سن العروسه

[mmohamed15]

السلام عليكم يا شباب ايه خباركم
بما انا في مواضيع كتيره عن الزواج في المنتدي و خصوصا المسمي بزواج الصالونات في مش هنقعد نتكلم عن مزايا و عيوب الطريقه دي
لكن بنتكلم عن الحد الاقصي للسن اللي ممكن توافق انك تشوف واحده و هي في السن ده
يعني مثلا انا شايف 27 يكون اقصي حاجه لو ا نت في اوائل الثلاثينات و السبب اللي انا شايفه هو
انا انتظار البنت طول المده دي من غير جواز و لا خطوبه معاناه اني هي مش شكلها ميعتبرش متوسط الجمال و لكن اقل من كده بكتير
لأن معروف ان معظم البنات الحلوه بتتخطب بدري و بتتجوز بدري و نادر انك تلاقيهم منتظرين لقرب الثلاثين و معتمدين علي الطريقه دي في الجواز
مش عارف صراحه لو الواحد اتعرض عليه واحده معديه ال 28 و هو مثلا 32 يقبل يشوفها و لا يقول بلاش و يدور علي حد اصغر
و لا يكبر دماغه و يجرب حظه و يقيمها بغض النظر عن سنها
عامه ايه رأيكم احب اسمها و خصوصا اخوانا yaris علشان الراجل ده خبره كبيره

[ahmed1981]

انا انتظار البنت طول المده دي من غير جواز و لا خطوبه معاناه اني هي مش شكلها ميعتبرش متوسط الجمال و لكن اقل من كده بكتير

لأن معروف ان معظم البنات الحلوه بتتخطب بدري و بتتجوز بدري و نادر انك تلاقيهم منتظرين لقرب الثلاثين و معتمدين علي الطريقه دي في الجواز

القاعدتين دول مش قاعدتين خالص

لا البنت اللي بتتأخر وحشة
ولا البنت الأكثر جمالاً بتتخطب بدري وبتتجوز بدري

القاعدتين دول في الجمادات فقط (سيارات ملابس شقق ... )

-*-ـ موعد الجواز حاجة تبع النصيب سواء جميله من وجهة نظر س أو وحشة من وجهة نظره

-*-ـ البنات الحلوة بتتخطب بدري !!!!!!!!!!
الجمال مسألة نسبية برضه

والعنوسة في مصر طايلة الكل
الجميلة والأقل جمالاً
البنات والولاد

ـ

[mmohamed15]

كلامك مظبوط يا استاذ احمد و انا مقتنع بصحته بس انت مجاوبتش علي السؤال ايه الحد الاقصي للسن اللي ممكن ترضي تقابل عروسه و هي فيه

[ahmad--ezzat]

متزيدش عن 26

وده رايي

[amr011111]

مفيش حاجه اسمها البنات الحلوه بتتخطب بدرى والوحشه لا
لان فيها بنات جميله جداً ومتجوزتش لحد دلوقتى

والأستاذ ياريس كان عامل موضوع قريب من الكلام ده هحاول ادور على اللينك
بالنسبه بقى لسن الزواج والله على حسب يعنى لو انت 32 وهتشوف واحده 27 عادى بس متروحش تخطب 3 سنين
انما تكون ناوى على الزواج فى فتره لا تزيد عن سنه
وبالتوفيق

[ahmed1981]

فرق السن المناسب مش قاعدة

هستعير رد سابق ممكن يفيد وإن كان مش نفس السؤال
السؤال كان عن الزوجة الأكبر في السن من الزوج:

نبدأ بمقدمة عن سيدنا محمد صلى الله عليه وسلم
تزوج أم المؤمنين خديجة عليها السلام وهي تكبره بحوالي 15 سنه
وكان عمره عليه الصلاة والسلام وقتها من 25 إلى 30 سنة
كانت بيوت العرب كلها مفتوحة للصادق الأمين يشاور بس وألف من يتمنى
لا أحد أكمل من النبي صلى الله عليه وسلم خلقاً وخلقاً
وهذه إشارة منه صلى الله عليه وسلم
ولم يتزوج عليها أبداً
وبعد وفاتها تزوج أكثر من واحدة
ومنهم الصديقة أم المؤمنين عائشة البكر
وكانت تغار من ذكر النبي صلى الله عليه وسلم لأمنا خديجة عليها السلام بكل خير وود ووفاء
ـــــــــــــ
المهم
مسألة فرق السن مسموح بها ومقبوله وحصلت من الأنبياء والصالحين
مع تحمل بعض العواقب إن وجدت

يعني الزوجة الأكبر في السن
كثيراً ما تمر الحياة بسلام وحب وخاصة لو كانت العشرة طيبة تلغي كل الفروق
وأحيانا وبالذات لو لم تكن حسنة الخلق
الموضوع بيقلب معاها على ندية في بعض المواقف والآراء
وده ممكن يحصل من المتدينة وغيرها
ومحتاجه زوج حكيم يضبط الأمر ويحكم القيادة بدون أن يغرق المركب
ومسألة الندية من الزوجة رأيته في مثال واقعي وكانت الزوجة أكبر من الزوج بسنة واحدة
لكن التدين والأخلاق كان ضعيف واستمرت المشاكل كثيراً وكان بعض المشاكل يساعد عليها الندية

وأحيانا لا يحدث
ولا يظهر موضوع كبر سنها أبداً
بل دائماً تكون بعقل راجح كبير حكيم
وقلب طفلة حنون رحيم

يبقى الأمر متوقف على رؤيتك للطرف الآخر
هل ترى من طباعه وأخلاقه دون السؤال صراحة التواضع والإيمان بأن الزوج هو القائد حتى لو كان هو الأصغر
أم أنك ترى فيها من الندية على الزوج والإعتداد بكبر سنها عليه دون النظر لأنه القائد والحاكم
بعد ما ترى رؤيتك فكر وقرر ولو الأمر يستحق توكل على الله ونية التحمل تكون موجودة لما يحصل موقف من إياهم
لأن الستات في النهاية لهم سقطات وأخطاء كما لنا

في بعض الأحيان وليس قاعدة بتكون البنت نسخة من شخصية أمها
فبرضه لو قدرت تقرأ شخصية الأم مع الأب هتقدر تقرأ جزء غير أكيد في شخصية البنت
بكرر غير أكيد
مش قاعدة
ـــــــــــــــــــــــــــــ

وفي أمر آخر
الستات بيعجزوا قبل الرجالة
لكن بعد دوام العشرة الطيبة سنوات بيذوب هذا الأمر

ـــــــــــــــــــــــ
لذلك هو كمبدأ مقبول
ولا تنسى صلاة الإستخارة

ـ

[bmya]

مفيش قاعده ثابته ولا خريطه في الجواز ده اللي انا اعرفه ومقتنع به وزي ما الاستاذ احمد ماقال الرسول عليه افضل الصلاه والسلام زوجته كانت اكبر منه ب 15 سنه مش اصغر منه بسنتين !!

[elfarashah]

سلام الله عليكم ورحمته وبركاته
في الحقيقة أخي الفاضل ..أدهشني سؤالك لسبب بسيط ألا وهو:ـ

أن الأمر كله مردوده إليك فأمر السن نسبي من شخص إلى آخر .

فانظر ماذا ترى أنت وتفضل ؟؟ لأنك وليس غيرك من سيتزوج ويعاشر

والأمر ايضا نسبي بالنسبة لموضوع الجمال فليست كل من تزوجت جميلة
وليست كل من لم تتزوج أقل جمالا ..

ورغم قناعتي بكل ذلك بحثتُ في راي الدين ربما يكون هناك أمر يخص سؤالك
فلم أجد غير الآتي :ـ وأرجو أن تجد فيه الإفادة:ـ

قال رسول الله صلى الله عليه وسلم - :

((تنكح المرأة لأربع ، لمالها ، ولحسبها ، ولجمالها ، ولدينها ، فاظفر بذات الدين تربت يداك)) .

وسئل - صلى الله عليه وسلم - : أي النساء خير ، قال :

((التي تسره إذا نظر ، وتطيعه إذا أمر ، ولا تخالفه في نفسها ولا ماله بما يكره)) .

وقال - صلى الله عليه وسلم - :

((تزوجوا الودود الولود فإني مكاثر بكم الأمم يوم القيامة)) .

وتعرف المرأة الولود من قرائن الحال في أسرتها وقريباتها ،
وهذا شيء ظني ، ولكن لابد أن يضع الزوج ذلك في باله

وعنه صلى الله عليه وسلم -أنه قال :

((عليكم بالأبكار ، فإنهنَّ أنتق أرحامـًا ، وأعذب أفواهـًا ،
وأقل خبـًا ، وأرضى باليسير)) .

وتزوج جابر - رضي الله عنه - ثيبـًا ، فقال له رسول الله - صلى الله عليه وسلم - :

((هلا بكرًا تلاعبها وتلاعبك)) .

وقد مدح الله الأبكار وجعل هذه الصفة من صفات نساء الجنة قال تعالى :

(إِنَّا أَنْشَأْنَاهُنَّ إِنْشَاءً * فَجَعَلْنَاهُنَّ أَبْكَاراً)(الواقعة/35 ، 36) .

ربنا يهديك لما فيه خيرك ويرزقك بالزوجة التي تسر عينك وقلبك
وبالك وخاطرك أنت وكل الشباب .

دمت برعاية الله وحفظه

[mmohamed15]

الموضوع مش موضوع سن في حد ذاته و لكن موضوع حاجات كتير مرتبطه يا زي ما قال استاذ احمد متزودش عن ٢٦ و هو اكيد ليه سبب للكلام اللي قاله بس زي ما قولت الموضوع مرتبط بحاجات كتير بيمثلها رقم العمر مرتبطه بيه يعني الواحد مش عايز السن ده علشان موضوع السن في حد ذاته زائد ان طريقه الجواز التقليديه انا مقتنع تماما ان مينفعش فيها تنازلات لان الواحد بيروح يرتبط ببنت ميعرفش عنها حاجه و بيناسب ناس ميعرفش عنهم حاجه مجرد ترشيح من شخص معرفه للطرفين علي عكس ما الواحد بيتجوز حد من قرايبه او من معارفه بيبقي عنده فكره كويسه عن البنت و عن طباع البيت اللي اتربت فيه عموما مستني باقي اراء الناس

[طارق _عبد السلام]

مش مقياس ابدا
وموضوع الجمال نسبى وممكن حد شايف ان واحده ملكه جمال مثلا وبالنسبه لغيره اقل من العادى كمان
وفيه بنات هى اللى بترفض الزواج ومش فارق معاها موضوع السن اصلا
ولو انت 32 وارتحت لواحده كزوجه وسنها 30 او 32 ايه المشكله اصلا
الموضوع نسبى وطبعا الكل يفضل زوجه اصغر منه بكثير لتحتفظ بشبابها فتره طويله
لكن هو موضوع راحه واختيار مهما كان سن العروسه الموضوع بيدك انت وليس بيد احد آخر

[mustafavet]

البنات في الاقاليم والقري والنجوع بيتجوزوا بدري لانهم معروفين النسب والاصدقاء
في المدن الكبري الحال يختلف قليل ان تجد جار يعرف جارة وتوجد بعض العائلات المحافظة جدا في الاختلاط وبالتالي دول فرصهم قليلة في الزواج
وعليه فقد تجد بنت في مدينة ذو مواصفات عالية تاخرت ف الزواج عن بنت في قرية تكون اقل في تلك المواصفات

[shiko85]

مش معنى ان سنها كبير يبقى مش جميله
من فتره طويله روحت فرح زميل اخويا فالشغل و كان فيه بنت جات سلمت على اخويا و الناس اللى معانا على الترابيزه (كلهم زمايل فالشغل) و كان اخويا فالوقت ده بيدور على عروسه و لفت نظرى جدا انها ما شاء الله فمنتهى الجمال و كمان كان باين من كلامها و من الأسلوب اللى سلمت بيه (سلام عليكم و طبعا من غير سلام البيد ) و انها دورت على البنات اللى معاها فالشغل و راحت تقعد معاهم انها مؤدبه جدا غير ان لبسها محترم جدا جدا فسألت اخويا عليها اكدلى ان كل اللى فالشغل بيشهدوا لها بالأدب و الأخلاق و التربيه و الأحترام و انها كمان من عيله كبيره و معروفه قلتله ما تتقدم ليها قالى يا ريت بس هى عندها 28 او 29 سنه و اخويا كان فالوقت ده 25 سنه بس سبحان الله اللى يشوفها يقول 21 او 22 بالكتير
و زميل ليا كان بيدور على عروسه و شاف كتير جدا جدا و فالأخر ربنا كرمه بأنسانه محترمه جدا و اتجوزوا كان هو 31 و هى 29 تقريبا و عنده ولد دلوقتى
الموضوع كله نصيب

[Mohamed_Hamid]

اخى الكريم:
الجمال مطلوب ولا خلاف. فلا يوجد رجل لا يحب أن تكون زوجته على قدر من الجمال. لكن ما هو الجمال؟ الجمال أن ترى المرأة على شئ من الحسن من الظاهر والأهم أن تكون كذلك حسناء من الباطن فهذا هو الجمال فعلا. اذا أمرتها أطاعتك حتى ولو كان على خلاف هواها. واذا غبت عنها صانت عرضك. تحب أهلك وتكرمهم كما تكرم أهلها وتحبهم ( مش لازم بنفس المقدار 100% لكن تحبهم وتكرمهم )
سؤال: لو كل واحد فينا ساب البنات اللى عمرها عدى 27 او 28 او 30؟ البنات دول من هيتجوزهم وهيعملوا ايه؟!!! والله كثير منهم جدا بنات زى الورد ولا يعيبهم اى شئ الا ثقافة المجتمع المتخلف الذى نعيش فيه.

[Ahmed abdkarim]

الموضوع ملوش اى مقياس خالص فى واحده جارتنا

جميلة جدا ومن عيله كبيرة جدا جدا و غنية جدا جدا ولغاية دلوقتى متجوزتش سنها حوالى 35 سنة

[ahmedteam]

و طبعا بعد كل الكلام الجميل ده لا تنسى

لاتحزن اذا فاتك قطر الزواج فأن يفوتك القطار خير من ان يدهسك