اسئلة بديهية ملهاش لازمة خالص بتحصل مع كل واحد فينا ؟؟؟

[mada121977]

في اسئله بديهيه مالهاش اي لازمه في الدنيا
بنتعرض ليها كل يوم من كل الناس

خلـونـــا نشــوف أمثلة

أنت في أوضتك .. على السرير وطافي النور ومتغطي .....
يجي أخوك الظريف ويفتح الباب عليك ويقول : ايه ياده انت هتنام ولا ايه ؟
(( أظن ده مش وضع الرقص !!! واضح ان انا هنام))

*******************


أنتم معزومين عند ناس ورحتو لبيتهم وأول ما فتحولكوا الباب يقول ابنهم الصغير " انتوا جيتــواااااااااااااااا

(( لا لسه ))


********************


والعكس : أنت لابس هدومك و متأنتك و على سنجه عشره وريحة البارفان واصله لاخر الشارع .. وخلاص بتفتح باب الشقه,, يجي حد من أهلك وينادي بصوت عالي : انت خااااارج ولا اييييييييييه

(( !!! لاء دانا لسه راجع ))

*********************

أو مثلا راكب العربيه ودورتها وخلاص هتطلع ... يجيلك لك البواب ويخبطلك على الزجاج,, أنت بكل ذوق تفتح الزجاج وتقوله : خير في حاجه؟
يقولك : انت رايح الشغل يابيه ؟

(( لا العربيه واحشاني ))

******************


مثلا ماسك سماعه التلفون وقاعد تضغط الارقام يجي حد من أهلك ويقولك : انت هتتكلم في التليفون ؟

(( لا أبتفرج عليه ,, أكيد بتكلم ))

******************

مثلا : ماسك مذكرة أو كتاب وقاعد تحفظ ومتحمس (أول مره بقى) .. جه حد وقالك :هاه قاعد تذاكر ؟
(( تقوم رامي الكتاب و تقوله لااااااااء ))


*****************


ربنا هاديك كده ... ماسك سبحه و عمال تسبح ، يجي حد من البيت يعدي عليك ويقول :هوه انت بتسبح
(( لاء هفرطها و أسلقها ))

*****************

ولا تعالــو شوفو قنواتنا واسئلتهم البديهيه البايخه

برنامج اهداءات يتصل واحد يطلب أغنيه
ترد عليه ست (المذيعه) بكل خفه ورشاقه : أنتا بتحب الاغنيّة ديه ولا ايه ؟

(( لاء طالبها اخنق على نفسي))


*****************

أو مثلا في العيد

المذيع : هههههه هههههههه هههههه نتعرف بيك
االمواطن : فلان الفلاني
المذيع :هههههه هههههه هههههه بتقول ايه للأهل ههه و صحابك ههه و قرابيك هههه و للناس اللي انت مخاصمهم كمان ؟ هههههه هههههه ههههههه
المواطن : أقولهم كل عام وأنتم بخير ....

(( أكيد يعني مش هيقولهم البقاء لله ))


*****************

,,,المذيعه الرخمه : وياترى بقى هتعملوا ايه العيد ده هتقضوه ازاي ؟ اكيد بيبقى زيارات الأهل و الصحاب و تخرجوا تشوفوا مظاهر العيد في الشوارع و تفسحوا أولادكم ونتصل بالمعارف نعيد عليهم و نقولهم كل سنه و انتوا طيبين

(( سبتيله ايه يقوله يارخمه ))

****************

والأسخف بقى ... الشلل الكبير.. لما المذيعين يكلموا الاطفال
يقول المذيع للطفل : أنت تحب ماما وبابا !!!


(( يعني اساسي الواد لسه ما طلعلوش عرق الخسه علشان يقول لأ ))


اللى عنده اسئله تانيه ياريت يحطها فى الموضوع :lol:

[vooooo]

جميله

[TAG_Turbo0]

هو لسة فى اسئلة تانية؟

[temoo_110]

واللهى جامدة مووووووووت يا باشا انا موت على نفسى من الضحك

أنت في أوضتك .. على السرير وطافي النور ومتغطي .....
يجي أخوك الظريف ويفتح الباب عليك ويقول : ايه ياده انت هتنام ولا ايه ؟
(( أظن ده مش وضع الرقص !!! واضح ان انا هنام))

*******************


أنتم معزومين عند ناس ورحتو لبيتهم وأول ما فتحولكوا الباب يقول ابنهم الصغير " انتوا جيتــواااااااااااااااا

(( لا لسه ))


********************


والعكس : أنت لابس هدومك و متأنتك و على سنجه عشره وريحة البارفان واصله لاخر الشارع .. وخلاص بتفتح باب الشقه,, يجي حد من أهلك وينادي بصوت عالي : انت خااااارج ولا اييييييييييه

(( !!! لاء دانا لسه راجع ))

[hazem_khidr]

كذا مره اكون رايح ناحيه موقف البيجو بجيب حاجه و كل ما نزل من العربيه و ببقي لوحدي الاقي سواق البيجو جاي عليا و يقولي مصر يا بيه؟؟!!
طب انا يعني حروح مصر و اسيب العربيه في نص الشارع؟؟!!!

[sab3aawy]

خد عندك الأسئلة دى:

نايم جنب مراتك او اخوك يفضل ينادى عليك 49 مرة لحد ما تصحى، تقول بين النوم واليقظة وقد طار النوم من عينك:نعم فيه إيه؟ تقوللك بكل براءة : هو انت صاحى وللا نايم؟.......حرااااام :x

تركب الأسانسير من الدور الأرضى الى لاتوجد ادوار اخرى تحته، يلحق بك راكب آخر ويبدأ فى ضغط الأرزار وهو بيضغط الأزار يسألك: هو حضرتك طالع؟؟؟؟؟؟؟ .................أومال يعنى داخل الأسانسير ارفع مقاساته علشان اركب له سيراميك؟

بتركن السيارة عند الشغل موازى للرصيف وطلعت امام مكان الأنتظار ونورت الدابل فلاشر ونقلت على المارشدير ولمبة المارشدير منورة وكسرت العجل على الآخر على اليمين وراجع لورا، تلاقى منادى رخم جاى يسألك، حضرتك هتركن؟ ...............لا ياظريف هاقيس المكان اشوفه ييجى على قد العربية وللا لأ وبعدين هاخرج تانى :lol:

اغبى سؤال سمعته فى حياتى، انت رايح مشوار مجاملة لصديقك القاطن فى الأرياف(فرح او عزاء) وهو واصف لك الطريق انك بتاخد طريق رئيسى لحد عاصمة المحافظة ومنها بتدخل الى طريق يؤدى الى مدينة صغيرة ومن المدينة الصغيرة تاخد طريق الى قريته، تيجى فى عاصمة المحافظة تسأل واحد شكله ريفى عن الطريق المؤدى الى المدينة الصغيرة، يرد بتلقائية شديدة جدا يقوللك (انت عايز مين هنالك؟).................., طب ارد اقول له إيه دا؟ :?: والله بتحصل معايا كل ما بسافر الأرياف واسأل على طريق

واحد معرفته بيك سطحية يكلمك على الموبايل، اول ما ترد عليه أول سؤال يسألهولك انت فين؟................. يا عم دانا مراتى نفسها مبقوللهاش انا فين هاقوللك انت؟

تلاقى نمرة متعرفهاش بتطلبك على الأرضى او الموبايل، ترفع السماعة تقول ألو، تلاقى واحد بيقوللك، الو ، مين معايا؟ .................الطم ياخواتى، مانت اللى طالب ياعم ، اكيد انت عارف انت طالب مين

انت نازل انت والمدام والأولاد وشايلين 3 شنط سفر كبيرة وشمسية وكراسى بحر وعوامات منفوخة وتورموس والعيال فى إيديهم جرادل بلاستيك وجواريف البحر ، جاركم يقابلك على السلم ويقول لك: إيه دا هو انتم مسافرين؟ .................لا يا سيدى رايحين نعمل camping عند فسقية رمسيس

سؤال تانى غبى جدا، قاعد بتتكلم مع حد وتقول له ثوانى هروح الحمام، يقول لك : ليه؟ ؟؟؟؟؟؟؟؟؟؟؟؟؟..........................تفتكروا ده يتقال له إيه؟

[hazem_khidr]

لا يا باشمهندس سبعاوي مش معقول كده :D
علم و ادب و خفه دم عاوز اعرف بس حاجه واحده مالكش فيها :D :D :D
خد عندك الموقفين دول كمان
تيجي تطلع علبه سجاير قدام واحد و تعزم عليه يقم يقولك ايه دا انت بدخن؟؟؟ امال يعني جايبها اعزم منها بس ولا ايه؟؟
....بتيجي تسال واحد علي مكان مثلا انت ما تعرفوش او شارع يقوم يقولك خد تاكسي!! طب ماهو انا الحمد لله ربنا اعطاني كميه ذكاء تخليني اعمل كده من غير ما سيادتك تطرح عليا فكرتك العبقريه دي!!!
موقف مشابه لموقفك
اروح اي جهه حكوميه او رايح اسال عن صنايعي في مكان معين و اول ما سال حد فلان الاقيه فين يقوم يقولي عاوزه ليه؟ خير؟؟!! بصراحه حاجه تجيب الضغط و انت مالك عاوزه ليه ف في مره واحد قالي كده قلتله عاوزه يقوم الغلس يقرر السؤال تاني قمت قايله حاجه ما تخصكش و دخلت فيه شمال :D

[ابوحميد]

تيجي تطلع علبه سجاير قدام واحد و تعزم عليه يقم يقولك ايه دا انت بدخن؟؟؟ امال يعني جايبها اعزم منها بس ولا ايه؟؟

ممكن يكون اللى بيسال كان فاكره مش بيدخن

[خالد]

روعة روعة روعة

[إسلام شاهين]

والله الواحد كان متنكد بس مش قادر من كثر الضحك .................

[Nader]

سؤال تانى غبى جدا، قاعد بتتكلم مع حد وتقول له ثوانى هروح الحمام، يقول لك : ليه؟ ؟؟؟؟؟؟؟؟؟؟؟؟؟..........................تفتكروا ده يتقال له إيه؟

عادي رايح اتوضي امال هعمل اية يعني :D

[محمد ابراهيم 1]

موقف تانى لكن مع العذر
واحد بيشتكى من صداع جامد المدام تسأله الصداع ده فين ؟ فى حواجبى يا ستى
نفس السؤال لكن مع شكوى من الإسهال بس المره دى بيبقى صديق رخم شويه فى صدرى يا سيدى