نادى وادى دجله...

[a_samy]

إستفسار بسيط لو سمحت ... قصدك بعقد الإشتراك إللي هيه ورقة البنود إللي مضيت عليه في الأول ... و ليه محتاجها..و هوه ينفع نسترد المقدم ؟
بصراحة أنا دفعت المقدم 8600 من 3 أيام بالظبط
و رحت فرع التجمع الأول ( النخيل ) و رأيي أنه نادي كويس و في مدارس كرة قدم و أسكواش كويسة

اناعضو في نادي الزهور و بيبقه زحمة في الأجازات للفرعين....

بس حاسس ناس كتير بتشتكي من وادي دجلة... ربنا يستر

العقد اللى حضرتك بتمضيه فى النادى اللى مكتوب عليه أسم البنك اللى هتقسط معاه...أنا اكنت عاوز نسخه منه عشان أسأل عليه من الناحيه الشرعيه وللأسف معرفتش أحصل عليه...
بالنسبه لموضوع إسترداد المقدم لما سألت عليه فى البنك عرفت أن المفروض هتقدم طلب وبيتعرض على رئيس مجلس الإداره وإذا وافق ممكن تسترد فلوسك (لو كان لسه البنك مخلصش إجراءاته).

[a_samy]

هافهمك عن تجربه شخصيه مع ناس اعرفهم . علشان النادى عامل الموضوع بالقسط فالناس بتستسهل الموضوع و مش بيبص على المبلغ الاصلى اللى هو 75 الف و بفوايده بيعدى ال100 و بيبقى فى الاول فرحان و مع الوقت و الشهور بيلاقى نفسه بيدفع شهريا 1400 تقريبا و بعد الفرحه فى الاول ما يبقاش يروح و ان راح اغلب الناس بتقعد و تاكل مش بتلعب رياضه بييجى يحسبها بعد ما يقعد مع نفسه يصعب عليه الموضوع او بيكون اتزنق فى الفلوس و مش عارف يعمل ايه لانه ما فيش استرداد و ﻻ بيع عضويه و يبدأ يشتم فى النادى كنوع من تفريغ الشحنه ههههه . ها يعمل ايه يعنى ؟ النادى رياضى من الدرجه الاولى و امكانياته الرياضيه و تجهيزاتها مش فى ااى نادى . ده فرع التجمع فيه 18 ملعب تنس و 4 حمامات سباحه منهم واحد اوليمبى و اربع ملاعب سله و زيهم طايره و اكتر من 6 صالات اسكواش و ملعب كرة قدم كبير و باستمرار صيانه و مولدات كهربا و نضافه و شوف امكانيات شيراتون عامله ازاى

أنا لسه مشترك فى النادى من حوالى شهر ونص ومروحتش غير 3 أو أو أربع مرات,
النادى فعلا زحمه جدااااا بس مش ده بس سبب إعتراضى عليه لأنى عارف أن كل نوادى مصر زحمه جدا وخصوصا فى أجازة الصيف.أنا سبب إعتراضى أن البنك مش بيحاول ينتقى أعضاؤه وده لأنه عاوز يجمع فلوس كتير من خلال الأعضاء الجدد...وأنا شخصيا ميهمنيش أوى أن النادى له فروع كتير طالما مش بيحاول يختار أعضاؤه عشان يكون مجتمع راقى ومتحضر داخل فروعه..أنا لما فكرت أنى أشترك فى نادى فده عشان عاوز مكان أروحه أنا وأسرتى يكون فيه ناس محترمه ومتحضره...
السبب التانى إنى لما روحت النادى ودخلت حمام السباحه لقيت أنه عياره عن ترعه صغيره مليانه كمية عيال بالهبل وناس كبيره بالإضافه للون الميه المعكر اللى لو شفته هتفكر كتير قبل ما تنزل فيه أو تنزل ولادك فيه.
وأخيرا ده رأى الشخصى وأكيد مفيش إجماع على حاجه واحده وأكيد فيه ناس مبسوطه بالنادى.

[ramy87]

بص يا كبير . المشكله انه احنا المصريين ما بيعجبناش حاجه و كل واحد دفع قرش بيتعامل انه اشترى المكان
اه معاك المصاريف السنويه غاليه نسبيا بس بص على النضافه و الحمامات و الامن اللى فى كل مكان فى النادى و مستوى الملاعب من الاخر لو عايز تستمتع بحاجه و حاسب كل حاجه قبل ما تدخل فيها و عارف انت عايز ايه هاتستمتع و لو عايز تشوفها وحشه هاتشوفها وحشه
ال 10 % دى متحدده من وزارة الرياضه مش النادى

عندك حق مستوى النادي عالي ... شكرا على الإفادة ....
تحــــــــــــــيـــــــــــاتي

[ramy87]

العقد اللى حضرتك بتمضيه فى النادى اللى مكتوب عليه أسم البنك اللى هتقسط معاه...أنا اكنت عاوز نسخه منه عشان أسأل عليه من الناحيه الشرعيه وللأسف معرفتش أحصل عليه...
بالنسبه لموضوع إسترداد المقدم لما سألت عليه فى البنك عرفت أن المفروض هتقدم طلب وبيتعرض على رئيس مجلس الإداره وإذا وافق ممكن تسترد فلوسك (لو كان لسه البنك مخلصش إجراءاته).

تمام .... فهمت حضرتك..... شكرا

[wawamoha]

النادي فعلا رياضي و انشطته كتير ...
اكيد كاي مجتمع هاتلاقي فيه طبقات بس المهم يكون في احترام للوائح و انظمه المكان .....

في انديه كتير بدون ذكر اسماء -- جلسات البانجو و البرشام في كل حته ...
بس في وادي دجله مستحيل لان الامن شديد بصراحه .. و مافيش الكلام ده

ربنا يوفقك

[Anaslbda]

النادي من الناحية الرياضية رائع,
لكن كـ وجاهة اجتماعية صفر. عامةً هييجي اليوم اللي هيحجّموا فيه باب العضويات وتلاقي العضوية بقت بأسعار خرافية. وهتلاقي اللي يقول ياريتني كنت لحقت.

[hameedo]

طيب بمناسبة الرياضة
برضه فى ناس كثير بتشتكى ان المدارس الرياضية بقت متكدسة جدا والاطفال مش بياخدوا حقهم فى التعليم ده غير ان اسعار المدارس برضه عالية نسبيا. انا بستفاد منكم لانى الفترة دى مقبل على اشتراك فى نادى بس اقرب حاجة ليا هو فرع المعادى وهو صاحب اعلى شكاوى