مش عارف الموضوع يستاهل المبلغ ده والا إيه!!

الموضوع لا يستاهل، كل اللى بيعمله نوع من التحفيز بالايحاء، أو البرمجة العصبية زى ما بيسميها و أغلب اقتناع الناس به نتيجة لشخصيته المقنعة، بس علميا هو غير مؤهل اطلاقا و لو على الشهادات الغريبة اللى عنده، ممكن تجيبها من على النت.

[egyptianmafia]

I saw him at City Stars like a month ago and I went to see one of his shows in Canada.

When I was in school, I always watched his videos before studying for my final exams....it made me be less stressed!

[aratux]

الراجل ده أنا شايف إنه إشتغالة
أهى موضة و هاتخلص

[Yarisawy]

فى ايه ياجماعه الهجوم على الراجل ده ... هو الراجل بيقول ايه غير ان الواحد يحسن من تفكيره ويستعين بربنا فى كل حاجة ... يعنى ازاى نفكر صح ومننساش الدين

انا شفت كذا حلقة كانوا اتعرضوا على Art ولقيتوا بيشجع الشباب من الناحيه النفسيه مع عدم اغفال الجانب الدينى ,

ياجماعه الراجل ده رئيس مجلس إدارة المعهد الكندي للبرمجة اللغوية و عالم التنمية البشرية لو مش عاجبنى اقول مش عاجبنى وده مش معناه انه اى كلام عشان مش عجبنى ... ولا هو لازم يعمل حركات عشان الناس تحبه

متهيالى ثمن الحضور مش غالى شفت قبل كده انه ب 40ج

[جمال]

انا مش مقتنع بيه و لا بطريقة اداءه , وكمان شكله بيستفزنى
ده رأيى

[Hossam_Hassan]

فى ايه ياجماعه الهجوم على الراجل ده ... هو الراجل بيقول ايه غير ان الواحد يحسن من تفكيره ويستعين بربنا فى كل حاجة ... يعنى ازاى نفكر صح ومننساش الدين

انا شفت كذا حلقة كانوا اتعرضوا على Art ولقيتوا بيشجع الشباب من الناحيه النفسيه مع عدم اغفال الجانب الدينى ,

ياجماعه الراجل ده رئيس مجلس إدارة المعهد الكندي للبرمجة اللغوية و عالم التنمية البشرية لو مش عاجبنى اقول مش عاجبنى وده مش معناه انه اى كلام عشان مش عجبنى ... ولا هو لازم يعمل حركات عشان الناس تحبه

متهيالى ثمن الحضور مش غالى شفت قبل كده انه ب 40ج

يا صديقى انا او انت ممكن بكره الصبح نروح نعمل اجراءات انشاء المعهد الأمريكى الكندى الفرنسى البريطانى للفضاء الخارجى

المعهد ده شركة هو عاملها مش مؤسسة تعليمية كندية و هو وصل لرئاستها و كل الشهادات اللى معاه من جامعات مجهولة

[hotboja]

هو محاضر ممتاز وروحت مرة فى قاعة المؤتمرات ندوة
ومحمل من النت جميع حلقات الدورات بتاعتة

وكنت لسة دلوقتى بسماع على الم بى ثرى حلقة عن التسامح

وهو راجل عالمى وانا بحبة ونفسى اتعلم كل حاجة بيقولة وانفذة فى حياتى

[د.أحمد سمير]

إبراهيم الفقي هو محاضر على شاكلة المئات من المحاضرين الأميركيين ..
وخلاصة شغلهم .. إنهم ليهم مجموعة محاضرات معروفة بيقولوها ويعيدوها في كل مكان شوية ..
لو حد قعد لابراهيم الفقي شوية وركز معاه هيلاقي كل كلامة معاد ومكرر وممل ..
أما عن مؤهلاته العلمية فهي محل شك بكل تأكيد ..

[Dream286]

انا حابب اعلق على الردود دي كلها بس اتمنى محدش يزعل مني

بصراحة يا جماعة انا اتضايقت لأن الردود دي فعلا مفهاش اي انصاف وتحمل رائحة النقد الهدام

اسف يا جماعة مرة تانية

بس لو كان الراجل دا زي ما بتقولوا

مكانش وصل للي وصل له

دا اولا مليونير يعني ناجح في حياته العملية

كان ماسك ادارة كبرى الفنادق العالمية الخمس نجوم ومعتقدش ان حد مطرقع او بتاع تنطيط يقدر يوصل للمكان دا في بلد زي كندا البلاد دي مش بتهزر يا اخوانا ومفهاش كوسة ولا خضار

لو فعلا بيقول اي كلام مكانش اخد ال تريد مارك
Trade mark
TM
في العلوم اللي انشأها واللي بتعترف بيها الدول المتقدمة (فقط)
وتخيل انت مش تبقي عالم لا وكمان تألف علم

لو كان الراجل دا مش عنده حاجة جديدة مكانتش القنوات العالمية كلها استضافته على برامجها وعملت حلقات مطولة معاه
ومكانش استعان بيه كبار رجال السياسة
ولا اي شخصية معروفة ( زي عمرو خالد مثلا )

مكانش حضر له آلاف الاشخاص على مستوى العالم بكافة المستويات

وحاجات تانية كتيييير جدااا مش مجالها دلوقتي

والمركز الكندي مش مجرد اسم زي ما اي واحد يقدر يقول المركز الموزمبيقي وخلاص
لا فعلا هو اصلا المركز بتاعه في كندا من سنين طويلة واسمه كدة
وبعد كدة انشأ فرع القاهرة اللي في مدينة نصر يعني الاسم فعلا موجود من زمان

معلش انا اسف على كلامي بس انا هقول الكلام دا وهقوله لنفسي قبل اي حد
الواحد عمل ايه في حياته عشان يقدر ينتقد شخصية زي دي ويهاجمها ببساطة
والحمدلله ان لسة في مصريين ليهم اسمهم على مستوى العالم ياريت الواحد يكون كدة

انا مش بقول ان الواحد لازم يعجب بيه ويصرخ انبهارا
لكن على الاقل لو مش حابب طريقة الالقاء والاسلوب
يبقى كفايا اننا نشهد له انه راجل نجح في حياته حتى لو شخصية مش مناسبة
دا انت ممكن تشهد لعدوك بالتقدم حتى لو مش بتحبه
فمابالك بمصري وبرضو راجل صاحب مبادئ متأثرش بحياة الغرب

بعتذر مرة تانية وانا بجد مقصدش اي اساءة
انا بس مش حابب اننا نتحول لآلات نقد هدام زي كتير من الناس وخاصة ان المنتدى حقيقي ناجح بالعقول الراقية اللي بتشارك فيه

تحياتي للجميع

[Hossam_Hassan]

النقد الهدام بيكون نقد متحيز، و محدش فيه بينه وبين الأستاذ ابراهيم الفقى اى مشكلة علشان يتحيز ضده، عن نفسى قلت رأيى اللى مقتنع بيه و اللى كونته نتيجة خبرة 9 سنين فى مجال التنمية البشرية فى صناعة الضيافة، و خلى بالك ان الشهرة مش دليل على النجاح الحقيقى، و احب اوضح لك بعض الحقائق:

- الكوسة و الخضار موجودين فى كل حتة فى العالم و بالرغم من كده، هو عمره ما ادار اى فنادق عالمية او حتى على مائتين.
- المركز الكندى زى ما انت قلت بتاعه و يقدر اى حد يعمل زيه و هو اولا و اخيرا سبوبة اكل عيش و مالهوش علاقة بعلوم التنمية البشرية.
- كونه مليونير مش دليل على انه ناجح
- لا هو مخترع علم و لا حاجة و صدقنى اسهل حاجة فى امريكا و كندا انك يبقى اسمك دكتور او بروفيسير طالما هتضحك بيهم على ناس مش هيدوروا وراك، اعمل كده بحث و شوف لو فى اى جامعة عليها القيمة حاولت تستفيد من العلم اللى اخترعه

[blazer]

انا بسمع عنه و كان جه يدى محاضره فى كليتنا
كنت عاوز احضر
لقيت اصحابى بيقلولى روح الحق اقطع تذكره قبل ما يخلوصوا
قولتلهم تذكره ايه هى سينما
قالولى لا ماهو دا تمن تذكره المحاضره
طبعا ما حضرتش لانى حسيت انه راجل حلنجى وجاى يلمله قرشين (طبعا هما مش قرشين دول الافات فى ساعه ولا اتنين )!!!
يعنى من الاخر الراجل عنده كلمتين بيبعهم لينا شويه ولكندا شويه واهى سبوبه
بس برده انا دا مش الرأى الناهئى اللى كونته عن الراجل لانى لسه مسمعتش اى حاجه من اللى بيقولها والله المستعان

[Meedo]

راجل لااااااااااااااااااااااااسع موت وبيقول أى كلام فى الهجايص و أحب اقول أنه رئيس الجمعيه التنزانيه الموزمبيقيه للعلوم المهلبيه