حاسس بإيه ناحية نصر أكتوبر؟

[NaBeLeOn]

6 اكتوبر 2009 لا يعني شئ ليا اكتر من انه اليوم اللى بينه و بين امتحان الباطنة يوم واحد بس ... بصراحة اضحك عليكوا لو قلت اننى قادر افكر فى حاجة تانية :d
====
الكلام عن حرب اكتوبر فيه تناقضات كتيره جدا جدا و فعلا الجدل فيها ملوش حدود ... يعني اللى يقرا كتاب هيكل " خريف الغضب " و كتاب يوسف ادريس اللى قال فيه ان الحرب كلها بالبلدى كده " مطبوخة " مع اليهود و امريكا .. مش فاكر اسم الكتاب الوقتى بصراحة .. لكنه اللى فاكره كويس اوى ان خالة والدتى كانت قعدت عندنا من فترة لمدة يومين كده و مرة لقيناها قاعدة بتعيط جامد بسألها فى ايه لقيت انها كانت بتقرا الكتاب ده .. المشكلة بقى ان زوجها رحمه الله استشهد فى 73 و هى ماكانتش قادره تصدق ان فى احتمال و لو واحد فى المليون ان دمه ممكن يكون راح عشان خاطر تمثيلية ..
و على النقيض تماما لو تقرا مذكرات السادات او الكلام الرسمى الحكومى المصرى عن اعظم نصر عسكرى و عن عبور اقوى حائط دفاعى فى الحروب الحديثة و عن معركة المنصورة الجوية الاشرس فى كل معارك الطائرات الحربية و عبور القناة بمياهها اللى كانت قابلة للاشتعال و التحول الى جحيم فى ثوان و و و و.... متبقاش عارف مين صح و مين غلط و لا الاتنين صح و لا الاتنين غلط !
عموما اكيد احنا المفروض بدل ما نشغل نفسنا بجدل عقيم زى ده نحاول نسأل نفسنا احنا ايه الوقتى ... و مفيش مانع نحتفل و نفخر ب6 اكتوبر - مهما كانت الحقيقة - ... يعني هيبقى لا طولنا عنب اليمن و لا بلح الشام ... الواحد من زمان مفرحش .. يمكن مفرحش خالص ... بس فى اخر اليوم لو قعدت مع نفسي يا ترى هحس انى فعلا فرحان و فخور بجد و من قلبي .. و لا اللى بشوفه و بيحصل كل يوم فى البلد كفيل بقتل اى بارقة أمل للتفاؤل ؟!
===
كل سنة و انتم طيبين .. دعواتكم ليا فى الامتحان !

[elassar2010]

انا حاسس ان ان دة اخر نصر ممكن مصر تحققة فى الظروف الراهنة
وان اسرائيل لو عايزة تحتلنا مش هتلاقى حد يوقفها واخرنا هنشجب لان مافيش جيش فى مصر ودى حقيقة كل الى اعرفهم وداخلوا الجيش طالعين منة كارهين مصر

[TIMODAX]

يوم أجازه و يوم بعد عيد ميلادي وبس

[Hany.ElBaathy]

لن يشعر بقيمة هذا اليوم وتاريخه و فخاره لمصر والمصريين غير الذين حضروا هذه الفترة و ماقبلها
بصراحة حاجة يقشعر لها بدنى كلما تذكرتها
ياريت تتكرر كل مده علشان المصريين يتجمعوا فى اتجاه واحد ويشعرون بالانتماء لبلدهم زى ايامها
اننى حتى الآن اشعر بفخر شديد كل عام لاننى شاركت و بجد فى هذه الحرب

احنا كلنا الى بنشعر بفخر علشان حضرتك معانا. للاسف فى زمانا دا ما بقاش فى قدوة غير تامر حسنى و امثاله الى هربو من الجيش و يا ريت حضرتك و الى زيك تكونوا حولينا علشان احنا مختاجينكم تكونوا القدوة الى ضايعة.

لقد حقا كنتم اخر الرجال المحترمين

[mohamed_mohsen]

يوم عيد ميلادي
و يوم ما انتصرنا علي الأعداء لكن رجعوا تاني بشكل مختلف قاعدين في منتجعاتنا و ليهم الأمان أكثر مننا هناك
و بس

[هيثم]

ممكن اصدق ان السادات انتصر فى معركه التفاوض ........ اما ان الحرب مطبوخه .......... اسمحلى

[human]

حرب سته اكتوبر رجعت سينا لرجال الاعمال غاليا علينا و مش قادرين نروحها
فاضل حرب ترجع مصر للمصريين

[HeMa_LanCeR]

انتصار 6 اكتوبر عرفني
ان السادات مافيش دماغ زي دماغه
بجد تفكير وتخطيط اكتر من رائع
حتي في معاهده السلام لعبها صح

[medo_2060]

طبعا حاسس بالفخر الشديد دى اخر حاجه نفتخر بيها ونرفع راسنا حصلت لمصر

[Dr Ahmed]

أكتوبر والسد العالى وأمجاد الفراعنة
هروب من الواقع المخزى بالفخر ببعض أحداث الماضى

[zyadahmed]

لانتصار 6 اكتوبر جانبين :-

الاول : مشرق ومدعاة للفخر والاعتزاز

وهو الانتصار العظيم الذى لا يجوز ابدا ان نشكك فيه كما يريد الموساد تصوير الامر لنا وهل يعقل ان تتركنا اسرائيل ندمر طائراتها الفنتوم وندمر معظم مدرعاتها السنتوريان الامريكية باسلحتنا السوفيتية فى ظل الحرب الباردة وقتها وان تتركنا نتقتل 300 جندى من جنودها واحنا عارفين قيمة الجندى الواحد اد ايه هناك لانهم احرص الناس على الحياة كما وصفهم القرآن الكريم ( لا يعقل طبعا ) ؟؟؟.....

وهذا الجانب المشرق انا لا انسبه ابدا للسادات وحده وانما هو بفضل توفيق الله سبحانه وتعالى ثم جهود قادة عسكريين عظام ومتخصصين فى العسكرية امثال الفريق العظيم سعد الدين الشاذلى رئيس الاركان وواضع الخطة و المشير احمد اسماعيل القائد العام والجمسى رئيس العمليات وحسنى مبارك قائد الطيران (الذى لا ينكر دوره العسكرى )
وسعد مأمون قائد الجيش الثانى وعبد المنعم واصل قائد الجيش الثالث وغيرهم ممن اتقنوا فنون الحرب والقتال عكس الصاغ السادات الذى خدم فى سلاح الاشارة لفترة قصيرة فى الاربعينيات ثم دخل السجن لسبب مشبوه ( الحرس الحديدى ) وعاد للجيش لنفس السبب المشبوه حتى استغله عبد الناصر وفرضه على مجلس قيادة الثورة

ولابد ان ينسب الفضل لاصحابه وهم القادة الذين ذكرتهم وغيرهم عشرات ومعهم مئات الالاف من الجنود البسطاء والضباط الشرفاء


الجانب الثانى للحرب :( غير مشرق )

وهو الثغرة وبدون دخول فى تفاصيل امتلك منها الكثير لمن يريد المناقشة ولكن ليس هذا مجاله ولا وقته هذا الجانب الاخر انفى المسئولية التاريخية عنه عن اى قائد عسكرى وخصوصا الراحل العظيم سعد الشاذلى وانسب الفضل كل الفضل للرجل السياسى الاوحد وقتها انور السادات الذى تعامل بالشكل الغريب الذى حدث بديكتاتورية وفردية لاسباب الله وحده اعلم بها ...... اهونها انها كانت قلة خبرة ومش هانقول حاجة تانية ولا تمثلية ولا مسرحية ولا اوامر امريكية !!!!!!! .
نصر اكتوبر نصر عظيم واشبه حروب المسلمين فى العصر الحديثة بملاحم بدر والقادسية واليرموك وحطين وعين جالوت فلا تهنوا ولا تحزنوا وانتم الاعلون يا امة محمد والعبرة الاهم من اكتوبر هى ( وما النصر الا من عند الله ) صدق الله العظيم

[M.Osman]

حاسس انها ذكرى بتموت كل يوم

[Rembrandt]

نصر اية بس هنرجع ونقول تانى مصر البلد الوحيدة فى العالم اللى بتعتبر حرب أكتوبر نصر مبين ,فى جميع كتب التاريخ فى العالم ودة يشمل الدول العربية مفيش الكلام الفاضى دة العالم كلة أعتبر ان معركة 6 اكتوبر لا فائز فيها ولا مهزوم ,,أسرئيل خدت سينا بعد 6 ايام ةأحنا عشان نسترد أخر جزء فى سينا طابا كان عام 86 يعنى بعد 19 سنة تقريبا من 67 ولم نستردها الا تحت شروط مجحفة أقرها الاسرائليين ووافق عليها الخونة من المصريين ودول معروفيين ظبطو الطبخة فى كامب ديفيد مع أسمرالوجة وأكلوها للناس الغلابة,القوات الاسرائلية كانت على بعد أقل من 60 كيلو من القاهرة بعد الثغرة ولولا وقف أطلاق النار كان زمان الجنود الاسرائليين بيتجولو فى شوارع القاهرة

[OlaOsman]

نصر اية بس هنرجع ونقول تانى مصر البلد الوحيدة فى العالم اللى بتعتبر حرب أكتوبر نصر مبين ,فى جميع كتب التاريخ فى العالم ودة يشمل الدول العربية مفيش الكلام الفاضى دة العالم كلة أعتبر ان معركة 6 اكتوبر لا فائز فيها ولا مهزوم ,,أسرئيل خدت سينا بعد 6 ايام ةأحنا عشان نسترد أخر جزء فى سينا طابا كان عام 86 يعنى بعد 19 سنة تقريبا من 67 ولم نستردها الا تحت شروط مجحفة أقرها الاسرائليين ووافق عليها الخونة من المصريين ودول معروفيين ظبطو الطبخة فى كامب ديفيد مع أسود الوجة وأكلوها للناس الغلابة,القوات الاسرائلية كانت على بعد أقل من 60 كيلو من القاهرة بعد الثغرة ولولا وقف أطلاق النار كان زمان الجنود الاسرائليين بيتجولو فى شوارع القاهرة

طيب و ايه لازمة كلمة أسود الوجه دي في الموضوع؟

من فضلك.. حاول تعبر عن رأيك من غير ما تعيب على خلق الله.

[Rembrandt]

طيب و ايه لازمة كلمة أسود الوجه دي في الموضوع؟

من فضلك.. حاول تعبر عن رأيك من غير ما تعيب على خلق الله.

أنا اسف
تم التعديل