عايز اروح شرم الشيخ افيدونى

[وليد مسلم]

يا جماعه
السلام عليكم ورحمة الله
الحقيقه انا كنت عايز اسافر شرم كمان كام يوم
وحجزت بالفعل فى احد الفنادق
لكن ليه كام سؤال لانى ببساطه اول مره اروح شرم
وعايز اهل الخبره يفيدونى

اولا هل الافضل اروح سوبر جيت ولا طيران؟؟
ثانيا انا عندى ثلاث اطفال صغار وهايتعبوا جداا اظن ذلك من السوبر جيت لان المسافه انا عرفت انها 6 ساعات
والطيرا ن غالى شويه

وانا مش رايح تبع شركة سياحه يعنى رايح مع نفسى

ولو روحت ممكن اتفسح هناك ازاى علشن الاطفال تنبسط ؟؟

يا ريت يا جماعه تفيدونى اخوكوا مزنوق

[nazar muharram]

وعليكم السلام ورحمة الله وبركاته

السوبر جيت من 6 الى 8 ساعات

الطيران اخر مره كنت حاجز فيها من سنه 550 جنيه

اما اماكن اللعاب الاطفال كتير

1- اكوا بارك المكان الهضبه

2- هوليود طريق الغرقانه

3-سوهو

4- مارينا

رحله سعيده ان شاء الله

[وليد مسلم]

وعليكم السلام ورحمة الله وبركاته

السوبر جيت من 6 الى 8 ساعات

الطيران اخر مره كنت حاجز فيها من سنه 550 جنيه

اما اماكن اللعاب الاطفال كتير

1- اكوا بارك المكان الهضبه

2- هوليود طريق الغرقانه

3-سوهو

4- مارينا

رحله سعيده ان شاء الله

الله يبارك لك يا اخى على الرد
والحقيقه انا نفسى اروح بالسوبر جيت لانه ارخص بس مش عارف الموضوع ده هايتعب الولاد ولا لا

[nazar muharram]

خد كراسى ورا بعض ورجعو الكرسى زى منتا عايز وباذن الله مش هتتعب

[ahmedteam]

نصيحه اخويه بلاش سوبر جيت انا لسه راجع من الغردقه و معايا طفل واحد بهدلنى و فرج الدنيا عليا وانا رايح و انا راجع قررت انى مستحيل اعمل كده تانى

قدامك حلين فى رأى

1- تروح بالعربيه لو معاك حاجه تستحمل السفر

2- تروح طيران

[shiko85]

لو عندك عربيه سافر بيها او طيران او اتفق مع ميكروباص سواء شركة سياحه او مخصوص

[وليد مسلم]

خد كراسى ورا بعض ورجعو الكرسى زى منتا عايز وباذن الله مش هتتعب

والله ممكن
وفكره برضه حلوه
جزاك الله خيرا

[وليد مسلم]

نصيحه اخويه بلاش سوبر جيت انا لسه راجع من الغردقه و معايا طفل واحد بهدلنى و فرج الدنيا عليا وانا رايح و انا راجع قررت انى مستحيل اعمل كده تانى

قدامك حلين فى رأى

1- تروح بالعربيه لو معاك حاجه تستحمل السفر

2- تروح طيران

والله انا عندى 3 اطفال وخايف من كده
بس المشكله ان الطيرا غالى اوى وهايفرق فى المصاريف

جزاك الله خيرا

[وليد مسلم]

لو عندك عربيه سافر بيها او طيران او اتفق مع ميكروباص سواء شركة سياحه او مخصوص

انا عندى عربيه لكن ما باحبش اسوق مسافات طويله
واخاف كمان انها تعملها معايا وتعطل فى الطريق وتبقى رحله سعيده
وبالنسبه للمكريوباص اظن ان السوبر جيت يكون افضل منه

الله يبارك فيك

[shiko85]

انا عندى عربيه لكن ما باحبش اسوق مسافات طويله
واخاف كمان انها تعملها معايا وتعطل فى الطريق وتبقى رحله سعيده
وبالنسبه للمكريوباص اظن ان السوبر جيت يكون افضل منه

الله يبارك فيك

الميكروباص ممتع جدا فالسفر
انا قصدى تاخد ميكروباص ليك لوحدك, زمان كنا بنعمل كده ميكروباص سياحه و بنروح بيه شرم و طابا و نوبيع
تلف الكنبه و يبقى عندك مساحه ممتازه و مريحه جدا

[svneleven]

ميكروباص هيكون غالي مش أقل من 1200 مثلا جنيه رايح جاي.

[وليد مسلم]

الميكروباص ممتع جدا فالسفر
انا قصدى تاخد ميكروباص ليك لوحدك, زمان كنا بنعمل كده ميكروباص سياحه و بنروح بيه شرم و طابا و نوبيع
تلف الكنبه و يبقى عندك مساحه ممتازه و مريحه جدا

يااااااااااااااااااااااه
فعلا انا فاكر وانا صغير كنا بنروح نصيف كده
والسواق بيفضل معانا وهوه اللى بيرجعنا تانى
كانت ايام جميله

جزاك الله خيرا

[alrabeh]

أعرف واحد محترم معاه عربية النترا 2013 لو حبيت ممكن أسأله الرحلة تتكلف كام

لو ما يضايقش حضرتك الفندق اسمه ايه والتكلفة كام

وأجازة سعيدة وتروح وترجع فى أمان الله وحفظه

[alrabeh]

أخبار الجو ايه هناك الفترة دى أنا شايف درجات الحرارة فى شرم الصغرى من 27-30 والكبرى من 32-38
فهل جو البحر بيخفف من حدة الحر ولا أفضل السفر فى الشتاء

[mohamed_hamdi]

اخي الفاضل وليد باشا المحترم و رفيق الفكر السياسي نصيحة من اخوك غالبا الاكبر بلاش السوبرجيت طالما معاك ما شاء الله ٣ اطفال و السيطرة صعبة عليهم و رحلة مش قصيرة و الطيران التذكرة النهاردة ليك و لاختنا الفاضلة كل فرد ١٠٩٠ جنيه و الاطفال ٧٧٥ جنيه للطفل يعني بتتكلم في حدود ٤٥٠٠ طيران بس وفعلا افضل حل ليك مع الاسرة و طبعا الشنط الخاصة بالرحلة هو ميكروباص خاص مكيف سياحة و تكلفته مقارنة بالطيران رائعة و افضل كمان من فكرة العربية الالنترا الخصوصي حتى لو أغلى شوية و تبقى اشتريت راحتك و الاسرة.
بخصوص الفنادق الاربع نجوم و تنفع الاسرة فممكن تعمل معاينة فعلية من موقع بوكنج.كوم بعد ادخال التواريخ الخاصة بالرحلة و معها فلترة الفنادق في شرم الشيخ الى اربع نجوم فقط و ستجد فندقين او ثلاثة بدون ذكر اسماء منعا للحرج مع المنتدى و بهم العاب مائية و بوفيهات افطار و عشاء او افطار فقط و دي نصيحتي لان العشاء بره الفندق احسن و ارخص و كل يوم حاجة جديدة و بدون التقيد بمواعيد. حاول تختار الفندق ذو التقييم العالي من النزلاء السابقين و اقرأ تعليقاتهم و تقييمهم للمكان و الغرف. لو عايز ترشيح معين ابعتلي على الخاص لو حبيت و سارد عليك فورا
بخصوص التوقيت فالفترة الحالية كويسة جدا لشرم من حيث درجة الحرارة قبل الارتفاع الى ٤٢ درجة في ٧ و ٨ .
لاي مساعدة تؤمر يا كنج و دعاء من القلب بحسن الاختيار و اجازة سعيدة و حاول تعمل زي اخوك و تخلي الاجازة شاملة يومين الانتخابات بتوع ٢٦ و ٢٧ طالما مقاطع زي اخوك و الكثيرين من رافضي المسرحيات الهزلية.