فكرة صغيرة كدا عايز رايكم

[3abdo.it]

ازيكم يا شباب

انا شغال فى شركة مرتبها زفت زى كل شركات مصر الخاصة

المهم الكلام دا فى وسط البلد قدام دار القضاء العالى


اعرف واحد على اول الشارع الى انا شغال فية بيصور ورق مش عايز اقلكم الاقبال علية عامل ازاى

اتكلمت انا وهو

قلى ممكن تجيب مكنة تصوير تعملها 15 الف

تدهالى فى المحل واديك 30 جنية فى اليوم يعنى 900 جنية فى الشهر


يعنى بعد سنة و3 شهور هكون اتحصلت على تمنها الى اشترتها بية وبعد كدا يبقا لية دخل اضافى الى هو المبلغ الى قولتكلم علية 900 فى الشهر

اية رايكم فى الفكرة هل مجزية ولا ملهاش لازمة

[mahmoud869]

طب و الصيانة

[#MAAM#]

بلاش ياباشا تسلم رقبتك لحد

[Ladawy]

على حسب الراجل نفسه

و اعمل معاه عقد شراكة ، أو الافضل خد عليه ايصالات امانة ( استشير محامى صديقك هايفيدك فى النقطة دى )

و السؤال المهم فعلا ، الصيانات و التكاليف ؟؟

بس مكنة ايه دى اللى بـ 15 الف !!! انا اغلى مكنة قابلتنى كانت بـ 4500 ج ( استعمال ) .

و سؤال فضولى معلش :) / هو بيصور الورقة بكام ؟

[أحمد كمال]

و هو لو المكنة بتجيب الدخل ده هيشارك حد ليه؟ سيولة؟ اكيد معاه ......

[sha2e]

مش هتكمل معاه 3 او 4 شهور وهيكون جاب اجلها
لو الشغل فعلا عنده كويس خد اجازة من شغلك واقف انت على المكنة بتعتك واديله ارضيه كل يوم 30 جنية مثلا او حسب ما تتفق معاه

[mk3]

اشتغل بايدك ياباشا
او اضعف الايمان افتح محل وشغل حد .ومش لازم فى نفس المكان
والمكن الاستيراد ارخص من كده بكتييييييير
الشغل اللى انت فيه اكيد عشان تبقى شغال فى كذا...لكن كذا مش هيأكلك

[Bassem Youssef]

مكنه تصوير ب 15 الف جنيه ؟ ليه مكنه الماظ ؟

اغلي مكنه قابلتها في حياتي كانت ب 5000 جنيه و صاحبها كان بيقول مستورده من المانيا و الله اعلم

اكيد الحوار ده نصب

انت ممكن تشتري مكنه استيراد و تقف انت عليها و تدي لصاحب المحل جزء من الربح

[DODGE2013]

قوله انت لقيت ماكينة تصوير وحتشتريها وسعرها 15 الف جنيه وحتحطها عنده وخد وصولات امانه وانت حتجبلك واحده ب 4000 ولا 5000 وتجيب تمنها على طول بس ابقى ركز على ردة فعله لما تقوله انت حتجبها ب 15 الف يقولك ليه نوعها ايه قولو زانوسي ههههههههههههههههههههههه

بس الراجل ده برنس حيدفعك 15 الف جنيه ويديك 900 في الشهر وهو اساسا تلاقيه حيجيب واحده مستعمله لو جاب ويمكن عنده واحده اساسا وياخد ال 15 الف يشغلهم ويسددهملك على سنه ونص قسط بدون فايده ولا تعب

ومش بعيد يشتغلك كل شويه لو كنت دفعتله ويديك الفلوس ناقصه ويقولك صيانه وحبر ومش عارف ايه

اساسا طالما بيربح لا يمكن يدخل حد معاه لان ممكن يجيب سيوله على طول ويجيب اي حاجه يوزد ويخلي الربح لنفسه

لان دول بيصوروا البطاقه ب نص جنيه وساعات جنيه خصوصا انه جمب القضاء ومكاتب رسميه فا بيصور صور بطاقات كتير وجوزات ولو عنده كمبيوتر وبيطبع حجات عليه او بيملى بيانات استمارات الخ الخ

يعني هوا في اليوم بيطلعله 250 - 500 جنيه ( ده لو معندوش حاجه ساقعه او شيبس وكروت شحن الخ الخ )

وفي الاخر عايز يضحك عليك ب 900 جنيه ولو عايز تتأكد من كلامي شوف اي حد تعرف عاطل وهات ماكينة التصوير

وخليه يشتغل عليها وقول لصاحب المكان طالما حتديني 900 جنيه يعني اليوم ب 30 جنيه انا موافق حديك 30 في اليوم وحجيب الماكينه وواحد يساعدك ..................... وادي وشي لو وافق

والله اعلم عشان مظلمش حد بس الواحد من كتر التجارب الي سمعها ولا مرت عليه بقى يقفش اي حوار حتى لو جديد

[أبو_يوسف]

احنا معرفناش مواصفات المكنة ايه علشان نقول 15 ألف كتير!
صحيح مكن التصوير اسعاره بتبدأ من 4000ج ودا المستعمل بس مش معنى كدا ان دا سعر ثابت لمكن التصوير..فيه مكن تصوير اغلى من كدا كتير.. وأظن انه طلب منك اللي تشتريها مش هو..
بس شوف ليه عايز المكنة بالسعر دا؟ هو بيصور ملازم وكتب مثلا؟

لو ضامن الراجل وتعرف تضمن حقك توكل على الله

وبالنسبة لصيانة التشغيل وتغيير الدرام .. أظن هايبقى صاحب المحل ملتزم انه يقوم بيها علشان شغله يمشي.. او تكتب بند في العقد ان يبقى في يوم شهريا تجيب فني الصيانة بنفسك..

[M!SHO]

ماكنة التصوير المقصودة بتعدي ال ١٥ الف كمان

كنا جايبنها في الشركه مستعمله ب ٧٠٠٠ وباظت بعدها بمفيش :)

[DODGE2013]

بصيت على كام ماكينة تصوير لقيت فيه ب 28 الف جنيه ومن مميزاتها تدبيس ورق , تفرقة ملازم , طباعة اوراق الرسم الكبيره ومميزات تانيه كتير مش فاكرها بصراحه وطلع فيه ب 15 الف وطالع

[prof2013]

دا فيه مكنه تصوير مع طباعه مع سكانر ب 5 الاف جنيه بس تقولي 15 الف !!

[بحار]

دا فيه مكنه تصوير مع طباعه مع سكانر ب 5 الاف جنيه بس تقولي 15 الف !!

الماكينه دى اعتقد بتاعة شغل مكتبى خاص . اللى بتشتغل تجارى وحمالة للضغط بتبقى غاليه ..
كان عندى ماكينه طول ماانا باطبع ورقة ورقتين تلاته شغالة تمام
ولو جه يوم عملت عليها مية متين ورقه اطلب ليها فنى الصيانه

[حسام الغرباوي]

ملاحظة للناس اللي مستغربة انو بيقول مكنة ب15 الف جنية ..في مكن طباعة بيعدي ال30 الف جنية وبيكون في امكانيات جبارة

سواء في تخفيض تكلفة الطباعة او سرعة الطباعة او امكانية عمل مذكرات كاملة مع التدبيس او طباعة a1 و a2 ...الخ او طباعات تانية كتير



انا شايف لو انتا واثق فيه اوي وثقة جدا ....اتفق على ما يلي

1 - انك تاخد منه مبلغ شهري ثابت 1000 جنية مثلا .
2 - صيانة المكنة تبقي كاملة عليه .
3 - انك لما تحب تفض الشراكة اللي بينكوا يسلمك المكنة شغاله زي ما استلمها .


سؤال جانبي ....واحد عليه الضغط الرهيب دا ازاي محتاج 15 الف جنية ...دا لو دفع ال900 جنية اللي عايز يدفعهملك دول قسط مكنه جديدة هيجيبها هوا وتبقي ملك !!!