استراليا ليست بلد الاحلام

[mustafavet]

السلام عليكم ورحمة الله وبركاته وكل سنه وحضراتكم طيبين
انا بكتب الموضوع دا لان في ناس كتير عندها رؤية مش واضحة شويتين عن الوضع بالدول الاجنبيه
خصوصا ان في ناس كتير ممكن تخاطر بفلوسها وبشغلها وباهلهم علشان السفر لارض الاحلام
احب اقولكم الوضع مختلف تماما والحياه غير ما انت متخيل
بالاضافة لصعوبة الحصول علي عمل علي افتراض انك قدرت تدخل البلد
في انواع فيزا كتير جداااااا زفرصك في دخول البلد موجودة مش صعبة لكن هتيجي تعمل ايه
هتشتغل؟ ولا هتعيش علي معونات الحكومة؟
الحكومه هنا بتدي معونه للاستراليين العاطلين مدة 3 اشهر فقط وبتسددهم لما يشتغل
فرصك في الحصول علي عمل صعبة جدا
ليه؟ لان مهما تكون كويس في الانجليزي مش هتكون زي اهل البلد ولا البلاد اللي اصلا دي لغتهم
لو فرحان بشهادتك مثلا... هنا ناس واخدين شهادات من احسن جامعات العالم ومش لاقيين شغل
(استراليا دوله مالتي ناشينوال يعني مش زي مصر فيها حنسيات من جميع انحاء العالم - الجامعه اللي انا فيها الطلبه من 94 دوله مختلفة)
فرحان بشبابك؟ هنا افارقة واسيويين مستعدين يعملوا اللي ميتعملش علشان ياخدوا 20 دولار في الساعه
المبلغ ممكن تكون انت شايفه كبير لكن....
انا واحد من الناس قاعد ف اوده متر في متر ب 700 دولار شهريا
الاكل غالي بطريقه بشعه ( الخيارة الواحده او الخسايه بشتريها ب 3 دولا) علبه التونه ب 6 دولار
كيلو اللحم ب 15 دولار قرن الفلفل او الليمونه ب دولار الباذنجان الواحده ب 3 دولار)
حبيت احسن دخلي؟ روحت دورت في اماكن ميكونش فيها حاجه تتنافي مع طبيعه الدين بتاعنا.
لو حبيت حضرتك تشتغل قهوجي... لازم تاخد كورس وشهاده في طريقه اعداد القهوة ومن غير الشهاده دي متشتغلش دا ان لاقيت اصلا.
الضرايب بتتحسب من اول يوم شغل ومفيش تهرب ضريبي - لا يجوز - ولو اتقفشت تبقي انت وصاحب العمل مع السلامه - وغالبا مش هتلاقي اللي بيمشي مخالف هنا ولو لقيت هتتقفشوا
الاقتصاد واقع - الدولار الاسترالي انخفض قيمته خلال سنه بما يعادل جنيه ونص مصري امام العمله الامريكيه

من الناحيه التانيه - التعليم ممتاز - الشوارع والبنيه التحتيه ممتازين بشكل لازم تشوفه علشان تتخيله
الناس اجتماعيا كويسين لكن طبعا من وراك الله اعلم - فسح وحفلات زي ما انت عاوز - مفيش تمييز ديني في وشك بمعني انهم كارهين انك تبقي مسلم لكن مش بيقولولك كدا (انا عرفت ازاي؟ من الجروبات اللي علي الفيس وتعليقات المواطنين نفسهم علي المواقع المختلفة والميديا طول اليوم دا غير اللي صارحني شخصيا)

عاوز تيجي استراليا؟ اهلا بيك بس لو سمحت يبقي ليك دخل مش اقل من 30 الف دولار سنويا علشان بس تعرف تعيش (دا الحد الادني)

عاوز تهاجر صح شوف الهنود والاسيويين بيروحوا فين لانهم مش بيروحوا الا علي الدول اللي بتبقي فاتحة الاستثمارات للاجانب
عاوز نصيحتي؟ روح تنزانيا او كينيا
هناك مدارس انترناشيونال فيها تعليم فوق الممتاز وناس بسيطه وسهله في التعامل وبيحبوا المسلمين بتوع شمال افريقيا وهتلاقي شغل بسهوله براتب اكتر من مجزي لانهم عندهم عقده الاجنبي زينا. البنيه التحتيه ف المدن الريسيه احسن من مصر بمرااااااااااااااحل فهتحس بنقله نوعيه في حياتك ومفيش اي مشاكل امنيه ممكن تواجهك ودا عن تجربتي ان شخصيا. فسح وطبيعه ورحلات لا حصر لها وباسعار اكتر من زهيده

انا مش هقدر اقدم اي نصايح بخصوص الفيزا لان شغلي هو اللي كان مخلصلي كل الاجراءات دي ولا اي شيء عن الهجرة لاني مش ناوي اهاجر لاستراليا الا لو لقيت شغل بعد ما اخلص يغطي مصاريفي ويعيشني حياه كريمة.

ممكن تلاقي حد عايش او عاش تجربة افضل او اسوء مني بس انا حبيت انقلكم الصورة علي الطبيعة زي ما انا عايشها
شكرا جزيلا واتمنالكم جميعا التوفيق ان شاء الله في حياتكم
د.مصطفي

[بحار]

الباذنجان الواحدة ب 3 دولار ؟؟؟ وقرن الفلفل ب 1 دولار .. على كده صينية المسقعه عندهم تتكلف بتاع 50 دولار يعنى 350 جنية مصرى .. عمااار يامصر حتى لو الاسعار غليت !!

[wawamoha]

شكرا عل نقل التجربه ...........

اللي بنعانيه في مصر مش غلو و لا رخص .. و مش اي حاجه انت قلتها ..

احنا مش حاسين اننا بني ادمين ........ بس

[مصطفى-حسن]

قول لهم ياباشا
اصل انا لسة قارى موضوع لناس عايزة تهاجر استراليا

تحيا مصر على الرغم من كل المساوى

[amr011111]

وكمان فيه حاجه مهما كان المصرى اللى هيسافر مميز هيلاقى ان فيه هندى بينافسه ومستعد ياخد ربع دخله فقط

[mustafavet]

شكرا علي الردود
الحقيقه انا مش بكرهكم في الهجرة بالعكس الهجرة قد تكون في بعض الاحيان واجبة
بس لازم تستعد وتختار صح من غير الانسياق وراء كلام معسول ممكن يقودك للاتجاه الخطا لسبب بسيط ان انت بتهاجر علشان تحسن من وضعك مش تنزل بمستواك

[Mahmoudyoussif]

موضوع تنزانيا و كينيا دا بجد و لاحضرتك بتهزر

و ممكن تفاصيل عنهم لو سمحت

[drcobra]

للاسف برة مصر الدول بتتعامل بالحترام والقانون والعدل
لكن هنا اى امين شرطة مرتشى يطلعك من اجدعها قضية ويعملك اللى انت عايزة

[Anaslbda]

ياعم العيشة غالية والناس بتتفشخ ضرايب, لكن يوم ما ظابط مرور يوقٌفك على جنب هناك بيقولك sir , هنا الظابط يدّيك بالقلم على قفاك عادي.

انت من الناس ال typical اللي راحت بلد مهجر واتبهدلت وجايّة تعمم تجربتها السيئة ع الكل. صباح الفل.

[4fun14]

استراليا دوله مستوي المعيشه فيها اعلي من مصر بكتير مهما اتكلمنا عن فرق اسعار..
معظم اللي بيتكلم ف هجرة مبيكونش بسبب الفلوس بدليل ان زصحابي ف الامارات مثلا بيستوا للهجره لاستراليا فما بالك بمصر
جايز استراليا مش بلد الاحلام لكن مص. يقينا بلد الكوابيس

[S O P H O S]

مش عارف لكن اكيد المميزات هناك تفي بالغرض
وطبعا شكرا علي التجربة

[M R. Z E C O]

عاوز نصيحتي؟ روح تنزانيا او كينيا

#حزلقوم

[ahmedsrs]

خلى الناس تعرف الدنيا بره عاملة اذاى

[kantofanto]

على فكرة انت بتكلم صح جداً و من المعروف ان مدينة سيدنى فى إستراليا من ضمن أغلى 10 مدن على مستوى العالم معيشة لدى الاجانب

[mustafavet]

ياعم العيشة غالية والناس بتتفشخ ضرايب, لكن يوم ما ظابط مرور يوقٌفك على جنب هناك بيقولك sir , هنا الظابط يدّيك بالقلم على قفاك عادي.

انت من الناس ال typical اللي راحت بلد مهجر واتبهدلت وجايّة تعمم تجربتها السيئة ع الكل. صباح الفل.

يا سيدي الفاضل انا مش متبهدل ولا حاجه بالعكس انا الحمد لله مرتاح جدا لان عندي وظيفة هنا بقدر احوش منها كمان الحمد لله
انا بتكلم علي الناس اللي ناويه تهاجر وبعدين تدور علي شغل