إعـــــــلان

Collapse

.

,
See more
See less

لما تفكر فى السؤال الحتمى لطلاب الثانوى :ادخل كلية ايه ؟

Collapse
X
 
  • Filter
  • الوقت
  • Show
Clear All
new posts

  • لما تفكر فى السؤال الحتمى لطلاب الثانوى :ادخل كلية ايه ؟

    الســلام عليكم و رحمة الله و بركاته

    عاوز اتكلم معاكم عن موضوع مرينا -أو بنمر- بيه كلنا ،، و على طول الطريق بنشوف السيناريو بيتكرر مع اللى حالينا

    أنا عاوز ادخل كلية ايه ؟

    و السؤال اللى مالوش اى منهج استرشادى للحل ، ولا لقيت اى حد يقدر يقدملك الاجابة المباشرة ليه
    و كل اللى بيتكلم فيه بيوسع الاختيارات ، و يبحر فى عوامل تشكيل الاختيار

    رغم انى شايف ان دا اســـهـــل سؤال ممكن تواجهه ، لأسباب كتير

    نبدأ فى الشرح

    أولا ، أنت/انتى مش محدد كلية ،، و حاسس انك تايه و سايب الامواج تاخدك لأى طريق
    و فى النهاية بتترمى فى اى كلية من الكليات الشعبية اللى مالهاش اى وزن فى البلد خالص

    مرحلة دخولك الكلية بيبقى ليها 3 اعتبارات : ( مادية - اجتماعية - ذاتية )
    هانتكلم فى الاعتبارات دى بس بعد ما نضرب الامثلة

    - 1 -
    دور فى الدفع اللى تعرفها خلصوا و دخلوا كليات ،، هاتلاقى بالمستريح اوى 40% منهم فى كليات تجارة & حقوق ... كلية من لا كلية له !!

    هل تعتقد ان الكليتين دول بالتحديد لسه محتاجين ناس للالتحاق بيها لتقديمهم لسوق العمل ؟؟

    انت عندك خريجين الحقوق أغلبهم مابيشتغلش فى المجال
    إلا فى النوادر بقى :
    1- لو ابوك حووووت محاماة ، فضامن انك تشاركه فى السمعة دى
    2- لو ابوك مستشار أو جهة سيادية ( فهاتبقى مشروع مستشار صغير بإذن الله :) )

    طيب و التجارة ؟؟
    نفس الفيلم ، ابوك 1- مأمور ضرايب 2- ماسك شركة كبيرة هنا أو برة ........ غير كدا مفيش

    برررضه ابعد عن دول :
    - كلية سياحة و فنادق : قبل الثورة ماكانش حد عارف يشتغل بيها ، و بعد الثورة ماعدش حد بيشتغل فيها :)
    - المعاهد الخاصة اللى اساسا اللى انشئوها مش عارفين هى بتخرج ايه ... عاوز تفشل فى الثانوية و تجيب مجموع زفت مايدخلش حاجة ، يبقى كنت توفر الفلوس من الاول

    - 2 -
    جبت سيرة الاب كتييير و كدا مش حلو :p ، بالعكس دا دى الخلااااصة
    طيب خد دى بقى و لو يتطابق معاك الحالة دى فانت مش محتاج تقرأ اللى بعد كدا اساسا

    ابوك مثلا طبيب اسنان ، و فاتح عيادة و تمام ،،
    سيادتك تسيبه و تروح تدخل كلية صيدلة !!؟ اعلام ؟ هندسة ! ... ( تبقى حمار على رأى عادل امام )
    ابوك فاتح شركة برمجة ....... مهندس و فاتح مكتب هندسى ........ الخ

    كدا يبيقى السؤال جايلك بالحل بتاعه ، غيرك متخرج و على ما بيجرى ورا واحد يتدرب عنده & يفتح مؤسسته الخاصة و يستنى العملاء و يكون سمعة ليه و للمكان ... احنا بنتكلم فى سنيين ، و يا عالم المحصلة ايه

    لكن لو ابوك شغال ترزى مثلا ... فاتح سوبر ماركت ،، اى مهن خاصة متوسطة العائد ، ماتتلككش بقى و تقول انا عاوز ادخل كلية التربية المائية علشان اقف مع ابويا فى محل اسماك الزينة !!
    الحاجات دى ممكن بسهولة جدا بقى اعمال جانبية ليك تقوم بيها و تباشرها حتى لو انت دكتور ،، خصوصا انها بتعتمد على الخبرة و مالهاش كليات أو حتى لو ليها كليات فالكلية لن تضيف للمجال شىء

    - 3 -
    طيب احنا كدا استبعدنا كام كلية ،،
    و فى حالة لو الطريق ممهد لكليات تانية بنترمى عليها على طول ، لكن لو مفيش ؟؟

    ارجعلى بقى للاعتبارات اللى كنت بقول عليها : مادية - اجتماعية - ذاتية
    و الاسطوانة المشروخة بتاعت : شوف انت بتحب ايه و ادخل فيه و ادخل كليته
    ^^^ اولا اللى انت بتحبه ده لو كان خارج كليات القمة يبقى كان ممكن تحققه من "دبلوم"
    و على فكرة مصطلح "كلية القمة" دا اصدق مصطلح ممكن تقابله فى مصر ،، و سيبك من اللى بيرفضه

    اساسا مرحلة الكلية دى ما هى إلا تصريح مزاولة مهنة للكلية اللى هاتدخلها ، لكن الكلية غير مؤهلة لتخريج دفعات بمرتبة احمد زويل" فى المجال ،، بل على العكس كلنا عارفين ان التعليم فى شتى المجالات عندنا واقع ولا استفادة فعلية منه

    فتخيل كدا لما يكون معاك تصريح مزاولة مهنة مهندس ،، أأأو معاك تصريح مزاولة مهنة محاسب
    هههههههههه ،، حلوة " تصريح مزاولة مهنة محاسب " دى ..... انا خريج تجارة و لحد الآن ماعرفش المحاسب دا بيشتغل ايه :)

    لذلك كلية القمة هى الكلية اللى وظيفتها متوفرة نسبيا عن باقى الوظائف
    الطب بيتوظف ، بيفتح عيادة ،، مطلوبين بالهبل برة مصر ....... كذلك الصيدلة و ما شابه
    الهندسة بيتعب شوية بس ممكن يتوظف ، ماشتغلش أهو هايسافر براتب حلو برة مصر
    هندسة بترووول ،، آآه ممكن يترمى فترة مايشتغلش ، بس كدا كدا هايشتغل فى النهاية .. و بالدولار

    دول اشهر كليات القمة ، دور انت على الـ 3 أو 4 الباقيين و ادرس برضه خباياهم و شوف شغلهم و سوق عملهم
    بس بالله عليك ابعد عن الكليات العجييبة زى : اعلام ، اقتصاد و علوم سياسية ... إلا لو عندك مخطط محكم و مدروس للى هاتعمله بعد التخرج منهم ... مدعم طبعم باستشارات من ناس فى المجال ، و يا حبذا لو موجودة الوسايط ;)

    --------------
    انا حصرت الكليات الموجودة بالتنسيق لـ بتاع 10 كليات بالكتير ، رغم وجود المئاات بيها
    لكن للأسف اغلب الكليات الموجودة عندنا بتقدم انصاف طرق ( تجارة ، أداب .. الخ ) ... و فيهم اللى مالوش طريق اساسا ( سياحة وفنادق - اقتصاد - معاااهد! )
    و لإن هما فعلا بتاع 10 كليات ، و الباقى بيتقرأ عند الدولة ( مؤهل عالى ) و بيتقدم الآلاف للوظائف بيها ،، أو للسفر بيها على وظيفة أدارى أو مندوب ..... و بتتساوى كل الكليات وقتها !

    فالاعتبارات فى المقام الاول مااادية ، فى فترة الظروف المادية للبلد نفسها صعبة ، فالاولى انك تنجو بنفسك و تأمن نفسك ماديا
    ثم اجتماعية ، لإننا - و إن استثنى البعض - مجتمع طبقى مريض ، الدكتور فيه افضل من المهندس ، و المهندس افضل من المحامى ،
    بل ان المحامى فيه مضطرا بحم شغله اللى فى الغالب بيبقى شغل خاطئ و شمال ، بقى فى ديل السلم الاجتماعى .

    أما الاعتبارات الذاتية ، و تحقيق حلمك ... فـ ممكن تمارس شغفك بكل سهولة فى اوقات فراغك ، و يبقى عندك الوظيفة & الهواية ...
    الكترونيات ،، رسم ،، اعمال نجارة ،،، تأليف و كتابات

    و دى كانت رؤيتى الملخصة عن الموضوع ده
    و قولت اعرضها عليكم ، و اعرف رأيكم برضه فى الموضوع ده لإنه زى ما قولت بيقابلنا باستمرار

  • #2
    مشكلتنا الابدية
    الكلية اللى بتوظف
    مصر بها اكبر عدد موظفيين بالجهاز الادارى للدولة

    لو عايز تنجح فى حياتك
    خلى اهتمامك بالمشاريع الخاصة
    اكبر شركات العالم كانت فكرة وحاجة صغيرة واتطورت وكبرت

    لازم نبعد عن التفكيير الروتينى

    يعنى لو واحد وفر على نفسة مصارييف كلية خاصة وبعد ما اتخرج عمل تجارة استيراد اى سلعة بسعر كويس طبقا لاحتياج السوق وبقى وكيل لسلعة وكبر معاها وممكن يبقى مجمع او مصنع للسلعة دى وممكن يدخل تعديلات جوهرية على المنتج يبقى احسن من المنتج نفسة

    Comment


    • #3

      طبعا موضوع جميل بس
      المهندسين و الأطباء و الصيادله و خريجى كليات القمه قاعديين فالبيوت و المقاهى زيهم زى اى خريج تانى
      الحل المهن الحره او مشروع صغير و النصب فالبلد كتير يعنى بسهوله هيطلع فلوس
      [SIZE=5][COLOR=Blue][sor2]http://s8.postimg.org/y3vj7185h/new5115.png[/sor2]
      سبحان الله و بحمده سبحان الله العظيم[/COLOR][/SIZE]

      Comment


      • #4
        عاوز اقول ان بلدنا بتحبط اى صاحب نشاط ، بس عارف ان الكلمة دى بقت قديمة و مبتذلة

        بس المكتب الهندسى ماهو مشروع خاص ، و العيادة مشروع خاص ، و مكتب البرمجة مشروع خاص
        و المحلات بمختلف اشكالها .. و الصناعات الحرفية

        بس فيهم اللى بيكبر ، و فيهم اللى بيظل فى مكانه ، و فيهم اللى بيخسر و بيتقفل

        و المشاريع الكبيرة اللى قدها هايدخل و يجازف ، رغم عدم استقرار السوق عندنا .
        اولها السوق الداخلى ، و اللى بيشترى منك عاوز يشترى بأقل من اصل سعرها . و لو طال ياخد منك فلوس كمان هاياخد
        و انت عاوز تبيعها بضعف التمن ، علشان غيرك بيبعلك احتياجاتك بضعف التمن .

        -----
        انا عامل مشروع ضئيل وحدته المحاسبية هى 25 جنيه ، لا بتزيد " ولا المفروض تقل" ،، و الناس بتفاصل برضه و فى مرات تقولك معلش مش معايا فلوس حاليا ، و مرات تقولك الحالة صعبة اجلنى كام يوم
        دا غير ان الـ 25 جنيه دول عاوزين بيها الدنيا و ما فيها .
        -----------

        هو السوق كدا ، احرق دمى و برضه اجرى عليه من طرقه المعتادة !

        Comment


        • #5
          المشاركة الأصلية كتبت بواسطة shiko85 مشاهدة المشاركة
          :u_thin1[1]:
          طبعا موضوع جميل بس
          المهندسين و الأطباء و الصيادله و خريجى كليات القمه قاعديين فالبيوت و المقاهى زيهم زى اى خريج تانى
          الحل المهن الحره او مشروع صغير و النصب فالبلد كتير يعنى بسهوله هيطلع فلوس
          كنت لسه عاوز اكتبها والله فى الرد بتاعى اللى فوق ( ماشوفتش ردك إلا لما وضعت ردى السابق )

          " النصب فى البلد كتير "

          ايوة ممكن اعمل مشروع رأس ماله 100 جنيه لسلعة و ابيعها بـ 1500 جنيه (( زى فلاتر المياة مثلا ))
          او ابيع فى محلى السلعة وسط الدوشة بضعف تمنها ، على اساس ان دا زبون طيارى و مش هايسأل عليها تانى

          خريجى كليات القمة ممكن يسافروا فى اى وقت يحبوه ، براتب مش بطال
          ممكن يفتحوا خاص ،،

          حتى لو قعدوا فى القهوة : ( اتفضل كوباية الشاى يا باشمهندس ،، اجيبلك ايه تشربه يا دكتور :d)
          بيبقى ليهم الجو بتاعهم برضه ;)

          Comment


          • #6
            مظبوط
            المشكلة ان الناس المميزة عندنا بنجبلهم احباط
            بظروف العمل والفرص المتاحة وده السبب انهم بيسفروا

            Comment


            • #7
              الموضوع دة جة متاخر اوى ياريتك كنت كتبتة من كام شهر او من كام سنة

              Comment


              • #8
                ليه الاهانه دي يعني هههههههههههههههههههههه
                rompo10

                Comment


                • #9
                  المشاركة الأصلية كتبت بواسطة Ladawy مشاهدة المشاركة
                  حتى لو قعدوا فى القهوة : ( اتفضل كوباية الشاى يا باشمهندس ،، اجيبلك ايه تشربه يا دكتور :d)
                  بيبقى ليهم الجو بتاعهم برضه ;)
                  هههههههههههه
                  [SIZE=5][COLOR=Blue][sor2]http://s8.postimg.org/y3vj7185h/new5115.png[/sor2]
                  سبحان الله و بحمده سبحان الله العظيم[/COLOR][/SIZE]

                  Comment


                  • #10
                    انا عمرى ما سمعت عن طبيب عاطل
                    على الاقل مستشفى حكومى

                    Comment

                    Working...
                    X