وصلة الكهرباء

[ashouhdy]

انا اسف عالعنوان بس ملقيتش وصف تانى الصراحة لانة اكتر وصف معبر لقيتة .


الموضوع ببساطة واحنا عايشين ازهي عصور الكهرباء :)

وبما ان اصلا الكهربا مش مكفية الاحتياج وكل كام يوم كشك يولع و ابراج تتفجر و البلد مش عارفة تنتج ولا تدى ومش عارفة تدير ... ما علينا



من كام يوم جالى واحد الشغل و عرض نفسة انة صاحب الحل السحرى لانقطاع الكهربا بأشتراك شهري !


قال اية


لما النور يقطع عندك حديك وصلة كهربا من الجمب التانى اللى فية الكهربا مقابل فلوس !









يعنى هما يقطعوا عشان الاحمال حتفرقع ومش عارفين يتصرفوا فييجي البشوات بالفهلوة يحلبوا الناحية التانية



من كام يوم حاجة فرقعت ونار ولعت ... الحمل زاد عن الوصلة ففرقعت كشك بياخد منة !

و شقة تانية في المنطقة اللى بعدى قامت فيها حريقة بسبب الوصلة مستحملتش !!


غير ان اسلاك الكهربا بقت عايمة في الجو وواخدين منها !




يخرب بيت كدة ويخرب بيت الناس دى و يخرب بيت اللى بياخد منهم ويخرب بيت اللي يقولك ديمقراطية و حرية و عيش وكرامة باذنجانية !



يعنى بتعملوا كدة دلوقتى اومال بقي لو كان فية الحرية والديمقراطية الافلاطونية كنتم حتعملوا اية !!


مش لاقي وصف اوصف بية شعبنا و الناس دى اللى بعتبرهم هما الدولة العميقة !!

[reda elgohary]

أبدعت .

[lolnk]

هههههههههههه على فكرة انا كنت بفكر فى نفس الفكرة دى وكنت عايز اعملها

[S O P H O S]

حلول غريبة فعلا
مشكلة الناس انا محدش بيشوف افعاله

[Adnfalcon]

الراجل دا لازم أشرف يمسكه السلك عريان

[Imhotep]

ده ميراث الفهلوة المصرية العريقة و اسلوب تحايلها على كل شئ. . . تتوقع ايه من الفهلوية اللى شعارهم احنا اللى دهنا الهوا دوكو . . . و ناسيين ان المكان الوحيد اللى ممكن بنى ادم يقف يدهن الهوا دوكو هو مستشفى الامراض العقلية :-)

[بحار]

لو حد عمل الحكاية دى برة مصر .. هيعدموه !!
اهم حاجه محتاجينها دلوقت تطبيق القانون .. لو اتطبق كل العينات دى هاتلم نفسها ..
ولو بايعه القضيه ومش هاممها اللى هايتعامل معاه هايخاف يلبس قضيه ..
من امن العقوبه .. اساء التصرف .. عندنا بقه : اساء - استهبل - قل ادبه - سرق - افترى على الناس !!

[naser_56]

شعب بيحلب نفسه فعلا وللاسف ياريت فيه حاجه تتحلب

[rotanamasoud]

يعنى بتعملوا كدة دلوقتى اومال بقي لو كان فية الحرية والديمقراطية الافلاطونية كنتم حتعملوا اية !!

ايه علاقه الحريه بالهمجيه اللى حضرتك بتحكى عليها

[besso]

السنه اللى فاتت كان فيه عطل فى الكهرباء عندنا فى الشارع بس اللى كان فاصل البيت اللى جنبنا واحنا والبيتين اللى قدامنا بس قام واحد جارنا راح جاب كهربائى ينقلله الخط بتاعه من الكفريه للبيت اللى جنبه علشان ياخد كهرباء فاشتغلت والراجل مشى
تانى يوم الكهرباء قطعت عن الكل وجات قام صاحب البيت ده التلفيزيون فرقع واللمبات نورها زاد اوى وشويه اجهزه خربت عنده

وكله من التفيكر الغبى ده

[ramymechanics]

اومال حضرتك متخيل اما النور يقطع عندك 6 ولا 8 ساعات فاليوم هتعمل ايه ؟؟ اما تكون ساكن فى الدور التاسع ولا العاشر ومفيش اسانسير و لا مية بتوصلك هتقول معلش اصلهم بيخففوا الأحمال ؟؟

اما يكون ابنك فى ثانوية عامة وعاوز يذاكر و النور مبيجيش هتسيبه يسقط ؟؟

الكهرباء مش رفاهية ولا أوبشن الكهربا ضرورة و متزعلش منى ما دام الحكومة مش بتدى اى حد حقه كل واحد ياخده بأيده ... الدول اللى حضراتكم بتتغنوا بقانونها لو النور قطع بالشكل دة ممكن أرفع قضية عالحكومة وأنفخها تعويض يخلينى اجيب مولد يشغل مدينة ملاهى لكن احنا النور بيقطع وأجهزة بتضرب (والدى تكييفين وتليفزيون وريسيفر ضربوا مين هيحاسب عليهم ؟؟ الحكومة ؟؟ ) ... متحرمش الناس من أساسيات الحياة وعاوزهم يمشوا بالقانون

ملحوظة : انا مبعملش كدة والنور مقطعش عندى من ييجى 6 شهور لكن انا بحط نفسى مكان الناس دى

[ashouhdy]

ايه علاقه الحريه بالهمجيه اللى حضرتك بتحكى عليها

مع وجود الحرية ... تأتي المسئولية

و احنا شعب اغلبيتة الكاسحة العظمي غير مسئولة بسبب عقود و عقووود من الفساد و الجهل.

ف حرية بلا مسئولية هي كمثل بما اننا في منتدي سيارات ... من يملك سيارة بلا اي عوامل امان و يجري بها و يتخطي كل انواع السلامة و السرعة الي ان تنفجر بة و بمن حولة.

Sent from my SM-C115 using Forum Runner

[ashouhdy]

اومال حضرتك متخيل اما النور يقطع عندك 6 ولا 8 ساعات فاليوم هتعمل ايه ؟؟ اما تكون ساكن فى الدور التاسع ولا العاشر ومفيش اسانسير و لا مية بتوصلك هتقول معلش اصلهم بيخففوا الأحمال ؟؟

اما يكون ابنك فى ثانوية عامة وعاوز يذاكر و النور مبيجيش هتسيبه يسقط ؟؟

الكهرباء مش رفاهية ولا أوبشن الكهربا ضرورة و متزعلش منى ما دام الحكومة مش بتدى اى حد حقه كل واحد ياخده بأيده ... الدول اللى حضراتكم بتتغنوا بقانونها لو النور قطع بالشكل دة ممكن أرفع قضية عالحكومة وأنفخها تعويش يخلينى اجيب مولد يشغل مدينة ملاهى لكن احنا النور بيقطع وأجهزة بتضرب (والدى تكييفين وتليفزيون وريسيفر ضربوا مين هيحاسب عليهم ؟؟ الحكومة ؟؟ )

ملحوظة : انا مبعملش كدة والنور مقطعش عندى من ييجى 6 شهور لكن انا بحط نفسى مكان الناس دى

النور مقطعش عندك من ٦ شهوور


انت منييييين ياراجل !

Sent from my SM-C115 using Forum Runner

[ramymechanics]

النور مقطعش عندك من ٦ شهوور


انت منييييين ياراجل !

Sent from my sm-c115 using forum runner

مدينة الرحاب مقطعش فعلا من ييجى سنة الا حاجات بسيطة لا تتعدى نص ساعة بأى حال من الأحوال وبقاله فترة طويلة مقطعش نهائى

فالمقابل فى مشكلة مية نتيجة محطة مياه اتعملت بالفساد والنتيجة مع اول اختبار الخطوط كلها سربت .. بس بردو المية مبتقطعش عندى عشان انا على المحطة القديمة هههههههههههه

[طارق _عبد السلام]

مدينة الرحاب مقطعش فعلا من ييجى سنة الا حاجات بسيطة لا تتعدى نص ساعة بأى حال من الأحوال وبقاله فترة طويلة مقطعش نهائى

فالمقابل فى مشكلة مية نتيجة محطة مياه اتعملت بالفساد والنتيجة مع اول اختبار الخطوط كلها سربت .. بس بردو المية مبتقطعش عندى عشان انا على المحطة القديمة هههههههههههه

خليها في سرك
هيحصل هجوم على الرحاب واحمالكم هتزيد والكهرباء تقطعوبعدين هيجيلك بتاع التوصيله :)