استفسار بخصوص الألتحاق بكلية الهندسة من الثانوي التجاري

[Darkk]

السلام عليكم ورحمة الله وبركاتة

لو سمحت كنت حابب استفسر عن شئ وبالله عليكم افيدوني لأني بجد تعبت ويأست

هل يمكنني عمل معادلة من دبلوم فني تجاري و الألتحاق بكلية الهندسة ام الألتحاق فقط من الثانوي العام والصناعي فقط ؟

هل يوجد اي طريقة للألتحاق بذلك ؟

معهد خاص او حكومي وعمل معادلة او اي طريق يوصلني لهندسة

حتي لو الموضوع هيطول او هياخد وقت او جهد او فلوس او اي شئ .

وللأسف انا غلطت من البداية اني دخلت ثانوي تجاري لأن حصلي ظروف والحمد لله علي كل شئ قدر الله وما شاء فعل

بالله عليكـم افيدوني وبالتفصيل لأني بجد تعبت

[eng.salama93]

ممكن ثانوي صنايع و بعدها معهد سنجر و بعدين كليه هندسة
بس ثانوي تجاري دي الله اعلم بصراحه اول مره اسمعها
هو انتا كنت بتدرس مواد ايه ؟ و هي أصلا علي حسب مزاجهم برضو

[Darkk]

انا شعبة عامة

دي المواد اللي بدرسها

محاسبة حكومية - محاسبة مالية وضريبية - لغة عربية - لغة أجنبية أولي - لغة أجنبية ثانية ( فرنساوي ) - حاسب ألي - إدارة مشروعات - سكرتارية - إقتصاد - بيزنيس - تأمينات هندسية

والله انا فعلاً زهقت ومش لاقي حل ومش عارف ازاي مش مديين مجال لكل الناس كدا هو التعليم دا مش محسوب ع الدولة هو كمان ولا ايه انا مش فاهم بجد تعبت !!

ولا ازاي المجال مفتوح لناس وناس لا علي الأقل يدوا الفرصة لكل الناس بالتدريج من الأسهل للأصعب علي حسب الدراسة اللي كل واحد درسها

لكن اقول ايه بس .

[mohamed_selim]

مينفعش
لازم ثانوى صناعى سواء نظام ٣ سنين و بعديه معهد سنتين او نظام ٥ سنين
و عادة اللى شفته ان ٩٩ ٪ من اللى بيكونو جايين ثانوى صناعى بيجيبو امتياز فى الرسم و بيسقطو فى الرياضه و الفيزيا و اغلبهم بيستنفد مرات الرسوب و يحول تجاره

[eng.salama93]

انا شعبة عامة

دي المواد اللي بدرسها

محاسبة حكومية - محاسبة مالية وضريبية - لغة عربية - لغة أجنبية أولي - لغة أجنبية ثانية ( فرنساوي ) - حاسب ألي - إدارة مشروعات - سكرتارية - إقتصاد - بيزنيس - تأمينات هندسية

والله انا فعلاً زهقت ومش لاقي حل ومش عارف ازاي مش مديين مجال لكل الناس كدا هو التعليم دا مش محسوب ع الدولة هو كمان ولا ايه انا مش فاهم بجد تعبت !!

ولا ازاي المجال مفتوح لناس وناس لا علي الأقل يدوا الفرصة لكل الناس بالتدريج من الأسهل للأصعب علي حسب الدراسة اللي كل واحد درسها

لكن اقول ايه بس .

للأسف مش هينفع المواد دي ملهاش علاقه بأي قسم من اقسام الهندسة ولو حتي كليه خاصه
ممكن تدور ف الكليات الخاصه بس اعتقد نسبه الأمل ضعيفه جدا ان مكانتش معدومه
انا اسف اني بحطم امالك بس دي الحقيقة
و بالنسبه لموضوع الفرصه فا انتا لو كنت دخلت ثانوي صنايع كانت بقت قدامك فرصه كبيرة جدا و انا ليا زمايل كتير خريجين معاهد زي سنجر و ثانوي صنايع

و هي فعلا علي حسب الدراسه اللي كل واحد درسها
يعني مينفعش مثلا واحد كان علمي رياضه ف الثانويه العامه و جاب 99% يقول انا عاوز اخش طب .. و هكذا

[besso]

هو اللى انا اعرفه ان دخول الهندسه من الثانوى الصناعى 5 او 3+معهد

لكن فيه معادله وتقريبا لاى حد معاه ثانوى او مايعادلها معرفش بس اسأل فيها مكاتب التنسيق او المراكز اللى بتدرس المعادله دى فيه مركز اسمه الامبراطور كنت اسمع عنه


انا كنت 5 سنين بس خدنا الم جاااااااااااااااامد فى التنسيق السنه اللى فاتت نط 5 % عن كل السنين وراح امل الهندسه منى الحمد لله على كل شىء بس دخلت تعليم صناعى حلوان ولكن الحمد لله مواجهتش ازمه فى الفيزياء او الانجليزى او الكيمياء هى اللى تعبتنى شويه الرياضه لانى كنت نسيت اللى درسته فى الدبلوم

فبردو الثانوى الصناعى ماتضمنوش

لكن تقريبا موضوع المعادله يمشى معاك اسأل فيها بس مش سهله خلى باللك

[Darkk]

ربنا يباركلكوا شكراً جداً لحضراتكـم لكن انا في اكتر من شخص قالولي الحل انكـ تدخل جامعة عمالية وتعمل معادلة منها علي كلية هندسة واللي طمني الحمد لله ان في 3 أشخاص قالولي نفس الكلام

هل من الممكن تفيدوني في كدا ؟

هل الكلام دا صحيح او لا ؟

[mohamed_selim]

روح اسال فى الجامعه العماليه

[Darkk]

حد عنده خلفية عن الموضوع دا يا جماعة ؟؟؟

[besso]

معنديش معلومه عن الحكايه دى روح اسال فى الجامعه العماليه ومكتب التنسيق بردو

[exelence]

أعتقد ما ينفعش لازم ثانوى صناعى و تجيب مجموع عالى كمان
بعدين ما انت ممكن تدخل كلية تجارة حلوه بردو و لو اشتغلت فى مكان كويس يبقى تمام بلاش تضيع سنين عمرك

مينفعش
و عادة اللى شفته ان ٩٩ ٪ من اللى بيكونو جايين ثانوى صناعى بيجيبو امتياز فى الرسم

كلامك صحيح يا هندسه و مع ذلك كانو بينقلوا منى فى الرسم مع انى ثانويه عامه بس كنت باعشق الرسم :)