Tweet
النهارده كان فيه حادثة على الاتوستراد في المعادي عند اليو تيرن اللي قبل الدائري
و ده قادنا لموقف لطيف جدا , البهوات اللي سايقين الناحية التانية بيهدوا اوي اوي عشان يتفرجوا !
طبعا النتيجة ان الطريق وراهم واقف لحد زهراء المعادي مثلا
طب يا اخينا انت موقف امم وراك عشان تتفرج , عايز تتفرج اركن في حتة فاضية و انزل اتفرج براحتك
لا ازاي ؟ يركن ليه و يعطل نفسه ؟ هو يعمل اللي هو عايزه بالظبط و يهدي شوية او حتى يقف ثواني يتفرج و طز في اللي وراه طالما هو هايتحرك وقت ما يحب
دي كانت المصيبة الخفيفة !
التقيلة بقى
الطريق الزحمة جدا اللي واقف او ماشي عجلة عجلة ببطء شديد .... متعطلة فيه عربية اسعاف
و ماحدش بيوسع لها ............ خالص
لأ مش كده و بس , اللي قدام شوية و بيحاول يوقف الحارات التانية عشان الحارة اللي فيها عربية الاسعاف تتحرك بيتخانقوا معاه !
طب عربية الاسعاف دي ممكن تكون شايلة واحد حياته في خطر و الثانية تفرق معاه او رايحة تلحق واحد في الحادثة اللي قافلة الطريق قدام
كل واحد يقول لك ماليش فيه
او تلاقيها فاضية و السواق بيستهبل
او حد قال للسواق يعدي من الحتة الزحمة دي ؟
اوسع اروح له فين ما الطريق كله واقف ؟
سواق غبي ما مشيش من العكسي ليه ؟
الخلاصة , انا مش هاوسع و اسيب عربية واحدة تعديني حتى لو البديل احتمال حياة او موت انسان
و انا في الموقف ده افتكرت كلمتين كان كاتبهم صديق على الفيس بوك
اللي معدي الشارع على رجليه عنده استعداد يخاطر بحياته عشان اللي راكب العربية يقف له و ما يعديش قبله
و اللي سايق لو معاه عربية تقدر تدهس اللي قدامها كلهم بعربياتهم من غير ما يتعرض لأدنى خطر او رد فعل كان عمل كده كل يوم
و اللي سايق لو معاه عربية تقدر تدهس اللي قدامها كلهم بعربياتهم من غير ما يتعرض لأدنى خطر او رد فعل كان عمل كده كل يوم
و الفيصل في الحالتين هو مصلحته و بس , و الباقي يولعوا بجاز , و الاخلاق تولع بجاز طالما مش في صالحي , و اي قواعد و مقاييس لأي حاجة تولع طالما مش في صالحي .... ممكن اي حاجة في دول افتكرها لما تبقى في مصلحتي انما طالما ضدي فانا هافتكر اي حاجة تانية
وقتها افتكرت المقال ده
http://www.nilemotors.net/Nile/407131-a.html
و الله يرحمه وقتها كان بيتكلم على حاجات ابسط بمراحل من اللي بنعمله النهارده
و كل واحد فينا رغم كل عمايله دي يقول لك انا طيب و الباقيين اشرار .......
و نفس المبدأ بتاع ان جالك الطوفان و انا من بعدي الطوفان طبيعي جدا اسقاطه و تكراره في كل حاجة , في البيع و الشرا , في طوابير المصالح و المحلات , في السياسة , في كل حاجة ........
و نرجع نستغرب احنا في قاع الامم ليه , و حالنا من سيء لأسوأ ليه , و ربنا مش مبارك لنا في حاجة ليه , و نقول احنا طيبين و ما نستاهلش يتعمل فينا كده ... لأ احنا نستاهل كده و اكتر
و هانفضل كده طول ما اخلاقنا كده
و بأسنا بيننا شديد !
Comment