تصور واحد يغتصب سطح بيتكم وياخدوا لحسابو ويبنيه تعمل ايه !!

[Y a r i s]

مساء الخير. اعزائي احبائي
لينا شقة في منطقة شعبية في بيت قديم ... بقالي فترة مرحتش ولمن رحت بصيت لقيت واحد من الافندية الي صادف انوا سارق حقوق لينا زمان وحبيبي حبيبي من زمان من ايام الجيزة .... رمى سقف وعمدان وقفل وشطب السطح. ومش بس كده باب حديد كمان على السلم علشان محدش يطلع السطح الي هو منفعه عامة .... على فكرة متستغربش بتحصل غيب حضرتك يومين عن بيتك وتعاله اتفرج بعد فترة جارك عمل ايه في غيابك !!! المهم الواحد يبدء منين يروح الحي ولا الكهرابا ولا يعمل محضر. ولا. لا اروح ولا اعمل. وارضى بالامر الواقع .... ثانياً هو مش السطح ده مشااااع. يبقى اي حاجة مبنية عليه مشاع تبقى الشقة مشاع ... ومن حقنا نطالب بحصة فيها. .

لان ملهاش اي حصة من الارض المبني عليها العمارة

فارجو الافادة من ذوي الخبرة ... وشكراً

[eslamrace]

انا مش متخصص بس انا لو مكانك حتصرف كالتالى :
1-محضر فى القسم انه اغتصب حق على المشاع وانه بانى على اساسات متستحملش وان فى خطر على المبنى "وظبط الامين اللى حيكتبلك المحضر علشان يعملك شغل نضيف" ولازم تاخد معاك محامى علشان الكلام المكتوب فى المحضر ميكونش فى اى ثغرات قانونيه تبوظ الموضوع وتسقط حقك وقبل متعمل المحضر اقعد مع نفسك فكر فى اى حاجه ممكن تتكتب فى المحضر تحسن من موقفك وتبقى ظبطه لو لميت كام ساكن من العماره وعملتم محضر جماعى

2-تروح الحى تقدم شكوى انه بانى من غير ترخيص وترفق المحضر بتاعك بان الموضوع فى خطر على حياه الناس

3-تروح شركه الكهرباء والمياه والاهم الكهرباء تعمل شكوى انه سارق تيار .

رقم 2-3 ممكن المحامى يعملهوملك **

4-محضر تانى انه منعك من الدخول للسطح لتركيب طبق دش او عمل صيانه ليه وتعدى عليك لفظيا

**المهم ان كل الخطوات دى لو انت مش مقيم هناك
5-تشوف مين كبير المنطقه اللى له كلام عليه "وغالبا حيكون راجل كبير اما مقاول او صاحب قهوه " وتكلمه انك صاحب حق وكلام لطيف كده شوف اخره ايه لو عرفت تجيبه سكه يبقى مشكلتك اتحلت من غير حكومه .
تحياتى وانتظر اراء باقى الاعضاء.

[Y a r i s]

تسلم يا باشا. ماهو انا بفكر بنفس خطواتك كده
بس. هل فيه أمل يعني هل هتجيب نتيجة ولا هتبقى أمل زي سعاد زي عفاف :) .... وتحياتي

[3mr Farrag]

علي قد معرفتي ديه مصلحه ليك
بما ان البيت باسمكم يبقي اي مباني هتبقي بتعتكوا
يعني من الاخر اعتبر السطح ده بتعك اساسي وان فاعل خير بانيهولك علي حسابه :)

شوف ورق ملكيه البيت و ايه نظام التصاريح في المنطقه
وتقدم ان الدور اللي مبني بتاعك وواحد واخده منك عافيه

ماتطالبش في حصه فيها والكلام ده
مادام واحد عامل فيها نصاب ناصح انت ممكن تاخدها كلها بسهوله

واسأل محامي عقر في الموضوع ده يظبطلك الدنيا

[Y a r i s]

عمر باشا ماهو زي ماهو بيتنا هو بيتوا هو كمان
يعني انا ليا فيه شقه صغيرة بسم الله مشاء الله وهو ليه شقه صغيرة كمان بس البيت في عمارة قديمة وعلى الطوب الاحمر في حي شعبي وبقالها اكتر من اربعين سنة العمارة يعني هزة ارضية صغيرة مع حمل جديد على اثاثات. العمارة. هلاقي العمارة كلها بعد الشر ارض ارض ... وساعتها مين هيعوضني ثم هو. اشترى. سطح العمارة من مين. اذا صاحب العمارة. مات من زمان ... وهنا بقه النقطة ! يعني باي حق يبني !

[AHMED12345678]

انا مش متخصص بس انا لو مكانك حتصرف كالتالى :
1-محضر فى القسم انه اغتصب حق على المشاع وانه بانى على اساسات متستحملش وان فى خطر على المبنى "وظبط الامين اللى حيكتبلك المحضر علشان يعملك شغل نضيف" ولازم تاخد معاك محامى علشان الكلام المكتوب فى المحضر ميكونش فى اى ثغرات قانونيه تبوظ الموضوع وتسقط حقك وقبل متعمل المحضر اقعد مع نفسك فكر فى اى حاجه ممكن تتكتب فى المحضر تحسن من موقفك وتبقى ظبطه لو لميت كام ساكن من العماره وعملتم محضر جماعى

2-تروح الحى تقدم شكوى انه بانى من غير ترخيص وترفق المحضر بتاعك بان الموضوع فى خطر على حياه الناس

3-تروح شركه الكهرباء والمياه والاهم الكهرباء تعمل شكوى انه سارق تيار .

رقم 2-3 ممكن المحامى يعملهوملك **

4-محضر تانى انه منعك من الدخول للسطح لتركيب طبق دش او عمل صيانه ليه وتعدى عليك لفظيا

**المهم ان كل الخطوات دى لو انت مش مقيم هناك
5-تشوف مين كبير المنطقه اللى له كلام عليه "وغالبا حيكون راجل كبير اما مقاول او صاحب قهوه " وتكلمه انك صاحب حق وكلام لطيف كده شوف اخره ايه لو عرفت تجيبه سكه يبقى مشكلتك اتحلت من غير حكومه .
تحياتى وانتظر اراء باقى الاعضاء.

كلام تمام
وفوق كدة
اطلع على النيابة الادارية المختصة
واعمل شكوى ضد بتوع الحى انهم مخدوش الاجراءات القانونية بخصوص المبانى والباب الى اتعمل علشان يسد السطح والى اتعملوا بدون ترخيص
وكمان فى نفس الشكوى اشتكى بتوع الكهربا انهم مخدوش الاجراءات القانونية ضد سرقة التيار
وفايدة الشكوى انك تجبر بتوع الحى والكهربا انهم يخدوا الاجراءات فى حالة انهم معملوهاش

[3mr Farrag]

انا كنت فاكر ان العماره بتاعتكوا

لأ كده مش عارف بصراحه النظام يمشي ازاي

لو العماره الاساسات مش مستحمله و طبعا باني من غير ترخيص
قدم كده في الحي و المفروض هيكسروا الدور
غير بقي لو هو مظبط ناس في الحي و الكلام ده يبقي صعب

[eslamrace]

تسلم يا باشا. ماهو انا بفكر بنفس خطواتك كده
بس. هل فيه أمل يعني هل هتجيب نتيجة ولا هتبقى أمل زي سعاد زي عفاف :) .... وتحياتي

علشان تاخد حقك خليك هادى وقبل متاخد اى خطوه اعرف من اين تؤكل الكتف يعنى فى القسم ظبط الامين ومعاك محاميك حيتعملك احلى شغل فى الحى والكهرباء يا تشوف واسطه يا تصدر محاميك علشان متكرهش نفسك وهكذا

وحلو الموضوع اللى ا/ahmed12345678 قال عليه انك تشتكى الهيئات الرسميه فى النيابه الاداريه لان بلدنا بتحب الورق الكتير وتقليب المواضيع على الموظفين

بس المهم خليك هادى وخلقك واسع وخلى عندك استعداد لتقبل اى حاجه علشان تقدر توصل لنتيجه ترضيك واهم حاجه اى مشوار تقيل على قلبك صدر محاميك بالتوكيل اللى معاه يقدم الشكاوى نيابه عنك .
تحياتى واتمنالك التوفيق

[Y a r i s]

طيب انا دلوقتي اتصلت على واحد محامي. وبصراحة هو جهبز
والحقيقة طمني وقالي اني مش هعرف اخود حق ولا باطل منو لانوا هيقول انوا عامل. الجزء الي فوق السطح ده ئوضة غسيل .... لانوا واخد تالت تربع السطح مش السطح كلو ... قلتلوا طب ماهو قافل السطح ومحدش يقدر يطلع السطح غير بئزنو ... والحقيقة صديقي الجهبز والي هو يعتبر مرجع في القانون. والتحكيم الدولي .... واحنا هنا بنسمية ديكشنري. القانون المصري .... ويعتبر غول وعلامة في الاجرائات الجنائية والقانوينة اقترح عليا حل قانوني ١٠٠٪ وهو يعتبر مخرج قانوني للازمة قالي. مفيش غير انك تعملوا ( صنية بطاطس ) قلتلوا ايه قالي اعملوا صنية بطاطس مش انتا كنت زمان بتقولنا. البلد دي ما بتمشيش غير بصنية بطاطس -- وده مصطلح كنت انا دايماً باستخدموا في حياتي. وهو اني بثبت الشخص الي قدامي بغدوة على سبيل اطعم الفم تستحي العين ... زي مصطلح برضو كنت باستخدموا تاني. ابقى خودلوا معاك صنية بسبوسة او طبق حلويات مشكل بس المصطلح ده باستخدموا في حالة التريقة لمن واحد يروح يعتذر من واحد .

مش عارف ليه كل ما اكلم محامي صاحبي ولا حتى مستشار ولا حتى واحد في مجلس الدولة ألاقيهم يحبطوني ويخوفوني ويقلولي حلوها ودي. حلوها ودي ... ومش هتاخد حق ولا باطل .... وخلي بالك. !!! ده ممكن يعمل فيك كزا وكزا وكزا وكزا ومش بس كده ده ممكن يستقصدك. في كزا وكزا وكزا .

يالله امرنا لله ... تعبناكم معانا يا رجالة ... ومنجلكمش في حاجة وحشة :) ... وتحياتي

[S O P H O S]

يعني من كلام المحامي كل شئ بوضع اليد !!

[Ahmed_Adham]

كنت سألت على موضوع زي ده في 6 اكتوبر وقالولي أسرع حاجه بتجيب نتيجه هيه الكهربا. الكهربا بتتقطع بعد سنه هههههههههههه

أنا سمعت عن حمله لازاله المخالفات شغاله في القليوبيه والمنوفيه اليومين دول بخصوص المباني على الاراضي الزراعيه وده معناه ان الحكومه بدأت تاخد موقف ولو اني ايف ان بالنسبه للي باني على أرضه الحل الامثل هوه الغرامه عان ميبقاش اهدار للثروات.

ربنا معاك مشوارك هيبقى طويل وهتدفع كتير في كل خطوه بس الاحسن تشوف محامي أدارجي في موضوع العقارات بيبقى عارف الناس اللي بتخلص.