رحله المرض والشفاء ابنتي ٨ سنوات

[hugan]

ربنا يشفيها
الطب في مصر كارثه

[د.محمود صلاح]

ربنا يشفيها
الطب في مصر كارثه

بعد ما سافرت الخليج وشوفت الطب المظبوط اللي يدرس في الكتب .. اقدر اقولك الطب في مصر محتاج امكانيات وفلوس بالهبل ابسط حاجة تحليل ال cbc صورة الدم ب 50 جنيه وكان من خلاله نقدر نحدد وجود زيادة في كريات الدم المصاحبة لالتهاب الزايدة

[AHMED12345678]

بعد ما سافرت الخليج وشوفت الطب المظبوط اللي يدرس في الكتب .. اقدر اقولك الطب في مصر محتاج امكانيات وفلوس بالهبل ابسط حاجة تحليل ال cbc صورة الدم ب 50 جنيه وكان من خلاله نقدر نحدد وجود زيادة في كريات الدم المصاحبة لالتهاب الزايدة

كل حاجة موجودة فى مصر
بس ناقص الكفاءه وتقدير الاطباء واصلاح الهيكل الوظيفى لهم
انا اعمل فى المجال القانونى لكن زوجتى طبيبه ومن تعامل الدولة مع الاطباء فى المجال الادارى حاجة فى منتهى السوء مش هقول حتى التعامل المادى
زوجتى علشان تخلى طرفها عند نقلها من مكان لمكان فمش عايز اقول عن كمية الاجراءات الشنيعه الى بتتعمل وكأنها هتتنقل لدولة أخرى
وبعد كل الاجراءات دى والبهدله وعدم التقدير المادى المفروض الاداء يكون بنفس مفتوحة
طب ازاى
الاطباء فعلا مظلومبن والكبار منهم فقط هما الى واخدين حقهم من العيادات الخاصة والمستشفيات الخاصة
لكن القاعده العريضة من الاطباء مظلومة والواحد فيهم مبيصدق ياخد الماحيستير علشان يسافره برة لتحسين مستوى دخله وده بيفرغ مصر من الكفاءات الطبيه بالفعل

[drcobra]

الف سلامة

[abdel samie]

انا أسف يا جماعه مقدرتش اكمل امبارح لانا كنا لسه خرجين من المستشفي الضهر وبقلنا بالضبط أسبوع في المستشفي بدون نوم
بس علي فكره القصه لسه لم تبدء بعد
الحلقة التانيه

قعدنا ٣ ايام بعد العمليه والبنت مفيش تحسن واضح ومازال القيء موجود الدكتور بيطمنا كل ما يجئ يبص علي البنت ويقلي أصل ده اثار الالتهاب والفلاجيل المطهر هو أل بيسبب الترجيع و في الاخر قرر يخرجها من المستشفي يومين والبنت حالتها ساءت اكتر والحرارة زادت وبدأت نبضها يعلي وتنهج وهي علي السرير كلمته قلي ده بس هتلاقي القولون صاغت علي الحجاب الحاجز في الاخر روح اعمل سونار علي البطن والحوض رحنا عملنا سونار واكس رأي ولاقيت د كتوره الأشعة بتقلي في هوا ضاغط علي الحجاب الحاجز مش عرفين مصدره كلمت د خالد شرحتله الموقف وقلتله البنت ديه لازم تتفتح تاني الوضع مش مطمان فلها البنت مش هتتفتح والجراحه ال انا عملها مفهاش مشكله ان متأكد من شغلي والعمليه ال انا عملها وفضل يكابر ويقنعنا ان مفيش اي مشكله راحت دكتوره الأشعة قالت خلاص اعملوا أشعه مقطعية هتبين المشكلة منين فعلا دخلت علي الأشعة المقطعيه لانا في تسريب من القولون الكلام ده فضلنا في مركز الاشعه من ٩ صباحا لحد ٩ مساء والبنت مش قدره تتحمل الألم بالاضافه للحقن الشرجية ال خدتها والصبغة ال شربتها واتحقنت بيها وفي الاخر طلعنا علي المركز الطبي التخصصي بالشرطة للمره التانيه بعد ٤ ايام من العمليه الأولي ولقينا حضرته مستنينا ومعاه دكتور تاني اكبر منه الدكتور محمد مصطفي الفرود بتعهم بلإضافة لدكتور مساعد معاهم اسمه علاء والتلاته أطباء تبع وزاره الداخلية ولاقيت الكبير بتاعهم بيقل د خالد البنت بطنها وحشه ولازم تتفتح وده بعد مشفنا يوم انا وأمها والبنت من الألم والحزن يصعب وصفه

[abdel samie]

الحلقة الثالثة

دخلت البنت عمليه استكشاف (عمليه رقم ٢) وقعدت حوالي ساعتين او تلت ساعات وفي نص العمليه لاقينا الممرضه طلعه من العمليات بتسال فين والد ملك وفين د هشام (جاري) دكتور خالد عيزكم في العمليات ولك ان تتخيل سماع ذلك ماذا تتوقع بعده !!!!!!!
دخلنا جوه لانا الباشا خالد والفرود بتعهم محمد مصطفي طلعين من العمليات وقعدين يشربوا سجاير وبيقلي البنت لاقينا القولون مقطوع ودايب وفي صديد والتهاب حاد بالبطن ما قبل صدمه تسمميه والمكان ال فيه القطع من القولون الجانب الاخر الشمال والزائده في اليمين المهم ان الباشا فضل يفهمني ان الوضع ال شافه في العمليات غريب عليه اول مره يشوفه الباشا ميعرفش ان الزائده لم انفجرت الماده ال جوه الزائده بكتريا سامه مجرد انفجارها تسبب تسمم في البطن بالكامل والباشا ال عمله المره الأولي نضف حولين الزائده فقط والحل الأمثل لو الزائده منفجره حلين :
الاول بمجرد ان يري الطبيب انها منفجره ان يركب درانق (أكياس متصلة بالبطن في أماكن تجمع الصديد عن طريق خراطيم اي سوائل تتجمع في البطن تخرج من خلال الخرطوم خارج البطن وتتجمع بالكيس) ويعطي المريض مضادات حيويه حتي يجف الصديد داخل البطن ويفضل ان يكون المريض أثنائها في الرعايا الحرجة حتي يتم متابعه صوره الدم والأملاح في الجسم وهذه القصه ربما تمكث من أسبوعين لتلاته في المستشفي .
الحل التأني ان يتم تحويل العمليه من استئصال الزائده الي استكشاف بطن ويتم عمل غسيل للغشاء البرتوني وايضاً تركيب درانق بعد العمليه لان احتمال أعاده تكون الصديد داخل البطن يكون احتمال وارد بشكل شبه مؤكد بعد العمليه.
نرجع لتكملة القصه خرجت البنت من العمليات وهيه مركبه درنقتين في البطن ورايل في الأنف واصل بالمعده عشان العصارة التي يتم افرزها في المعده تخرج من البطن في كيس خارج البطن يسمي رايل وتم عمل فتحه اخراج تسمي اليوستمي (خارج الأمعاء الدقيقة علي الخارج مباشره ويتم تجميع البراز في كيس لازق علي البطن ) وذلك لان القولون أتعمل فيه خياطه بالاضافه للالتهاب ال موجود فيه ليظل هذا الحال (الاخراج من الجانب في كيس لمده ٦ أسابيع) حتي يلتئم القولون مره اخري.

[abdel samie]

الحلقة الرابعه.

قعدنا بعد العمليه ٢ بالضبط أسبوع من ٢/١ الي ٢/٨ والبنت حالتها مش بتتحسن وكل يوم يعدي البنت الهيموغلوبين بتعها بينزل لحد موصل ل ٨ والألبومين ( بروتين الدم) وصل ل٢.٥ والبنت بدا جسمها ينفخ ومش عرفين نديها المحاليل عشان الأوردة كلها التهبت واضطرنا يركبوا لها كنولا في الرقبه عشان الوريد في الرقبه بيبقي قريب من القلب والوريد كبير وكل يوم ال منه لله يطمني هو والجزار محمد مصطفي ويوم ٢/٨ كلمته قلي البنت جراحيا زي الفل بس هيه محتاجه رعايه أطفال المهم جه د كتور الأطفال بص عليها وقلي لازم البنت تتنقل لرعايا مركزه وبالفعل بدأت أدور علي مستشفي فيها رعايا ومكان فاضي في حوالي ٥ او ٦ مستشفيات وللأسف كل مروح مستشفي ياما يرفضوا ياما مفيش مكان لحد موصلت بمستشفي عند قصر الطاهره في الزيتون
ولاقيت نفسي طالع عند العيادات الخارجية وتحديدا عند حضنات الأطفال ولاقيت الممرضه ال علي الباب طلبت منها أقابل الطبيب خرجت لي دكتوره شرحت لها الحالة قلتلي أستني شويه هكلم حد ورد عليك خرجت بعد حوالي ٢٠ دقيقه والمفاجئة لاقيتها بتقلي انا كلمت د أيمن البغدادي وطلع عارف حاله بنتك وقبل يدخلها المستشفي باسمه بس المشكلة مفيش مكان في الرعايا شاء القدر ان مكان يفضي اليوم ده وتنتقل البنت بالإسعاف وتتدخل الرعايا.

الدكتور أيمن كلم الجراحه في الطوارئ عشان يدخلوا الحاله والغريب ان الدكتور قرر ان البنت تدخل عمليه استكشاف (عمليه رقم ٣) من قبل ميشوف البنت بالتليفون
نسيت اقلكم ان الدكتور ده جه شاف بنتي في المركز ال كانت فيه وكان بالفعل عارف الحاله من حوالي اسبوع

[د.محمود صلاح]

لا حول ولا قوة الا بالله .....

[abdel samie]

الحلقة الخامسه

بصيص الأمل عاد الي مره اخري ولا أكاد أخفيكم سرا اني كنت اشعر ساعتها ان ابنتي علي وشك الوفاه خاصه بعد ان طلب مني دكتور الأطفال في المركز الطبي التخصصي بالشرطة ان انقل ابنتي الي مستشفي اخر تكون فيه رعايا حرجه وبعد ان تدهورت حالتها وظللت ابحث في المستشفيات عن مكان انقلها فيه ولكن يشاء الله ان تغلق كل أبواب المستشفيات في وجهي الا مستشفي واحد شاء القدر فيه ان أتكلم مع دكتوره في الحضانات لا اعرفها لتكلم طبيب مشهور بدون اي ترتيب مني كان قد زار ابنتي في المركز الطبي ويخبرها في التليفون انه يعرف هذه الحاله جيدا وان يدخلها باسمه في الرعايا الحرجة لتظل في الرعايا حوالي ٤ ايام في ذلك الوقت كان لابد لتجهيز ابنتي لدخول العمليات (عمليه استكشاف وديه العمليه رقم ٣ بعد ١٢ يوم من العمليه التانيه)لان ابنتي في ذلك الوقت كانت تقربيا وصلت لحاله تسمم الهيموغلوبين وصل ٧ والأملاح البوتاسيوم وصل لمعدلات منخفضه وكان لابد من ضبط هذه الأشياء قبل دخول العمليات بدأت الأمور تضح الي من الدكتور أيمن بغدادي خاصه بعد اجراء العمليه رقم ٣ حيث وجد الخياطة التي عملها الدكتور خالد علم الدين ومحمد مصطفي مفتوحة داخل البطن وفتحه الإخراج في الجانب جزء منها يخرج البراز داخل البطن مما أدي لتكون خراج صديد بين الحجاب الحاجز والكبد المهم البنت خرجت من العمليات بعد ا جراء عمليه تعديل مسار للمره التانيه ولكن في هذه المره تمت بفضل الله بنجاح ثم قعدنا حوالي ٥ ايام في الرعايا الحرجة والحاله بدأت تتحسن بالتدريج ثم خرجت من الرعايا الي غرفه عاديه لمده ٣ او ٤ ايام وكتب لنا الدكتور أيمن خروج من المستشفي ولكن كان هناك حمل ثقيل كيف تظل ابنتي بكيس اخراج جانب البطن لمده حوالي شهرين حتي يلتئم القولون مره اخري ليجري لها الدكتور بعدها عمليه أعاده توصيل الأمعاء الدقيقة بالقولون.

[sting_2010]

الف مليون سلامة لبنت حضرتك يا رب يتم شفاءها على خير .

[abdel samie]

الحلقة السادسه


رحله الشفاء في البيت خاصه اول أسبوع كانت من اصعب المراحل لان كان عندي مشكله ان البنت في خياطه الجرح بطول البطن لابد ان الجرح أحافظ عليه نضيف بس المشكلة ان فتحه الإخراج لان البنت بطنها صغيره كانت قريبه جداً من الجرح وكنت مش عارف اركبلها الفلانشه علي البطن وديه بتتلزق وبيركب عليها كيس الإخراج كان دائماً في تسريب علي الجرح عشان كده الجرح خد فتره كبيره عشان يلتئم بالاضافه ان التسريب ده لم بينزل علي الجسم بيلهب الجلد لان ده بيكون ذي الحامض حاولت احل المشكلة ان أجيب لاصق قرح وده بيكون لاصق معين بيتلزق ويعمل ذي العازل ومنه مضاد حيوي بس للأسف كان برده بيسرب لغايه اننا اشتريت مرتبه مخصوص وقطعت منها مربع وخليت البنت تنام بحيث الفتحه ال فالمرتبه تكون تحت فتحه الإخراج والبنت تعرف حته تنام لان الالتهاب مكانش حتي البنت حد قادر يلمس بطنها
لغايه ربنا مهد أني لطريقه اثبت بيها الفلانشه علي الجسم بدون متسرب أني اثبتها علي البطن باستيك حوالين الوسط وبفضل الله الحل ده خفف كثير من الألم للبنت وقدرنا نكمل فتره الشهرين وبعد ما انتهت الدراسه كان لازم اعمل أشعه بالصبغة علي القولون عشان نطمن ان القولون مش بيسرب في البطن وان الخياطه ال فيه التأمت وبالفعل عملنا الاشعه وكانت النتائج كويسه ان القولون لايوجد به تسريب او انسدادات ورحنا علي المستشفي عشان نعمل أعاده توصيل القولون بالأمعاء الدقيقة (عمليه رقم ٤) والحمد لله العمليه تمت يوم ٥/٢٠ بعد تقربيا ٣ شهور و١٠ ايام من العمليه رقم ٣

[م. حاتم السباعي]

اللهم لا راد لقضائك

اللهم اجرك في محنتك و اللهم اشفي لك ابنتك الغالية شفاء لا يغادر سقما

و اللهم اجعل صبركما في ميزان حسناتكما انت ووالدتها و عافها لكما

الحمد لله و الشكر لله علي تمام شفائها و بارك الله في كل من اجتهد في عمله و ربنا ينير لهم الطريق و اللهم اهدي كل مقصر في عمله و اللهم اهدي كل مغرور يظن انه ملك العلم وهو بعيد كل البعد عنه

دمت في رعاية الله وحفظه

[abdel samie]

انا أسف للإطالة عليكم والسرد الطويل ولكني أردت ان اسرد قصه قد يستفيد منها البعض وقد يمل منها البعض وجزاكم الله خيرا علي حسن دعاءكم لي ولابنتي وزوجي ولكن أودّ ان انهي هذه القصه ببعض العبر بعد هذا البلاء
١- احيانا يكون البلاء خير وفير يسوقه الله لعبد ما
٢-عندما تضيق بك السبل تأكد ان الله لن ينساك بلطفه
٣- في شده الكرب كن علي يقين ان الله رحيم بعباده
٤-لا يرد القدر الا الدعاء
٥-لا تيئس أبدا من روح الله
٦-ما ضاع منك في الدنيا سيرد إليك مره اخري
٧- بعد البلاء والصبر عليه يشعر الانسان بطمئانينه وأنس بالله

[moudy88]

ربنا يجعل اللي حصلك في ميزان حسناتك وتكفير عن سيئاتك وتفرح ببنتك ان شاء الله

[JAM]

الحمد لله على سلامة إبنتك... وياريت لو تدبح حاجة لوجه الله تعالى فدو بنتك