اماكن مضمونة لاخراج زكاة المال فى مصر ؟؟

[Ladawy]

الســلام عليكم و رحمة الله وبركاته

عاوز اتناقش و استفسر عن اماكن لاخراج زكاة المال عندنا هنا فى مصر

انا فضلت ادور على النت على اوجة صرف الزكاة ،
و ان يجوز اخراجها للصومال ( عن طريق لجنة الاغاثة بنقابة اطباء دمياط ، بس شكلها وجهت نشاطها لسوريا & النشاط في الموقع ضعيف - مش عارف شغالين فعلا ولا لأ - )

و يجوز اخراجها للاجئين السوريين ، ( و عندنا جيران سوريين فعلا لكن حالهم مش بطالة مقارنة بأهل البلد )

و مصر الخير و رسالة و... و... الخ ، من الاعلانات اللى بيعملوها على التليفزيون - اللى بتكلف شىء و شويات - بقيت متخوف شوية منهم

أظن اوجه صرف الزكاة المتاحة حاليا تتمثل فى :
الفقراء & المساكين - الغارمين - ابن السبيل

مبلغ الزكاة صغير جدا ، لكن للأسف لعدم معرفتى الشخصية بأشخاص اثق بإنهم يستحقوا الزكاة ، فـ مش عارف اخرجها فين

لو هيئات مشهود لها بالثقة دلونى عليها ، لو فيه طرق تانية دلونى عليها

[Mohamed.Muslim]

جزاك الله خيرا ,
انا برضه لما جيت أخرج الزكاة السنة دى احترت اخرجها فين و برضه رسالة و مصر الخير و الجمعيات الأخرى بشك فيها و المساجد للأسف , اتعاملت مع مسجدين قبل كده كنت بديهم جزء يوزعوه بمعرفتهم وجزء انا بوزعه على حالات تبعهم بنفسى عملت كده فى 3 مساجد و اكتشفت ان القائمين على تجميع اموال الزكاة بياخدوا جزء فى جيبهم لدرجة ان اتنين من القائمين على الزكاة اتخانقوا مع بعض فى المسجد على نظام توزيع الزكاة و صوتهم على و واحد فيهم عاير التانى انوا بياخد تبرعات و يوديها بيته ... الخلاصة اللى وصلتلها السنة دى انى ادى الزكاة لعمال النظافة اللى بيبدأوا شغلهم قبل الفجر , فكنت بنزل قبل الفجر بنص ساعة اتمشى بالعربية على البحر و أول ملاقى أحد عمال النظافة أقف و أنزل اديله اللى ربنا كاتبهوله و أمشى , وبيكون ليها احساس مختلف لان البلد بتبقى نايمة و محدش شايفك و انت بتديلة الزكاة أو الصدقة ...

[Ladawy]

ربنا يكرمك على الفكـــرة الجميلة دى
.
هاحاول احطها فى الحسبان ، العائق الوحيد معايا هو مواعيد الصحيان و النوم ،
لإن الشغل مع الحر و الصيام مبهدلنى ، نادرا لما بقدر اصحى اتسحر ، و بتسحر قبل ما انام :| .

[محمد عز]

روح اى سوق خضار

هتلاقى ست غلبانة قاعدة بتبيع جرجير وفجل

اديها الزكاة

[hilal]

يا سلام لو تقدر تروح احدى المستشفيات الحكومية
هتلاقى هناك ناس غلابة من المرضى سيفرحون كثيرا وسوف تجد نفسك في غاية السعادة

[Ladawy]

جميـــل جدا ،، جزاكم الله خيرا
.
زيدونا من الافكار يا جماعة الخير

@hilal
اعتقد صعب الواحد يقدر يحدد مين فقير/مسكين فعلا و يستحق الزكاة دى فى المستشفى
خصوصا ان المرض بيخلينا كلنا غلابة .. اللهم عافنا

[hilal]

معظم المرضى بالمستشفيات الحكومية من الغلابة
وعندما ترى البسمة على وجه المريض الفقير سوف تنسى الدنيا وما فيها
وقانا الله وإياكم شر المرض والفقر

[FOUR 2014]

جزاك الله كل خير
انا اي حاجة الصراحه بوديها رساله بس بفكر اشوف اي طريقه بالتبرع لسوريا او فلسطين للي يستحق فقط لان فين منهم قادر
او مساجد وفي اي حد بيربي ايتام

[Mohamed.Muslim]

موضوع المستشفى ده انا مش بفضله لأن واحد أعرفه راح مستشفى حكومى عشان يوزع فلوس على المرضى , اول ما راح مخلهوش يوزع براحته و و كلفه واحد من التمرجية انه يرافقه و خلاه يوزع على عنابر معينة و بعد كده اتلم عليه بعض من التمرجية و الممرضات عشان ياخده منه اى حاجة ...

[Mohamed.Muslim]

انعايز اوضح برضه اختيارى لعمال النظافة ...
1- الواحد منهم قبل انه يشتغل شغلانة زى دى و بمرتب تعبان و فى وقت ليل و الناس نايمة عشان ميشحتش مش زى اللى بنشوفهم فى الشارع بيشحتوا ( و الله أعلم بحالهم برضه ).
2- لما بدى واحد فيهم بيبقوا مش مصدقين لان الدنيا ليل و الشوارع فاضية مفيش ناس غير عربية كل فين و فين و مرة واحد منهم و انا بديله قالى : ده كتير عليا ... ربنا يعينهم و يرحمهم

[shiko85]

وعليكم السلام ورحمة الله وبركاته
مستشفى السرطان او مستشفى القلب
لان بصراحه الجمعيات زى رساله و الأورمان و ... و بنك الطعام مش مضمونه
من كتر الأعلانات بتاعتهم بحس انهم هم بس اللى شغالين فمصر و مفيش حد تانى و من كتر الأعلانات بحس ان البلد مفهاش فقير و لا محتاج من اللى بيعملوه و العجيب ان عرفت ان موضوع زى الجاموسه ده مش بيدوها للفقير ببلاش دا بيدفع تمنها بالتقسيط !!!!!
و المفروض قبل ما نفكر فالسوريين او الفلسطنيين او الصوماليين نشوف المصريين الأول و بعد كده نشوف باقى الدول
و ربنا يتقبل من الجميع ان شاء الله

[amrezzat82]

اعتقد لو نزلت فى اماكن شعبية حتلاقي ناس محتاجة كتيرة
لو روحت مستوصف مثلا او مستشفي حكومية
لو سافرت فى قرية مثلا انت عارف اهلها محتاجين
او لو فى جمعيات خيرية فى الحي بتاعك او فى اماكن شعبية حتلاقيهم مش لاقيين اي حاجة

المفروض تفكر فى فقراء داخل البلد الأول قبل ما تفكر فى فقراء خارجها

[aif]

كل عام وانتم بخير
حسب الفتاوى من علماء المسلمين ومن دار الافتاء
هناك اجماع ان الزكاة ... سواء زكاة المال او زكاة الفطر يجب ان تعطي للمسلمين من من يستحقون الزكاة من مصارف الزكاة الثمانية الواردة في سورة التوبة الآية 60
﴿ إِنَّمَا الصَّدَقَاتُ لِلْفُقَرَاءِ وَالْمَسَاكِينِ وَالْعَامِلِينَ عَلَيْهَا وَالْمُؤَلَّفَةِ قُلُوبُهُمْ وَفِي الرِّقَابِ وَالْغَارِمِينَ وَفِي سَبِيلِ اللَّهِ وَاِبْنِ السَّبِيلِ فَرِيضَةً مِنَ اللَّهِ وَاللَّهُ عَلِيمٌ حَكِيمٌ ﴾
اذا يجب ان تخرج الزكاة للمسلمين من هذه الفئات
طيب ازاي اعرف اللي ح اعطيله الزكاة ده مسلم او غير مسلم ؟؟
اعتقد لو سألته عن اسمه او اتكلمت معاه دقائق ح تعرف
طيب لو طلع مش مسلم !!!
مش معقول ح تمنع المساعدة عن واحد محتاج لأنه مش مسلم ... ده ضد الانسانية وضد سماحة الاسلام وضد الفطرة
طب ح تعمل ايه ؟؟؟
خلي مع فلوس الزكاة مبلغ تاني للصدقة ... خارج حساب الزكاة
ولو طلع مش مسلم اديله من الصدقة مش من الزكاة ... لأن الصدقة يجوز اخراجها لغير المسلمين ... اما الزكاة فيجب ان تكون للمسلمين ( دار الافتاء )
وده هو اللي بيخليني احاول قدر النمستطاع اوزع الزكاة بنفسي ولا اعتمد علي المستشفيات و 57357 والاورمان ورسالة وغيرهم
وربنا يتقبل

[Ladawy]

كان فيه فتاوى & فيديوهات بـ تبيح اخراج زكاة المال لأهل الصومال ، بحكم انهم فى مجاعات
مش عارف بقى الموضوع دا مجال خلاف أو مشكوك فيه ولا لأ
.
موضوع التبرع للمستشفيات دا مش عارف إذا كان يدرج من مخارج زكاة المال ولا لأ
برضه شوفت فيديو للعريفى بيقول إذا كانت الزكاة خارجة للمرضى نفسهم ( من المسلمين ) يعتبر من مصارف الزكاة ،، أما إذا كان استعمالها فى بناء المستشفيات ف ماتعتبرش من مخارج زكاة المال .

-----------------
الغلابة منهم اللى غلابة فعلا و منهم المتصنع ،، انا بشوف شحاتين فى منطقتنا بقالهم سنيييين فى الموضوع ده ، و معروفين لدى الغالبية .

الجمعيات الخيرية الأهلية اللى كانت شغالة أغلبها قفل علشان خايفين يتمسكوا ( لإن القائمين عليها كانوا اخوان و حاليا فى المعتقلات ! )

معرفتى المحيطية محدودة شوية ، و غير كدا بكون متخوف و قلق جدا ان اللى بعطيله مايكونش مستحق للزكاة و يكون متصنع

مثلا : عاملة نظافة بس شغالة فى هيئة حكومية ، و مطلقة ( إذا يصرف لها نفقة من زوجها ) ، و بتنضف المكاتب بين كل يوم و التانى بأجر بسيط بيعطيهولها الى موجود فى المكتب ... احدد ازاى إذا كانت تستحق زكاة ولا لأ :) ؟؟

[mustafavet]

حد يعرف كيفيه التبرع لحماس - فلسطين؟