مشروع شركة تصدير

[ahmedtalat]

السلام عليكم ورحمه الله و بركاته
من فضلكم يا جماعه عاوز اعمل مشروع انشاء شركة للتصدير (ادويه-حاصلات زراعيه-اسمده-سيراميك-...الخ)

فى حد يعرف ابتدى ازاى و ايه المطلوب بألظبط (دراسة جدوى تقريبا)

و يا سلام لو فى حد له خبره بألمشروع و يقدر يدلنا

اهم حاجه فى المشروع هو الوسيط التجارى (الراجل اللى حيشترى منى من بره)
حد يعرف منين اتعرف عليه و اجيبه ؟؟

[qkash.com]

بالتوفيق ان شاء الله

[mk3]

احييك على تفكيرك بره الصندوق....لانى واحد من الناس مرتبط فى دماغى نشاط الاستيراد والتصدير على انه استيراد فقط بحكم انى مش منتج اى حاجه لكن بطريقه الوسيط ورغم انها اكيد معروفه اكيد هيبقى وراها افكار جديده....اعتقد انت ممكن تراسل او ممكن تسافر لمكاتب مصدره بره مصر وتعرض عليهم يستوردوا منك العكس يعنى

[hazoom2006]

متابع ومنتظرين الافادة

[walidzakzok]

الموضوع مش سهل لازم تكون اشتغلت فيه قبل كدة شوف حاجة بتفهم فيها واشتغل فيها حتى لو مكسبها قليل بدل ما تخسر

[Kaizer]

السلام عليكم ورحمه الله و بركاته
من فضلكم يا جماعه عاوز اعمل مشروع انشاء شركة للتصدير (ادويه-حاصلات زراعيه-اسمده-سيراميك-...الخ)

فى حد يعرف ابتدى ازاى و ايه المطلوب بألظبط (دراسة جدوى تقريبا)

و يا سلام لو فى حد له خبره بألمشروع و يقدر يدلنا

اهم حاجه فى المشروع هو الوسيط التجارى (الراجل اللى حيشترى منى من بره)
حد يعرف منين اتعرف عليه و اجيبه ؟؟

ربنا يوفقك ان شاء الله.
مشروع ممتاز لكن حاول ان تحدد ايه السلع اللي ممكن تشتغل فيها سواء تصدير او استيراد.
في التصدير هناك بعض السلع لازم تكون انت المنتج او تحصل على موافقة للتصدير من المنتج (المصنع) مثل السيراميك
كذلك هناك بعض السلع تحتاج الى تراخيص خاصه من الوزارات المعنية بالسلعة مثل الادوية و الاسمده.
بعض السلع تحتاج الى تحاليل و شهادات خاصة

[ahmedtalat]

هو ليه مفيش تفاعل كفايه مع الموضوع

عظيم جدا - بس يا ترى مفيش حد هنا فى المنتدى عنده شركة تصدير او حتى بيشتغل فى شركة تصدير؟؟

[#MAAM#]

أحييك على التفكير الايجابي التصدير بدل الاستيراد ربنا يوفقك وتبتدي مشروعك وتنجح فيه بإذن الله

[Kaizer]

عظيم جدا - بس يا ترى مفيش حد هنا فى المنتدى عنده شركة تصدير او حتى بيشتغل فى شركة تصدير؟؟

لو موجودين محدش منهم ها يتكلم علشان بيعتبر المعلومه اللي عنده اسرار حربية

[walidzakzok]

يا جماعة علشان تعمل بيزنس فى مجال لازم تبقى اشتغلت فيه وفاهمه

[dedi]

عظيم جدا - بس يا ترى مفيش حد هنا فى المنتدى عنده شركة تصدير او حتى بيشتغل فى شركة تصدير؟؟

يا باشا انت مستنى حد ينصح او يفيد دة بقى شئ نادر الايام دى كل واحد مصلحتة و موش عاوز يفيد حد وبيخاف احسن تقاسمة فى رزقة او نصيحتة لك سوف تخسرة عملاء او فلوس مافيش حد بينصح للة او بيستنى مكافئة من ربنا لانة نصح باخلاص انس يا باشا
جرب مع نفسك بعد دراسة الموضوع كويس و ابدا بحاجة قليلة
بس سؤال برئ لو ربنا و فقك و لعبة البلية معك هل سوف تنصح و تحكى تجربتك للاستفادة ها ها ها ها

[MaZaGAngeE]

انا اتعملت مع شركات تصدير خامات تعدينية ....
عشان تعمل مكتب استيراد و تصدير ده مش صعب و كانك بتاسس شركة عادية بس هتزيد عليها :
1- تسجيل في هيئة المستوردين لو عايز تستورد
2- تسجيل في هيئة المصدرين لو عايز تصدر
و الاحسن انك تسجل الاتنين محدش عارف الرزق جاي ازاي ....
و بعد كده بتروح تاخد دورة 5 ايام في مركز الصادرات اللي في شيراتون عشان تطلع الرخصة

الاوراق سهلة و تكاليف استخراج الرخصة و الاوراق كلها مش كتير بس هتاخدلك بتاع شهر على ما تخلص كل الاجراءات و التراخيص و الموافقات بس الكويس انها في الغالب من مكان واحد هوه هيئة الاستثمار اللي في ارض المعارض ما عدا سجل المستوردين و المصدرين ده في شارع 26 يوليو تقريبا او في وسط البلد ...

بعد كده هتشوف الزبون اللي هيشتري منك ............ ده بقى اهم حاجة و عشان توصله ....
1- موقع انترنت
2- تشترك في مواقع التجرة الالكترونية
3- تدور على شركات الاستيراد في البلد اللي انت عايز تصدر ليه

بعد ما توصل للزبون ............. هتقابلك مرحلة الشحن البري لحد المينا و الشحن البحري لحد بلده ده بيكون على حسب الاتفاق ..
يعني انت ممكن تبيع المنتج على ارض المصنع او تبيعه واصل المينا في مصر او واصل المينا عنده ..

طبعا شركة الشحن هتطلب منك فاتورة و شوية اوراق كتير انت كنت عاملهم في التراخيص و تفويض ليهم ... و كمان هيطلبوا منك شهادة امان للمنتج و دي ان بتاخدها من المصنع اللي انت شاري منه المنتج ولو معندوش بتجيبها من النت

ده كده ملخص سريع للموضوع كله

[Secret-Man]

المووضوع بسيط باذن الله اول شيىء توكل على الله واستخير ربنا مره واتنين وتلاته قبل متقدم على شيىء

خد بالاسباب وافهم السوء كويس وسيرش على الانترنت كويس وجمع داتا لتجار فى مجال التصدير واعرف حجم التصدير هيكون اد ايه - شوف ازاى تقدر تحصل على تجار من دول اخرى الى هتستورد منك

الحاجه التالته تفهم الورقيات وقوانين التصدير فى بلدنا العزيزه يعنى مثلا ازاى تفتح ملف مصدرين فى الهيثه

ايه الدعم الى تقدر تاخده من الصادرات - لازم يكون حجم صاداراتك اد ايه - هل الصادرات اغذيه فهتحتاج تلاجه وتبريد للتصدير ولا هتشحن ااازى وهل الموضوع مكلف ولا لا لازم تحسبها كويس

[Anaslbda]

.......

[ahmedtalat]

يا ترى فى هيئات فى مصر ممكن تدعم موضوع التصدير بأ(المعرفه know how)
و تعرفنى على المستوردين فى البلاد التانيه؟؟