استفسار لخبراء الملتيمديا و المونتاج

[3mr Farrag]

انا بفكر اخد كورس مونتاج بس مش عارف تفاصيل كفايه
من ناحيه افضليه البرنامج اللي اخده و من ناحيه هل المونتاج مطلوب كشغل ولا هاخد الكورس و هقعد في بيتنا بيه


انا اللي عرفته انه في كذا برنامج بس اهمها و معظم الشركات بتستخدمه هو Final cut
و ده لازم طبعا اجيب معاه لاب ابل


ياريت اللي شغال في المونتاج يفهمني الدنيا ماشيه ازاي وهل لازم اخد الفاينال ولا فيه حاجات تانيه تغني عنه و هحتاج لاب مواصفاته ايه بالاخص كارت الشاشه علشان الراندر و الكلام ده و مطلوب المونتاج في الشغل ولا هتعسف بيه

مع العلم يكون البرنامج اللي هاخده بره في اوروبا او دول الاجنبيه شغاله بيه علشان ناوي اسافر و ربنا يكرم

[3mr Farrag]

مافيش حد عنده اي معلومات !!!!!

[Y a r i s]

بص يا عمر يا عزيزي
حتت انك تتعلم ده شيء جميل ... اما حتت انك هتشتغل بيه. او مش هتشتغل بيه فده في علم الغيب ... وعامة مجال المونتاج مع احترامي الشديد. قد ماهو ابداع وفكر اكتر من اي حاجة تانيه بس النفسنة بين الي بيتشغلوا في نفس المجال كبيرة ... وحتت انك هتشتغل او مش هتشتغل زي ما قلتلك قبل كده ... بخلاف كمان حط باعتبارك الواسطة والمحسوبية بمعنى. ان لازم يكون ليك معارف علشان يبعتولك شغل .

طيب نيجي بقه اذا انتا ذات نفسك هاوي منتاج بقه مش علشان شغل وفولوس ومني ... بداية المونتاج. الفاينل كات هو برنامج قص ولزق جميل ورائع وتغوص في دهاليزوا والجديد فاينل كات اكس بس مدوستش فيه. قوي. بس حلاوتوا كمان بتتحكم بهندسة الصوت بشكل اكبر والله اعلم .

طيب هل الفاينل كات كفاية هقولك لأ. لازم تاخود جمبها حاجة زي (( موشن او افتر افيكت )) والاتنين. بالنسبة لي رووووعه. .. الافتر افيكت هو هو. الفوتوشوب. ولكن الفوتو شوب للصور الثابته والافتر افيكت للصور المتحركة او. المراد تحريكها .... الموشن بقه اسهل واسهل .

بس علشان تشتغل عليهم. لازم تكون محترف. فوتوشوب وايسليتور وإين دزاين ... طيب بعد ده كلو هتخوش في حاجة اسمها. يا ثري دي. ماكس يا برنامج المايا ... ودي. بيعملك الصورة مجسمه زي سرحان ونفيسة كده وبعد ما تصمم المجسم الي انتا عاوزوا بتدخلو على الافتر افيكت وكده يعني. موضوع محتاج دماغ. . بس روعه. انا كنت واخدوا هوايه .

طيب عاوز. تاخد كورسات هتلاقي في عندك تراكيب في المهندسين. .... وفي عندك المركز الثقافي الروسي في الدقي ... وفي عندك مركز الرباط في مدينة نصر. .... وفي عندك بست بااااي. في المهندسين بيدوا كمان دورات .

بس خلي بالك. ده مش كورس ورد او اكسل بمية او متين جنيه هههه ...

اخر حاجة في سؤالك يا عزيزي هل لازم يكون عندك كمبيوتر أبل. .... اه لازم يكون عندك. كمبيوتر او لاب أبل ماك ويكون برو كمان مش وايت. ... لان في الوايت. ده لاب او كمبيوتر عادي مش بتاع شغل مونتاج . ... ساعت الي بيمنتج من اول ٦٠ جنية. وانتا طالع ... بس اغلب الشغل. الي بنشوفوا في مصر. فاكس ومش عاوز اقولك. ان حتى اشهر القنوات بتبعت شغلها لبره بالذات الفواصل احلى شغل بيتعمل بره مش في مصر. ... وهنروح بعيد ليه. انتا تصور ان اغلب الاعلانات والدعاية مستوردة وبيتيجي مصر بيتعملها دبلاج ( يعني الصوت بالعربي). + يتم تغير اسم المنتج كمان بالعربي .

في الختام. الشغلانه دي محتاجة واحد مبدع. او حد من فنون جميلة. ... محتاجة واحد يعمل شغل يخلي. الي حوليه يقولوا واااااو يا ابن اللعيبه عملتها ازاي. دي !!

ولا تحزن يا عزيزي ولا تيئس .... لو حاب الموضوع خش فيه ... اما لو علشان شغل ما شغل. فصدقني في مهندسين وطيارين ودكاترة ومحامين. من صفوت شباب ٦ اكتوبر والقاهرة الكبرى والجيزة. والمحلة قاعدين في بيوتهم عادي .
وده مش عيب في البلد او عيب في الشباب لكن بسبب حاجتين. :
١- الازمة الاقتصادية العالمية الي سببها جورج بوش في حربوا على العراق .
٢- زيادة غير طبيعية في عدد المواليد في مصر. كل بني ادم متعلم ومتحضر بيخلف بالاتنين والتالته والاربع خمس عيال. بمنتهى الاستخفاف تقلش الحياة وردية ومش ناقص غير انو يخلف ويربي الاخ وادي النتيجة تالت تربع العيال في الشوارع مش متربين ومش لاقين اي فرصة في الحياة ... ده اذا لقو حياة كريم او حتى حياة طبيعية اساساً ... بس يا سيدي. اتمنى اكون رديت على ٧٥٪ من تساؤولاتك. واترك المايك للاخوة الاعضاء لو حد يحب يضيف حاجة او يعقب ... وتحياتي

[3mr Farrag]

انا كنت غاوي رسم زمان و بورتريهات و الشغل ده
فالفكره عماتا عجباني
كنت هاخد من فتره كورس 3dmax بس قولت اشوف ايه النظام قبل ما اخد الكورس هيعجبني فكرته ولا لأ بالنسبا ليا
وبالفعل خليت حد من صحابي يفهمني الفكره و نزلت البرنامج و قعدت اشتغل بيه شويه بس جالي شلل منه الصراحه و حسيت انه مش دماغي نهائي
حسيت انه توهان من ناحيه انك بتبدء شغل من تحت الصفر
بعكس المونتاج الماتريال بتكون عندك و انت اللي بتظبطها فاريح و افضل كتير بالنسبا ليا

الافتر افكت اللي فاكره انه بيتاخد مع 3dmax بس انا ماعرفش عنه حاجه
و في نفس الوقت انا ماليش اصلا في الفوتوشوب :)

يعني كده محتاج احترف الاول فوتوشوب علشان اخد الكورس !!!!

وفكره الشغل اكيد هتفرق اساسي لاني مش اخد كورس بكام الف و اجيب لاب يعدوا معايا 10 الاف علشان ماعملش بيهم حاجه

لأن الشغل الواحد بيشتغلوا اي كلام و حمصي و انا محتاج احترف في حاجه علشان عايز اسافر اي دوله اجنبيه نضيفه و ماينفعش تروح بشغل الحمصي بتاع معظم الشعب بيشتغلوا ده

[Y a r i s]

ماهو. يا صديقي
انا قلتلك حتت السفر بره ... دي موال تاني. ... وبعدين شركات بره لو عاوزة حد من العالم العربي ( بخلاف لبنان ) فهتحتاجوا. يشتغل عندها يعمل شاي وقهوة وكابتشينوا هههههه. طبعاً انا قلت بخلاف لبنان. لان اللبنانين محترفين. بسبب ذوقهم العالي ودبلوماسيتهم ... عامةً. انا مش عاوز. اكون انسان يحبطك بقدر ماعاوز اشجعك ابدء تاته تاته كده واتعلم فوتوشوب وخش بعدها على اليسليتر اذا. لقيت نفسك في البرنامجين دول وحسيت انك مبدع استمر. محسيتش سيبك وفكك من الموضوع ده .

وبصفه عاااااااامة. تتعلم. اي صنعه او اي حاجة. فهو أحسن وأفضل من أنك تقعد كده .... انا ليا صديق مش مصري هو. عندو ٦٦ سنة وبيتعلم لغة ألمانية بسم الله مشاء عليه رغم انوا لا بيروح الماني ولا عمروا شاف شارع من شوارع الماني بس هو كده بيحب يتعلم ... العلم نور . وعلى قولت محمد منير لو بطلنا نحلم نمووووت .... وتحياتي واي استفسار انا في الخدمة ولكن لا تيأس .

[3mr Farrag]

انا هحاول ادعبس في الموضوع اكثر و اشوف اخرته ايه
لأن ذي ما قولت اني محتاجه للشغل مش ترفيه يعني
و موضوع السفر اصلا معقد جدا و انا عارف
بس بحاول اخد حاجه او يكون معايا حاجه اكون مميز فيها غير الشغل المعتاد علشان لو لقيت سكه للسفر

وتشكر يا استاذ ياريس علي تعبك معايا

ومستني بقيه ردود الاعضاء