سؤال بخصوص الكشري

[marsguy]

السلام عليكم ورحمة الله وبركاته،،،

أنا واحد من الناس باحب الكشري جداً وأهلي كمان بيحبوه

كنت كل فتره أطلب كشري من بره وكنت باحب الموضوع ده أوي

بس مؤخراً فكرت في حاجه كانت غايبه عن بالي .... طبعاً لما بنطلب الكشري ديليفري الصلصه بيحطوها في أكياس نايلون شفافه زي بتاعت الساندويتشات وطبعاًً الصلصه بتكون سخنه جداً


طب دلوقت مش ممكت الصلصه تكون بتسيح الكيس أو بتتفاعل معاه وتكون النتيجه إني باكل كشري بالصلصه والبلاستيك السائل؟

مش ممكنن يكون الموضوع ده مضر؟ ولا الأكياس دي آمنه مع الحاجات السخنه؟

شكراً

[MotorX]

يافندم نسبة كبيرة من العبوات المستخدمة في محلات الاكل غير آمنة على الاطلاق ، دا غير مواصفات الاكل نفسه ، مثلا العلبة البلاستك اللي بييجي فيها الكشري ماحدش يعرف دي متصنعة من ايه وحتى لو اطباق فويل برضه الألومنيوم بيتفاعل مع الاكل ، وحسب تصوري الاكياس البلاستك اكيد بتتفاعل بشكل ما من الاشكال مع اي محتوى ساخن .

تحياتي.

[أحمد كمال]

صلي عالنبي و سمي و كل و ما تسمش بدنك :)

[M7amD_7amDy]

الكشرى بالذات من الحاجات اللى احب اكلها فى المطعم فى الطبق الأستانلس ده والجو الكشرى الجميل :)

ولو جبته ديليفرى مش بتمزج بصراحة

[kar!m]

بالضبط كده .. لو ركزت في الحاجات دي .. مش هتلاقي حاجه صحية تاكلها في مصر و هتموت من الجوع.

أنا باكل كشري كتير .. بس على طول بره في المحل .. نادرا لما باكل دليفري.

و بعدين ضبط مره كده نخرج عشان عاوز أشوفك فعلا و كنت لسه جايب سيرتك أنا و مجدي االسبوع اللي فات .. ممكن نخليها خروجة كشري حتى :-) .. أنا بكون في مصر الجديدة كل يوم تلات :-)

[ahmad--ezzat]

طيب يعني يارجاله لا كشري ولا شيبسي ولا بيبسي ولا عصاير ولا كنتاكي

الواحد يعمل ايه ف ام البلد دي

[Ahmed_Adham]

غمض عينك وكل يا باشا.

[eng/ahmed_go]

شوف يا باشا احنا نبدأ القصة من البداية
1- الكشري بتعمل في حلل الومنيوم ومعروف طبعا ان الالومنيوم من اكتر اسباب السرطان في العالم
2-العلب والمعالق البلاستيك معموله من انواع رديئه من البلاستيك الغير مخصص للاطعمه (معظمها مصانع تحت بير السلم )
3-السخونية بتأثر على البلاستيك وبتخليه يتفاعل مع الاكل
4- فرضا ان مفيش سخونية ده بردو لا يمنع من انتقال جزء بسيط من البلاستيك الى الكشري بسبب الDiffusion

أخير يا راجل جوعتني انا رايح اطلب كشري ديليفري :D

[drcobra]

عمرك شفت حد بنى هرم ........... احنا بنينا تلاتة

[elpasha1]

سمي الله ودوس يا عمونا

[J A G U A R]

الشعب المصرى عنده مناعه من الحاجات المسممه .. كل يا راجل ولا يهمك

[المنسي]

في مصر اخر حاجة تفكر فيها الاكل والشرب لانك لو فكرت هتلاقي ان الشعب المصري عايش بستر ربنا

[mohamed_selim]

يعنى هى جت على دى؟

[elhelwany188]

ههههههههههههههههههههههه
احلى حاجة الكشرى لما يتعمل فى البيت طبعا نظافة ايه وصحة ايه بس للاسف بضايق قوى لما أسألهم طبخين ايه النهاردة يقولولى طبخين كشرى ...
بحس عن نفسى ان اليوم اللى عملين فيه كشرى كأنهم عملين عزومة ...
خمسين حله : حلة للرز ... حلة للمكرونة ... حلة للعدس ... حلة للصلصله ... حلة للبصل ... حلة لحمص الشام ..............
وفى الاخر ما يطلعش زى اللى فى المحلات طبعا ...
وعندى وجهة نظر فى الموضوع ده الا وهو :
ان ما بدل منعمل الغلبة دى وخمس ساعات فى المطبخ وبعد كده ساعتين بنغسل فى الحلل نجيب علب كشرى من برة ونريح دمغنا ونستفيد بالوقت ده فى حاجة تانية او حتى نروح ناكل فى اى محل كشرى يعنى مشوار مش هاياخد غير ساعة يبقى وفرنا ست ساعات ...
بس الاكيد ان الكشرى اللى فى المحلات مش صحى وده كلنا متفقين فيه وخصوصا اللى فى العلب البلاستيك حاجة تانية وطعم تانى وحلاوة وايه بقى بس مش صحى وبقولها تانى علشان الامانة والنصيحة مش صحى .....
كفاية كتابة بقى انت جوعتنى على فكرة هبعت اجيب كشرى دليفرى اجيبلك معايا ....

[mero100]

هوه فكره تفاعل البلاستيك مع الاطعمه السخنه دي عاوزه رأي حد متخصص و لكن :

بالنسبه الي ان البلاستيك مصنوع من مخلفات و غير مطابق للمواصفات دي اقدر انبه الاعضاء الكرام الي نقطه مهمه ..
كل محلات الكشري الكبيره زي التحرير و هند و ابو طارق و توم & بصل و غيرها بتجيب العلب و المعالق من شركات تصنيع بلاستيك كبيره و معروفه و مطابقه للمواصفات زي : هاشم بلاست و حكيم بلاست و انباكو .. و دي بتتعرف من اسفل العلبه بتلاقي مطبوع بالبلاستيك المضغوط علي العلبه اسم الشركه .. ف مفيش داعي للقلق من النقطه دي .. و الحمد لله ان فيه بشر في مصر زينا بتدور في الحاجات دي و يهمها تاكل اكل صحي الي حد ما ..و ربنا يسترها علينا جميعا و علي اولادنا .