رجالة القاهرة مساعده لاخوكم الاقاليمي

[M!SHO]

يا جماعه انا قولت على سبيل المثال لا الحصر

يعني فيه أسباب تانيه كتير ممكن تكون بسيطه بس لما بيجي وقتها بتبقى مؤثره

بس فعلاً موضوع الشغل والفرص أهمهم

sfahmy6

كلامك صح طبعاً ، وانا عارف النقطه دي ، ممكن اخد شقه في مدينة نصر و شغلي يكون في اكتوبر مثلاً يبقى الاسهل السفر من الزقازيق

وبالمناسبه الشغل اللي اترفضت فيه كان في القريه الذكيه اصلاً

عشان كده في كلامي قولت انا عايز شقه تكون قريبه من كل حاجه في نفس الوقت اللي عارف فيه ان ده مستحيل

واللي جه في دماغي ان ساعتها ممكن ابيعها او اجرها مثلاً

انا عارف ان ده نفس التفكير بتاع البيضه ولا الفرخه عشان اشتغل محتاج محل اقامه والعكس

نفس الوضع ينطبق على عشان اشتغل عايز خبره وعشان اخد خبره لازم اشتغل

بس ده الطبيعي في مصر بندور في حلقه مفرغه

amrelsaqqa

هو بصرف النظر عن الاسلوب واني متأكد أنك متأقصدنيش أنا بكلامك

انا موافقك تقريباً في كل كلامك لانه ببساطه كان نفس تفكيري من سنه ولا اتنين

بس دي تظل حساباتك وحساباتي للموضوع لاكن لأصحاب العمل بتختلف

الواقع بيقول غير كده خالص ، انا متخرج بقالي ٣ سنين وطول ال ٣ سنين بدور على شغل حتى وانا شغال كنت بدور

عملت عدد لا بأس به من الانترفيوهات وكلها بلا استثناء كانت في القاهرة وكان دايماً تواجهني مشكلة السكن ، يا اما صاحب الشغل اول ما يسمع اقاليم يتحول يا اما المرتب ضعيف ومش هعرف اجيب سكن بالبلدي هصرف من جيبي يعني

عشان تشتغل في الاقاليم الزقازيق مثلاً يا تشتغل في الكهربا ولا الضرايب او اي حاجه حكومه وطبعاً دي سكتها معروفه وانا للاسف معنديش واسطه ولا شغل الحكومه طموحي اصلاً

يا تشتغل في البنوك وده اوبشن مش متاح للفريش ولا حتى جينيور ، صعب جداً تبتدي في الاقاليم

يا اخيراً تشتغل في شركه نص لبه وده اللي حصل فعلاً بس في طنطا

منكرش ان طنطا فيها حياة عن الزقازيق وقريبه من القاهرة بس برده فيها عيوب الاقاليم

وللاسف مطيقتش الوضع وسيبت الشغل واتجهت للشغل الخاص

الخلاصه ان فرص الشغل في القاهرة اكتر واحسن الطموح اكبر وده كلام ميختلفش عليه اتنين

وبرغم كده وفرلي فرصة شغل معقوله ( ادميه ) في بلدي وانا مش هافكر حتى

بس انا مش هفضل مستنى حال البلد ينصلح ويفكروا شويه في الاقاليم ويهتموا بيها

يا رب تكون وصلتك وجهة نظري وفهمت اني ضحية لنظام متخلف مش اكتر

[amrelsaqqa]

انا عارف انك ضحية والله مفيش كلام ، وانا كنت في نفس وضعك بالظبط ومش بلومك شخصيا في اي حاجة

وزي ما قلت في ردى انا مش منفعل عليك شخصيا
انا اتنرفزت من اللى بيقولك مش من القاهرة يبقى مش هتشتغل وحاجات تانية في تفكيرنا ككل اللى ودى البلد في داهية ولسة حصل موقف من يومين في نفس الموضوع ده وفي نفس الوقت صعب عليا حال الشباب كلهم ف انا كنت معبى بقى والكلام كله طلع مرة واحدة

ربنا يوفقك ويصلح حالك يارب ، لو عاوز حاجة قريبة قدر الامكان لكل حتة في القاهرة هتبقى صعبة وغالية جدا ، انا بقول تشوف الوضع الاول كبيئة شغل وعمل ، انا كنت بروح اعمل الانترفيوهات اقول انا من المنوفية بس باخد سكن هنا في القاهرة قريب من شغلى (من الاخر بقول له انا احسن من اللى في القاهرة نفسها ) وفعلا كنت بعمل كدة والحمد لله ما حصلش معايا موقف انى اترفضت بسبب الاقامة او المحافظة

ومعلش طالما حضرتك في اول حياتك تقدر تستحمل تتعب شوية ولو حاجة بسيطة في الاول ، انا اول ما اشتغلت اشتغلت في شركة في مساكن شيراتون وخدت شقة متواضعة ايجار مفروش مشترك مع مغتربين زيي في منطقة الالف مسكن وبعد كدة ربنا سهل وخدنا شقة فاضية في مدينة نصر، وبعد كدة نقلت شغلى الدقى وبرضه نقلت من الشقة اللى انا كنت فيها ...

فبيتهيألى خلى الشغل ييجى الاول ولما تحس بالاستقرار ولو نسبى وان الدنيا بقت تمام ، تقدر تفكر في موضوع الشقة
مثلا لو جالك شغل في القرية الذكية اجر شقة في الشيخ زايد وطالما معاك عربية مش هيبقى الموضوع صعب خالص ، بعد كدة الدنيا استقرت ، يبقى زي ما بيتقال طالما دخلت القرية الذكية مش هتطلع منها يعنى لو هتتنقل هتتنقل بين الشركات جوة ، في الحالة دى وضعك بقى مستقر نسبيا ونقول مثلا تشتري شقة في اكتوبر .. بيتهيألى ده اسلم الحلول من وجهة نظري

[marsguy]

السلام عليكم ورحمة الله وبركاته،،،،

أنا عندي فكره كويسه

أنت هاتروح الإنترفيو ولما تتسأل عن سكنك هاتقول الحقيقه

هاتقول إنك حالياً في الزقازيق بس أول ما تشتغل هاتأجر شقه في مكان قريب من الشغل. وطبعاً إنت مستني إذا كنت هاتتقبل في الشغلانه ولا لأ عشان تحدد مكان الشقه اللي هاتأجرها.

شكراً