قمر الدين والياميش

[A.Saad]

كل سنة
كل سنة
بلا استثناء
بيضحك عليا فى قمر الدين
نادر انى اعرف اجيب نوع كويس
والسنة دى كمان السورى منه غالى

حد يقول على نوع كويس مصرى او سورى

[midooo_119]

قاطع احسن

[shiko85]

فعلا قاطع احسن
مش من المنطق ان الـ 400 جرام توصل لـ 27 جنيه
لما نقاطع المنتجات دى التجار هتخلى عندها دم و تبطل جشع

[J A G U A R]

قضيها سوبيا وخلاص

[marsguy]

لو خلطت عصير برتقال مع عصير جزر بيديك تقريباً نفس طعم قمر الدين بالظبط

وطبعاً شتان الفارق في القيمه الغذائيه

[amrezzat82]

انزل لف كويس فى السوبر ماركت العادية او الجملة بس مش لازم كارفور ولا مترو لأنهم بيغالوا جدا فى معظم حاجات رمضان
انا وصلت لحد 20 بس اسمه غرناطة سوري - و اعتقد ان السوري متقارب فى الطعم
او مممكن تجيب ازازة فيتراك قمر الدين و تعمل بيها عصير بيبقى جميل جدا

[sas5]

انا مش هشترى قمر الدين هذه السنه - انا مقاطع

[fepsceasar]

والمشمشية والقراصية هم كمان مولعين السنة دى ولا ايه الكلام
انا لسة ما لفتش

[cheetos_892005]

في ماركه اسمها تاج الدين مبيلقهاش غير في هايبر وان الوحيده اللي مركزه و طعمها حلو

[MotorX]

زي ما الزملاء قالولك قااااااطع وما جاتش على قمرالدين ماله الكركرية والتمرهندي ، لكن لو عايز نصيحة عن تجربة معظم العبوات 400 جرام في السوق مضروبة ونسبة سكر الجلوكوز للمشمش فيها كبيرة والسعر من 25 الي 28 ، الافضل العبوات وزن 500 جرام ودي في اعتقادي مابتبقاش موجهة اصلا للسوق المصري وهاتلاقي سعرها من 35 الى 40 جنيه والماركات "سامو" و "الاحلام" ودول ممكن تلاقيهم في هايبر وكارفور و مترو ، بس طبعا بناء على الاسعار السابقة ياريت تقااااااااااااااااااااااااااااطع.

تحياتي.

[esam_refaat]

وماله المشمش لما تجيب 20 كيلو ب 100 جم وتحفظهم فى الفريزر باى طريقة من طرق الحفظ
ان شاء الله اشترى النهاردة قبل المشمش ما يخلص

[ah-gawad]

قمر الدين ده كائن ملهوش اي لازمة ليه يعني لفة قمر الدين ب 33 جنيه لو بتحبه اوي كده المشمش موجود اعمله عصير و ريح نفسك و البدائل كتير و بتروي من العطش اكتر منه جدا و رمضان كريم

[blazer]

بلح باللبن :d
قمر الدين ايه وبتاع ايه ,, اصلا الناس فى رمضان بتفترى,, يعنى اعتقد انه ناس كتير كل يوم لازم بسبوسه او كنفه و قطايف و جلاش عشان يحلو ,, و اطباق لحوم مختلفه و محااااشى كتير
كان دا شهر الاكل,, مانت عندك السنه كلها موجوده كل براحتك , اشمعنى ااكل بيحلى فى رمضان
دا حتى الصيف و الحر بيخلوا الواحد عاوز ينزل ياخد غطس فى حمام سباحة مليان بلتمر الهندى مع الكركدية :D

[A.Saad]

خلاص هاركز مشمش واعمله عصير

[casperinoo]

عندي نفس الازمه
امبارح جربنا نعمل العصير بنفسنا وطلع طعمه احلي من قمر الدين
ديه الطريق والمكونات اللي مشينا عليها

مشمش – ماء – سكر – شرائح ليمون.

طريقة التحضير:
* يغسل المشمش جيداً ثم يقسم الى أنصاف و ينزع لبه
* يوضع اناء به قليل من الماء حسب كثافة العصير المراد الحصول عليه وكمية من السكر حسب الرغبة على النار
* يضاف له انصاف المشمش وشرائح ليمون للمحافظة على لون المشمش زاهياً مع الانتباه لعدم الإكثار من شرائح الليمون حتى لايكون فيه طعم الحموضة ظاهراً
* يترك المزيج يغلي لحوالي 10 – 15 دقيقة
* عندما ينضج يرفع عن النار و يترك جانباً ليبرد
* يوضع في الخلاط
* يصفى للتخلص من الألياف
* يتم تذوقه لتعديل السكر وتخفيفه بالماء ان كان كثيف